Moa e Giwa Machon

‘Mano e Wach Maber Mapok Ne Owinji’

“MAGI duto gin mag ang’o?” Mano e penjo ma George Naish nopenjo kosiemo sirini madongo ma borgi ne romo fut 60 (mita 18), ma ne ochok kanyachiel e sto moro man Saskatoon e provins mar Saskatchewan e piny Kanada. Ne onyise ni sirnigo ne ogergo ohingni mag chiwo signal ne ji e kinde Lweny Mokwongo mar Piny. Owadwa Naish wacho kama: “Gima nobiro e pacha en ni ne wanyalo tiyo gi sirni madongogo e loso tal madongo mag kowo weche redio, to kanyo e kama paro mar bedo gi stesen mar redio malando weche Nyasaye nochakoree.” Bang’ higa achiel​​—⁠e higa 1924, stesendwa mar redio miluongo ni CHUC nochako lendo. Ne en achiel kuom stesende mag redio ma nokwongo lando weche mag Nyasaye e piny Kanada.

Piny Kanada, ma lachne chiegni romo gi Ulaya, ne en kama owinjore ahinya gi timo lendo mar redio. Florence Johnson, ma notiyo e stesen man Saskatoon, nowacho kama: “Wadwoko erokamano kuom bedo gi chenro mar lendo e redio marwa, adiera ne ochopo ne ji mang’eny ma ok ne wanyal romogo wang’ gi wang’ e tijwa mar lendo. To nikech e kindego redio pod ne nyien e wang’ ji, ji ne gombo ahinya winjo gimoro amora ma ne ilando.” Ka nochopo higa 1926, Jopuonjre mag Muma (mana kaka Joneno mag Jehova ne iluongo e kindego) ne nigi stesende ma maggi giwegi e taonde ang’wen mag Kanada. *

Iparo ni gin weche mage ma dine iwinjo kapo ni iyawo achiel kuom stesendego? Thothne jower mawuok e kanyakla ema ne wer, to seche moko wende mag okestra bende ne igoyo. Seche moko bende owete ne golo twege, kendo timo puonjruok mag Muma e redio. Owadwa miluongo ni Amy Jones, ma ne puonjo ji Muma kokalo kuom redio wacho niya, “Sama ne wang’ere gi weg udi ka an e tij lendo, seche moko wuon ot ne nyalo wacho ni, ‘Ooh, in ema nyocha awinjo duondi e redio.’”

Jopuonjre mag Muma man Halifax, Nova Scotia, nochako tiyo gi chenro moro manyien ahinya, chenro mamiyo jowinjo goyo simu ka gipenjo penjo mag Muma. Owadwa moro nondiko kama: “Ji ne mor  sidang’, kendo ne girwako programno ahinya. Simbe ma ji ne goyo e stesendno ne ng’eny matamre gi nono.”

Mana kaka jaote Paulo, Jopuonjre mag Mumago ne yudo penjo koda dwoko mopogore opogore. (Tich 17:​1-5) Moko kuom jowinjo, nohero puonj ma ne giyudo. Kuom ranyisi, kane Hector Marshall owinjo e redio ka Jopuonjre mag Muma wuoyo e wi buk miluongo ni Studies in the Scriptures, nokwayo mondo oorne bugego ka gin auchiel. Bang’e nondiko niya: “Noyudo aparo ni bugego ne dhi konya mana e puonjo nyithindo e Sunday school.” Kata kamano kane otieko somo buk mokwongo, nong’ado mar weyo din mare. Nobedo jalendo ma jakinda ahinya kotiyo ne Jehova gi chunye duto nyaka e thone e higa 1998. E provins mar Nova Scotia, bang’ winjo twak e redio ma wiye wacho ni, “Pinyruoth Nyasaye e Geno Kende Madier ne Dhano,” e odiechieng’ maluwo, Jatend Jolweny moro miluongoni J. A. MacDonald, nowacho ne owadwa moro niya: “Ji modak e chula mar Breton nyoro owinjo wach moro maber e redio, mapok ne owinji e pinywa ka.”

To komachielo, jotend din ne ochwanyore ahinya. Moko kuom Jo-Katholik man Halifax nogolo siem ni ne gibiro wang’o stesendego ma Jopuonjre mag Mumago ne tiyogo. Kijiwogi gi jotend din, e higa mar 1928, apoya nono sirkal nolando ni ok ne gidhi chiwo kendo laisens ne stesende mag Jopuonjre mag Muma. Nikech mano, owete gi nyimine nopogo ji kalatese ma nondikie weche makwedo timbe machalo kaka mago ma wiye wacho ni​​—⁠Who Owns the Air? Jotend sirkal pod ne otamore chiwo laisens ne Jopuonjre mag Muma mondo oti gi redio.

Be mano nonyoso chuny jotich Jehova ma ne nie piny Kanada? Isabel Wainwright wacho kama: “Mokwongo, ne nenore ka gima jowasigugo oloyowa. Kata kamano nang’eyo ni Jehova ne nyalo geng’o mano mondo kik timre kapo ni yo ma ne watiyogono ok nowinjore gi dwarone. Omiyo mano ne nyiso ni ne onego wamany yo machielo mar lando ne ji wach maber mar Pinyruoth, kendo neno ni en yo matiyo maber moloyo.” Kar geno ahinya ni redio ema ne nyalo lando ne ji wach maber, Jopuonjre mag Muma e piny Kanada nochako keto pachgi e lendo mar ot ka ot. Kata kamano, e kindego redio nokonyo kama duong’ ahinya e lando ‘wach maber mapok ne owinji.’​​—⁠Moa e giwa machon e piny Kanada.

[Weche moler piny]

[Blab e ite mar 32]

“Simbe ma ji ne goyo e stesendno ne ng’eny matamre gi nono”

[Piche e ite mar 32]

(1) Stesen ma ne nitie Edmonton, Alberta (2) Owadwa moro mulo waya mag redio e studio man Toronto, Ontario (3) Studio mar CHUC man Saskatoon, Saskatchewan