Enterove ningo jaguereko ñande réra. Umi mymba jarekóva ñande rógape jepe héra. Upéicharõ Ñandejára oguerekomantevaʼerã avei héra. La Bíbliape oñehenói hag̃ua chupe ojeporu “Ipuʼakapáva”, “Mburuvicha Guasu Ijojahaʼỹva” ha opa mbaʼe “Apohare”. Péro haʼe oguereko héra tee. (Elee Isaías 42:8.)

Heta Bíbliape, Salmo 83:18-pe oĩ Ñandejára réra tee. Pór ehémplo, Traducción del Nuevo Mundo de las Santas Escrituras heʼi: “Nde, nderérava Jehová, nde añoite pe Ijyvatevéva ko yvy ape ári”.

Ñandejára oipota jaiporu héra. Ñande ningo ñañeʼẽ jave peteĩ ñane amígo tee ndive, ñahenói chupe héra rupi. Koʼýte jajapovaʼerã upéicha ñañeʼẽ jave Ñandejárandi. Jesucristo heʼivaʼekue avei jaiporuvaʼerãha Ñandejára réra. (Elee Mateo 6:9; Juan 17:26.)

Péro jaiko hag̃ua Ñandejára amígoramo tekotevẽ jaikuaave chupe, ndahaʼéi héra añónte. Pór ehémplo, ¿Mbaʼeichaguápa Ñandejára ha ikatúpa ñañemoag̃ui hese? La Biblia ombohovái upéva ha ambue porandu.