NGESIKHATSI George Naish abona incumbi yetingodvo letingemamitha langu-18 budze tibekwe endzaweni lapho bekubekwa khona tikhali eSaskatoon, Saskatchewan eCanada, wabuta watsi: “Tani tonkhe letingodvo?” Watjelwa kutsi lamapulango abesetjentiselwa kwakha imibhoshongo yekutfumela imilayeto ngesikhatsi seMphi Yelive Yekucala. Ngekuhamba kwesikhatsi, uMzalwane Naish watsi: “Ngafikelwa ngumcabango wekutsi sisebentise lamapulango kute sakhe imibhoshongo yekusakata, futsi sacala lapho kucabanga kutsi sibe nesiteshi sekusakata tindzaba teMbuso.” Ngemuva kwemnyaka, nga-1924, siteshi lebesibitwa ngekutsi yi-CHUC sacala kusakata. Bekusiteshi sekucala semsakato wemoya lebesikhuluma ngetindzaba letimayelana nenkholo eCanada.

Njengobe iCanada icishe ibe ngangeYurophu ngebukhulu, umsakato wemoya waba yindlela lencono yekushumayela. Florence Johnson, lobekasebenta kulesiteshi eSaskatoon watsi: “Lesiteshi semsakato sasisita kakhulu ngobe liciniso belifika kubantfu labanyenti lebesingakhoni kufika kubo matfupha. Njengobe umsakato wawungakatayeleki kakhulu ngaleso sikhatsi, bantfu bebakujabulela kulalela nobe ngabe yini lebeyisakatwa.” Nga-1926, Bafundzi beliBhayibheli (njengobe boFakazi BaJehova bebabitwa njalo) bese banesiteshi sabo semsakato emadolobheni lamane aseCanada. *

Yini lobewungayiva nawuvula letiteshi tekusakata? Bazalwane basemabandleni ladvutane bebahlabela tingoma letehlukene, lebetihambisana nemculo wetinsimbi. Bebaphindze betfule tinkhulumo futsi babe netincociswano letisekelwe eBhayibhelini. Amy Jones lobekaba kuletincociswano ukhumbula loku: “Nangenta umsebenti wekushumayela, bengitetfula kumnikati welikhaya, ngalokuvamile ubese utsi: ‘Hawu, nguwe lebengikuva emsakatweni.’”

Bafundzi beliBhayibheli eHalifax, eNova Scotia, basungula lolunye luhlelo lwemsakato—tincociswano lebetivumela kutsi bantfu labalalele umsakato bashaye tincingo babute imibuto lesekelwe eBhayibhelini. Lomunye umzalwane wabhala kutsi: “Bantfu bebalutsandza kakhulu loluhlelo. Bantfu lebebasishayela bebabanyenti kakhulu.”

 Njengasesikhatsini saPawula, labanye bantfu bebawulalela umlayeto weBafundzi beliBhayibheli, labanye bangawulaleli. (Imis. 17:1-5) Labanye bawutsandza kakhulu lomlayeto. Nasi sibonelo: Ngesikhatsi Hector Marshall eva Bafundzi beliBhayibheli bakhuluma ngencwadzi letsi “Studies in the Scriptures” emsakatweni, wa-oda imiculu lesitfupha. Ngekuhamba kwesikhatsi, naku lakubhala: “Bengicabanga kutsi letincwadzi titawungisita nangifundzisa bantfwana esontfweni.” Ngesikhatsi acedza kufundza uMculu wekucala, Hector wakhetsa kulishiya lisontfo lakhe. Waba ngumshumayeli lokhutsele waze washona nga-1998, akhonta Jehova ngekwetsembeka. Emphumalanga yeNova Scotia, ngelilanga lelalandzela kusakatwa kwenkhulumo letsi “UMbuso, Litsemba Lebantfu,” umphatsi wemasotja J. A. MacDonald watjela lomunye umzalwane kutsi: “Itolo bantfu basesichingini saseCape Breton beve umlayeto lomnandzi kakhulu lowake walalelwa bantfu balapha.”

Ngakulolunye luhlangotsi, bafundisi batfukutsela. Lamanye emaKatolika aseHalifax etsembisa kusibhomisa lesiteshi semsakato lebesisetjentiselwa tinhlelo teBafundzi beliBhayibheli. Ngekugcugcutelwa bafundisi benkholo, nga-1928 hulumende wakulelive wamemetela kutsi angeke uyivusetele imvume yekusakata yeBafundzi beliBhayibheli. Ngemuva kwaloko, bazalwane nabodzadze basakata umlayeto lobhaliwe lowawutsi “Who Owns the Air?” kute balwele emalungelo abo. Nobe kunjalo, tiphatsimandla tahulumende atizange tivume kuvusetela imvume yabo yekusakata.

Loku kwalicedza emandla yini licembu lelincane letinceku taJehova taseCanada? Isabel Wainwright watsi: “Ekucaleni, kwabonakala shengatsi titsa tetfu tiyaphumelela. Kodvwa ngiyati kutsi Jehova abengeke akuvumele loko kutsi kwenteke kube bekungahambisani nenjongo yakhe. Ngako-ke, mhlawumbe loko bekusho kutsi kufanele sishintjele kulolunye luhlobo loluncono lwekumemetela tindzaba letimnandzi teMbuso.” Esikhundleni sekwetsembela kakhulu emsakatweni wemoya kute bashumayele, Bafundzi beliBhayibheli eCanada bacala kunaka kakhulu kuvakashela bantfu emakhaya abo. Nobe kunjalo, ngaleso sikhatsi, umsakato wemoya waba nendzima lebalulekile ekumemeteleni ‘umlayeto lomnandzi kakhulu lowake wevakala.’—Lokuvela emtatjeni wetfu eCanada.