Roṱhe ri na madzina. Na zwifuwo zwashu zwa hayani ri a zwi fha madzina! Naa a zwi pfali uri Mudzimu na ene a vhe na dzina? Bivhilini, Mudzimu u na madzina-zwao manzhi, a ngaho Mudzimu Ramaanḓaoṱhe, Murena Muvhusahoṱhe, na Musiki, fhedzi u dovha a vha na dzina ḽawe.—Vhalani Yesaya 42:8.

Ṱhalutshedzelo nnzhi dza Bivhili dzi na dzina ḽa Mudzimu kha Psalme ya 83:18. Sa tsumbo, kha New World Translation of the Holy Scriptures, yeneyo ndimana i ri: “Iwe ane dzina ḽau ḽa pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.”

Mudzimu u ṱoḓa ri tshi shumisa dzina ḽawe. Ri shumisa madzina musi ri tshi amba na vhane ra vha funa, u fana na musi ri tshi amba na khonani dzashu dza tsini—zwihuluhulu arali vha si na thaidzo ya u vhidzwa nga dzina. Naa a ro ngo fanela u ita nga u ralo musi ri tshi amba na Mudzimu? Zwiṅwe hafhu, Yesu Kristo o ṱuṱuwedza vhathu uri vha shumise dzina ḽa Mudzimu.—Vhalani Mateo 6:9; Yohane 17:26.

Naho zwo ralo, u itela u vha khonani ya Mudzimu, ri fanela u ḓivha zwo engedzeaho nga hae, hu si dzina ḽawe fhedzi. Sa tsumbo, Mudzimu u hani? Naa zwi nga konadzea zwa vhukuma u sendela tsini na Mudzimu? Ni nga wana phindulo dza dzenedzi mbudziso Bivhilini.