Sa iyang Wali sa Bukid, giingnan ni Jesus ang iyang mga sumusunod: “Kamo ang asin sa katawhan. Kon ang asin kawad-an sa iyang kaparat, unsaon pa man pagpabalik sa kaparat niini? Kini wala nay kapuslanan ug angay na lamang ilabay unya tunobtunoban sa mga tawo.” (Mateo 5:13; Ang Bag-ong Maayong Balita Biblia) Ang asin makapreserbar. Busa, ang ilustrasyon ni Jesus lagmit nagpasabot nga ang iyang mga tinun-an makapanalipod ug angayng manalipod sa uban batok sa espirituwal ug moral nga kadunotan.

Apan, maylabot sa giingon ni Jesus bahin sa asin nga mawad-an sa kaparat niini, ang The International Standard Bible Encyclopedia miingon: “Ang asin nga gikan sa Patayng Dagat kontaminadog ubang minerales; busa kon matunaw ang asin, wala nay lami ang nahibiling substansiya.” Nan, masabtan kon nganong miingon si Jesus nga ang nahibiling substansiya “wala nay kapuslanan ug angay na lamang ilabay.” Ang ensiklopedia midugang, “Tungod sa pagkakontaminado sa asin nga gikan sa Patayng Dagat, ubos kinig kalidad kon itandi sa ubang asin, apan kay dali ra man kining makuha (mapunit ra sa baybayon), mao ni ang sagad gamiton sa mga taga-Palestina.”

Si Jesus nag-asoyg sambingay bahin sa usa ka babaye kinsa human mawad-ig usa sa iyang napulo ka drakma mikuhag lampara ug nanilhig pag-ayo sulod sa balay hangtod iya kining nakaplagan. (Lucas 15:8-10) Sa adlaw ni Jesus, ang usa ka drakma maoy suweldo sa usa ka adlaw, busa dakodako kini nga kantidad. Apan, ang iyang sambingay tinuod usab sa lain pang kahimtang.

Ang pipila ka reperensiya nagpakita nga ang mga babaye sagad naggamit sa mga sensilyo ingong alahas. Busa, lagmit ang gitumong ni Jesus nga sensilyo maoy bahin sa bililhong kabilin o bahin sa bugay alang sa babaye. Kini man ang kahimtang o dili, masabtan kon nganong gusto gyod sa babaye nga makit-an ang nawalang sensilyo.

Dugang pa, ang balay sa ordinaryong mga tawo sa adlaw ni Jesus gidisenyo nga dili kaayo mahayagan ug mainitan sa adlaw. Pipila lang ang bentana niini, kon duna man. Ang mga salog niini sagad hanigag dagami o gipaugang punoan sa lainlaing tanom. Kon mahulog niana ang sensilyo, lisod kining pangitaon. Ang usa ka komentarista miingon, “Busa kon ang usa ka gamayng butang, sama sa sensilyo, mawala sa maong balay, ang pagdagkot ug lampara ug pagpanilhig, mao ang sagad gayong buhaton aron makit-an kini.”