1, 2. a) Ka sádara ídounboun labusenra Satanási lun wéiguadun? b) Kaba íderaguawa lun werederun yarafa lun Bungiu?

ADÜGA lumutiwa Heowá lidan aban manera lun megei wamá wayarafadun lun. Gama lumoun, busenti Satanási lun wasaminarun memegeirun wamani Bungiu. Ani buruguagüda laali iyeeni le lúmagiñebei leyeedunu Ewa lidan fuluri-agei Edén (Agu. 3:4-6). Ani lidan sun dan, ibihati lun hafiñeruni hibe-agei gürigia iyeeni le.

² Ánheinti wagía, mama mosu wéiguadun tidoun lisadaran Satanási, “ladüga subudi wamani luriban laritagun” (2 Ko. 2:11). Lóuchuña ladügün lun wasigirun aban üma le lunbei ladisedagüdüniwa luéi Heowá. Kei wafurendeiruni lidan arütíkulu le lubaragiñebei le, gayarati desidírü wamá buidu lidan luáguti wadagimanu, isebáhari luma iduheguaü. Lidan arütíkulu le warihiba anhein lan wíchiga teknolohía, átuadi, seinsu luma pantaü lidan lilugaarun líderagubadiwa lun wayarafadun lun Bungiu (Sant. 4:8).

3. Ru humá aban hénpulu le arufuduti gayara lan layusurún teknolohía dandu lun buiti kei lun wuribati.

³ Uguñe weyu anuhein sun tuwuyerigu máhina lidan sun fulasu ubouagu. Anhoun wayusura buidu, huutu, gama lumoun anhoun wayusura wuriba, gayarati tagadeiruni wamadagua luma Wáguchi le siélubei. Ru wamá aban hénpulu. Garüdia to haliihaboun guentó abürühóuatu ani afanreinhoua tuguya lau tídehan konputadora. Seriwitu máhina burí to lun wakutihan somu ariñahani o lun wayanuhan hama amu gürigia, ani anihein dan seriwi tan lun isebáharime. Gama lumoun, gayarati hagumeserun gürigia ayusuroun konputadora o amu burí máhina saragu kamá aban bisiu. Añahein burí laburiña bísinisi sumaditiña aba hafiñeragüdüniña gürigia luagu mosu lan gama hamani lagumuhóun máhina le áfuriduti. Anihein aban nibureinti, wéiriti labusenrun aban konputadora fadatu, darí lun aba lan lalugurun aban tídangiñe lani riñón aramudaguarügü lun lagañeinhanu. Ma lanarime libidiounigan aau!

4. Ka ladügübei aban kristiánu lun lígiruni tayusurún konputadora saragu?

 ⁴ Wuribatimati wíchuguni wamadagua luma Heowá lidan peliguru lau wayusurun konputadora o amu burí máhina wuriba o luagu saragu dan. Ariñagati aban kristiánu 30 irumu lau gíriti Huan *: “Subudi numuti ariñaga tan Bíbülia lun wasagarun dan lun wayusuruni lidan weseriwidun lun Heowá, gama lumoun dan le wayanuhan tuagu konputadora, au guánarügü áganibei núniwagua”. Rédeitiha Huan ayusura Internet darí láriebudun. Aba lariñagun: “Éibuha labuchadun nuagu, hénrengutimati meha nun nígiruni nayanuhan o naríagun bideu chátiti ani mama sun dan lun buidu lan bideu burí ligía”. Lun lígiruni luriban échuni le, aba laranserunu konputadora lun téñeguchun lidan lóurate lidin arumuga (aliihoualá Éfesuna 5:15, 16).

5, 6. a) Ka hánibei agübürigu buligasion? b) Ka gayarabei hadügüni agübürigu lun buidu hamá hamadagu hasaanigu?

⁵ Agübürigu, íbini mama lan mosu hagibuagu humá hisaanigu lidan sun le hadügübei, mosu hasubudiruni ida liña lan hayusurunu konputadora. Mígira humaña lun héiguadun lidoun magíaguni, huraraü lánina áfarahani, katei hani máfianu hama hagübüri umadagu ha lídanbaña Internet lúnrügü míchugun hamá lisü ichügü hun. Ánhadün metenirun houn, gayarabei hasaminarun: “Anhein meberesen habéi nagübürigu lau le nadügübei, maribarügü liña”. Hani buligasion hóunigiruniña luéi sun le gayarabei ladisedagüdüniña luéi Heowá, íbini anhein wéinamuraühaña lubéi. Samina humá luagun kaba lan hamuga tadüga aban osu würi lun tóunigiruniña tirahüñü. Mini lan le, íbini lan animaalugu góunigi hamutiña harahüñü luéi peliguru! (Konpararü huméi luma Oseasi 13:8.)

⁶ Íderagua humaña hisaanigu lun hadügün umadaguaü hama kristiánugu ha íchugubaña aban buiti hénpulu, dandu ha nibureingiña kei ha derebuguhaña. Mabulieida huméi megei hamá hisaanigu lun hásügürün dan hama lun héherahan, háhurerun, hawadigimaridun luma lun hayarafadun lun Heowá úara. *

7. Ka uagu busén wabéi lun buidu lan wátuadi?

⁷ “Ida liña basandiragun bungua?” Anihein aban inarüni híruti lanagangiñe álügüdahani le. Kei aba lubéi hígirun furumiñetiña wagübürigu lun ladisedagüdüniña Satanási luéi Heowá, ligía sun lubéi wagía gayarati wasandirun. Gúndaati Satanási dan le wasufurirun, lugundun adügati le lun hénrengu lan weseriwidun lun Bungiu. Ani dan le wounwen, aba siñá lan weseriwidun lun Bungiu (Sal. 115:17). Ligíati, buiti lun wadügüni sun wayaraati lun buidu lan wátuadi luma lun wadiheridun luagu hátuadi wíbirigu lidan afiñeni. *

8, 9. a) Ida luba wadüga lun mafuudun wamá saragu luagu átuadi? b) Ida liña líderaguniwa wakipuruni wagundan?

⁸ Súdiniti lun wakipuruni sun katei lidan lilugaarun. Añahein hagía, wéiritimati háfaagun  lun hayanuhan luagu somu átüürüni, agaranihani o árani sügǘ lau luagu hapurichihani Larúeihan Bungiu. Háfuga saminatiña híderaguña lan amu gürigia ítara, gama lumoun, mabuidunti layanuhóun luagu árani lun lubuidun átuadi o lun hóunigiruni ligaburi haríawagun ni lubaragiñe ni lárigiñe adamuridaguni tidan Luban Wadamuridagun o lidan adamurini. Ka uagu?

⁹ Lugundun le lébunabei wadamuridagun, wafurendeirun luagu Bungiu luma waganwoundagüdüni wagundan, aban lídangiñe igaburi le líchugubei sífiri sandu (Gal. 5:22). Ánhawa ñüdün íchiga adundehani o wayanuhan luagu árani lidan burí ókaasion le, amuriahóuarügü lan yebe wama, adügati lun weferidiruni lébuna wadamuridagun ani gayarati heferidiruni amu hagundan (Rom. 14:17). Mabulieida huméi kada lan gürigia lun desidírü lan libügürü látuadi ani úati lan ni aban gürigia gámati láranina sun sandi. Íbini surusiagu ha buídutimabaña sánditiña, wéiyatiña ani hilá hagía. Ani wadiheridun saragu luagu wátuadi madügünbei lun laganwoundun wabagari (Luk. 12:25). Luagu le aban oubaü, “árani buiti anigi gúndaatu” (Ari. 17:22).

10. a) Ka adügübei lun magadiñe lan gürigia ligibugiñe Heowá? b) Ídaba san buidu lan wátuadi sunsuinagubei?

¹⁰ Ítarameme, maribanti busén wamá lun buidu lan waríawagun. Gama lumoun, mama mosu wáfaagun lun wagidaruni sun lumakün aweiyaduni wawariua, lugundun gayarati larufudun iderebugu lidan wafiñen, inebesei luma magadiñein le múnadagiñeti. Rutu Bíbülia aban hénpulu dan le tariñagun: “Gürigia ha richaguabaña, ítara liña hagaruban kei aban ridi” (Ari. 16:31). Le súdinitimabei lun Heowá ka lan hawuyeri gürigia wagía múnadagiñe wabiti, ani lunti giñe ítara lan warihini (aliihoualá 1 Féduru 3:3, 4). Buiti funa san wáluahan surusia lun operarü lániwa o somu agaranihani le íchuguti wabagari lidoun peliguru lúnrügü magadiñe lan waríawagun? “Ugundani le líchugubei Bungiu” ligía lébunabei magadiñein le inarüniti, meberesenga warumudiri o wátuadi (Neem. 8:10). Lídanrügübei iseri ubóu wadarira lubuidun átuadi ani magadiñegu wagíame kei dan le nibureingidiwa (Hob. 33:25; Isa. 33:24). Lubaragiñe lachülürün dan ligía, líderagubadiwa lichú aau luma afiñeni lun werederun yarafa lun Heowá lidan awanha lan adügei sun wayaraati (1 Tim. 4:8).

11. Ida liña gayara lan aban lan sádara seinsu?

¹¹ Maribanti seinsu, maribanti giñe wabusenrun wagañeiruni lau laruman (Apur. 7:12; Luk. 19:12, 13). Gama lumoun, dísegüda lumutiwa ‘ínsiñeni luagu seinsu’ luéi Heowá (1 Tim. 6:9, 10). ‘Lanarime afuuduni luagu katei lánina ibagari le’, lidan amu dimurei, lanarime idiheri lun wibihini le wemegeirubei lun wawinwandun, gayarati ladügün lun weferidiruni wamadagua luma Heowá. Ligiaméme asuseredubei lau “irisini”, yeeda lumutiña gürigia lun hafiñerun luagu barǘ lan ugundani luma ichouruni le durati (Mat. 13:22). Ígira lumuti Hesusu furangu úati lan ni aban gayarati leseriwidun buidu lun Bungiu luma lun irisini (Mat. 6:24).

12. Ka burí sádara kamaniboun uguñe lun lagañeirún seinsu, ani ida luba méiguadun wamá tidoun?

¹² Aban saminaü charati luagu seinsu gayarati ládaruniwa lidoun turóbuli (Ari. 28:20). Ha busenbaña hagañeirun seinsu furese ani lau lumerengun, aba hagañeihan chika o bolidu o aba hádaragun houngua lidoun alugurahani le ídanbei hagañeira seinsu dan le hebelaagüdün amu lidoun bísinisi ligía, ani belugüdatiña amu burí lílana damuriguaü ñeinhin. Añahein gástatiña saragu seinsu lidan somu bísinisi ladüga hafiñerun luagu hibihiba lan saragu afayeiruahaü. Mígira humá lun ladügün igaaduaü lun heferidiruni húmati. Samina humá buidu: anhein weiri lubéi lubuidun aban katei lun inarüni lan, háfuga iyeeni.

13. Ida liña amu lan ligaburi larihini Heowá lagañeirún seinsu luma ligaburi harihini gürigia ubouaguna?

¹³ Anhein wíchiga “larúeihan luma liricha Bungiu furumiñe”, labinirubei wáfaagun lun wibihini le wemegeirubei sin wadügün katei le mabuidunti (Mat. 6:33; Efe. 4:28). Mabusenrunti Heowá lun woudin adamuridagua lau lanarime lubucha uagu ladüga wawadigimaridun saragu o lun wasigirun asaminara luagun seinsu. Gíbetiña gürigia ubouagu saminatiña ábanrügüñein lan manera lun wagundaarun lau aban ibagari  chóuruti ani darangilati, lagañeirúniwa saragu seinsu. Darí lun hafosuruniña hasaanigu lun hadügüni ligiaméme. Gama lumoun, arufudahati Hesusu mabuidun lan saminaü le (aliihoualá Lúkasi 12:15-21). Mítaran wamá kei Geasí le igaaduabei, saminati yebe gayara lan libihini le labusenrubei lau igaaduaü ani kipuléi lumadagua luma Heowá (2 Uru. 5:20-27).

14, 15. Ka uagu moun lumuti lubéi werederun áluaha ichouruni lidan liseinsun ubóu le? Ru humá aban hénpulu.

¹⁴ Añahein dunuru wéinamutiña ha gíribaña ágila ñaraguatiña ladüga hárügüdün údüraü ha wéiriti hahürü ani mabusenruntiña hígiragüdüniña. Gayarati san lasuseredun lun aban kristiánu ítara? Abahüdahati aban wéiyaali lidan afiñeni gíriti Alex: “Gareidahatina. Dan le námuruduni lagei sabun anhein áfurida lóugiñe le nemegeirubei, aba nadaaruni budéin lun níchuguni le ígiragubei lárigoun”. Gama lumoun, héiguati Alex tidoun aban sádara to adügüboun lun leferidirun saragu seinsu. Aba layusuruni liseinsun tidan burí mágidu to ñein lubéi hagarabahei laburiña bísinisi haseinsun lun laganwoundun, saminati yebe lidan lanme murusun dan gayarahalime lígiruni luadigimari lun leseriwidun kei prekursoru. Eibu dan ábatima lagüragun lungua aturiaha luagu burí oferta luma luagu ida liña lan léibugun luáguti seinsu. Aba layusuruni seinsu le areida láalibei ani afuredeiha ligía lanwoun lun lagañeinhan somu fánreinti tídangiñe somu bísinisi, ladüga según hariñagun aturiahatiña luagu burí katei ligía, liñuruba nege tebegi dugumedu burí tuguya lau lóufudagun. Gama lumoun lubaragiñe liñurun ebegi, rarirügü ligía. Aba lariñagun Alex: “Desidírühadina yebe nibihini niseinsun lárigoun. Según yebe au ánhana lan agurabaha somu dan, liñurayaba lan lebegi”.

¹⁵ Sügüti Alex saragu hati siñati lasaminarun luagun amu katei. Hénrenguti meha lun lun lederaguagüdün lisaminan lidan leseriwidun lun Heowá ani féridi lumuti lidabagu. Gama lumoun, miñurunti lebegi katei burí le ídanbei lagastarei liseinsun. Kei resultóu, féridi lumuti sun liseinsun ani mosu meha lalugurunu luban. Aba lariñagun: “Wéiriti dañu le nadügübei houn niduheñu”. Gama lumoun, furendeiti aban katei súdiniti, aba lariñagun: “Guentó subudi naali le lan íchuguti lafiñen luagu ubóu le lani Satanási, fériditi” (Ari. 11:28). Le linarün katei, wíchuguni wafiñen luagu seinsu le areida wamaalibei, luagu somu bísinisi o luagu iaraani le wawagubei lun wadügün seinsu, wafiñeruña luagu Satanási le “lubungiute ubóu le” (2 Ko. 4:4; 1 Tim. 6:17). Lúmagiñe dan ligía, sensiyutimahali libagari Alex luagu “uganu lánina asalbaruni”. Guentó, dandu ligía kei lufamilian gúndaatimahaña ani buídutimahali hamadagua luma Heowá (aliihoualá Márükosu 10:29, 30).

16. Ida liña lasubudirúniwa pantaü le buídubei luéi le wuribabei?

¹⁶ Anihein katei le uágubei gayara lan wapantahan. Kéiburi ladüga gefentiwa lan luagu Heowá (Her. 9:24). Ínsiñeni le wasandirubei wawougua íderagua lumutiwa lun desidírü wamá buidu luma lun madüraagun wamani lilurudun Bungiu le lánina laruman ibagari. Gama lumoun, ánhawa asaminara súdinitima lan le wasaminarubei o wabara gayarabei wadisedun luéi Heowá (Sal. 138:6; Rom. 12:3).

17, 18. a) Írida humá gürigia ha uágubei layanuhóua tidan Bíbülia ladüga ǘnabugu hamá o ladüga barügua hamá houngua. b) Ka ladügübei aban íbiri lun madisedagüdün lani barüguaü unguaü luéi Heowá?

¹⁷ Tidan Bíbülia daritiwa hénpulu hani gürigia ǘnabugutiña hama gürigia barüguatiña houngua. Biní lumuti Heowá urúei Dawidi luagu láluahani ladundehan lau ǘnabuguni (Sal. 131:1-3). Gama lumoun, bei lumutiña urúeigu barügua tungua kéiburi Nabukodonosoru luma Bélisasarü (Dan. 4:30-37; 5:22-30). Uguñe weyu anihein burí giñe sügǘ le óuchagubaliwa anhein ǘnabugu wabéi. Anihein aban ídehati lidan damuriguaü, 32 irumu lau gíriti Raulu, aba lasansirun lidoun amu damuriguaü. Aba lariñagun: “Saminatina yebe furesebei lan niridún kei wéiyaali lidan afiñeni, gama lumoun sügüti aban irumu miridúntina”. Aba funa san taribadun lanigi Raulu ani samina ligía luagu móuserun hamani wéiyaaña lidan afiñeni lau inebesei  le yuubei lun? Aba funa san mídinhali lan adamuridagua, ígira ítara lun ladisedagüdüni barüguaü unguaü luéi Heowá luma lóundarun? Lun hamuga huguya lan, kaba hamuga hadüga?

¹⁸ Aba laritagun Raulu: “Aliiha numuti sun ariñahani le nadarirun tidan burí wani agumeiraguagüdüni luagu ‘emenigini masaliti’ le uágubei layanuha Ariñawagúni 13:12. Aba gunfuranda nani mosu lan gaguraasun nan ani ǘnabugu aume. Mosu meha nígirun lun laranserunina Heowá”. Aba merederunhaali lan Raulu asaminara luouguoun, aba letenirun lun leseriwidun houn amu, dandu lidan damuriguaü kei lidan apurichihani. Murusun dan lárigiñe, líchuguña aturiahani houn saragu gürigia ani hawanseruña buidu. Ariñagati: “Dan le niridúnbei wéiyaalime lidan afiñeni aban irumu dimí lárigiñe, magurabun numuti yebe. Wéiriti nugundan lidan nani ministeriu, darí lun madiheridunhadina lan luagun katei ligía” (aliihoualá Sálumu 37:3, 4).

19, 20. a) Ka gayarabei wadügüni lun madisedagüdün lániwa katei burí le lánina ibagari luéi Heowá? b) Ka gayarabei wáyeihaniña lun werederun yarafa lun Heowá?

¹⁹ Sun katei le akutiha wamaalibei lidan arütíkulu le luma le ásügürübei gániti aban lúgaaru lidan wabagari. Gúndaatiwa lau aban wamá gefenti luagu Heowá. Ugundani lidan familia luma lubuidun átuadi ligía biama lídangiñe lubuidun burí idewesei le gayarabei weresibiruni lúmagiñe. Gunfuranda wamuti seriwi lan wadagimanu luma seinsu woun lun wagañeihani le wemegeirubei. Subudi wamuti ru lan isebáhari awalidaguni ani seriwi lan teknolohía woun. Gama lumoun, sun katei burí le gayarati ladisedagüdüniwa luéi Heowá ánhawa etenira lun lidan oura le moun lubéi, anhein agidara saragu dan wawéi o ánhawa ígira lun leberesehani wáhuduragun lun Heowá.

²⁰ Chóuruti hínsiñebei lan hamuga lun Satanási lun hadisedun luéi Heowá hau sun hiduheñu. Gama lumoun, gayarati hadügün lun masuseredun lan katei le (Ari. 22:3). Lun masuseredun lan, yarafa humá lun Heowá ani redei humá yarafa lun. Ayanuhatu Bíbülia hawagu saragu gürigia úaraguatiña ha erederubaña yarafa lun Heowá. Sigiti Enoku luma Noé “abagarida lau lugundan Bungiu” (Agu. 5:22; 6:9). “Rédeiti [Moisesi] deregüdagu lidan laritagun kamá hamuga aríagu liña lun Bungiu le marihínbei” (Ebü. 11:27). Íderagua lumuti Bungiu Hesusu súnwandan ladüga ladügüni lugundan (Huan 8:29). Áyeiha huméi hénpulu burí lánina úaraguni le ani sigí huméi adundehani tídangiñeti Bíbülia le: “Gunda humá súnwandan. Afurieida humá lun Bungiu sun dan. Ru humá seremei lun luagu sun le asusereduti” (1 Tesa. 5:16-18). Maweiyasun humá ígira lun ñein lan adisedagüdütün luéi Heowá.