Bushe Kuti Mwa-asuka Ifi Fipusho?

Bushe Yesu alilufyenye ilyo alandile ukuti umucele ulafumuka?

▪ Mu Lyashi lya pa Lupili, Yesu aebele abasambi bakwe ati: “Muli mucele wa pano isonde; lelo umucele nga wafumuka, bushe ukalowa shani na kabili? Tapali uko bengaubomfya kano fye uku-upoosa ku nse na bantu balaunyantapo.” (Mateo 5:13) Umucele ulalenga ifintu ukukanabola. Kanshi nalimo icilangililo ca kwa Yesu, calolele mu kuti abasambi bakwe balingile ukwafwa abantu bambi ukutaluka ku fingonaula imibele yabo e lyo na bucibusa bwabo na Lesa.

Icitabo ca The International Standard Bible Encyclopedia calanda pa fyo Yesu alandile pa mucele ukutila kuti wafumuka, aciti: “Ilingi line umucele uwalefuma ku ncende iyali lwa mupepi na Bemba Wafwa walekwatamo ne fintu fimbi; e co balesungulula ifi fyonse pamo pa kuti bafumyemo umucele e lyo ifyaleshalako fyaleba fye ifyatalalila.” Kanshi e mulandu wine Yesu alandiile ukuti umucele nga wafumuka, “tapali uko bengaubomfya kano fye uku-upoosa ku nse na bantu balaunyantapo.” “Nangu ca kuti umucele walefuma muli Bemba Wafwa tawali uusuma sana pa mulandu wa kuti walikwetemo ne fintu fimbi,” icitabo ca encyclopedia cilanda no kuti, “uyu mucele tawayafishe ukusanga pantu waleba fye mu lulamba lwa bemba, kanshi abena Palestine abengi e mucele balebomfya sana.”

Bushe ukulufya indalama ya drakima iyo Yesu alandilepo mu mulumbe, kwakumine shani abaumfwileko uyu mulumbe?

▪ Yesu alandile umulumbe wa mwanakashi uwakwete indalama sha drakima 10, e lyo alufyapo imo ukuti alisanike inyali no kupyanga mu ng’anda no kufwailisha ukufikila aisanga. (Luka 15:8-10) Mu nshiku sha kwa Yesu, umuntu nga abomba akasuba konse balemupeela drakima imo, kanshi drakima iyo umwanakashi alufishe mu mulumbe wa kwa Yesu yalicindeme sana. Ifyo Yesu alondolwele muli uyu mulumbe fyalecitika.

Ifitabo fimo filanda ukuti ilingi line abanakashi balebomfya indalama nge fibekobeko. Kanshi nalimo Yesu alelanda pa ndalama iyafumine pa ndalama sha cishale isho balemona ukuti shali ishacindama sana, nelyo yafumine pa ndalama bali no kulipila impango. Te mulandu no ko iyi ndalama yali no kubomfiwa, ukulufya ilya ndalama kwali no kusakamika sana ulya mwanakashi, aali no kuifwayafwaya mpaka fye aisanga.

Mu nshiku sha kwa Yesu, amayanda abantu abengi baleikalamo baleyapanga mu nshila ya kuti tamwaleba sana ulubuuto kabili tamwalekaba sana. Nga kwali amayanda ayakwete amawindo ninshi yali fye ayanono. Pa nshi balebikapo ifyani nelyo utumuti utwauma utwalekanalekana. Kanshi indalama nga yaponenapo caleafya sana ukuimona. Umwaume umo atile, “Nga ca kuti akantu akanono pamo nga indalama kaponena pa nshi mu ng’anda ya musango uyu, ico umuntu engacita fye kwasha inyali no kupyanga mu ng’anda pa kuti akamone.”

[Icikope pe bula 21]

Umucele wa muli Bemba Wafwa

[Ifikope pe bula 21]

Indalama ya Drakima