Jondron nikwe ükakröta

“Kukwe kwin kukwe nua ñaka ye kukwe nuabare”

KÄ 1923, George Naish nämene kä Saskatchewan (Canadá), jondron rükrä nämene ükaninkrö Saskatoon yekänti. Kri dokwä 18 metros (60 pies) ükaninte jatäri yebätä kise kitani kwe aune ngwantaribare kwe: “¿Drekäre sribebare?”. Rübare kri kena ye ngwane kri dokwä yebiti jondron sribebare kukwe mikakäre gare niebare ie. Kä nikani ta ye bitikäre, ja mräkä Naish mikani gare: “Jondron yebiti nun raba torres sribere kukwe mikakäre gare ye rükaba ti töite aune nunkwe ja töi mikaba kukwe Ngöbökwe mike gare radiobiti”. Kä 1924 ye ngwane kukwe Ngöbökwe mika jatani gare radiobiti kä Canadá yekänti; emisora ye kädekani CHUC.

Juta ye kri krubäte bäsi kä Europa ye kwrere, ye medenbätä kä Canadá ye nämene kwin krubäte kukwe driekäre radiobiti. Florence Johnson, sribibare emisora nämene Saskatoon yekänti käkwe niebare: “Nitre kwati abokän känti nun ñaka nämene nemen, yei kukwe metre namani gare emisora nunkwe ye köböire. Kä ye ngwane kukwe mika jatani gare krire radiobiti, aisete dre dre mika nämene kukwe nuara ye nitre tö nämene kukwe nuai”. Kä 1926 nitre Ja Tötikaka Bibliabätä (nitre testiko Jehovakwe) yekwe emisora nämene kä ketabokä jene jene te juta yekänti. *

¿Dre kukwe nua nämene emisora yete? Ja mräkätre konkrekasionte yekwe orquesta chi nämene aune nämene musika täke bätä nämene kantare ye mika nämene kukwe nuara emisora yete. Arato, kukwe kädrie nämene aune blita nämene Bibliabätä ye mika nämene kukwe nuara. Amy Jones, nämene blite siba yete käkwe niebare: “Ti nämä niken kukwe driere aune ti nämä ja kädeke ni gwi ie ye ngwane, ruäre nämä niere tie : ‘An, mä ye ai tä kukwe mike gare radiote ñaña’”.

Kä Halifax (Nueva Escocia), nitre Ja Tötikaka Bibliabätä käkwe kukwe ñan tuabare nuainbare: nitre emisora kukwe nuaka yei kä mikate nämene ne kwe nitre ye käkwe ñäkädre kukwe Bibliabätä ngwantarikäre. Ja mräkä käkwe niebare: “Kukwe ükaninte ye köböire kukwe kwin namani bare.  Nitre kwati nämene kukwe ngwentari aune bäsi kä ñaka nämene nemente emisora yete”.

Pablo näire erere, kukwe drie nämene ye nitre ruäre nämene kain ngäbiti kwin aune ruäre abokän ñaka nämene kain ngäbiti (Hech. 17:1-5). Nitre ruärebätä kukwe ye nämene mate kwin. Ñodre, Ja Tötika Bibliabätä yebätä blitabare radiote aune Hector Marshall ye kukwe nuabare angwane volúmenes kwä ti käräbare kwe ja kräke. Ye bitikäre, mikani gare kwe tärä ye namani tuin kwin ie kukwe driekäre kwela dominical yete. Akwa, niarakwe ñäkäbare volumen kena yebätä angwane ja töi mikani kwe iglesia ye tuenmetre. Niarakwe kukwe driebare kä jutobiti aune Jehová mikani täte metre kwe nememe niara krütani, kä 1998 yete. Kä Nueva Escocia kädrikri, John A. MacDonald nitre rükä jie ngwanka käkwe kukwe “El Reino, la esperanza del mundo” ye kukwe nuabare. Jetebe se kwrere, niebare kwe ja mräkä madai: “Jändrin, nitre nünanka Cabo Bretón käkwe kukwe kwin kukwe nua ñaka ye kukwe nuabare”.

Kukwe mika nämene kukwe nuara ye nitre ruäre ñaka kani ngäbiti kwin. Ñodre, ni ji ngwanka iglesia madate namani rubun krubäte. Kä Halifax yekänti, emisora nitre Ja Tötikaka Bibliabätä nämene kukwe mike gare ye nitre católico tö namani dikainte jökrä. Nitre ji ngwanka iglesiate kukwe ye niebare gobran ie, yebätä kä 1928 gobran kä yekänti mikani gare niaratre ñaka täräkwata ükaite nitre Ja Tötikaka Bibliabätä kräke, ne kwe ñaka kukwe mikadre gare kwetre radiobiti. Kukwe ñaka kwin nuaibare yebätä ja mräkätre täräkwata Who Owns the Air? (¿Nire abokän emisora bökänkä?) ye döräibare. Akwa, yebiti ta nitre ye ñaka ja töi kwitani.

Akwa, nitre braibe nämene Jehová mike täte kä Canadá yekänti ñaka ja di ngwani nekä. Isabel Wainwright käkwe niebare: “Kenabe rababa tuin nuen nitre ja mikaka nun rüere käkwe gananbare. Jehová törbadre akräke kukwe ye ñaka tuanemetre nemen bare kwe, ye nämä gare tie. Kukwe namani bare ye mikaba gare nunye nun rabadre kukwe mada bäri ütiäte ükete Gobran Ngöbökwe kukwei driekäre”. Nitre Ja Tötikaka Bibliabätä nünanka Canadá ñan kukwe driebare mada radiobiti, ñakare aune ja töi mikani kwetre kukwe driere ju ju te. Radio ye köböire “kukwe kwin kukwe nua ñaka ye kukwe nuabare”. (Jondron nikwe ükakröta, kukwe kädrieni ne namani bare Canadá.)

[Notas]

[Jondron üai bämikani 31]

[Jondron üai bämikani página 32]

(1) Emisora kä Edmonton (Alberta) (2) Ja mräkä nämene jondron ükete kukwe mikakäre gare Toronto (Ontario)

[Jondron üai bämikani página 32]

(3) Obisina CHUC nämene Saskatoon (Saskatchewan)

Jondron üai bämikani 32]

[Kukwe nieta página 32]

“Nitre kwati nämene kukwe ngwentari aune bäsi kä ñaka nämene nemente emisora yete”