1, 2. (a) Ania ti ibilang ti adu a tattao kas naballigi a biag? (b) Kasano a maammuam no ania ti panangmatmatmo iti balligi?

ANIA ti kaipapanan ti naballigi a biag? No isaludsodmo dayta kadagiti tattao, nagduduma la ketdi ti sungbatda. Mabalin nga adu kadakuada ti mangrukod iti balligi sigun iti kinabaknang, propesion, wenno adal. Adda met dagiti agkuna nga agpannuray dayta iti nasayaat a relasion iti pamilia, gagayyem, wenno katrabahuan. Ti maysa nga agserserbi iti Dios mabalin pay ketdi nga inaigna ti balligi kadagiti pribilehio iti kongregasion wenno kadagiti gapuanan iti ministerio.

² Tapno maammuam no ania ti panangmatmatmo maipapan iti balligi, mabalinmo nga isurat ti nagan ti sumagmamano a tattao nga ibilangmo a naballigi​—dagidiay ap-apresiarem ken pagraraemam. Ania ti pagpapadaanda? Nabaknangda kadi wenno popularda? Natan-okda kadi? Dagiti sungbatmo ipakitada no ania ti linaon ti pusom, ken dakkel ti impluensia dayta kadagiti desision ken kalatmo.​—Luc. 6:45.

3. (a) Ania idi ti masapul nga aramiden ni Josue tapno agbalin a naballigi? (b) Ania ita ti usigentayo?

³ Ti kapatgan ket no ibilangnatayo ni Jehova a naballigi, ta nakadepende ti biagtayo iti anamongna. Idi inikkan ni Jehova ni Josue iti nadagsen nga annongen a mangidaulo kadagiti Israelita nga agturong iti Naikari a Daga, imbagana a basaen ni Josue ti Mosaiko a Linteg iti “aldaw ken rabii” ken siaannad a tungpalenna ti naisurat iti dayta. Impasigurado ti Dios kenkuana: “Iti kasta pagballigiemto ti dalanmo ket iti kasta agtignaykanto a sisisirib.” (Jos. 1:7, 8) Nagbanaganna, talaga a nagballigi ni Josue. Kasano met a maibagatayo a ti panangmatmattayo iti balligi ket maitunos iti panangmatmat ti Dios? Usigentayo nga umuna ti biag ti dua a lallaki a nadakamat iti Biblia.

4. Apay a maikunatayo a naballigi ni Solomon?

⁴ Naisangsangayan dagiti balligi a nagun-od ni Solomon. Apay? Gapu ta adu a tawtawen a nagbuteng ken nagtulnog ken Jehova, a nangipaay kenkuana iti naruay a bendision. Laglagipentayo nga idi sinaludsod ni Jehova no ania ti kiddaw ni Solomon, kiniddaw ti ari ti sirib a mangidalan kadagiti tattao. Gapuna, binendisionan ti Dios iti sirib kasta met iti kinabaknang. (Basaen ti 1 Ar-ari 3:10-14.) Ti siribna ket nagbalin a “dakdakkel unay ngem ti sirib dagiti amin a taga Daya ken ti isuamin a sirib ti Egipto.” Nagdindinamag ti dayag ni Solomon iti “amin a nasion iti intero nga aglawlaw.” (1 Ar. 4:30, 31) No iti kinabaknang, ti tinawen a mapastrekna a balitok ket agarup 25 tonelada! (2 Cron. 9:13) Nalaing iti diplomasia, panagbangon, ken komersio. Wen, naballigi ni Solomon bayat a matalek nga agserserbi iti Dios.​—2 Cron. 9:22-24.

5. Ania ti konklusion ni Solomon maipapan kadagiti naballigi iti imatang ti Dios?

⁵ Kas ipakita ti insurat ni Solomon iti libro nga Eclesiastes, ammona a saan laeng a dagidiay nabaknang ken natan-ok ti makagun-od iti balligi ken rag-o. Insuratna: “Naammuak nga awanen ti nasaysayaat kadakuada ngem ti panagrag-o ken panagaramid iti naimbag bayat ti panagbiag ti maysa; ken kasta met a ti tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.” (Ecl. 3:12, 13) Nabigbigna pay nga ad-adda a makapnek dagita a pagragsakan no ti maysa ket addaan iti anamong ti Dios ken nasinged Kenkuana. Siuumiso a kinuna ni Solomon: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”​—Ecl. 12:13.

6. Ania ti maitulong kadatayo ti kapadasan ni Solomon tapno mabigbigtayo no ania ti pudno a balligi?

⁶ Adu a tawtawen a nagbuteng ni Solomon iti Dios. Mabasatayo nga “intuloy ni Solomon nga ayaten ni Jehova babaen ti pannagnana kadagiti paglintegan ni David nga amana.” (1 Ar. 3:3) Saan kadi a pudno a balligi dayta? Iti panangiwanwan ti Dios, nakaibangon ni Solomon iti nangayed a templo para iti pudno a panagdayaw ken nakaisurat iti tallo a libro iti Biblia. Nupay ditay maaramidan dagita, ti kapadasan ni Solomon idi matalek pay isuronatayo a mangtingiting no ania ti pudpudno a balligi ken tulongannatayo a manggun-od iti dayta. Laglagipentay a pinaltiingan ti Dios ni Solomon a mangisurat nga ubbaw dagiti ibilbilang ita ti kaaduan kas pagrukodan ti balligi​—ti kinabaknang, sirib, kinalatak, ken pannakabalin. Awan kaes-eskan dagita, arigna “panangkamkamat iti angin.” Madlawmo kadi a saan a mapmapnek ti adu a managayat iti kinabaknang? Masansan met a madanaganda gapu kadagiti banag nga ik-ikutanda. Ken addanto tiempo a ti kinabaknangda ket mapan iti sabali a tao.​—Basaen ti Eclesiastes 2:8-11, 17; 5:10-12.

7, 8. Kasano a nagbalin a di matalek ni Solomon, ken ania ti resultana?

⁷ Ammotayo met nga idi agangay, saan a nagtultuloy a matalek ni Solomon. Kuna ti Biblia: “Ket naaramid iti tiempo ti panaglakay ni Solomon a dagiti met laeng assawana pinagannayasda ti pusona a sumurot kadagiti sabali a didios; ket ti pusona saan idi a naan-anay ken Jehova a Diosna a kas iti puso ni David nga amana. . . . Inrugi nga aramiden ni Solomon no ania ti dakes kadagiti mata ni Jehova.”​—1 Ar. 11:4-6.

⁸ Saan a naay-ayo ni Jehova ket kinunana ken Solomon: “Iti rason a . . . saanmo a sinalimetmetan ti tulagko ken dagiti paglintegak nga impasdekko kenka kas bilin, di bumurong a pisangekto nga iyadayo kenka ti pagarian, ket pudno unay nga itedkonto dayta iti adipenmo.” (1 Ar. 11:11) Anian a nakalkaldaang! Nupay nagun-od ni Solomon ti adu a balligi, napagladingitna ni Jehova  idi agangay gapu ta saanna a tinaginayon ti kapatgan a banag iti biag​—ti kinamatalek iti Dios. Mabalin a maisaludsodtayo iti bagitayo, ‘Silalagipak kadi iti kapadasan ni Solomon tapno masiguradok nga agbalin a naballigi ti biagko?’

9. Naballigi kadi ni Pablo sigun iti panangmatmat ti lubong? Ilawlawagmo.

⁹ Dakkel ti nakaidumaan ti biag ni apostol Pablo no idilig ken Ari Solomon. Awanan ni Pablo iti marfil a trono ken saan met a nagragragsak a kadua dagiti ar-ari. Imbes ketdi, adda gundaway a nagsagaba iti bisin, waw, lam-ek, ken kinalamolamo. (2 Cor. 11:24-27) Idi inawatnan ni Jesus kas Mesias, napukaw ni Pablo ti nadayaw a saadna iti Judaismo ket ginurgura dagiti panguluen a Judio. Naibalbalud, nasapsaplit, napangpang-or, ken naub-ubor. Kinuna ni Pablo nga isu agraman dagiti padana a Kristiano ket nagurgura, naidadanes, ken napadpadakes. “Nagbalinkami a kas basura ti lubong, ti gabsuon a rugit ti amin a bambanag, agingga ita.”​—1 Cor. 4:11-13.

10. Apay a kasla inidian ni Pablo ti balligi?

¹⁰ Idi agtutubo pay ni apostol Pablo, nga agnagan idi iti Saulo, agparang nga adu ti agur-uray nga oportunidad kenkuana. Nayanak iti prominente a pamilia ken nagbalin nga estudiante ni Gamaliel, maysa a mararaem a mannursuro. Insurat ni Pablo idi agangay: “Dakdakkel idi ti irarang-ayko iti Judaismo ngem iti adu a kasadarko.” (Gal. 1:14) Nalaing ni Saulo iti Hebreo ken Griego ken addaan met kadagiti pribilehio ken kalintegan kas maysa a makipagili iti Roma, a dayta ti arapaap ti kaaduan. Nagbalin la ketdi a natan-ok ken nabaknang no intultuloyna a gun-oden ti kasta a nailubongan a balligi. Ngem pinilina ti biag nga imbilang dagiti sabsabali​—nalabit uray ti dadduma a kabagianna​—kas kinamaag. Apay?

11. Ania dagiti bambanag ken kalat a napateg ken Pablo, ken apay?

¹¹ Inayat ni Pablo ni Jehova ken tinarigagayanna ti anamongna nga ad-adda ngem iti kinabaknang ken kinatan-ok. Yantangay naammuan ni Pablo ti kinapudno, impategna ti subbot, ti Nakristianuan a ministerio, ti namnama nga agbiag idiay langit​—bambanag a saan a pagan-ano ti lubong. Nabigbig ni Pablo nga adda isyu a masapul a marisut. Kinuna ni Satanas a mapagtallikudna dagiti tattao nga agserserbi iti Dios. (Job 1:9-11; 2:3-5) Aniaman ti rigat a nakaipasanguan ni Pablo, nagmatalek iti Dios ken nagibtur agpaay iti pudno a panagdayaw. Saan a kasta ti ibilbilang ti lubong kas balligi.

12. Apay a pinilim ti agtalek iti Dios?

¹² Kasta met kadi ti determinasionmo? Nupay saan a kaskarina ti agbalin a matalek,  ammotayo a mangyeg dayta iti bendision ken anamong ni Jehova, ket dayta ti mangipaay kadatayo iti pudpudno a balligi. (Prov. 10:22) Magunggonaantayo itan, ken manamnamatayo dagiti bendision iti masanguanan. (Basaen ti Marcos 10:29, 30.) Dakkel ngarud ti panggapuantayo a mangnamnama, “saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.” ‘Sitatalged nga agurnongtayo maipaay iti bagbagitayo iti nasayaat a pamuon maipaay iti masanguanan, tapno mapetpetantayo a sititibker ti pudpudno a biag.’ (1 Tim. 6:17-19) Wen, sangagasut a tawen manipud ita, uray sangaribu a tawen wenno nasursurok pay, sigurado a maikunatayto, “Imbag la ketdin ta pinilik ti biag a mangiturong iti pudpudno a balligi!”

13. Ania ti imbalakad ni Jesus maipapan iti panagurnong kadagiti gameng?

¹³ Kinuna ni Jesus maipapan kadagiti gameng: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw. Ta no sadino ti ayan ti gamengmo, addanto met sadiay ti pusom.”​—Mat. 6:19-21.

14. Apay a di nainsiriban ti agurnong kadagiti gameng ditoy daga?

¹⁴ Mabalin a saan laeng a kuarta ti gameng ti maysa a tao. Ramanenna ti aniaman a banag a kinuna ni Solomon nga adda pakainaiganna iti ibilbilang dagiti tattao kas balligi​—dayag, kinatan-ok, wenno pannakabalin. Dinakamat ni Jesus ti punto nga umasping iti insurat ni Solomon iti libro ti Eclesiastes​—saan a manayon dagiti gameng ditoy lubong. Kas nalabit mapalpaliiwmo iti lubong, amin a kasta a gameng ket mabalin a madadael ken nalaka a mapukaw. Insurat ni Propesor F. Dale Bruner maipapan kadagiti kasta a gameng: “Pagaammotayo a temporario laeng ti kinalatak. Daydiay nalatak idi kalman ket lausen inton bigat. Ti narang-ay a negosio ita ket lugin inton umay a tawen. . . . Ay-ayaten [ni Jesus] dagiti tattao. Indagadagna a liklikanda ti pannakapaay a sigurado nga itden ti apagkanito a dayaw. Saan nga agbayag dayta. Saan a kayat ni Jesus a mapaay dagiti adalanna. ‘Ti biag ket kasla pilid; addaka ita iti ngato, ngem madamdama addakan iti baba.’” Adu a tattao ti umanamong iti dayta a sasao. Ngem mano ngata kadakuada ti sidadaan a mangbalbaliw iti panangmatmatda iti biag? Iti biangmo, ipangagmo kadi ti balakad ni Jesus?

15. Ania a kita ti balligi ti pagreggetantay koma a gun-oden?

¹⁵ Isursuro ti dadduma a lider ti relihion a di umiso ken masapul a pengdan ti aniaman a tarigagay a gumun-od iti balligi. Ngem laglagipentayo a saan a kinondenar ni Jesus  ti amin a panagregget nga agballigi. Imbes ketdi, parparegtaenna dagiti adalanna a baliwanda ti pangipamaysaanda iti panagreggetda, ket idagdagadagna nga agurnongda kadagiti saan a madadael a “gameng idiay langit.” Pagreggetantayo koma a gun-oden ti ibilang ni Jehova a pudpudno a balligi. Wen, ipalagip kadatayo ti sasao ni Jesus a mabalintayo a pilien no ania ti aramidentayo. Kinapudnona, no ania ti ar-aramidentayo, isu ti naggubuay iti pusotayo, ti banag a napateg kadatayo.

16. Ania ti naan-anay a masiguradotayo?

¹⁶ No ti tarigagay ti pusotayo ket ti panangay-ayo ken Jehova, makapagtalektayo nga ipaayna dagiti kasapulantayo. Mabalin nga ipalubosna a mabisinan wenno mawawtayo no dadduma, kas iti kapadasan ni apostol Pablo. (1 Cor. 4:11) Nupay kasta, naan-anay a makapagtalektayo iti nainsiriban a balakad ni Jesus: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—Mat. 6:31-33.

17, 18. (a) Ania ti pakaibatayan ti pudno a balligi? (b) Ania ti saan a pagpannurayan ti pudno a balligi?

¹⁷ Nabatad ti punto: Ti pudpudno a balligitayo ket saan a maibatay kadagiti banag a naragpattayo wenno iti saadtayo ditoy lubong. Saan met a marukod dayta iti kaadda ti pribilehio iti kongregasion. Ti kasta a pribilehio ket nainaig laeng iti pakaibatayan ti pudpudno a balligi​—ti kinatulnog ken kinamatalektayo iti Dios. Impasigurado ti Dios kadatayo: “Ti sapsapulen kadagiti mayordomo ket ti maysa a tao masarakan a matalek.” (1 Cor. 4:2) Ikagumaantayo ngarud ti agtalinaed a matalek. Kinuna ni Jesus: “Ti nakapagibtur agingga iti panungpalan isunto ti maisalakan.” (Mat. 10:22) Umanamongka kadi a ti pannakaisalakan ket pammaneknek iti panagballigi?

¹⁸ Sigun iti nadakamaten, makitam a ti kinamatalek iti Dios ket awan pakainaiganna iti kinaprominente, edukasion, kinabaknang, wenno saad iti kagimongan. Saan met nga agpannuray dayta iti kinalaing, saguday, wenno abilidad. Aniaman ti kasasaad a pakaipasanguantayo, kabaelantayo ti agmatalek iti Dios. Adda dagiti nabaknang nga adipen ti Dios idi umuna a siglo, ken adda met dagiti napanglaw. Binalakadan ni Pablo dagiti babaknang nga “agaramidda iti naimbag, nga agbalinda a nabaknang iti nasayaat nga ar-aramid, nga agbalinda a naparabur, sisasagana a mangiranud.” Agpada a dagidiay nabaknang ken napanglaw mabalinda a ‘petpetan a sititibker ti pudpudno a biag.’ (1 Tim. 6:17-19) Agaplikar met kadatayo dayta a balakad. Addaantayo iti agpapada nga oportunidad ken responsabilidad​—ti panagtultuloy a matalek ken “nabaknang iti nasayaat nga ar-aramid.” No kasta ti aramidentayo, ibilangnatayto ti Namarsua kas naballigi, ket naragsaktayto ta ammotayo a makaay-ayotayo kenkuana.​—Prov. 27:11.

19. Ania koma ti determinasionmo tapno agballigika?

¹⁹ Nupay saantay a mabalbaliwan ti panangmatmat ti lubong kadatayo, mabalbaliwantayo ti panangmatmattayo iti kasasaadtayo. Ikagumaam ti agmatalek aniaman ti kasasaadmo, ket awanto ti pagbabawyam. Agtalekka nga ipaayannaka ni Jehova iti naruay a bendision​—ita ken iti agnanayon. Laglagipem koma ti kinuna ni Jesus kadagiti napulotan a Kristiano: “Paneknekam ta bagim a matalek uray agingga ken patay, ket itedkonto kenka ti korona ti biag.” (Apoc. 2:10) Pudpudno a balligi dayta!