1, 2. (a) “Magano” musinke ga kara nago Satana? (b) Yisinke nayi vhura kutuvatera tu hedere Karunga pepi?

JEHOVA KARUNGA kwa tu unga tu hedere pepi nendi. Nye Satana kuna hara tu pure asi ose kapi twa hepa Jehova. Yimo ngorooro Satana ga kumbagerere Eva mosikunino saEdeni. (Gen. 3:4-6) Dogoro nanaina vantu wovanzi kwa va kumbagera Satana.

² Ose kapi tatu gwire mosiraha saSatana. Morwa “magano gendi twa ga diva.” (2 Kol. 2:11) Satana kuna hara kutugusa ko kwaJehova pokututumangeda tu ture po matokoro gomadona. Nye sirongwa sa ka pita, kasi likidire asi ose kuvhura kutura po matokoro gomawa kuhamena yirugana noyilihafeso ntani mepata. Sirongwa esi tasi ka likida omu kukara nomutaro gomuwa kuhamena ukonentu nouhaku noyimaliwa nomfumwa nayi vhura kutuvatera tu ‘hedere Karunga pepi.’—Jak. 4:8.

3. Faturura omu yikwakonentu nayi tu retera uwa ndi udona.

³ Mouzuni mudima yikwakonentu kuna kuligwederera. Ayo yiruganeso yoyiwa nsene tu yi ruganesa monaruwa. Nsene tu yi ruganesa momudona kuvhura yi tu guse ko kwaGuhyetu gemeguru. Tu tarurureni kuhamena kompiuta. Sifo esi ono kuresa kwa si tjanga nokusinduruka pokuruganesa nokompiuta. Kuvhura kuruganesa kompiuta o papare nombudi ndi o zogere novakweni ndi o gwane ko yilihafeso. Nye kuvhura tu kare vapika wonokompiuta. Vatjingisi kuzeda vantu va rande yikwakonentu yoyipe. Mumati gumwe kwa here sili unene kompiuta zompe age kwa randesere mokahore-hore ngera zendi zimwe a ka rande kompiuta ozo zompe. Olyo kwa kere etokoro lyedona.

4. Yisinke ga rugene mudinkantugara gumwe mokuhagekesa po nkareso zendi zokuhara unene kompiuta?

 ⁴ Ayo siponga unene o zumbanese elikwatakano lyoge naJehova morwa kuruganesa momudona yikwakonentu. Jon mudinkantugara goMukriste kwa tente asi: “Na yi diva asi Bibeli kwa tanta asi ‘nkenye karuwo tuna gwana tu ka ruganese nawa.’ * “Nye ame ngani kara siruwo sosire kokompiuta.” Jon pamwe nga ruganesa kompiuta dogoro masasiku. Age kwa tente asi: “Nampili ngomu ngani lizuvhu eroroko, ngayi digopere nge kuhageka kuzogera novakwetu kokompiuta ndi kutarera novidiyo.” Eyi ya mu vatetere a hageke nkareso ezi, age kwa tulire kompiuta zendi zi lidimise zene nsene siruwo sendi sokurara sina siki mo.—Resa Vaefeso 5:15, 16.

5, 6. (a) Situmbukira musinke va kara naso vakurona kovana vawo? (b) Ngapi vakurona nava divilisa asi vana vawo vana kara novakaume wovawa?

⁵ Vakurona, kapisi hepero mu pangere vana veni mwankenye eyi vana kurugana, nye mwa hepa kutarera eruganeso lyawo lyokompiuta. Mwa ha va sigilira va tarere yininke yoruhonda, yonyanya, youmpure ndi va zogere novakaume wovadona kokompiuta. Nsene mu va sigilira ngava gazara asi: ‘Oyina notate kapi vana kutupakera mbili, kuvhura tu ruganese kompiuta nkenye omu.’ Vakurona, aso kuna kara situmbukira seni sokupopera vana veni kwankenye eyi nayi va gusa ko kwaJehova. Nampili yikorama kukunga vana vayo kosiponga. Gazara tupu eyi nali rugana erundu nsene gumwe a hara kukwata munalyo.—Hetakanesa Hoseya 13:8.

⁶ Vatera vana woge va tulise po ukaume wouwa noVakriste wosihonena sosiwa, vadinkantu ndi vakondi. Ntani diworokeni asi vana veni vana hara mu litulire po siruwo sokukara kumwe nawo. Litulireni po siruwo sokuzora nokudana nokurugana kumwe ntani ‘nokuhedera Karunga pepi.’ *

7. Morwasinke natuvenye atu kondjere tu kare vakanguki?

⁷ Natuvenye kuvera, morwa Adamu naEva kwa pulisilire Satana ava guse ko kwaJehova. Apa atu vere kutudigopera kukarera Jehova, ano Satana yimo ga yi harera. Ano nsene tu fa, kapi tatu vhuru kukarera Jehova. (Epis. 115:17) Yiyo nye atu kondjere tu kare vakanguki. * Ntani twa hepa kupakera mbili ukanguki noukalinawa wovanavazinyetu.

8, 9. (a) Ngapi natu nyokera po kukara nosinka sosinene kuhamena ukanguki? (b) Morwasinke ya karera nouwa tu kare nehafo?

⁸ Nye twa hepa kunyokera po kukara nosinka sosinene kuhamena ukanguki. Mevango lyokukara upampi mokuzuvhisa  mbudi zongwa zoUhompa waKarunga, vamwe kulitura mo unene kutantera vakwawo kuhamena nondya edi nava lya nomutji edi nava nwa ndi magadi aga nava likwita. Awo kugazara asi kuna kuvatera vakwawo. Nampili ngoso, kapi ya wapa kuuyunga kuhamena yuma oyo poSinyanga soUhompa ndi koyigongi. Morwasinke?

⁹ Sitambo seyi atu zire komapongo, sokukazogera yininke yopampepo nokugwederera koruhafo rwetu, morwa aro ruha royiyimwa yompepo zokupongoka zaKarunga. (Gar. 5:22) Nsene tu gava magano kuhamena nomutji ndi magadi ndi nondya dokuhamena uhaku koSinyanga soUhompa ndi koyigongi kuvhura kudonganesa sitambo somapongo getu ntani kapi tayi retere vakwetu ruhafo. (Rom. 14:17) Nkenye gumwe ga hepa kutokora mwene kuhamena uhaku. Ntani kwato gokuvhura kugusa po mauvera. Vandokotora nawo kukurupa, kuvera nokufa. Nampili tu kare nosinka sosinene kuhamena ukanguki wetu kapi ngayi gwederera ko keparu lyetu. (Ruk. 12:25) Nye, “mutjima gehafo kukwafa mokuveruka.”—Yis. 17:22.

10. (a) Ngapi Jehova a tara vantu wokukurupa? (b) Ngapi natu hafera ukanguki wetu?

¹⁰ Ayo kapi ya kara epuko kupakera sinka emoneko lyetu. Nye kapisi tu kondje unene asi tu guse po magonye goukurupe. Magonye ogo kulikida asi muntu ono kuru ntani kugava mfumwa nomfeto zouhungami. Pasihonena Bibeli kwa uyunga asi: “Mwenyo gomure mfeto zouhungami; ano nomvhi nkata zefumano.” (Yis. 16:31) Jehova yimo ngoso a tu tara, nose twa hepa kulitara nyamwetu monkedi zangoso. (Resa 1 Peturusa 3:3, 4.) Yipo nye kapi ya wapa tu liture mosiponga sokuza komatauro ndi tu papare uhaku morwa kapi tuna hara kukurupa. O kare asi o mukurupe ndi kapisi mukanguki, eyi nayi ku retera uwa kuna kara “ehafo” lyomwaJehova. (Neh. 8:10) Ntudi mouzuni woupe yimo ngatu kara noukanguki wouwa nomarutu gosiudinkantu. (Joba 33:25; Jes. 33:24) Nye ngesi nsene tu kara nonondunge nepuro ngayi tu vatera tu hedere Jehova pepi nokuhafera ukaro wetu ou.—1 Tim. 4:8.

11. Ngapi yimaliwa nayi kara siponga?

¹¹ Yimaliwa kapisi yidona ntani kapi ya kara nepuko kukara nongesefa. (Muud. 7:12; Ruk. 19:12, 13) Nye kukara nedowo “lyokudowokera emona” ngayi tu gusa ko kwaJehova. (1 Tim. 6:9, 10) Ano kukara ‘nosinka seyi youzuni ou’ kuvhura kutudipaga pampepo. Ntani hena epuko nsene tu kara negano asi ‘emona’ ndi ungawo kuvhura kutupopera nokuturetera ruhafo rwanarunye. (Mat. 13:22) Jesus ga yi zeresere nawa-nawa asi “nokuvhura si” kukarera Karunga nomamona.—Mat. 6:24.

12. Yisinke ava rugana wovanzi morwa kuhara kungawopa usimbu?

¹² Kudowokera yimaliwa kuvhura yi ku ture mosiponga. (Yis. 28:20) Morwa kuhara kungawopa usimbu, vamwe kudana jakpoti ndi kuza mousimba ndi koyirongo yapeke negano asi tava ka gwana yimaliwa yoyinzi. Vamwe kulihameka monongesefa edi adi va ninkisa va gendagure unene, ano vamwe kurugana novili dononzi va gwane yimaliwa. Wa ha pulisira edowo lyoyimaliwa o rugane yininke yangoso. Muntu wa hepa kugazara komeho o ture po matokoro gangoso.

13. Ngapi mutaro gwaJehova koyimaliwa gwa lisiga nogu govantu?

¹³ Nsene tu hova kupapara “Untungi waKarunga neyi ga hepa” ko kwetu, age nga tu tungika nsene tu hetekera ko tupu kugwana eyi ya kara hepero meparu. (Mat. 6:33; Efe. 4:28) Kapi ana tu harere  tu ka kumauke komapongo morwa kurugana unene ndi tu kare mepongo nye ose kuna kugazadara kuhamena yimaliwa. Nye vantu wovanzi mouzuni kwa pura asi wa hepa tanko kurugana unene o gwane yimaliwa morwa komeho ngayi ka ku gamena kapi ngo ka kara hena nosinka. Ntani awo pamwe kukorangeda vana vawo va kare nositambo sokungawopa. Jesus kwa yi likidire asi ugova kukara nomagazadaro gangoso. (Resa Rukasa 12:15-21.) Eyi kutudiworokesa Gehasi, ogu ga gazarere asi kuvhura a kare nedowo ano Jehova simpe na mu hafera.—2 Vah. 5:20-27.

14, 15. Morwasinke natu dilira kupapara ungawo mouzuni ou? Gava sihonena.

¹⁴ Nsene mpungu a kwata mfi zonene kapi na vhura kutuka ntudi a sige mfi ozo nsene kapisi ngoso age kuvhura a dame nokufa. Yininke yokulifa kuvhura yi horokere Mukriste. Alex, mukuronambunga kwa tente asi: “Ame kapisi muntu na hara kuhepeka yininke. Nsene nina tjire mfewa zonzi zokulikuhwisa momutwe ame kutengwidira mo zimwe mekende lyazo.” Nampili ngoso, Alex kwa ya litulire unene mongesefa, age kwa gazarere asi nga gwana yimaliwa yoyinzi makura a hageke yirugana yendi nokutameka uzuvhisi wokukarerera. Age kwa ya litulire mo unene a lironge kuhamena unangesefa. Age kwa ruganesere yimaliwa yendi nokukorota yimwe makura ta yi ruganesa mongesefa morwa kwa gazarere asi ngayi ligwederera usimbu. Nye kapi ya horokere. Alex kwa tente asi: “Ame kwa gazarere asi ngani gwana yimaliwa yoyinzi. Ame kwa lizuvhire asi na hepa tupu kukwaterera kongesefa ozo, yimaliwa ngayi ligwederera tupu.”

¹⁵ Makwedi nomakwedi, Alex nga gazara tupu ngesefa zendi. Kapi nga vhuru kulihameka moyininke yopampepo ntani ngayi mu digopere kuponyoka. Ngesefa zendi kapi za gendere po nawa. Age ga zumbanesere yimaliwa yendi ntani ga hepere kurandesa embo lyendi. Age kwa tente asi: “Ame kwa reterere epata lyange kukora kokunene.” Nye ga lirongerere ko sirongwa somulyo. “Ngesi nina yi dimburura asi nkenye ogu a kwaterere kouzuni waSatana ngayi mu retera kukora.” (Yis. 11:28) Nsene tu huguvara moyimaliwa yetu ndi tu kondjere kugwana yimaliwa mouzuni ou, ayo kuna lifana ngwendi kuna kutura ehuguvaro lyetu ‘momupangeli gouzuni,’ Satana. (2 Kol. 4:4; 1 Tim. 6:17) Ngesi Alex ga rerupika eparu lyendi ‘mokonda zombudi zongwa.’ Age ga tanta asi kurugana ngoso ya mu retera ruhafo nepata lyendi ntani va hedera pepi naJehova.—Resa Marukusa 10:29, 30.

16. Ya kara epuko kulizuvha mfumwa ndi?

¹⁶ Kapi ya kara epuko kulizuvha mfumwa. Pasihonena, ose narunye kulizuvha mfumwa morwa ose Nombangi daJehova. (Jer 9:24) Nsene o lifumadeka tayi ku vatere o ture po matokoro gomawa nokunyokera po kurugana yoyidona. Nye nsene tu lizerura unene kuvhura ngayi tu guse ko kwaJehova.—Epis 138:6; Rom 12:3.

17, 18. (a) Tumbura yihonena yovantu moBibeli ava va linunupikire nava va linenepekere? (b) Yisinke ga rugene munazinyetugara gumwe mokudira kupulisira elinenepeko li mu guse ko kwaJehova?

¹⁷ MoBibeli kwa kara mo yihonena yovantu ava va linenepekere nava va linunupikire. Hompa Ndafita nga linunupike pokuhundira evyukiso kwaJehova, ano Jehova ga mu tungikire. (Epis 131:1-3) Nye Jehova ga nunupikilire hompa Nebukadenesara naBelisasara ava va linenepekere. (Ndan 4:30-37; 5:22-30) Naina poyili yimwe nayi vhura kutuninkisa tu linenepeke. Ryan mukwafimbunga gonomvhura 32, kwa dirukilire kombungakriste  zompe. Age kwa tanta asi: “Ame kwa gazarere asi tava ka tura nge ni kare mukuronambunga, nye pwa pitire mvhura nye kapi ya horokere.” Ngoso, Ryan ga handukire asi vakuronambunga kapi vana kumufumadeka ndi? Age ga hagekere nye kuwiza komapongo a pulisire elinenepeko li mu guse ko kwaJehova novantu vendi ndi? Ngano nyove, yisinke ngano wa rugene?

¹⁸ Ryan kwa tente asi: “Ame ngani resa yimbapiratjangwa yetu eyi ya uyunga kuhamena kundindira.” (Yis 13:12) “Na ya yi dimbwilire asi na hepere kundindira nokulinunupika. Na hepere kupulisira Jehova a deure nge.” Ryan kapi ga ligazarere tupu nyamwendi nye ga demenene kuvatera vakwawo mombungakriste nomoyirugana yokuzuvhisa. Age ga ya tamekere kurugana malirongo goBibeli gomanzi. Age kwa tente asi: “Kwa pitire po mvhura zimwe noharufa ntani va horowere nge ni kare mukuronambunga, kapi na yi ndindilire. Morwa siruwo oso ame kwa haferere unene sirugana sange sokuzuvhisa.”—Resa Episarome 37:3, 4.

19, 20. (a) Yisinke natu rugana yipo tu dire kupulisira nkenye eyi yi tu guse ko kwaJehova? (b) Yihonena musinke natu temwinina yava va hederere pepi naJehova?

¹⁹ Nayinye eyi tuna zogere mosirongwa esi nesi ka si pitire ya kara nomulyo meparu. Ose kulizuvha mfumwa kukara vakareli vaJehova. Epata lyoruhafo noukanguki wouwa kuna kara mauhwi gomawa gokutunda kwaJehova. Twa yi diva asi yirugana noyimaliwa kuvhura kutuvatera tu lirere. Ntani yilihafeso kuvhura kutupwizumukisa ano yikwakonentu ayo yiruganeso yoyiwa. Nye nsene tu litura mo unene moyininke nayinye oyo, kuvhura kudonganesa ukareli wetu nokutugusa ko kwaJehova.

²⁰ Satana kuna hara kutugusa ko kwaJehova. Nye kuvhura o nyokere po oyo yi dire kukuhorokera nepata lyoge! (Yis 22:3) Hedera pepi naJehova. MoBibeli mwa kara yihonena yoyiwa. Henoka naNowa kwa kere “momalikwatakano naKarunga.” (Gen 5:22; 6:9) Mosesa “age kwa kere nouradi ngwendi gogu ana kutara Karunga ogu ga ha moneka.” (Heb 11:27) Karunga nga vatere Jesus morwa age nga rugana nkenye apa eyi va here oGuhwe. (Joh 8:29) Temwinina yihonena eyi. “Omu hafe nkenye apa. Omu kanderere narunye, omu pandure moyipimpo nayinye.” (1Tes 5:16-18) Wa ha pulisira nkenye eyi yi ku guse ko kwaJehova!