Kontinyen apros avek Zeova
Kontinyen apros avek Zeova
“Apros avek Bondye, e i ava apros avek zot.”—ZAK 4:8.
ESKI OU KAPAB EKSPLIKE?
Ki mannyer nou kapab gard en pwennvi ekilibre lo teknolozi ek lasante?
Ki mannyer nou kapab gard en pwennvi ekilibre lo larzan ek lafyerte?
Ki mannyer nou kapab reste pros avek Zeova?
1, 2. (a) Ki bann “lentansyon” Satan? (b) Kwa ki pou ed nou apros avek Zeova?
ZEOVA ti kre imen avek sa bezwen pour apros avek li. Me, Satan i oule ki nou annan menm pwennvi ki li setadir, ki nou pa bezwen Zeova. Sa i en mansonz ki Satan in promote depi ki i ti tronp Ev par sa menm fason panse dan zarden Edenn. (Zen. 3:4-6) Tou dilon listwar, en kantite imen in fer sa menm fot.
2 Erezman, nou pa bezwen tonm dan latrap Satan parski “nou konn byen son bann lentansyon.” (2 Kor. 2:11) Satan i esey elwanny nou avek Zeova par pous nou pour fer bann move desizyon. Me, parey lartik avan ti montre, nou kapab fer bann bon desizyon konsernan karyer, divertisman ek relasyon dan fanmir. Sa enn lartik pou montre nou konman ki ler nou gard teknolozi, lasante, larzan ek lafyerte dan son plas, sa pou ed nou “apros avek Bondye.”—Zak 4:8.
TEKNOLOZI
3. Eksplike ki mannyer teknolozi i kapab ganny servi dan en bon e move fason.
3 Partou kot ou pase dan lemonn, ou pou trouv bann dernyen model keksoz elektronik. Si i ganny byen servi, sa bann lekipman i kapab itil. Me si i mal ganny servi, zot kapab separ ou avek ou Papa ki dan lesyel. Pran legzanp konpiter. Sa magazin ki ou pe lir ti ganny ekrir e pibliye avek led konpiter. En konpiter i kapab en zouti efikas pour fer resers e kominike e parler i kapab ganny servi konman en bon detant. Me, nou kapab osi vin adikt avek teknolozi ek konpiter. Bann piblisiter i esey konvenk bann dimoun ki zot bezwen ganny dernyen model bann lekipman elektronik. En zenn onm ti telman anvi ganny en serten konpiter ki i ti vann enn son ronnyon an kasyet zis pour kapab arive aste enn. Eski pa i bet pour fer en sakrifis parey!
4. Ki en Kretyen ti fer akoz i ti pe tro servi konpiter?
4 I pli danzere ankor pour sakrifye ou lanmitye avek Zeova par mal servi ouswa pas tro bokou letan avek teknolozi. Jon, * en Kretyen ventwit an i dir: “Mon konn konsey Labib ki dir ‘servi byen tou lokazyon’ pour bann keksoz spirityel. Me an sa ki konsern konpiter, mwan mon mon prop lennmi.” Jon i souvan vwar li ankor lo Internet tar aswar. I dir: “Menm si mon ti byen fatige, i ti difisil pour mwan aret chat ouswa get bann pti video ki pa touzour akseptab.” Pour aret sa move labitid, Jon ti fikse en ler pour son konpiter tenny otomatikman pour li al dormi.—Lir Efezyen 5:15, 16.
5, 6. (a) Ki responsabilite paran i annan anver zot zanfan? (b) Ki mannyer paran i kapab fer sir ki zot zanfan i annan bon frekantasyon?
5 Paran, ou pa bezwen kontrol tou mouvman ou zanfan, me eski ou kapab annan kontrol lo sa ki zot fer lo konpiter. Fer sir ki zot pa al lo bann sit imoral, zwe bann zwe video vyolan, annan akse avek bann pratik demonyak ek bann move frekantasyon zis pour kit zot okipe e pa dan ou lipye. Si ou pa enterese avek sa ki zot pe fer lo Internet kekfwa zot pou mazinen, ‘Vi ki Manmi ek Dadi pa fatig zot, i bezwen ki i oke.’ Konman paran, i ou devwar pour protez ou zanfan, ensi ki ou bann adolesan avek okenn keksoz ki kapab elwanny zot avek Zeova. Menm bann zannimo i protez zot piti avek danze. Mazin sa ki en manman lours ti pou fer si en dimoun ti menas son piti.—Konpar Osea 13:8.
6 Ed ou zanfan pour organiz bann bon aktivite avek lezot Kretyen egzanpler, ki swa zenn oubyen aze. Rapel byen, ou zanfan i bezwen ou pour pas letan avek zot! Alor, fer letan pour riye, zwe, travay e “apros avek Bondye” ansanm. *
LASANTE
7. Akoz nou oule reste an bonn sante?
7 “Ki mannyer ou santi ou?” Sa kestyon i rapel nou ki i pa posib pour annan en lasante parfe dan sa lemonn. Lefet ki nou premye paran ti les Satan elwanny zot avek Zeova, nou tou nou tonm malad. Maladi i al byen avek plan Satan akoz ler nou malad i pli difisil pour nou servi Zeova. Si nou mor, nou pa kapab servi li ditou. (Ps. 115:17) I normal alor, ki nou oule fer tou sa ki nou kapab pour reste an bonn sante. * Nou devret osi konsernen avek lasante ek byennet nou bann frer ek ser.
8, 9. (a) Ki mannyer nou kapab evite tro egzazere konsernan nou lasante? (b) Akoz i byen pour devlop lazwa?
8 Me i vreman enportan pour pa tro egzazere osi. Serten in donn tou pour tou pour promot serten ladyet, tretman ouswa prodwi, menm plis ki pour anons sa bon nouvel Rwayonm. Petet zot senserman krwar ki zot pe ed lezot. Kantmenm sa, i pa apropriye pour promot bann prodwi labote ouswa tretman medikal avan e apre renyon kot Lasal Rwayonm ouswa kot lasanble. Akoz?
9 Nou zwenn ansanm pour koz lo bann keksoz spirityel e pour ogmant nou lazwa, ki en laspe fri lespri sen Bondye. (Gal. 5:22) Ler nou donn bann konsey ouswa ofer bann prodwi medikal dan bann tel rasanbleman, ki swa nou’n ganny demande ouswa non, nou kapab tant pour oubliy rezon akoz nou’n zwenn ansanm e i diminyen lazwa lezot. (Rom. 14:17) Sak dimoun i devret kapab deside ki tretman i pou swazir. Deplis, napa personn ki annan remed pour tou maladi. Menm bann pli bon dokter i vin vye, malad e mor a lafen di zour. Menm si en dimoun i trakase pour son lasante, sa pa pou prolonz son lavi. (Lik 12:25) De lot kote, “en leker ki zwaye i fer lekor dibyen.”—Prov. 17:22.
10. (a) Ki kalite ki zoli pour Zeova? (b) Kan ki nou pou annan en pli bon lasante?
10 Pareyman, i apropriye pour konsernen avek nou laparans. Me, nou pa devret esey fer en kantite zefor pour paret bokou pli zenn ki nou ete. Menm si nou lekor i sanze akoz lavyeyes, sa i kapab endik matirite, dinyite ek labote enteryer. Par egzanp, Labib i dir: “Seve blan i en kouronn labote kan i ganny trouve dan semen ladrwatir.” (Prov. 16:31) Koumsa ki Zeova i vwar nou e nou devret esey vwar nou dan sa menm fason. (Lir 1 Pyer 3:3, 4.) Alor, eski i saz pour fer bann loperasyon danzere ki pa neseser ouswa swiv bann tretman medikal zis pour nou pli atiran fizikman? “Lazwa Zeova” i en sours vre labote ki sorti anndan, nenport ki laz nou annan ouswa kalite lasante. (Nee. 8:10) Zis dan nouvo lemonn ki nou pou kapab annan en lasante parfe e revin zoli parey en zenn. (Zob 33:25; Iza. 33:24) Ziska sa i arive, i byen pour demontre lasazes pratik ek lafwa ki pou ed nou reste pros avek Zeova anmezir nou profit byen nou sirkonstans aktyel.—1 Tim. 4:8.
LARZAN
11. Ki mannyer larzan i kapab vin en pyez?
11 Larzan pa mal dan li menm, e i pa mal osi pour annan en biznes si nou onnet. (Ekle. 7:12; Lik 19:12, 13) Me nouri en “lanmour [pour] larzan” pou sirman elwanny nou avek Zeova. (1 Tim. 6:9, 10) “Traka” dan sa lemonn, ensi ki lenkyetid pour ganny bann nesesite de baz i kapab touf nou spirityelman. Nou osi kapab ganny anbete pour krwar ki “plezir lavi ek larzan,” i kapab anmenn vre boner ek sekirite. (Mat. 13:22) Zezi ti dir klerman ki “personn” pa kapab reisi servi Bondye ek larises.—Mat. 6:24, nou ki’n met an italik.
12. Ki pyez finansyel i annan konmela e ki mannyer nou kapab evit zot?
12 En move pwennvi lo larzan i kapab fer nou fer bann move keksoz. (Prov. 28:20) Bokou in ganny anbete par aste tiket lotri ouswa envestir dan serten biznes pour ki zot ganny larzan vitman e serten in menm trenn lezot dan kongregasyon avek zot. Lezot in les zot ganny anbete pour pret larzan akoz zot ti krwar zot ti pou ganny bann gro lentere. Pa bezwen les vorasite fer ou ganny anbete. Servi bon zizman. Si en zafer i paret pli briye ki lor, pa aksepte.
13. Ki mannyer pwennvi Zeova lo larzan i diferan avek pour lemonn?
13 Kan nou “rod plito Rwayonm Bondye ek son lazistis,” Zeova i beni nou bann zefor ekilibre pour ganny bann nesesite dan lavi. (Mat. 6:33; Efe. 4:28) I pa oule ki nou tonm dormi pandan renyon akoz nou’n travay tro bokou ouswa nou pe asize dan Lasal me pe enkyet larzan. Me pourtan, bokou dimoun dan lemonn otour nou i krwar ki zis ler zot depans tou zot letan pour fer larzan ki zot pou annan en lavenir sir e zot pa pou bezwen enkyet pour larzan plitar. Zot souvan pous zot zanfan pour annan bann lobzektif materyel. Zezi ti montre ki sa fason panse pa realistik. (Lir Lik 12:15-21.) Sa i kapab fer nou rapel Geazi ki ti krwar i kapab voras e kontinyen gard en bon relasyon avek Bondye.—2 Rwa. 5:20-27.
14, 15. Akoz nou pa devret depan lo sistenm finansyel pour santi nou an sekirite? Donn legzanp.
14 Dapre rapor, serten leg in noye apre ki zot pa ti oule larg en pwason ki ti tro lour pour zot anmennen. Eski en keksoz parey i kapab arive avek en Kretyen? En ansyen ki apel Alex ti dir: “Labitid mon fer bokou lekonomi, si mon vid tro bokou sanmpou, mon remet en pe dan boutey.” Me Alex ti konmans vreman preokipe avek son bann lenvestisman dan stock market, akoz i ti krwar ki i ti pou kapab kit son travay e konmans servis pionye. Avek letan, i ti zis etidye konman pour aste e vann bann par dan bann lakonpannyen. I ti servi son larzan labank ensi ki pret larzan avek lezot dimoun pour envesti dan sa bann par lakonpannyen ki bann eksper ti dir son pri ti pou ogmante. Me tou lekontrer ti arive, akoz valer sa bann par ti desann. Alex i rakonte: “Mon ti determinen pour reganny mon larzan. Mon ti mazinen ki si mon gard sa bann par pour ankor en pe letan, son valer ti pou remont ankor.”
15 Pour plizyer mwan, Alex pa ti kapab mazin en lot keksoz. I ti vwar li difisil pour konsantre dan bann keksoz spirityel e i pa ti byen dormi. Me valer sa bann par pa ti zanmen remonte. Alex ti perdi larzan ki i ti’n anmase, e i ti bezwen vann son lakaz. I admet: “Mon’n fer soufer mon fanmir.” Me i ti aprann en leson enportan. “Prezan mon konnen ki nenport ki ki met son konfyans dan lemonn Satan pou sirman dezapwente.” (Prov. 11:28) Si nou met nou konfyans dan larzan ki nou’n anmase, dan nou bann lenvestisman ouswa dan nou abilite pour ganny plis larzan dan sa lemonn, se konmsi nou pe met konfyans dan Satan, ‘bondye sa syek.’ (2 Kor. 4:4; 1 Tim. 6:17) Depi sa zour, Alex in senplifye son lavi akoz son servis pour Zeova. I pou kapab dir ou ki ler i’n fer sa, li ek son fanmir i pli ere e zot in vin pli pros avek Zeova.—Lir Mark 10:29, 30.
LAFYERTE
16. Ki diferans i annan ant sa bon lafyerte ek sa enn move?
16 Sa bon kalite lafyerte i pa mal dan li menm. Par egzanp, nou fyer ki nou en Temwen Zeova. (Zer. 9:24) En bon degre respe pour nou lekor i ed nou pour fer bann bon desizyon e pa abes nou standar moral. Me si nou atas tro bokou lenportans avek nou pwennvi ouswa pozisyon, sa i kapab elwanny nou avek Zeova.—Ps. 138:6; Rom. 12:3.
17, 18. (a) Donn legzanp bann dimoun dan Labib ki ti annan limilite ek bann ki ti orgeye. (b) Ki mannyer en frer pa ti les lafyerte elwanny li avek Zeova?
17 Dan Labib i annan legzanp bann dimoun ki ti orgeye ensi ki bann ki ti annan limilite. Avek limilite, Lerwa David ti rod gidans Zeova e Zeova ti beni li. (Ps. 131:1-3) Me Zeova ti abes Lerwa Neboukadnetsar ek Belsatsar akoz zot ti orgeye. (Dan. 4:30-37; 5:22-30) Ozordi osi nou rankontre bann sityasyon ki teste nou limilite. Ryan, en asistan ministeryel 32-z-an ti al dan en lot kongregasyon. Ryan i dir: “Mon ti pe ekspekte ki byento mon ganny apwente konman ansyen, me en lannen ti pase e sa pa ti arive.” Eski Ryan ti pou ankoler an krwayan ki bann ansyen pa’n demontre li sa respe ki i merite? Eski i ti pou aret asiste renyon e les lorgey elwanny li avek Zeova ek Son pep? Ki ou ti pou’n fer?
18 Ryan i rapel: “Mon ti lir tou sa ki mon ti kapab trouve konsernan nou ekspektasyon ki pa ganny realize dan nou bann piblikasyon.” (Prov. 13:12) “Mon ti konmans realize ki mon bezwen annan pasyans ek limilite. Mon ti bezwen les Zeova form mwan.” Ryan ti aret mazin son prop lekor e konmans mazin lezot dan kongregasyon e dan teritwar. Pa tro bokou letan apre, i ti pe kondwir bann letid Labib ki byen progrese. I dir: “Enn an edmi pli tar, ler mon ti ganny apwente konman ansyen, mon ti sirprann. Mon ti’n aret trakas lo la akoz mon ti vreman kontan mon minister.”—Lir Psonm 37:3, 4. *
RESTE PROS AVEK ZEOVA!
19, 20. (a) Ki mannyer nou kapab fer sir ki bann diferan laspe nou lavi pa elwanny nou avek Zeova? (b) Ki legzanp bann dimoun ki ti reste pros avek Zeova ki nou kapab swiv?
19 Tou bann pwen ki’n ganny diskite dan sa lartik e dan lartik avan i annan son plas apropriye dan nou lavi. Nou fyer ki nou serviter Zeova. En fanmir ere e an bonn sante i parmi bann pli zoli kado Zeova. Nou konpran ki larzan ek nou lanplwa i kapab ed nou pran swen avek nou bann nesesite. Nou konnen ki bann bon detant ek teknolozi i annan en plas dan nou lavi. Me si nou tay deryer sa bann keksoz plis ki fodre e dan en letan ki pa apropriye oubyen dan en fason ki i enterfer avek nou ladorasyon, zot kapab elwanny nou avek Zeova.
20 Byensir, Satan i oule ki sa i arive. Me, ou kapab anpes sa maler tonm lo ou ek ou fanmir. (Prov. 22:3) Apros avek Zeova e reste pros avek li. I annan en kantite legzanp dan Labib ki ed nou dan sa domenn. Enok ek Noe ti “mars avek sa vre Bondye.” (Zen. 5:22; 6:9) Moiz ti “reste ferm konmsi i ti pe war sa enn ki envizib.” (Ebr. 11:27) Zezi ti touzour annan sipor Bondye akoz i ti touzour fer sa ki fer plezir son Papa ki dan lesyel. (Zan 8:29) Imit sa bann legzanp. “Rezoui tou letan! Priye tou letan! Dan tou sirkonstans remersi Bondye.” (1 Tesa. 5:16-18) Pa les nanryen elwanny ou avek Zeova!
[Not anba lo paz]
^ par. 4 Non in ganny sanze.
^ par. 6 Vwar “How to Raise Responsible Children” (Konman pour elve bann zanfan responsab) dan Awake! Oktob 2011.
^ par. 7 Vwar “Five Keys to Better Health” (Senk keksoz pour reste an bonn sante) dan Awake! Mars 2011.
^ par. 18 Psonm 37:3, 4: “3 Met ou konfyans dan Zeova e fer sa ki byen; Reste lo later e azir avek fidelite. 4 Pran bokou plezir dan Zeova, e i pou donn ou sa ki ou leker i demande.”
[Kestyon]
[Portre lo paz 17]
[Portre lo paz 18]
Paran, ed ou zanfan pour byen servi teknolozi
[Ekstre lo paz 21]
Pa les nanryen elwanny ou avek Zeova!
[Portre lo paz 21]
Olye atoupri rod pozisyon dan kongregasyon, apresye ou minister!
