Hanma or u hen tsombor wase cii nan ngu a iti i nan. Aniwaav je kpa mba a ati! Nahan ka a inja u Aôndo yô una lu a iti ga zee? I yila Aôndo sha atiatom ken Bibilo kpishi, er Aôndo Uhembanagee man Ter Uhembancii kua Orgbanakaa nahan. Nahan cii kpa, Aôndo shi ngu a iti na kpôô kpôô kpaa.—Ôr Ekesodu 6:3.

Ken mbamgem mba Bibilo kpishi, i nger iti i Aôndo kpôô kpôô la ken Pasalmi 83:18. U tesen ikyav yô, ken Bibilo i i yer ér New World Translation of the Holy Scriptures la, i kaa ken ivur la ér: ‘We, u i yer iti You er Yehova la, i lu We tseegh U lu Uhembansha sha tar cii yô.’

Aôndo soo ér se yilan un sha iti na. Ka sea lamen vea azende a ase a kôôsôô yô, se yilan ve sha ati a ve. Nahan shighe u se lu lamen a Aôndo yô, doo u se yila un sha iti na ga he? Heela tseegh ga, Yesu Kristu kpa yange tese er i doo u se yilan Aôndo sha iti na yô.—Ôr Mateu 6:9; Yohane 17:26.

Nahan cii kpa, gba u se fa kwagh u Aôndo ve se fatyô u hingir ijende na ye, a lu iti na tseegh ga. U tesen ikyav yô, Aôndo ngu nan jimi? Or a fatyô u kporom hen Aôndo je kpa? U fatyô u zuan a mbamlumun sha mbampin mban ken Bibilo.