Aʻoaʻoga a le Tusi Paia

Aiseā na Auina Mai ai e le Atua Iesu i le Lalolagi?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O fea sa iai Iesu a o leʻi auina mai e le Atua?

Sa soifua Iesu i le lagi i se tino agaga a o leʻi fanau mai i Peteleema. O ia o le uluaʻi foafoaga na foafoaina tuusaʻo e le Atua, ma ua talafeagai ona taʻua o ia o le Alo e toʻatasi o le Atua. Sa avea o ia ma fofoga fetalai a le Atua a o iai i le lagi. O le māfuaaga lenā e taʻua ai o ia o le Upu. Sa avea o ia ma fesoasoani a le Atua, ma na ia foafoaina isi foafoaga. (Ioane 1:2, 3, 14) Sa soifua faatasi Iesu ma le Atua i le lagi mo le faitau afe o tausaga a o leʻi foafoaina tagata.—Faitau le Mika 5:2; Ioane 17:5.

2. Na faapefea ona auina mai e le Atua lona Alo?

Na faaaogā e Ieova lona agaga paia e tuu ai le ola o Iesu i le manava o Maria. O lona uiga, e leʻi manaʻomia se tamā faaletagata ina ia fanau mai ai Iesu. Na faailoa atu e ni agelu i ni leoleo mamoe le fanau mai o Iesu, a o leoleo a latou lafu i le fanua i le pō. (Luka 2:8-12) O lona uiga, e leʻi fanau Iesu i se tau malūlū, ae atonu o se taimi e lata iā Oketopa, a o māfanafana pea le tau. I se taimi mulimuli ane, na ave ai e Maria ma Iosefa Iesu i Nasareta ma tausia ai. Na avea Iesu ma ataliifai o Iosefa.—Faitau le Mataio 1:18-23.

Na papatiso Iesu pe tusa o le 30 o ona tausaga, ma na faailoa mai e le Atua i le lautele, o Iesu o lona Alo. Ona amata lea ona faia e Iesu le galuega na auina mai ai o ia e le Atua.—Faitau le Mataio 3:16, 17.

 3. Aiseā na auina mai ai e le Atua Iesu?

Na auina mai e le Atua Iesu e aʻoaʻo tagata i le upu moni. Na ia aʻoaʻo atu e uiga i le Malo o le Atua, o se malo i le lagi o le a aumaia le filemu i le lalolagi. Na ia saunia foʻi se faamoemoe o le ola e faavavau. (Ioane 4:14; 18:36, 37) Na aʻoaʻo e Iesu tagata i auala eseese e maua ai le fiafia moni. (Mataio 5:3; 6:19-21) Na ia aʻoaʻo atu e ala i lana faaaʻoaʻoga. Na faailoa mai e Iesu le auala e faia ai le finagalo o le Atua e ui i tulaga faigatā. O se faataʻitaʻiga, ina ua faileagaina o ia, e na te leʻi toe taui atu.—Faitau le 1 Peteru 2:21-24.

Na aʻoaʻo e Iesu ona soo e faaalia le alofa faataulaga. Sa iai o ia i se tulaga aloaʻia i le lagi ma lona Tamā, peitaʻi na lotomaulalo ma usiusitaʻi e afio mai e ola faatasi ma tagata i le lalolagi. E leai se tagata e mafai ona ia faataatia se faaaʻoaʻoga sili o le alofa nai lo o Iesu.—Faitau le Ioane 15:12, 13; Filipi 2:5-8.

4. O le ā na faataunuuina i le maliu o Iesu?

Na auina mai foʻi e le Atua Iesu e maliu mo a tatou agasala. (Ioane 3:16) E tatou te agasala ma e lē lelei atoatoa uma lava, o le māfuaaga lenā ua mamaʻi ai ma feoti. I se faaeseesega, sa lelei atoatoa Atamu, leai sana agasala, ma e lē oti pe maʻi foʻi. Ae na melea uma na mea ina ua ia lē usiusitaʻi i le Atua. Ua tuufaasolo mai le agasala ona o Atamu, ma o le totogi o le agasala o le oti.—Faitau le Roma 5:12; 6:23.

O Iesu o se tagata lelei atoatoa, e lē tatau ona maliu auā e leai sana agasala, ae sa maliu ona o a tatou agasala. O le maliu o Iesu ua tatou maua ai le avanoa e olioli ai i le ola e faavavau ma faamanuiaga mai i le Atua.—Faitau le 1 Peteru 3:18.

Mo nisi faamatalaga, tagaʻi i le mataupu e 4 ma le 5 o lenei tusi, O ā Aʻoaʻoga Moni a le Tusi Paia? lomia e Molimau a Ieova.