Kpep N̄kpọ To Ikọ Abasi

Ntak Emi Abasi Ọkọdọn̄de Jesus Edi Isọn̄?

Ibuotikọ emi ọbọrọ mme mbụme emi ẹkemede ndidi afo emesibụp onyụn̄ owụt n̄ko ebiet emi edikụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Jesus okodu ke m̀mọ̀n̄ mbemiso Abasi ọkọdọn̄de enye edi isọn̄?

Jesus okodu ke heaven mbemiso enye akamanade ke Bethlehem. Enye edi akpa ye n̄kukụre owo emi Abasi okobotde ke idem esiemmọ. Ntak edi oro ẹkotde enye ikpọn̄-ikpọn̄ edibon Eyen Abasi. Ke ini enye okodude ke heaven, Abasi ekesida enye etịn̄ ikọ. Oro anam ẹkot enye Ikọ. Enye ama esin̄wam Abasi onyụn̄ etiene obot kpukpru mme n̄kpọ eken. (John 1: 2, 3, 14) Jesus ama odụn̄ ke heaven ye Abasi ke anana-ibat isua mbemiso ẹkebotde mme owo.—Kot Micah 5:2; John 17:5.

2. Abasi akanam didie ọnọ Eyen esie edimana ke isọn̄?

Jehovah ama ada edisana spirit okpụhọde Jesus anam enye oto heaven edidu ke idịbi Mary. Ntre, Jesus ikenyeneke ata ete mi ke isọn̄. Mme angel ẹma ẹsian mme ekpemerọn̄ emi ẹkedude ke an̄wa ke okoneyo ẹkpeme erọn̄ ke Jesus amana. (Luke 2:8-12) Ntem, etie nte Jesus akamana ke ntọn̄ọ ntọn̄ọ October, idịghe ke ini ọkpọsọn̄ etuep. Nte ini akakade, Mary ye Joseph ebe esie, ẹma ẹda Jesus ẹwọrọ ẹka Nazareth ẹkebọk enye do. Joseph ekememen Jesus akama nte eyen esiemmọ.—Kot Matthew 1:18-23.

Ke ini Jesus ekedide n̄kpọ nte isua 30, enye ama ana baptism, ndien Abasi ama etịn̄ ke eferife ke enye edi Eyen imọ. Ekem, Jesus ama ọtọn̄ọ ndinam utom emi Abasi ọkọdọn̄de enye.—Kot Matthew 3:16, 17.

  3. Ntak emi Abasi ọkọdọn̄de Jesus edi isọn̄?

Abasi ọkọdọn̄ Jesus edikpep mme owo akpanikọ. Jesus ama ekpep mme owo n̄kpọ aban̄a Obio Ubọn̄ Abasi, kpa ukara eke heaven emi edinamde kpukpru owo ke isọn̄ ẹnyene emem. Enye ama anam mme owo ẹnyene idotenyịn nsinsi uwem. (John 4:14; 18:36, 37) Jesus ama ekpep mme owo ediwak n̄kpọ oro ẹkemede ndinam mmọ ẹkop inemesịt. (Matthew 5:3; 6:19-21) Enye ama enịm eti uwụtn̄kpọ onyụn̄ ada oro ekpep mme owo n̄kpọ. Ke uwụtn̄kpọ, enye ama owụt nte ẹkemede ndinam uduak Abasi idem ke ini afanikọn̄. Ke ini ẹkenamde n̄kpọ ye enye ke idiọk usụn̄, enye ikosioho owo usiene.—Kot 1 Peter 2:21-24.

Jesus ama ekpep mme anditiene enye ke ana mmọ ẹyak n̄kpọ atak mmọ man mmọ ẹnam n̄kpọ ẹnọ mbon en̄wen. Okposụkedi emi enye ekenyenede san̄asan̄a idaha ke ini okodude ke heaven ye Ete esie, enye ama osụhọde idem okop uyo Ete esie onyụn̄ enyịme ndidi isọn̄ ndidu ye mme owo. Anie owo enyene ima nte Jesus emi ikpekpebede?—Kot John 15:12, 13; Philippi 2:5-8.

4. Nso ufọn ke n̄kpa Jesus anam ọnọ mme owo?

Abasi ọkọdọn̄ Jesus edikpa ke ntak idiọkn̄kpọ nnyịn. (John 3:16) Kpukpru nnyịn idi mme anam idiọkn̄kpọ; nnyịn ifọnke ima. Ntak edi oro nnyịn mme owo isidọn̄ọde isinyụn̄ ikpan̄ade. Edi Adam, akpa owo, ama ọfọn ama. Enye ikpakakpaha ikpokonyụn̄ idọn̄ọde tutu amama. Edi enye ikedịghe aba mfọnmma owo ke ini enye ọkọsọn̄de ibuot ye Abasi. Nnyịn ikada idiọkn̄kpọ ye n̄kpa emi edide utịp idiọkn̄kpọ ito Adam.—Kot Rome 5:12; 6:23.

Jesus ekedi mfọnmma owo; enye ikakpaha ke ntak idiọkn̄kpọ esie. Enye akakpa ke ntak idiọkn̄kpọ nnyịn. N̄kpa Jesus ayanam Abasi ọnọ nnyịn nsinsi uwem onyụn̄ ọdiọn̄ nnyịn.—Kot 1 Peter 3:18.

Edieke oyomde ndifiọk n̄kpọ efen mban̄a emi, mbọk kot ibuot 4 ye 5 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.