Fwena Nyeke Kudi Yehova

“Fwenai kudi Leza, nandi ukemufwena.” —YAK. 4:8.

LE UKOKEJA KUSHINTULULA?

Le i muswelo’ka otukalama mumweno muyampe pa bya busendwe ne bukomo bwa ngitu?

Le i muswelo’ka otukalama mumweno muyampe pa lupeto ne kwitemba?

Le i muswelo’ka otubwanya kwikala nyeke pabwipi na Yehova?

1, 2. (a) Le “budyumuku” bwa Satana i budyumuku’ka? (b) Lelo i bika biketukwasha tufwene kudi Leza?

 YEHOVA LEZA wāpangile bantu na mutyima wakufwena nyeke kwadi. Ino Satana usakanga tulange mwalangilanga—amba ketusakilwapo Yehova. Buno bo bubela busambakanyanga Satana tamba Eva ongolwa mu budimi bwa Edena. (Ngal. 3:4-6) Mu bula bwa mānga, bantu bavule baloñanga’nka kulonga kino kilubo.

² Ino na bya dyese, ketusakangapo kuponena mu dikinga dya Satana. “Ketwidilwepo budyumuku bwandi.” (2 Kod. 2:11) Satana uloñanga bukomo bwa kwitusonsolola kudi Yehova na kwitutonona tutonge butongi bubi. Ino enka na mokyalombwedilwe mu kishinte kibadikile, tubwanya kutonga butongi buyampe mu mwanda utala kaji, makayo ne myanda ya kisaka. Kino kishinte kisa kulombola muswelo otubwanya ‘kufwena kudi Leza,’ na kulama bya busendwe, bukomo bwa ngitu, lupeto ne kwitemba pa kifuko kyabyo.—Yak. 4:8.

BYA BUSENDWE

3. Leta kimfwa kilombola mwingidijijo muyampe nansha mubi wa bya busendwe.

³ Pano bingidilwa bya kwisambulwila nabyo mawi bibasambakana konsokonso pano pa ntanda. Shi twibingidije biyampe bino bipungwa, bikekala bu bingidilwa bikwasha . Ino shi twibingidije bibi, biketusonsolola kudi Tata wetu wa mūlu. Twisambilei bidi pa makompyuta. Dino dipepala dyotanga dyalembelwe ne kulupulwa na bukwashi bwa kompyuta. Kompyuta ibwanya kwikala bu kingidilwa kiyampe kya kulonga nakyo bukimbi, kwisamba, kyaba kimo ne bu kya kwipwija nakyo mukose. Inoko kadi tubwanya kumunwa na busendwe bwa kompyuta. Bansunga bakulupijanga bantu na bunwa amba badi na bintu bya panopano. Nkasampe umo mwana-mulume wadi wabila bininge kwikala na kompyuta ya pa bula, ebiya wakapoteja kufula lufyo lwandi mwanda wa kwiipota. Kuno shako ko kwipāna bine!

4. Le Mwine Kidishitu umo wanekenye namani kwingidija kompyuta bipitepite?

⁴ I bulanda bukatampe kujimija kipwano kyobe na Yehova mwanda wa kwingidija bibi bya busendwe. Jon  mwine Kidishitu wa myaka ilumba ku 30 unena amba, “ndyukile amba Bible unena’mba tufwaninwe ‘kukūla kitatyi kifwaninwe’ mwanda wa bintu bya ku mushipiditu. * Ino shi ke kitatyi kya kwingidija kompyuta, nelonga nkendi kinkwa mubi.” Pavule pene Jon wadi ushikilwa ku Entelenete kufika’nka ne bufuku. Unena amba, “kitatyi kyonadi nkoka bininge, byadi bikomo kuleka kutuma misapu nansha kutala mavideo mepi—kadi divule dine adi mabi.” Kintu kyakweshe Jon aleke kino kibidiji kibi, i kutūla mpangiko mu kompyuta amba ishite ayo mine shi kitatyi kyandi kya kulāla kibabwana.—Tanga Efisesa 5:15, 16.

5, 6. (a) Le i biselwa’ka bidi na bambutwile pa babo bana? (b) Le bambutwile babwanya kuyuka namani shi babo bana badi na balunda bayampe?

⁵ Bambutwile kemunenenwepo kulonda byonso bilonga benu bana, inoko mufwaninwe kukengelela muswelo obengidija kompyuta. Kemwakilekai benu bana batala bya busekese, makayo a bikanda-ngobo, majende ne kipwano kibi ku Entelenete mwanda’tu wa bekale na bivule bya kulonga nansha shi kemudi’popo. Shi mulonge namino bana bakafula kukunena amba, ‘ba Tata ne Mama byokebatele’kopo mutyima, nanshi i biyampe.’ Byomudi bambutwile, mudi na mwingilo wa kukinga benu bana—kubadila’mo ne bankasampe—ku kintu kyo-kyonso kibwanya kwibasonsolola kudi Yehova. Enka ne banyema bakiñanga babo bana ku kyaka. Langa’po bidi bikalonga Kimungu kyamusha shi muntu watūla twandi twana mu kyaka!—Dingakanya na Hosea 13:8.

⁶ Kwasha bobe bana basambe kipwano kilumbuluke na bene Kidishitu bankasampe ne batame baleta kimfwa kiyampe. Kadi vuluka’mba, bobe bana basakanga mupityije nabo kitatyi pamo! Nanshi tūla’ko kitatyi kya kusepa, kukaya, kwingila ne ‘kufwena kudi Leza’ pamo. *

BUKOMO BWA NGITU

7. Mwanda waka batwe bonso tusakanga kwikala nyeke na bukomo bwa ngitu?

⁷ “Le wiivwene namani?” Kino i kipangujo kiipangulwanga divule. Batwe bonso tubelanga mwanda wa bambutwile betu babajinji bālekele Satana ebasonsolole kudi Yehova. Misongo ivuijanga mpango ya Satana, mwanda kitatyi kyotubela tukomenwanga kwingidila Yehova. Kadi shi tubafu ketukibwanyapo ku mwingidila. (Mit. 115:17) Na bubine tusakanga kulonga bukomo bwa kwikala nyeke na bukomo bwa ngitu. * Ne kadi tufwaninwe kuta mutyima ku bukomo bwa ngitu ne ndoe ya banabetu.

8, 9. (a) Le i muswelo’ka otubwanya kuleka kuzumbija mutyima bipitepite pangala pa bukomo bwa ngitu? (b) Le i byabuyabuya’ka bidi mu kutamija nsangaji?

⁸ Inoko i biyampe twepuke kupityija’byo kipimo. Bamo balēmekanga na bupyasakane bidibwa byobebajidikile, bundapi, lawa—kupita’nka ne myanda miyampe ya Bulopwe bwa Leza. Padi babwanya kukulupila na bubine amba bakwashanga bakwabo.  Nansha nabya, ke biyampepo kusumbija malawa mayampe ne bundapi kumeso nansha pa kupwa kupwila ku Njibo ya Bulopwe nansha ku bitango. Mwanda waka?

⁹ Tubungakananga mwanda wa kwisambila pa bintu bya ku mushipiditu ne kutamija nsangaji yetu, kipa kya mushipiditu sandu wa Leza. (Ngat. 5:22) Kupāna bukwashi butala bukomo bwa ngitu nansha lawa ku kuno kubungakana—bobakulombele nansha bokebakulombele—kubwanya kulabika bakwenu ku kitungo kyetu kya ku mushipiditu ne kwibajimijija nsangaji. (Loma 14:17) Mwanda utala kulama bukomo bwa ngitu i butyibi bwa muntu mwine. Kadi, kekudipo muntu nansha umo ubwanya kupwa misongo yonso. Nansha ke bañanga bayampe banunupanga ne kubela, mwenda mafuku bafwa. Kuzumbija mutyima bipitepite pangala pa bukomo bwetu bwa ngitu kekukokejapo kulepeja’ko būmi bwetu. (Luka 12:25) Pakwabo kadi, “mutyima wa nsangaji bo bwanga bulumbuluke.”—Nk. 17:22.

10. (a) Le i ngikadilo’ka miyampe kumeso a Yehova? (b) Le i muswelo’ka otukokeja kwikala na bukomo bwa ngitu buyampe?

¹⁰ Mu muswelo umo onka, i biyampe kuta mutyima ku mumwekelo wetu. Inoko, ketufwaninwepo kulonga bukomo bwa kujimankanya biyukeno byonso bya bununu. Bino biyukeno bibwanya kulombola’mba twi batame, ba bulēme, kadi ne buya bwa munda. Kimfwa, Bible unena amba: “Mutwe wa mvwi i kilongo kya ntumbo, ukatanwa mu dishinda dya boloke.” (Nk. 16:31) Uno o muswelo witumonanga Yehova, kadi tufwaninwe kulonga bukomo bwa kwimona mwaetumwena. (Tanga 1 Petelo 3:3, 4.) Penepa, le i biyampe kwitūla mu kyaka, ne kulongeja lupasulo lukatampe nansha kukimba bundapi bwa kiñanga mwanda’tu wa umweke bu muyampe? “Tusepo twa Yehova” i nsulo ya buya bwa bine bwa munda, nansha shi wi mutame namani ne udi na bukomo bwa ngitu muswelo’ka. (Neh. 8:10) I enka mu ntanda impya kete ye motukekala na bukomo bwa ngitu bubwaninine ne buya bwa bunkasampe. (Yoba 33:25; Is. 33:24) Kulombola tunangu ne lwitabijo tamba’nka pano, kuketukwasha twikale nyeke pabwipi na Yehova koku twilumbulula mu ngikadilo yotudi’mo.—1 Tem. 4:8.

LUPETO

11. Le lupeto lubwanya kwikala bu dikinga namani?

¹¹ Shako lupeto ke lubipo, ne kusunga busunga bwampikwa budimbidimbi nako ke kubipo. (Mus. 7:12; Luka 19:12, 13) Inoko, kutamija mutyima wa “kusanswa kwa lupeto” kuketusonsolola kudi Yehova. (1 Tem. 6:9, 10) ‘Byakūminina bya panopantanda,’ kuzumbijazumbija mutyima pa mwakumwena bya kwikwasha nabyo mu būmi, bikokeja kwitudya ku mushipiditu. “Budimbidimbi bwa bupeta” ne milangwe mifwe ya amba bupeta buletanga nsangaji ya nyeke ne mutyima-ntenke nabyo bibwanya kwitudya ku mushipiditu. (Mat. 13:22) Yesu ulombola’kyo patōkelela amba i kutupu “nansha umo” ubwanya kwingidila Leza ne bupeta kumo.—Mat. 6:24.

12. Le i makinga a muswelo’ka a mu myanda ya lupeto adi’ko dyalelo, ne i muswelo’ka otubwanya kwiepuka?

¹² Mumweno mubi wa lupeto okokeja kwitutwala ku bilongwa bibi. (Nk. 28:20) Milao ya kupeta bukidi bukidi kadi mu muswelo upela, yāongwele bantu bamo ke bapote matyike a tombola nansha kwikuja mu busunga bwa manyengenyenge bwa kudya bantu lupeto, enka ne kukokela’mo bantu bakwabo ba mu kipwilo. Bakwabo nabo baongwelwe na busunga bobadi bafwatakanya amba mudi kamweno kakatampe. Kokaleka makomwa-meso akulengeje wikale wa budimbidimbi. Ikala na bujalale. Shi kaji kamweka bu kayampe mpata, padi i kayampe bine.

13. Le mumweno umona Yehova lupeto i mwishile namani na mumweno wa ntanda?

¹³ Kitatyi kyotutangidija kumeso “bulopwe bwa Leza, ne boloke bwandi,” Yehova weselanga bukomo botulonga na bujalale mwanda wa kusokola bya kwitukwasha mu būmi. (Mat. 6:33; Ef. 4:28) Kasakangapo tuponene mu tulo ku kupwila mwanda wa  kwingila bipitepite, nansha kushikata mu Njibo ya Bulopwe koku tuzumbija mutyima pa mwanda wa lupeto. Inoko, bantu bavule betujokolokele mu ino ntanda bakulupile amba, i enka kwipeneneka mu kukimba lupetoko kubwanya kwibapa mutyima-ntenke mu mafuku a kumeso ne kwikala bafuke ku makasa. Divule dine batononanga babo bana bekale na kitungo kimo kyonka kya kulondalonda bya bupeta. Yesu wālombwele amba ino milangwe i yakubulwa kufwaninwa. (Tanga Luka 12:15-21.) Kino kibwanya kwituvuluja Ngehazi, wālangile amba ukokeja kwikala na makomwa-meso aye koku ulamine kipwano kyandi na Yehova.—2 Bal. 5:20-27.

14, 15. I kika kinenenwa’mba ketufwaninwe kuta mutyima ku tumweno twa ino ntanda mwanda wa kukimba mutyima-ntenke? Leta kimfwa.

¹⁴ Mukebo ubwanya kupona panshi shi keulekelelepo mala andi ku mushipa mukatampe wakomenwa kutumbuka nao. Le kintu kya uno muswelo kibwanya kufikila Mwine Kidishitu? Mukulumpe witwa bu Alex unena amba, “na bubine ngidi na kakama ka lupeto. Shi napungulula māni mavule a ku mutwe mu mukomba, ngelanga makwabo mu mukomba mukwabo.” Inoko, Alex weēlele mu kubika bintu bya busunga mu kibīko, na kulanga’mba kasapo kwija kuleka kandi kaji ne kushilula mwingilo wa bu pania. Ebiya wefunda mwa kupotela ne kupoteja bintu mu bibīko, ne kwingidija lupeto lwandi lonso mu kupota bintu byabwanya kupota. Na kwingidija tumweno twandi ne lupeto lwaāpwile ku bashintula lupeto, wapota bibīko byādi bilaya bantu bapotolwele amba kebyādipo bya kwija kwikala na kamweno. Inoko, wadi wenda’nka utūka. Alex unena’mba, “nādi musumininwe kwaluja lupeto lwa bene. Nādi nanga amba shi nelusokola, bibīko byadi bya kuyula monka.”

¹⁵ Alex wādi ulanga kubweja’ko bikwabo mu bula bwa myeji mivule. Wākomenwe kuta mutyima ku bintu bya ku mushipiditu, ne kulala kwine kakilāla biyampe. Ino ne bibīko bine kebyāyudilepo monka. Alex wājimije tumweno twandi ne kupoteja njibo yandi. Witabija’mba, “nāsanshije kisaka kyami bininge.” Ino wēfundile’ko bufundiji bwa kamweno. “Pano nayuka’mba muntu yense ukulupila mu ntanda ya Satana utyumukwanga mutyima mpata.” (Nk. 11:28) Na bubine, kutūla lukulupilo lwetu mu tumweno, bya busunga, ne bukomo bwetu bwa kukimba lupeto mu ino ntanda, kudi pamo bwa kutūla lukulupilo lwetu mudi Satana “leza wa panopantanda.” (2 Kod. 4:4; 1 Tem. 6:17) Pano Alex i mupēleje būmi bwandi pa mwanda wa “myanda-miyampe.” Ukakulombola amba kulonga namino kwamupele nsangaji aye ne kisaka kyandi, kadi kwebafwenyenye kudi Yehova.—Tanga Mako 10:29, 30.

KWITEMBA

16. Le kwitemba kuyampe i kwishile namani na kwitemba kubi?

¹⁶ Kwitembela pa bintu byoloke i kuyampe. Kimfwa, tufwaninwe kwitemba nyeke pa kwikala kotwikele bu Batumoni ba Yehova. (Yel. 9:24) Kwilēmeka pa ndēmekelo kwitukwashanga tukwate butyibi buyampe ne kwepuka kutūkija panshi misoñanya ya mu mwikadilo. Kumona mumweno ne mwimanino wetu bu udi na mvubu mpata, kubwanya kwitusonsolola kudi Yehova.—Mit. 138:6; Loma 12:3.

17, 18. (a) Tela bimfwa bya mu Bible bya bantu betyepeje ne ba mitatulo. (b) Le i muswelo’ka waepukile tutu umo kuleka mitatulo imusonsolole kudi Yehova?

¹⁷ Mu Bible mudi bimfwa bya bantu ba mitatulo ne bantu betyepeje. Mulopwe Davida wākimbile buludiki bwa Yehova na kwityepeja, ne Yehova nandi wamwesela. (Mit. 131:1-3) Ino wāikije balopwe ba mitatulo ba Nebukaneza ne Beleshazale. (Dan. 4:30-37; 5:22-30) Dyalelo nadyo kumwekanga ngikadilo itūla kwityepeja kwetu pa ditompo. Ryan, mwingidi wa mingilo wa myaka 32, wāvilukīle mu kipwilo kipya. Unena’mba, “nadi nkulupile amba nkisapo kwija kwikala mukulumpe, ino myaka ipwa ipunguluka kwikala’bo mpika.” Le Ryan wālobele nansha kwivwana bululu na kulanga’mba, bakulumpe kebamupelepo  bulēme bumufwaninwe? Le wādi wa kuleka’byo kupwila ne kuleka mitatulo yandi imusonsolole kudi Yehova ne kudi bantu Bandi? Shi wadi amba i abe, wādi wa kulonga namani?

¹⁸ Ryan uvuluka’mba, “nādi ntanga bintu byonso byonādi ntana mu mabuku etu bisambila pa lukulupilo lwija.” (Nk. 13:12) “Nashilula kujingulula’mba nādi nsakilwa kwifunda kitūkijetyima ne kwityepeja. Nādi nsakilwa kuleka Yehova amfundije.” Ryan wālekele kwita mutyima aye mwine, ino wata’o ku kwingidila bakwabo—mu kipwilo ne mu busapudi. Ne kwija kwine mpika, kaendeja bifundwa bivule bya Bible byendelela. Unena’mba, “kitatyi kyonatongelwe bu mukulumpe mwaka umo ne kipindi pa kupita’po, natulumuka. Nālekele kuzumbija mutyima pa uno mwanda, mwanda nādi nsangedile bininge mwingilo wami.”—Tanga Mitōto 37:3, 4.

IKALA NYEKE PABWIPI NA YEHOVA!

19, 20. (a) Le i muswelo’ka utubwanya kuyuka’mba kekudipo bintu byotulonga bibwanya kwitusonsolola kudi Yehova? (b) Le i bimfwa bya bāni bāikele nyeke pabwipi na Yehova byotubwanya kwiula?

¹⁹ Myanda yonso yabandaulwa mu kino kishinte ne mu kibadikile idi na kamweno mu būmi bwetu. Twitembanga pa kwikala kotwikele bengidi ba Yehova. Kisaka kya nsangaji ne bukomo bwa ngitu bibadilwa mu byabuntu bikatakata bitupele Yehova. Tubajingulula’mba kaji ka ntanda ne lupeto bibwanya kwitukwasha pa kuvuija bisakibwa byetu. Tuyukile amba kwipwija mukose kubwanya kwitutūkija mutyima ne bya busendwe nabyo bibwanya kwikala na kamweno. Inoko kulondalonda kintu nansha kimo pa bino, mu kitatyi kyampikwa kufwaninwa, twakuja’mo ne mutwe nansha mu muswelo obijikakanya butōtyi bwetu kubwanya kwitusonsolola kudi Yehova.

²⁰ Na bubine, Satana usakanga kino kikufikile. Inoko, abe ubwanya kukankaja kino kyamalwa kileke kukuponena pamo ne kyobe kisaka! (Nk. 22:3) Fwena kudi Yehova ne kushala nyeke pabwipi nandi. Tudi na bimfwa bivule bya mu Bible bya kwitufundija pa uno mwanda. Ba Enoke ne Noa ‘bānangile na Leza wa bine.’ (Ngal. 5:22; 6:9) Mosesa “wakankamene ne kukankamana bwa wamona aye wakubulwa kumweka.” (Bah. 11:27) Yesu nandi wādi ukwatakanibwe nyeke na Leza mwanda wādi ulonga nyeke byobya byādi bisangaja Shandi wa mūlu. (Yoa. 8:29) Iula bino bimfwa. “Sepelelai mafuku onso nyeke. Lombelai ne kuleka mpika. Mufwijeiko umbyonsololo.” (1 Tes. 5:16-18) Kadi, kokaleka kintu nansha kimo kikusonsolole kudi Yehova!

[Kunshi kwa dyani]

[Bipangujo bya Kifundwa]

[Kifwatulo pa paje 17]

[Kifwatulo pa paje 18]

Bambutwile, kwashai benu bana bengidije bya busendwe na tunangu

[Bushintuludi pa paje 21]

Kokaleka kintu nansha kimo kikusonsolole kudi Yehova!

[Kifwatulo pa paje 21]

Pa kyaba kya kukimba kyepelo mu kipwilo, loelelwa mu mwingilo obe wa busapudi!