Kufuma Mu Nthamba Yithu

‘Ukaŵa Uthenga Uwemi Comene Uwo Ukaŵa Kuti Undapulikikwepo Nakale’

UKU wakulongora mulu wa mapolo gha mamita 18 ku malo agho ŵakasungangako vinthu pa nyengo ya Nkhondo Yakwamba ya Caru Cose, ku Saskatoon, Saskatchewan, Canada, George Naish wakafumba kuti: “Kasi mapolo agha nga nchito wuli?” Wakaphalirika kuti mapolo agha ŵakazengeranga mathiranzimita mu nyengo ya Nkhondo Yakwamba ya Caru Cose. Pamanyuma, Mubali Naish wakati: “Nkhaghanaghana kuti mapolo agha tizengere mathiranzimita gha wayilesi, ndipo aka kakaŵa kakwamba kuti tighanaghane vyakuti tiŵe na wayilesi yakucitira mulimo withu wa kupharazga.” Caka cimoza cikati cajumphapo, mu 1924, wayilesi ya CHUC yikamba kupharazga uthenga. Yikaŵa yimoza mwa mawayilesi ghakwamba ghakupharazga nkhani za cisopa mu Canada.

Cifukwa cakuti caru ca Canada nchikuru comene, ghakaŵa malo ghawemi ghakupharazgira uthenga pa wayilesi. Florence Johnson, uyo wakagwiranga nchito pa wayilesi ya ku Saskatoon, wakati: “Tikuwonga comene cifukwa ca kuŵa na wayilesi yithu, ŵanthu ŵanandi awo tikate tiŵapharazgirenge yayi ŵakapulika unenesko. Ndipo pakuti wayilesi pa nyengo iyi zikaŵa zacilendo, ŵanthu ŵanandi ŵakakhumbanga kutegherezga cilicose ico cikapharazgikanga.” Kufika mu 1926, Ŵasambiri ŵa Baibolo (nga umo Ŵakaboni ŵa Yehova pa nyengo iyi ŵakacemekeranga) ŵakaŵa na mawayilesi ghanayi mu misumba ya ku Canada. a

Kasi mukatenge mupulikenge vici usange imwe mujurenge yimoza mwa mawayilesi agha? Ŵabali na ŵadumbu ŵa mu mpingo wapafupi kanandi ŵakimbanga sumu pa wayilesi. Kweniso ŵabali ŵakadumbanga nkhani ndiposo ŵakaŵanga na vidumbirano vya mu Baibolo. Amy Jones, uyo wakacitako vidumbirano ivi, wakukumbuka kuti: “Para nili mu uteŵeti wa m’munda, ndipo najiphara zina lane, nyengo zinyake mweneko wa nyumba wakayowoyanga kuti, ‘Enya nadi, nili kumupulikanipo pa wayilesi.’”

Ŵasambiri ŵa Baibolo ku Halifax, Nova Scotia, ŵakacitanga mwapadera comene pulogiramu yinyake ya pa wayilesi. Ŵakadumbiskananga nkhani ndipo pamanyuma ŵakapemphanga ŵategherezgi kuti ŵimbe foni, na kufumba mafumbo gha mu Baibolo. Mubali munyake wakati, “Ŵanthu ŵakanweka nayo comene  pulogiramu iyi. Tikatondekanga kuzgora ŵanthu wose awo ŵakimbanga telefoni cifukwa cakuti ŵakaŵanga ŵanandi comene.”

Nga ni ŵanthu ŵa mu nyengo ya mpositole Paulosi, ŵanji ŵakazomera uthenga wa Ŵasambiri ŵa Baibolo, kweni ŵanji ŵakakana. (Mil. 17:1-5) Ŵategherezgi ŵanji ŵakawutemwa uthenga. Mwaciyelezgero, apo Hector Marshall wakapulika Ŵasambiri ŵa Baibolo ŵakuyowoya vya buku lakuti Studies in the Scriptures pa wayilesi, wakacemeska mavoliyumu ghankhondi na limoza. Pamanyuma wakalemba kuti: “Nkhaghanaghananga kuti mabuku agha ghanovwirenge kusambizga Sande sukulu.” Ndipouli, wakati wamalizga Voliyumu 1, Hector wakalileka chalichi lake. Wakaŵa mupharazgi wamwamphu mpaka apo wakafwira mu 1998, ndipo wakateŵetera Yehova mwakugomezgeka. Ku mafumiro gha dazi kwa Nova Scotia, nkhani ya mutu wakuti “The Kingdom, the Hope of the World” yikati yayowoyeka pa wayilesi, zuŵa lakulondezgapo, Colonel J. A. MacDonald wakaphalira mubali munyake kuti: “Ŵanthu ŵa ku Cape Breton Island mayiro ŵakapulika uthenga uwemi comene, weneuwo ŵakaŵa kuti ŵandawupulikepo nakale.”

Kweni ŵaliska ŵa visopa ŵakakwiya comene. Ŵakatolika ŵanyake mu Halifax ŵakayowoya kuti ŵabwangandurenge wayilesi iyo yipharazgenge mapulogiramu gha Ŵasambiri ŵa Baibolo. Cifukwa ca kukhuŵilizgika na ŵalongozgi ŵa visopa, mu 1928 boma likapharazga kuti lipelekengeso yayi vikalata viphya vya wayilesi za Ŵasambiri ŵa Baibolo. Boma likati lacita nthena, ŵabali na ŵadumbu ŵakagaŵira thirakiti lakuti Who Owns the Air? (Kasi Mweneko wa Mphepo Ni Njani?), ilo likaŵa na uthenga wakususka ivyo boma likacita. Ndipouli, ŵalara ŵa boma ŵakakana nipera kupeleka vikalata viphya vya wayilesi za Ŵasambiri ŵa Baibolo.

Kasi ici cikagongoweska ŵateŵeti ŵa Yehova ŵa ku Canada? Isabel Wainwright wakati: “Pakwamba, vikawoneka nga kuti ŵalwani ŵatonda. Kweni nkhamanya kuti mphanyi Yehova wakaŵatondeska viŵenge kuti wakakhumbanga kuti tilutilire kupharazga pa wayilesi. Ntheura vikalongora kuti tikwenera kusanga nthowa yinyake yiwemi kuti tipharazge makani ghawemi gha Ufumu.” M’malo mwa kuthemba comene wayilesi kuti ŵapharazge, Ŵasambiri ŵa Baibolo mu Canada ŵakamba kuŵikapo mtima kwendera ŵanthu mu nyumba zawo. Ndipouli, pa nyengo yake wayilesi yikacita mulimo ukuru comene pakupharazga ‘uthenga uwemi comene uwo ukaŵa kuti undapulikikwepo nakale.’—Kufuma mu nthamba yithu ku Canada.

[Mazgu ghamusi]

[Cithuzithuzi pa peji 31]

[Vithuzithuzi pa peji 32]

(1) Wayilesi ya ku Edmonton, Alberta (2) Mubali wakunozga mawaya gha thiranzimita ku Toronto, Ontario

[Cithuzithuzi pa peji 32]

(3) Nyumba ya wayilesi ya CHUC ku Saskatoon, Saskatchewan

[Cithuzithuzi pa peji 32]

[Mazgu Ghakukhozgera pa peji 32]

“Tikatondekanga kuzgora ŵanthu wose awo ŵakimbanga telefoni cifukwa cakuti ŵakaŵanga ŵanandi comene”