Ala den famiriman fu wi abi wan nen. Srefi den meti di sma e kweki abi nen! Yu no denki taki Gado sa abi wan nen tu? Bijbel abi difrenti fasi fa a e kari Gado. Wan tu fu den fasi dati na Gado na Almaktiwan, A Moro Hei Masra, èn a Mekiman. Ma Gado abi en eigi nen tu.—Leisi Yesaya 42:8.

Furu Bijbel vertaling abi a nen fu Gado na Psalm 83:18. Fu eksempre, na ini a Bijbel—Nyun-Grontapuvertaling, a tekst dati e taki: „Yu di nen Yehovah, Yu wawan na a Moro Heiwan fu heri grontapu.”

Gado wani taki wi gebroiki a nen fu en. Te wi e taki nanga den lobiwan fu wi, soleki den bun mati fu wi, dan wi e kari den na den nen, spesrutu te den e taigi wi fu du dati. A no so a musu de tu te wi e taki nanga Gado? Boiti dati, Yesus Krestes ben gi wi deki-ati fu gebroiki a nen fu Gado.—Leisi Mateyus 6:9; Yohanes 17:26.

Ma fu man de wan mati fu Gado, dan a no nofo te wi e kon sabi soso a nen fu en. Fu eksempre, sortu fasi Gado abi? A tru taki wi kan tron mati fu Gado? Yu kan feni den piki tapu den aksi dati na ini Bijbel.