Yesu a a hanya etilweni tanihi munhu wa moya loko a nga si velekiwa eBetlehema. A a ri xivumbiwa xo sungula xa Xikwembu naswona hi yena ntsena loyi a vumbiweke hi Xikwembu hi ku kongoma. Xisweswo, swa fanela leswi a vuriwaka N’wana wa Xikwembu la tswariweke a ri swakwe. Hakanyingi loko a ri etilweni, a a vulavula tanihi muyimeri wa Xikwembu. Hi yona mhaka leyi a vitaniwaka Rito. U tlhele a tirha tanihi mupfuni wa Xikwembu naswona u hoxe xandla eku tumbuluxeni ka swilo leswin’wana hinkwaswo. (Yohane 1:2, 3, 14) Yesu u hanye ni Xikwembu etilweni ku ringana nkarhi lowu nga pimekiki emahlweni ko va vanhu va tumbuluxiwa.—Hlaya Mikiya 5:2; Yohane 17:5.

Yehovha u tirhise moya lowo kwetsima leswaku a hundzisela vutomi bya Yesu ku suka etilweni ku ya embelekweni wa Mariya. Kutani Yesu u velekiwe handle ka tatana wa nyama. Tintsumi ti twarise ku velekiwa kakwe eka varisi van’wana va le ndhawini yoleyo, lava a va ri enhoveni nivusiku va rindza mintlhambi ya vona. (Luka 2:8-12) Xisweswo, Yesu u velekiwe kwalomu ka October, loko maxelo ya ha kufumelanyana, ku nga ri hi xixika. Endzhakunyana, Mariya ni nuna wakwe, Yosefa, va teke Yesu va n’wi yisa ekaya ka vona eNazareta laha va n’wi kuriseleke kona. Yosefa u khathalele Yesu tanihi tata wakwe wa muwundli.—Hlaya Matewu 1:18-23.

Loko Yesu a ri ni malembe ya kwalomu ka 30, u khuvuriwile naswona Xikwembu xi swi vule erivaleni leswaku a a ri N’wana wa xona. Kutani Yesu u sungule ntirho lowu Xikwembu xi n’wi rhumeke wona.—Hlaya Matewu 3:16, 17.

Xikwembu xi rhume Yesu leswaku a ya dyondzisa vanhu ntiyiso. Yesu u dyondzise malunghana ni Mfumo wa Xikwembu, ku nga hulumendhe leyi nga ta tisa ku rhula emisaveni hinkwayo. U nyikele ntshembo wa vutomi lebyi nga heriki. (Yohane 4:14; 18:36, 37) Yesu u tlhele a dyondzisa vanhu swilo swo tala malunghana ni ku kuma ntsako wa xiviri. (Matewu 5:3; 6:19-21) A a hanya hileswi a a swi dyondzisa. Hi xikombiso, u kombise ndlela ya ku endla ku rhandza ka Xikwembu hambi ku ri eka swiyimo swo tika. Loko a xanisiwa, a nga rihiselanga.—Hlaya 1 Petro 2:21-24.

Yesu u dyondzise valandzeri vakwe ku va ni rirhandzu leri nga riki ni vutianakanyi. A a ri ni xikhundlha xo hlawuleka swinene etilweni ni Tata wakwe, kambe hi ku titsongahata u yingise Tata wakwe kutani a ta emisaveni leswaku a ta hanya ni vanhu. A nga kona loyi a nga hi vekelaka xikombiso lexinene xa rirhandzu ku tlula Yesu.—Hlaya Yohane 15:12, 13; Vafilipiya 2:5-8.

Xikwembu xi tlhele xi rhuma Yesu leswaku a ta fela swidyoho swa hina. (Yohane 3:16) Hinkwerhu ka hina hi vadyohi, leswi vulaka leswaku a hi hetisekanga naswona hi ni xidyoho. Hi yona mhaka leyi hi vabyaka hi tlhela hi fa. Ku hambana na hina, wanuna wo sungula, ku nga Adamu a a hetisekile. A a nga ri na xidyoho naswona a a nga ta fa kumbe ku vabya. Kambe endzhaku ka loko a nga xi yingisanga Xikwembu, u ve la nga hetisekangiki. Hi kume xidyoho eka Adamu ni hakelo ya xona, ku nga rifu.—Hlaya Varhoma 5:12; 6:23.

Yesu, loyi a a hetisekile, a nga felanga swidyoho swa yena n’wini. U fele swidyoho swa hina. Rifu ra Yesu ri endla leswaku swi koteka eka hina leswaku hi tiphina hi vutomi lebyi nga heriki hi tlhela hi katekisiwa hi Xikwembu.—Hlaya 1 Petro 3:18.