Saskatoon, Saskatchewan, Canada ai tuari kohudia idia haboua gabuna ta ai tadikaka George Naish be timba haida ia itaia​—⁠edia lata be mita 18 bamona​—⁠bona ia henanadai: “Inai timba ibounai be dahaka totona umui gaukaralaia?” Haida ese idia hamaoroa unai timba be Tanobada Tuarina Ginigunana ai idia gaukaralaia signal tower haida idia haginia totona. Tadikaka Naish ia gwau: “Lau laloa ai ese unai timba ai gaukaralaidia diba reidio tower haida ai haginia totona. Unai be nega ginigunana, ai ese lalohadai ai abia tiokratik reidio steiseni ta ai haginia totona.” Lagani 1924 ai, reidio steiseni ladana CHUC ia gaukara matamaia. Canada ai, CHUC be Baibel ia herevalaia reidio steiseni ginigunana ta.

Canada be tano badana dainai, reidio idia gaukaralaia idia haroro totona be dala namona. Taihu Florence Johnson be Saskatoon reidio steiseni dekenai ia gaukara, bona ia gwau: “Ai moale badina reidio amo ai ese momo dekenai hereva momokani ai halasia diba, idia haida be gabu daudaudia ai idia noho bona ruma-ta-ruma-ta dekenai ai haroro henidia be auka. Unai neganai reidio be gau matamatana dainai, momo idia ura dikadika reidio idia kamonai.” Lagani 1926 ai, Bible Student taudia (hari idia gwau Iehova ena Witnes taudia) ese sibodia edia reidio steiseni be Canada ena siti foa ai idia gaukaralaia. a

Unai reidio program ta oi kehoa neganai, dahaka do oi kamonai? Unai gabu ena kongrigeisen taudia haida be miusiki idia gadaralaia bona haida be ane idia abia. Danu, tadikaka ese Baibel ena hereva idia harorolaia bona ma haida ida idia herevalaia hebou. Taihu Amy Jones be unai program lalonai ia vareai, bona ia gwau: “Haroro gaukara ai ruma taudia lau hedavari henia neganai, nega haida idia gwau, ‘Oiemu gadona be reidio dekenai lau kamonai.’”

Halifax, Nova Scotia, ai idia noho Bible Student taudia ese inai dala matamatana idia gaukaralaia: Tadikaka ese Baibel herevana ta idia harorolaia murinai, kamonai taudia idia rini bona henanadai idia henia. Tadikaka ta ia gwau: “Unai dala matamatana  ese namo ia havaraia, badina kamonai taudia momo idia rini bona henanadai momo idia henia.”

Aposetolo Paulo ena nega bamona, haida ese Bible Student taudia edia hereva idia kamonai, to ma haida be idia kamonai lasi. (Kara 17:1-5) Haida ese Bible Student taudia edia hereva idia abia dae, hegeregere Hector Marshall. Reidio ai ia kamonai, Bible Student taudia ese buka ta ladana Studies in the Scriptures idia herevalaia. Unai murinai, Hector ese unai buka ena volium ibounai siks ia oda. Ia gwau: “Lau laloa unai buka ese lau do idia durua Sunday sikuli lau hakaua totona.” Hector be volium 1 ia duahia haorea neganai, ena lalona ia hadaia ena dubu do ia rakatania. Ia be mai abidadama ida haroro gaukara ia karaia bona Iehova ia hesiai henia ela bona lagani 1998 ai ia mase. Nova Scotia ena ist kahana ai, tok ladana The Kingdom, the Hope of the World be reidio steisen ai idia halasia murinai, Colonel J.  A. MacDonald be tadikaka ta dekenai ia gwau: “Varani Cape Breton Island ai idia noho taudia be sivarai namo hereana ta idia kamonai, guna unai bamona sivarai ta idia kamonai lasi.”

To, dubu gunalaia taudia be idia badu. Halifax ai, Katolik taudia haida idia ura Bible Student taudia edia program idia halasia reidio steiseni do idia hadikaia. Gavamani be dubu gunalaia taudia ese idia doria dainai, lagani 1928 ai idia gwau Bible Student taudia edia reidio steiseni ena laiseni do ia hamatamataia lou lasi. Unai dainai, tadikaka taihu ese pepapepa ta ladana Who Owns the Air? idia hariharilaia, bona idia hahedinaraia gavamani ia karaia karana be maoro lasi. To, gavamani ia ura lasi Bible Student taudia edia reidio steiseni ena laiseni ia hamatamataia lou.

To, unai ese Canada ai idia noho Iehova ena hesiai taudia edia haroro gaukara urana ia hadikaia, a? Taihu Isabel Wainwright, ia gwau: “Matamanai, toana be emai inai taudia idia kwalimu. To lau diba, bema Iehova ia ura reidio amo emai haroro gaukara ai karaia noho, ia ese gavamani taudia edia kara do ia koua. Toana be Basileia ena sivarai namona ai harorolaia totona, dala namona ma ta do ai gaukaralaia be namo.” Unai dainai, Canada ai Bible Student taudia ese ruma-ta-ruma-ta haroro gaukarana idia habadaia. To momokani, unai negai reidio amo idia haroro dainai, momo ese ‘sivarai namo hereana’ ta idia kamonai.​—⁠Orea ena histori Canada ai.