“WANEM wok bilong ol dispela samting?” George Naish i mekim dispela askim taim em i lukim ol hip timba em longpela bilong ol inap olsem 18 mita, em ol i stap long hap bilong bungim ol samting bilong pait, long taun Saskatoon, Saskatchewan, long Kanada. Ol i tokim em olsem ol i bin yusim ol dispela timba long wokim ol taua long taim bilong Wol Woa 1. Brata Naish i tok: “Mi kisim tingting olsem mipela i ken yusim ol dispela timba long wokim ol taua bilong kisim signel bilong redio, olsem na mipela i tingting long wokim wanpela redio stesin bilong yusim long autim tok.” Wanpela yia bihain long dispela, long 1924, CHUC redio stesin i kirap long mekim wok. Em i wanpela bilong ol redio stesin bilong Kanada em ol i fes lain long stori long ol samting bilong lotu.

Kanada em i bikpela ples wankain olsem Yurop, olsem na redio em gutpela rot bilong autim tok long ol man. Florence Johnson i bin wok long redio stesin long Saskatoon na em i tok: “Redio i helpim mipela long bringim tok i tru i go long planti manmeri em mipela yet i no inap long bungim. Long dispela taim, redio i kam nupela, olsem na ol manmeri i amamas long harim olgeta kain samting i kamap long redio.” Long 1926, ol Sumatin Bilong Baibel (nem bilong ol Witnes Bilong Jehova long bipo) i mekim wok long redio stesin bilong ol yet long 4-pela taun long Kanada. a

Sapos yu bin stap long dispela taim bipo na putim yau long wanpela bilong ol dispela redio stesin, bai yu harim wanem kain tok? Ol bratasista i save mekim ol singsing wantaim ol lain bilong pilaim musik. Na tu, ol brata i save mekim ol tok bilong Baibel. Amy Jones, em wanpela meri husat i bin toktok tu long redio, em i tok: “Taim mi mekim wok autim tok, mi save kolim nem bilong mi na sampela taim man bilong haus i save tok, ‘O yes, mi bin harim yu long redio.’”

Ol Sumatin Bilong Baibel long taun Halifax, long provins Nova Scotia, i yusim wanpela redio program we ol man i ken ring i go na kamapim ol askim ol i gat long tok bilong Baibel. Wanpela brata i tok: “Planti man i amamas long harim dispela program. Planti  man tru i save ring i kam, olsem na i hatwok long bekim olgeta askim.”

Taim ol Sumatin Bilong Baibel i autim tok, ol man i mekim ol wankain pasin olsem ol i bin mekim long taim aposel Pol i bin autim tok. (Apo. 17:1-5) Sampela man i laikim tok ol i harim. Olsem: Taim Hector Marshall i putim yau long redio na harim ol Sumatin Bilong Baibel i kolim nem bilong buk Studies in the Scriptures, em i putim oda long kisim 6-pela volium bilong dispela buk. Bihain em i tok: “Mi ting ol dispela buk bai helpim mi long skulim ol pikinini long Sande skul.” Tasol bihain long Hector i ritim pinis Volium 1 bilong dispela buk, em i wokim disisen long lusim lotu bilong em. Em i mekim wok bilong Jehova na givim bel tru long autim tok i go inap long taim em i dai long 1998. Long hap is bilong Nova Scotia, dispela tok “The Kingdom, the Hope of the World” i kamap long redio, na wanpela de bihain long en, Kolonel J.  A. MacDonald i tokim wanpela brata olsem: “Ol manmeri bilong Cape Breton Island i harim wanpela tok asde na dispela em i nambawan gutpela tok ol i bin harim long dispela ples.”

Tasol ol bikman bilong lotu i belhat. Sampela lain Katolik long taun Halifax i tok ol bai bomim redio stesin em ol Sumatin Bilong Baibel i yusim bilong kamapim ol program bilong ol. Ol lida bilong lotu i givim tingting long gavman, na long 1928 gavman i tokaut olsem ol bai i no inap givim nupela laisens long ol redio stesin bilong ol Sumatin Bilong Baibel. Ol bratasista i no amamas long dispela samting, olsem na ol i tilim nius Who Owns the Air? Maski ol bratasista i mekim olsem, ol wokman bilong gavman i no laik givim nupela laisens long ol redio stesin bilong ol.

Yu ting dispela i pasim wok bilong liklik lain em ol i stap olsem ol wokman bilong Jehova long Kanada? Isabel Wainwright i tok: “Pastaim i luk olsem ol birua i daunim mipela. Tasol mi save olsem Jehova inap pasim dispela samting long kamap sapos dispela samting i stret wantaim laik bilong em. Olsem na dispela i makim olsem mipela i mas senisim pasin bilong autim tok na bihainim narapela rot bilong autim gutnius bilong Kingdom.” Ol Sumatin Bilong Baibel long Kanada i no tingting tumas long yusim redio long autim tok, nogat. Ol i kirap long bihainim pasin bilong i go long haus bilong ol man na autim tok. Tasol long dispela taim bipo, redio i bin mekim bikpela wok long autim “nambawan gutpela tok.”—Histori bilong yumi long Kanada.