Long Bikpela Tok Long Maunten, Jisas i tokim ol disaipel bilong em olsem: “Yupela i olsem sol bilong graun, tasol sapos sol i lusim strong bilong en, orait olsem wanem bai em inap kamap gutpela gen? I no gat wok long kain sol olsem, olsem na ol bai tromoi i go ausait na ol man bai krungutim tasol.” (Matyu 5:13) Ol i save putim sol long kaikai bambai kaikai i stap gut longpela taim. Olsem na dispela tok piksa bilong Jisas i makim olsem ol disaipel i mas lukautim ol narapela na bai ol i no lusim pasin bilong lotuim God na ol stretpela lo bilong Em.

Buk The International Standard Bible Encyclopedia i stori long tok bilong Jisas long sol i lusim strong bilong en, olsem: “Sol em ol i kisim long raunwara Detsi i gat ol narapela mineral i miks wantaim, olsem na sol inap lusim strong bilong en, na bai i no gat teis bilong en.” Em as na Jisas i tok olsem taim sol i lusim pinis strong bilong en, “i no gat wok long kain sol olsem, olsem na ol bai tromoi i go ausait.” Ensaiklopidia i tok moa olsem: “Sol bilong Detsi i no klin na dispela i mekim na planti man i no laikim, tasol em i isi long kisim (ol man inap kisim tasol arere long nambis), dispela i mekim na em i nambawan sol bilong ol man long Palestain.”

Jisas i tok piksa long wanpela meri i gat 10-pela koin drakma na wanpela i lus, na em i kisim lam na brumim gut haus bilong em i go inap em i painim gen dispela koin. (Luk 15:8-10) Long taim bilong Jisas, wanpela koin drakma em pe bilong wok em man i mekim long wanpela de, olsem na wanpela koin drakma em i bikpela samting. Tasol i gat sampela samting moa long dispela stori bilong Jisas.

Sampela buk i tok planti taim ol meri i save yusim ol koin olsem bilas. Olsem na ating Jisas i tok long wanpela koin i bin stap longpela taim long famili bilong dispela meri o em wanpela bilong ol koin famili bilong meri i bin baim man long en. Maski koin i kam long dispela kain rot o nogat, taim meri i lusim wanpela bilong ol 10-pela koin em i gat, em i tingting planti na em i wok strong long painim.

Ol man nating long taim bilong Jisas i bin wokim ol haus we lait na hat bilong san i no ken i go insait, na tu, i no gat planti windo. Ol i save karamapim plua bilong haus long ol pitpit o gras samting i drai pinis. Sapos wanpela koin i pundaun, em bai i hatwok tru long painim. Wanpela man bilong skelim ol tok bilong Baibel i tok: “Taim wanpela liklik samting olsem wanpela koin i lus long kain ples olsem, orait em pasin tru bilong ol long laitim lam na brumim haus bilong painim dispela samting i lus.”