Tuláakal máak yaan u kʼaabaʼ. Yaan horaeʼ tak tiʼ le baʼalcheʼob ku tsʼaʼabal u kʼaabaʼoboʼ. ¿Kux túun Dios? ¿Máasaʼ kʼaʼabéet xan yaan u kʼaabaʼ? Teʼ Bibliaoʼ jejeláas bix u yaʼalaʼal tiʼ Dios: u Diosil tuláakal páajtalil, Yuumtsil, Máax beetmil tuláakal baʼal; baʼaleʼ jach u kʼaabaʼeʼ Jéeoba wa Yahveh. (Xok Isaías 42:8.)

Tiʼ yaʼab bibliaʼobeʼ, u kʼaabaʼ Dioseʼ ku chíikpajal xan teʼ Salmo 83:18. Teʼ tekstoaʼ, le Traducción del Nuevo Mundo de las Santas Escriturasoʼ ku yaʼalik: «Teech, a kʼaabaʼeʼ Jéeoba, chéen teech u Sen Kaʼanlil yóokʼol tuláakal le Luʼumaʼ».

Dioseʼ u kʼáat ka k-tʼan tu kʼaabaʼ. Ken tʼaanakoʼon yéetel máaxoʼob k-yaabiltmaj —maʼ xaaneʼ yéetel k-amigoʼobeʼ— k-tʼankoʼob tu kʼaabaʼob, maases wa letiʼob aʼaliktoʼon ka k-beet beyoʼ. Wa k-ilik Dios bey k-amigoeʼ, ¿maʼ wa túun unaj k-tʼanik xan tu kʼaabaʼiʼ? Tsʼoʼoleʼ Jesucristoeʼ tu yeʼesaj jach kʼaʼabéet k-tʼanik Dios tu kʼaabaʼ. (Xok Mateo 6:9; Juan 17:26, LTN.)

Baʼaleʼ utiaʼal k-beetikba u amigo Dioseʼ, maʼ chéen unaj k-ojéeltik u kʼaabaʼiʼ, kʼaʼabéet xan k-ojéeltik máax letiʼ. ¿Bix Dios? ¿Jach wa tu jaajil jeʼel u páajtal k-natsʼikba tu yiknaleʼ? Teʼ Bibliaoʼ jeʼel u páajtal a kaxtik u núukil le kʼáatchiʼobaʼ.