“PARA ania dagita?” insaludsod ni George Naish, bayat nga itudtudona dagiti nagtutuon a troso a 18 metro (60 pie) ti kaatiddogda iti lugar a nakaidulinan dagiti armas idiay Saskatoon, Saskatchewan, Canada. Naibaga kenkuana a naaramat dagita a kayo kadagiti signal tower idi Gubat Sangalubongan I. “Napanunotko a mabalin nga aramatenmi dagita a troso a pangibangon kadagiti radio tower,” insalaysay ni Kabsat Naish idi agangay, “ket dayta ti nangrugian ti pannakausar ti estasion ti radio para iti nateokratikuan a trabaho.” Maysa a tawen laeng kalpasanna​—idi 1924​—nangrugin ti estasion a CHUC. Maysa dayta kadagiti kaunaan nga estasion ti radio iti Canada a nangibrodkas kadagiti narelihiosuan a topiko.

Ti Canada ket gistay kadakkel ti Europa, isu a maitutop unay nga usaren ti radio iti panangasaba. “Adu ti naitulong dagiti programatayo iti radio ta dimmanon ti kinapudno iti adu a tattao a saanmi a kabaelan a danonen,” kinuna ni Florence Johnson, a nagtrabaho iti estasion iti Saskatoon. “Ket gapu ta manmano pay laeng idi ti radio, magagaran dagiti tattao a dumngeg iti aniaman a maibrodkas.” Idi 1926, addaanen dagiti Estudiante ti Biblia (kas awag idi kadagiti Saksi ni Jehova) iti bukodda nga estasion ti radio iti uppat a siudad ti Canada. *

Ania ngata ti nangngegmo no dimngegka iti maysa kadagitoy nga estasion? Masansan nga agkanta dagiti kumakanta manipud iti lokal a kongregasion a danggayan dagiti tumutokar ken babassit nga orkestra. Siempre, nagpalawag met dagiti kakabsat ken nangidatagda kadagiti diskusion a naibatay iti Biblia. Kuna ni Amy Jones, a karaman kadagita a diskusion: “Bayat a mangaskasabaak, iyam-ammok ti bagik ket adda dagiti bumalay nga agkuna, ‘Ay wen, nangnangngegkan iti radio.’”

Dagiti Saksi ni Jehova iti Halifax, Nova Scotia, nagaramatda iti naiduma a programa iti radio​—maysa a talk show a mabalin dagiti dumdumngeg ti tumawag bayat ti programa ket agsaludsodda maipapan iti Biblia. “Nagadu ti nakiraman iti daytoy a kita ti  programa,” insurat ti maysa a kabsat. “Dimi magabenan a sungbatan ti nakaad-adu a tawag.”

Kas ken apostol Pablo, nagduduma ti reaksion dagiti tattao iti mensahe dagiti Estudiante ti Biblia. (Ara. 17:1-5) Magustuan dayta ti dadduma. Kas pagarigan, idi nangngeg ni Hector Marshall iti radio a dinakamat dagiti Estudiante ti Biblia ti maipapan iti Studies in the Scriptures, nagorder iti innem a tomo. “Panagkunak, matulongannak dagitoy a libro iti panangisurok iti Sunday school,” insuratna idi agangay. Ngem idi nabasanan ti Volume I, inkeddeng ni Hector a panawannan ti relihionna. Nagbalin a naregta nga ebanghelisador, ket nagserbi a simamatalek ken Jehova agingga iti ipapatayna idi 1998. Iti makindaya a Nova Scotia, maysa nga aldaw kalpasan ti pannakaibrodkas ti palawag a “The Kingdom, the Hope of the World” (“Ti Pagarian, ti Namnama ti Lubong”), kinuna ni Colonel J. A. MacDonald iti maysa a kabsat: “Idi kalman, nangngegan dagiti agnanaed iti Cape Breton Island ti kasayaatan pay laeng a mensahe a naipangngeg iti daytoy a paset ti lubong.”

Iti sabali a bangir, nakapungtot dagiti klero. Impangta dagiti dadduma a Katoliko a bombaenda ti estasion a mangibrodbrodkas kadagiti programa dagiti Estudiante ti Biblia. Gapu iti panangsugsog dagiti lider ti relihion, bigla nga inyanunsio ti gobierno idi 1928 a saanen a mapabaro dagiti lisensia dagiti estasion ti radio a kukua dagiti Estudiante ti Biblia. Gapu iti dayta, nagibunong dagiti kakabsat iti handbill a Who Owns the Air? kas panagprotestada iti kasta a di nainkalintegan a tignay. Ngem impetteng latta dagiti opisial ti gobierno ti desisionda.

Naupay kadi ti bassit a grupo dagiti adipen ni Jehova iti Canada? “Idi damo, kasla dakkel a balligi dayta ti kabusor,” inadmitir ni Isabel Wainwright. “Ngem ammok a no talaga a pagayatan dayta ni Jehova, bimmallaet koma. Isu a kaipapananna a mangusarkami iti sabali a pamay-an a mas epektibo tapno maipablaak ti naimbag a damag ti Pagarian.” Imbes nga agpannurayda lattan iti panangasaba babaen iti radio, impamaysa dagiti Estudiante ti Biblia iti Canada ti personal a panagsarungkar iti pagtaengan dagiti tattao. Ngem iti daydi a tiempo, dakkel ti naaramidan ti radio iti pannakaibrodkas ti ‘kasayaatan pay laeng a mensahe a nangngegan.’​—Manipud iti archive-tayo iti Canada.