1, 2. (1) ¿Kasa jülüjeeka waaʼin nutuma Satanaa? (2) ¿Kasa waaʼinrajatka süpüla warütkaain nünainmüin Maleiwa?

NUKUMAJÜIN waya Jeʼwaa süpüla warütkaainjanain nünainmüin. Akaisaʼa Satanaa keeʼireesü naaʼin jülüjüinjatüin waaʼin nnojolin choʼujaain wamüin Jeʼwaa. Nüküjatüjülia tia wanaa sümaa nimeejüin Eva otta wainmairü tü wayuu anoujakat sünain tü alawaa nümakat (Gén. 3:4-6).

² Aluʼusaʼa wayakana, nnojoishii süpüla nimeejüin Satanaa süka ‹eein waaʼin sünain tü mojusü naaʼinreekat waka› (2 Cor. 2:11). Naainjireein waya Satanaa kasa mojusü süpüla wakayalaain nuulia Jeʼwaa. Wekirajaaitpa anain eein süpüla pejein waya nünain Maleiwa anale watuma süneekia wanee aʼyatawaa, ashaittaa otta wakuwaʼipa sümaa wapüshi. Wekirajaainjatü joo anain walaüleʼerüinjatüin waaʼin suulia sumojujüin wakuwaʼipa tü computadorkot sümaa Internet, tü ayuuliikat, tü nneetkat otta tü aʼwaatawaakat suluʼu akuwaʼipaa. Müle shia watuma, arütkaajeena waya nünainmüin Maleiwa (Sant. 4:8).

3. Püküja süchiki tü kasa jalouikalü atuma wanee computador jee tü nnojotkalü jaloulin atuma shia.

³ Joutsü maʼin maaʼulu computador, serulaat, DVD otta waneeirua kasa. Jalouijeerü shia nümüin wanee wayuu anale sukuwaʼipa nutuma. Mojule sukuwaʼipa watuma, mojeerü wakuwaʼipa nümaa Jeʼwaa. Jülüja waaʼin tü jalouikat apüla wanee computador. Aainjuushi rewiisütakat tüü sükajee wanee computador. Eeshii süpüla wekirajaain sünain wanee kasa sükajee wanee computador jee waashajaain sümaa wayuu suluʼu. Otta eeshii weʼrajüle jee washaittüle wanee kasa suluʼu. Eeshii na wayuu achajaakana maʼin sukuwaʼipa süpüla namaʼanain wanee computador. Na akumajüliikana computador, nemeʼejüin naaʼin na wayuukana süpüla namaʼanainjatüin wanee computador jeketka ojuʼitüin. Eeshi wanee jimaʼai kamaʼaneeka maʼin wanee computador, nuikkaka ojuunaa suwalaʼata nüchüʼü süpüla niyaʼlajüinjatüin shia. ¡Malaa neʼe tia!

4. ¿Kasa naaʼinraka Juan suulia naaʼinmaain tü computadorkot?

 ⁴ Mojuleesia maʼin sumojujaale wakuwaʼipa nümaa Jeʼwaa sutuma waaʼinmaain wanee computador jee waainjüin kasa mojusü suluʼu. Müshi wanee anoujüshi kanüliakai Juan, * eeirü maʼaka saaʼin apünüin shikii nuuyase: «Tatüjaa aaʼu takatalüinjachin kaʼi süpüla aʼyatawaa nümüin Maleiwa saashin tü Wiwüliakat, akatsaʼa isain tachiki sutuma tü computadorkot. Mapüsale maʼin taya, ayatshia taya sünain aluwatawaa mensaaje suluʼupünaa Internet otta sünain eʼrajaa video eekai nnojoluin anain maʼin». Jaʼitairü kaʼlein aikka naaʼu, ayatshia Juan sünain Internet. Süpüla nuuʼulaain suulia tia, niʼitaain suluʼu tü nucomputadorsekat shiyokojooinjatüin soʼu tü oora niisalaainjatkalü oʼu (paashajeʼera Éfeso 5:15, 16, NM).

5, 6. (1) ¿Kasa naaʼinmajüinjanaka oulia nachonnii na anoujüshiikana? (2) ¿Kasa waaʼinrajatka süpüla aleewain wachonnii namaa na wawalayuu anakana akuwaʼipa?

⁵ Jiakana kachonshiikana, nnojotsü choʼujaain nachiiruaakuʼu namüin jia jüchonnii, shia choʼujaaka jütüjaain saaʼu tü naainjakat suluʼu computador. Süpüla eeinjatüin tü kasa naainjakat na jüchonniikana otta nnojoliinjanain nekeʼejüin jaaʼin, nnojo juuʼulaain naya sünainpünaain kasa yarüttüsü suluʼu Internet, ashaittaa kasa eekai mojuin, tü naainjakat na outshiikana otta na wayuu mojukana süpüla naʼaleewain. Jaainjüle tia, eeshii süpüla namüin naleʼeruʼu: «Anasüjaʼa mata, müshiijeseʼe yüütüin naya toulia». Jaaʼinmajüinjana na jüchonniikana suulia tü kasa akayaleʼereekat naya nuulia Jeʼwaa, jaʼitainna jimaʼaliin otta majayünnüüin naya. Jaʼitakajeʼe wanee jeesü saaʼinmajüin süchonnii suulia kasa mojusü. (Puʼwanaajireʼera sümaa Oseas 13:8.)

⁶ Jükaaliinja jüchonnii süpüla aleewain naya namaa na wawalayuu anakana akuwaʼipa, eekai jimaʼaliin otta miyoʼuyuuin. Soto jaaʼin choʼujaain jükatalüin kaʼi süpüla jüshaittüin, jiʼyataain otta jürütkaain nünainmüin Jeʼwaa namaa jüchonnii. *

7. ¿Jamüshii wachajaaka sukuwaʼipa süpüla nnojoluin ayuulin waya?

⁷ «¿Jamayaa paaʼin?». Münüshii waya wanaa sümaa ayuulin waya. Ayuuishii waya sutuma nükayaleʼennüin Adán sümaa Eva nutuma Satanaa. Ayuuire waya, talatsü naaʼin Satanaa süka kapüleejeerüin wamüin waʼyataain nümüin Jeʼwaa jee ouktüle waya nnojoishii süpüla waʼyataainjanain nümüin (Sal. 115:17). Müsüjeseʼe wachajaain sukuwaʼipa süpüla nnojoluin ayuulin waya otta wakaaliinjeein na wawalayuukana süpüla nnojoliin ayuulin naya. *

8, 9. (1) ¿Kasa waaʼinrajatka süpüla waaʼinmajüin wakuwaʼipa suulia waaʼinmaain aneein waya? (2) ¿Jameena waya talatüle waaʼin?

⁸ Eeshii na aashajaakana waneepia süchiki tü  ekünajatkat, tü wunuʼu asünajatkat jee shiale tü nipinaseinjatkat wanee wayuu. Alanaʼaleesia tia natuma suulia aküjaa pütchi süchiki Nuluwataaya Maleiwa. Naainjüin tia sükajee nakaaliinjüin wayuu naküjainruʼu. Waaʼinmajüinjatü wakuwaʼipa suulia waaʼinrüin tia. Woʼunüle sünain tü outkajawaakat jee shiale sünain tü outkajawaakat miyoʼu, nnojotsü anain waashajaale süchiki tü wunuʼu asünajatkat jee shiale tü nipinaseinjatkat wanee wayuu. ¿Jamüsü?

⁹ Tü outkajawaakat süpülajatü waashajaain süchiki tü anoujaakat jee talatüin maʼin waaʼin sutuma tü kasa eekat nutuma chi naaʼinkai Maleiwa (Gal. 5:22). Mojuteerü wamüin tü wanoulakat jee nnojoleerü talatüin maʼin naaʼin na waneeinnua, waashajaale sünain tü outkajawaakat süchiki tü wunuʼu asünajatkat otta tü nipinaseinjatkat wanee wayuu (Roma 14:17). Soto waaʼin nayainjanain aneekaka na wayuukana tü wunuʼu nasüinjatkat otta tü nepinaseinjatkat. Nnojotsü jaralüin kamaʼanain tü shipinaseinjatkat wanee ayuulii. Jaʼitakajeʼe na tottootkana, laülaashii, ayuuishii jee ouktüshii naya mapa. Shapaale maʼin waaʼin sünain tia ‹nnojoleerü kasain saapüin wamüin süpüla epijawaa› (Luc. 12:25). Otta müsia «talatüle naaʼin wanee wayuu, aneechi nia» (Prov. 17:22).

10. (1) ¿Kasa anaka maʼin atuma wayolojo noʼuluʼu Jeʼwaa? (2) ¿Joujeena anaka waya jee anaka wayolojo?

¹⁰ Nnojotsü mojuin keeʼireere waaʼin anain wayolojo. Akatsaʼa nnojoluinjatüin wachajaain maʼin sukuwaʼipa süpüla wounjulajüin laülaainnapain waya. Jaʼyale waaʼu laülaainnapain waya, kojuteena waya atumawaa otta nnojotsü wamojulain shia. Müsü tü Wiwüliakat: «Kojutshi chi wayuu kakasuulakai lotule nukuwaʼipa» (Prov. 16:31). Müsü wakuwaʼipa noʼuluʼu Jeʼwaa otta müinjatia shia woʼuluʼu (paashajeʼera 1 Pedro 3:3, 4). Sünainjee tia, nnojotsü anain wawaʼnnüle jee wasajüle wunuʼu shiiʼiree anain maʼin wayolojo süka eein süpüla sülatüin wamüin kasa mojusü. Tü anakalü atuma wayolojo shia talatüin waaʼin nutuma Jeʼwaa. Jaʼitainna laülaain jee tepichin waya; anain jee ayuulin waya (Neh. 8:10). Waneʼereʼeya anain waya sümaa anain wayolojo suluʼu tü Paʼaraiisükat (Job 33:25; Is. 33:24). Sümaʼinruʼu waʼatapajüin tia, kekii waya sümaa kanoulain waya süpüla pejein waya nünain Jeʼwaa otta jülüja waaʼin tü wakuwaʼipakat maaʼulu (1 Tim. 4:8, NM).

11. ¿Jamüshii eeka süpüla wakayalaain nuulia Maleiwa sutuma tü nneetkat?

¹¹ Nnojotsü mojuin tü kanneetseekat, nnojotsü mojuin waʼyateʼerüle tü wanneetsekat sümaa anain sukuwaʼipa watuma (Ecl. 7:12; Luc. 19:12, 13). Akatsaʼa ‹weʼitaale waaʼin sünain nneerü›, sükayaleʼereena waya nuulia Jeʼwaa (1 Tim. 6:9, 10). Eesü süpüla sümalajaain wanoula sutuma ‹shapaain waaʼin saaʼu tü katüinjatkat atüma woʼu›. Otta alatsia tia nümüin chi wayuu eekai «kachiiruain maʼi naaʼin washirüü, tü nnojotkat kaluʼuin talataa» (Mar 4:19). Naashin Jesuu, nnojoishi jaralinjachin aʼyataain nümüin Maleiwa sümaa kachiiruain naaʼin washirüü (Mat. 6:24).

12. ¿Kasa naaʼinraka waneeinnua wayuu süpüla washirüin maalü naya? ¿Kasa waaʼinrajatka süpüla wayouktüin tia?

¹² Nnojorüle anain tü jülüjakat waaʼin süchiki tü nneetkat, eeshii süpüla waainjüin kasa mojusü (Prov. 28:20). Shiiʼiree washirüin maalü waneeinnua wawalayuu, nayaʼlajüin loteriia jee nashajirüin sünülia wanee wayuu suluʼu konpainyiia shiiʼiree nakanajüin nneerü sünainjee. Otta naküjüin namüin waneeinnua wawalayuu süpüla naainjüinjatüin tia. Otta eeshii na wawalayuu emeejünakana süka süküjünüin namüin wainmeerüin tü nneerü nakanajakat. Kekii waya süpüla nnojoluin wemeejünüin sutuma keeʼireein waaʼin washirüin waya. Anale maʼin pütchi süchiki wanee aʼyatawaa, alawaa neʼe tia.

13. ¿Jamüsü naataka tü jülüjakat naaʼin Jeʼwaa süchiki tü nneetkat suulia tü jülüjakat naaʼin na wayuukana?

¹³ Palajanale watuma «nuluwataaya Maleiwa  sümaa tü lotookalü akuwaʼipaa», nükaaliinjeena waya süpüla wousütüin anain tü choʼujaakat wamüin (Mat. 6:33, NM; Éf. 4:28). Nnojotsü nücheküin watunküin sünain tü outkajawaakat sutuma mapüsain maʼin waya jee shapaain maʼin waaʼin süchiirua tü nneetkat. Naashin na wayuukana, kachiiruainjatü maʼin waaʼin tü washirüükat süpüla nnojoliinjanain müliain waya mapeena otta napüleerua aaʼinchii nachonnii süpüla naaʼinrajatüin tia. Maaʼin aaʼinchi wanee wayuu jülüjüle naaʼin tia naashin Jesuu (paashajeʼera Lucas 12:15-21). Nnojo washatüin nukuwaʼipa Guehazí, chi washireekai maʼin sümaa aleeweein nia nümaa Jeʼwaa (2 Rey. 5:20-27).

14, 15. ¿Jamüsü mojuka weʼitaale waaʼin sünain tü nneetkat? Püküja süchiki tü alatakat nümüin wanee wawala.

¹⁴ Eeshi warulapai eekai wüinsirüin sutuma nnojoluin nüjütüin süchiki wanee jime eeka miyoʼuin maʼin. ¿Eesüche süpüla müin nukuwaʼipa wanee anoujüshi? Müsü nünüiki Alex, wanee wawala laülaashi suluʼu outkajaalee: «Keisalashi maʼin taya sümüin wanee kasa. Wanaa sümaa sülanaʼaleein tatuma tü chanpuukot, toʼyotuin süchikuaʼa suluʼu tü sütakat». Akatsaʼa keeʼireein naaʼin niʼyataain sünain ayaʼlajaa jee oikkaa suwashirüin konpainyiia. Naainjüin tia shiiʼiree nuuʼulaain suulia tü niʼyataainkat süpüla pürekutsoolin nia. Shia naaʼinmaaka maʼin tü aküjünakat eere suikkaanüin jee shiyaʼlajünüin suwashirüin konpainyiia. Süka tü nneerü nünaajakat paala otta tü nujuyaajakat noulia na aʼyataakana sünain tia, niyaʼlajüin suwashirüin wanee konpainyiia süka walaajeerüin shia mapa. Nnojotsü alatüin tia; ajayajaasü maʼin neʼe. Müshi Alex: «Nnojotsü amülouilinjatüin tanneetse. Shia jülüjaka neʼe taaʼin walaainjatüin shia süchikuaʼa».

¹⁵ Shia neʼe jülüjaka naaʼin Alex tia. Nnojotsü jülüjüin naaʼin tü aʼyatawaakat nümüin Maleiwa otta matunküinsai nia sutuma. Ayatsia jayain tü niyaʼlajakat paala Alex, makalaka amüloulin tü nünneetsekat otta nuikküin tü nipiakat. Müshi nia: «Taya kasitka müliain na tapüshikana, akatsaʼa tatüjaaitpain aaʼu mülieechin wanee wayuu niʼitaale naaʼin sünain tü nuluwataakalü aaʼu Satanaa» (Prov. 11:28). Weʼitaale waaʼin sünain tü nneerü wamaʼanakat otta tütüle waya süpüla akanajaa nneerü maaʼulu, nia weʼitaaka anain waaʼin «chi aluwataakai saʼaka wayuu manoujainsat» (2 Cor. 4:3, 4; 1 Tim. 6:17). Sünainjee tia, nnojoluitpa kachiiruain naaʼin Alex kamaʼanaa wainma kasa otta shiaitpa kachiiruaka naaʼin tü aküjaakat süchiki tü pütchi anasükat. Maaʼulu yaa, talatsü maʼin naaʼin sümaa nüpüshi otta anasü maʼin nakuwaʼipa nümaa Jeʼwaa (paashajeʼera Marcos 10:29,30).

16. ¿Jamüsü naataka talataa aaʼin suulia aʼwaatawaa suluʼu akuwaʼipaa?

¹⁶ Nnojotsü mojuin talatüle waaʼin sünain waneeirua kasa. Maʼaka talatüin waaʼin süka waküjüliin pütchi nüchiki Jeʼwaa (Jer. 9:24). Kojutüle wamüin wakuwaʼipa, aneerü süneekia watuma tü waaʼinrajatkat otta nnojoleerü wamojujüin wakuwaʼipa. Waʼwaataale suluʼu wanüiki jee waʼyataain, eeshii süpüla wakayalaain nuulia Jeʼwaa (Sal. 138:6; Roma 12:3).

17, 18. (1) Püküja jaraliin na wayuu aʼwaataakana suluʼu nakuwaʼipa otta na nnojoliikana pülayaain aaʼin. (2) ¿Kasa naainjaka wanee wawala süpüla nnojolin nuuʼulaain suulia anoujaa?

¹⁷ Aashajaasü tü Wiwüliakat nachiki waneeinnua wayuu aʼwaataakana suluʼu nakuwaʼipa otta na nnojoliikana aainjüin shia. Anasü nukuwaʼipa David nutuma Jeʼwaa süka nuchuntüin kaaliinwaa nümüin (Sal. 131:1-3). Akatsaʼa süsalain naainjala Nabucodonosor nümaa Belsasar süka naʼwaataain suluʼu nakuwaʼipa (Dan. 4:30-37; 5:22, 30). Eesü sülatüle wamüin kasa weeʼiyatüinjatka anain nnojoluin pülayaain waaʼin. Raúl, nia wanee wawala okolojookai suluʼumüin wanee outkajaalee, aʼyataashi nia neʼipajee na laülaashiikana; 32 nuuyase. Müshi  nia: «Aneekünamaatüinjachia taya taaʼinruʼu süpüla laülaashinjachin taya, alatsü wanee juya sümaa nnojoluin sülatüin tia». ¿Jashicheeiche Raúl süka mojutüin nia nüküjainruʼu namüin na laülaashiikana? ¿Ooʼulaajeeiche nia suulia tü anoujaakat nünain Jeʼwaa sutuma pülayaain naaʼin? ¿Kasajeʼe paainjaka?

¹⁸ Müshi Raúl: «Taashajeʼerüin süpüshuaʼa tü sünainpünaakat tü sümakat Proverbios 13:12. Tayaawata aaʼu nnojoluinjatüin shapaain sümaa pülayaain taaʼin. Nnojotsü mojushiinjatüin tamüin nunoukteʼerüin takuwaʼipa Jeʼwaa.» Nnojotsü jülüjüin naaʼin Raúl tü nukuwaʼipakat shia jülüjaka naaʼin nükaaliinjüin na nuwalayuukana otta aküjaa pütchi. Sutuma tia, kojuyamaatüshii na wayuu nikirajakana sünain tü Wiwüliakat. Müshi nia: «Sülatapa wanee juya shiatapünaamüin, ainkalaa müsü taaʼin taneekünüin süpüla laülaashinjachin taya. Nnojotsü jülüjüin maʼin taaʼin süka shiain taaʼinmaain tü aküjaakat pütchi» (paashajeʼera Salmo 37:3, 4).

19, 20. (1) ¿Kasa waaʼinrajatka süpüla nnojoluin wakayalaain nuulia Jeʼwaa sutuma wanee kasa eekai anain? (2) ¿Jaralii na washatüinjanakana akuwaʼipa süpüla pejein waya nünain Jeʼwaa?

¹⁹ Süpüshuaʼa tü wekirajaakalü anain sünain ekirajaayakat tüü otta tü wanee, sünainpünaasü shia tü wakuwaʼipakat. Talatsü waaʼin sutuma waküjüliin pütchi. Nüsülajala wamüin Jeʼwaa talatüin waaʼin sümaa wapüshi otta anain waya. Wayaawata aaʼu choʼujaain waʼyataain otta kanneetsein waya. Watüjaa aaʼu talatüin waya sutuma washaittüin otta eein tü kasa jalouikat apüla tü computadorkot. Akatsaʼa eein süpüla sükayaleʼerüin waya müleka shiale waaʼinmaain, walatirüle wainma kaʼi sünain otta wooʼulaale sumojujeʼerüin wanoula.

²⁰ Shia nüchekaka maʼin Satanaa pükayalaain nuulia Jeʼwaa sümaa püpüshi. ¿Puuʼulaajeerü sülatüin tia? (Prov. 22:3.) Pürütkaa nünainmüin Jeʼwaa otta nnojo pükayalaain nuulia. Wainma na wayuu aainjakana tia saashin tü Wiwüliakat. Enoc nümaa Noé, «wanaawajiraasü naaʼin waneepia nümaa Maleiwa» (Gén. 5:22; 6:9, 10). Ayatshia Moisés «jülüjain naaʼin waneepia chi Maleiwakai, mayaashije nnojolin niʼrüin [nia]» (Heb. 11:27). Nnojoishi ooʼulaanüin nümüiwaʼa Jesuu nutuma Maleiwa ‹süka naaʼinrüin weinshi tü kasa talatakat atüma naaʼin› (Juan 8:29). Naya anaka süpüla püshatüin akuwaʼipa. ‹Talata jaaʼin waneepia. Jüchunta nümüin chi Maleiwakai waneepia. Jaapa analuʼut nümüin.› (1 Tes. 5:16-18.) Nnojo pükayalaain nuulia Jeʼwaa sutuma wanee kasa.