“KO E heigoa ka taute aki e tau mena na?” he hūhū e George Naish, he tuhi ke he tau patu akau ne 18 e mita he loloa he tokaaga koloa tau i Saskatoon, Saskatchewan i Kanatā. Ne tala age ki a ia, ko e tau akau ia ne fakaaoga mo tau pou fakamailoga tokoluga he Felakutaki I he Lalolagi. “Ne tupu hake e manatu haaku kua maeke a mautolu ke fakaaoga e tau akau ia ke talaga aki e tau pou letiō,” he talahau he Matakainaga Naish he mogo fakamui, “ti ko e malagā mai a ia he manatu ke fakatū e fale letiō fakateokarasi.” Ke he taha ni e tau he mole—he 1924—ne fakapuloa ai e leo taogo ha CHUC. Ko e taha a ia he tau fale letiō fakamua ke fakapuloa e tau vala tala fakalotu i Kanatā.

Ha kua teitei tatai ni e lahi mo Europa, kua eke a Kanatā mo matakavi mitaki lahi ke fakamatala ki luga he letiō. “Fakaaue ke he tau fakapuloaaga letiō ha mautolu, ati hoko ai e kupu mooli ke he tokologa he tau tagata ne kua nakai maeke ia mautolu ke hokotia fakatagata ki ai,” he talahau e Florence Johnson, ne gahua he fale letiō i Saskatoon. “Ha ko e letiō ko e mena foou he magahala ia, ne fiafia lahi e tau tagata ke fanogonogo ke he ha mena ni ne kua fakapuloa mai.” He 1926, ko e Tau Tagata Fakaako Tohi Tapu (higoa he Tau Fakamoli a Iehova he magahala ia) ne fakaaoga e tau fale letiō ni ha lautolu mai he fā e taone i Kanatā. a

Ko e heigoa la ka logona kaeke ke fanogonogo a koe ke he taha he tau fakapuloaaga letiō nei? Ne fa mahani a lautolu he fakapotopotoaga he matakavi ke lologo mo e tau leo kofe ti pihia foki mo e matakau tote ne fakatagitagi kofe. Ne taute foki he tau matakainaga e tau lauga mo e tau fakatutalaaga faka-Tohi Tapu. Ko Amy Jones, ne fakalataha ke he tau fakatutalaaga ne manatu, “Ka fina atu au he fonua, ti fakafeleveia atu ke he tagata he kaina, ne fa pehē mai he falu magaaho, ‘Oi, ē, na logona e au a koe he letiō.’”

Ko e Tau Tagata Fakaako Tohi Tapu i Halifax, Nova Scotia, ne taute e fakaholoaga foou he magahala ia he letiō—ko e fakatutalaaga ne maeke e tau tagata fanogonogo ke vilo atu mo e talahau e tau hūhū faka-Tohi Tapu. “Ko e tali ke he fakaholoaga nei kua ofoofogia,” he tohi he taha matakainaga taane. “Loga  lahi e tau hea telefoni ti teitei ai fahia e fale letiō ke tali e tau hea oti.”

Ke tuga ni e aposetolo ko Paulo, ne fiofio e tali ne moua he Tau Tagata Fakaako Tohi Tapu ke he fekau. (Gahua 17:1-5) Ne fiafia e falu tagata fanogonogo ke he fekau. Ma e fakatai, magaaho ne logona e Hector Marshall e Tau Tagata Fakaako Tohi Tapu ne fakailoa he letiō hagaao ke he tau tohi Studies in the Scriptures, ne ota e ia ono e volume. “Ne manatu au to lagomatai he tau tohi ia au ke fakaako e aoga Aho Tapu,” he tohi e ia he magaaho fakamui. Ka ko e mogo ne oti e totou he Volume I, ne fifili a Hector ke fano kehe mai he lotu haana. Ne eke a ia mo tagata fakamatala makutu, ti ko e fekafekau tua fakamooli a ia ki a Iehova ato mate he 1998. He faahi uta ha Nova Scotia, taha e aho he mole e fakapuloa he lauga “Ko e Kautu, ko e Amaamanakiaga he Lalolagi,” ne tala age e Takitaki Kautau ko J. A. MacDonald ke he matakainaga taane i ai: “Ne logona he tau tagata ha Cape Breton Island ne afi e fekau kua mua atu e mitaki ke fanogonogo ki ai tali mai, ke he faahi nei he lalolagi.”

Ka ko e taha faahi, ne ita e takitaki lotu. Ko e falu Katolika i Halifax ne fakaneinei ke moumou e fale letiō ne taute ai e tau fakaholoaga he Tau Tagata Fakaako Tohi Tapu. He fakaohooho ai he tau takitaki lotu, ne hoko ke he 1928 ti fakailoa he fakatufono to nakai liu fakafoou e tau laisini fakapuloa leo ma e tau fale letiō he Tau Tagata Fakaako Tohi Tapu. He tali atu ki ai, ne tufatufa he tau matakainaga taane mo e fifine e Who Owns the Air?—ko e fekau ne tohia ke totoko e puhala nakai fakafili tonu nei. Pete ia, ne nakai mafai e tau takitaki he fakatufono ke liu fakafoou e tau laisini fakapuloa leo he Tau Tagata Fakaako Tohi Tapu.

Fakalolelole kia he mena nei e agaaga he matakau tote he tau fekafekau ha Iehova i Kanatā? “Fakamua, ne tuga kua kautū lahi e fī,” he talahau e Isabel Wainwright. “Ka e iloa e au na maeke ia Iehova ke taofi ai ane mai kua felauaki mo e finagalo haana. Ti ko e kakano, kua liga lata ia mautolu ke hiki ke he taha puhala ne mua atu e mitaki ke fakapuloa e tala mitaki he Kautu.” He nakai falanaki lahi ke he letiō ke fakamatala atu, ne kamata e Tau Tagata Fakaako i Kanatā ke hagaaki ke he ahiahi atu fakatagata ke he tau kaina. Ka e ke he vahā ni haana, pete ia, kua lahi mahaki e gahua he letiō he fakapuloa e ‘fekau ne mua atu e mitaki kua logona tali mai.’—Mai he tau tokaaga tuai i Kanatā.