Likalabo kwa Lipuzo za Bibele
LIKALABO KWA LIPUZO ZA BIBELE
Libizo la Mulimu ki Lifi?
Batu ba mwa lubasi lwa luna kaufelaa bona ba na ni mabizo. Mane ni limunanu li na ni mabizo! Kana haki taba ye utwahala kuli Mulimu ni yena u na ni libizo? Mwa Bibele, Mulimu u na ni malumbatina a mañata, a cwale ka Mulimu ya Maata, Muambakani ya Pahami, ni Mubupi, kono hape u na ni libizo.—Mu bale Isaya 12:2.
Litoloko ze ñata za Bibele li itusisa libizo la Mulimu kwa Samu 83:18. Ka mutala, Bibele ya Toloko ya Lifasi le Linca ya Mañolo A Kenile, kwa timana ye, i bulela kuli: “Wena, wa libizo la Jehova, ki Wena Muambakani ya Pahami a nosi wa lifasi kaufela.”
Ki kabakalañi ha lu swanela ku itusisa libizo la Mulimu?
Mulimu u bata kuli lu itusise libizo la hae. Ha lu ambola ni batu be lu lata, inge cwalo balikani ba luna ba batuna, lwa ba bizanga fa mabizo. Kamukwaoswana, ha lu ambola ku Mulimu lu swanela ku itusisa libizo la hae. Hape Jesu Kreste naa lu susuelize ku itusisa libizo la Mulimu.—Mu bale Mateu 6:9; Joani 17:26.
Kono kuli lu be mulikanaa Mulimu, lu tokwa ku ziba ze ñata ka za hae ku fita feela ku ziba libizo la hae. Ka mutala, Mulimu u cwañi? Kana kwa konahala luli ku sutelela ku Mulimu? Mwa kona ku fumana likalabo za lipuzo zeo mwa Bibele.
Kuli mu fumane litaba ze ñata, mu bone kauhanyo 1 ya buka ye, Bibele i Lutañi Luli?, ye hatisizwe ki Lipaki za Jehova
[Siswaniso se si fa likepe 16]
Ha lu ambola ni batu be lu lata, inge cwalo balikani ba luna ba batuna, lwa ba bizanga fa mabizo
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Kana Mulimu Unani Libizo?
Mulimu unani malumbatina amañata, kukopanyeleza cwalo ni Yamaata Kaufela, Mubupi, ni Mulena. Kono libizo la Mulimu neliitusisizwe ibato ba ha 7,000 mwa Bibele.
LIKALABO KWA LIPUZO ZA BIBELE
Mulimu Unani Mabizo Amakai?
Batu bakona kunahana kuli Mulimu unani mabizo acwale ka ‘Allah’ kamba ‘El Shaddai,’ kamba ‘Jehovah-Jire’ kamba ‘Alfa ni Omega.’ Ki kabakalañi halutokwa kuziba libizo la Mulimu?
