“EAA tera au apinga?” i ui mai ei a George Naish, te tou anga aia ki tetai au rakau e 18 mita te roaroa i te ngai vairanga apinga i Saskatoon, Saskatchewan, i Kanata. Kua akakiteia kiaia e kua taangaangaia ana te rakau no te akatu anga i te au are teitei ei akamatakiteanga i te tuatau o te Tamaki I o te Ao. “Kua kite mai au e ka rauka ia matou i te taangaanga i taua au rakau ra ei akatu anga i te au are ratio,” i akakite mai ei te Taeake Naish i muri mai, “e kua rauka mai tetai parani no te maani anga i tetai ngai akatangianga ratio teokaratiki.” E tai mataiti i muri mai​—i te mataiti 1924—​kua akamata te CHUC i te rave i te akakitekiteanga. Ko teia tetai o te ngai akatangianga ratio mua no te akakitekiteanga i te au tumu manako akonoanga i Kanata.

No te mea e enua mamaata a Kanata, e ngai meitaki te reira no te akakitekiteanga i runga i te ratio. “Na roto i ta matou akakitekiteanga i runga i te ratio, kua taeriaia te au tangata e manganui e te tuatua mou tei kare i rauka ana ia matou i te aravei atu,” i tuatua ai a Florence Johnson, tei angaanga ana i te ngai akatangianga ratio i Saskatoon. “I te mea e te ou ra rai te ratio i te taangaangaia, te inangaro ra te au tangata i te akarongo i tetai ua atu mea e akakitekiteia ra.” I te mataiti 1926, te taangaanga ra te Aronga Apii Pipiria (tei kapikiia te Au Kite o Iehova i tera tuatau) i ta ratou uaorai ngai akatangianga ratio i roto i te au oire e a i Kanata. *

Eaa taau ka kite mai me akarongo atu koe i tetai o teia au akakitekiteanga i runga i te ratio? Ka imene putuputu te aronga imene o te putuputuanga, kapiti mai te aronga akatangi imene e tetai pupu akatangi imene meangiti. E oronga katoa ana te au taeake i te au akoanga e te au uriurianga Pipiria. Kua maara ia Amy Jones, tei piri ana ki roto i te au uriurianga e, “Iaku i roto i te ngai tutuanga, me akakite au e koai au ki te tangata ngutuare, ka tuatua mai aia i tetai taime e, ‘Ae, kua akarongo ana au ia koe i runga i te ratio.’”

E taangaanga ana te Aronga Apii Pipiria i Halifax, Nova Scotia i tetai ravenga ou i runga i te ratio​—ka ringi mai te aronga e akarongo maira e ka ui mai i te au uianga Pipiria. “E meitaki tikai te reira porokaramu,” i tata mai ei tetai taeake. “E maata tikai te aronga i ringi mai e kare e rauka ana ia matou i te pau i ta ratou au uianga.”

 Mei te apotetoro ko Paulo rai, kua ariu mai tetai pae ki te karere a te Aronga Apii Pipiria, kare ra tetai pae i ariu mai ana. (Anga. 17:1-5) Kua reka tetai pae i te akarongo mai ki te karere. Ei akaraanga, te akarongo anga a Hector Marshall i te Aronga Apii Pipiria e taiku ra i te Studies in the Scriptures i runga i te ratio, kua ota mai aia e ono voriumu. “Kua manako au e ka tauturu mai te au puka iaku kia apii i te tamariki i te Tapati,” i tata ei aia i muri mai. Inara te vaitata anga aia i te oti i te tatau i te Voriumu I, kua akaruke a Hector i tana akonoanga. Kua riro mai aia ei tangata tutu evangeria maroiroi e kua tavini tiratiratu aia ia Iehova e tae ua atu ki tona mateanga i te mataiti 1998. I te tua itinga o Nova Scotia, i te ra i muri ake te akakitekiteia anga te akoanga “Te Patireia, te Manakonakoanga no Teianei Ao,” kua akakite tetai Rangatira Vaeau ko J. A. MacDonald ki tetai taeake e: “Kua akarongo ana te au tangata i Cape Breton Island i tetai karere i nanai e ko te karere meitaki rava atu te reira tei akarongoia ana i teia tuanga o teianei ao.”

I tetai tua, kua riri te au orometua. Kua tamatakutaku tetai au tangata Katorika i Halifax e ka pomu ratou i te ngai akatangianga ratio te akakitekite ra i te au porokaramu a te Aronga Apii Pipiria. No tei akamaroiroiia e te au arataki akonoanga, kua akakite poitirere te kavamani i te mataiti 1928 e kare ratou e akaou i te pepa tikaanga no te akakitekiteanga a te Aronga Apii Pipiria i runga i te ratio. Noatu rai, kua tua aere te au taeake e te au tuaine i tetai karere tei tataia e Who Owns the Air? i te patoi i taua tu tau kore ra. Inara, kare rai te aronga mana o te kavamani i akaou ana i te pepa tikaanga no te akakitekiteanga a te Aronga Apii Pipiria.

Kua akaparuparu ainei teia i te pupu meangiti o te au tavini o Iehova i Kanata? “I te akamataanga, mei te mea rai e kua autu te au enemi,” i akakite mai ei a Isabel Wainwright. “Inara kua kite au e ka rauka ia Iehova i te arai atu i te reira me te tau ra ki tona akakoroanga. No reira, te aiteanga e kia taui tatou ki tetai mataara meitaki atu no te akakitekiteanga i te tuatua meitaki o te Patireia.” Kare ratou i irinaki ua ki runga i te ratio no te akakitekiteanga, mari ra kua akamata te Aronga Apii Pipiria i Kanata i te rave i te au atoro anga i te au tangata i te kainga. Inara, i te tuatau e taangaangaia ana te ratio, e maata te angaanga tei raveia i te akakitekiteanga i te ‘karere meitaki rava atu tei akarongoia ana.’​—Au Apinga Takere i Kanata.