Litho tsohle tsa malapa a rōna li na le mabitso. Le liphoofolo tse ruuoang malapeng li na le mabitso! Na ke ho utloahalang hore Molimo a be le lebitso? Ka Bibeleng, Molimo o na le litlotla tse ngata, tse kang Molimo ea Matla ’Ohle, ’Musi Morena le ’Mōpi, empa o boetse o na le lebitso.—Bala Esaia 42:8.

Liphetolelong tse ngata tsa Bibele lebitso la Molimo le hlaha ho Pesaleme ea 83:18. Ka mohlala, Phetolelong ea Lefatše le Lecha ea Mangolo a Halalelang, temana eo e re: “Uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle.”

Molimo o rata hore re sebelise lebitso la hae. Re bitsa batho bao re ba ratang ka mabitso ha re bua le bona, ba kang metsoalle ea rōna e haufi-ufi—haholo-holo haeba ba thabela ha re ba bitsa ka ’ona. Na re lokela ho etsa se fapaneng ha re bua le Molimo? Ho phaella moo, Jesu Kreste o ile a re khothalletsa ho sebelisa lebitso la Molimo.—Bala Matheu 6:9; Johanne 17:26.

Leha ho le joalo, e le hore re be metsoalle ea Molimo re lokela ho mo tseba eseng re tsebe lebitso la hae feela. Ka mohlala, Molimo o joang? Na ha e le hantle re ka khona ho atamela ho Molimo? U ka fumana likarabo tsa lipotso tseo ka Bibeleng.