1, 2. (a) Setana “ngamthlêmna” chu engte nge? (b) Engin nge Pathian hnaih tûra min ṭanpui ang?

PATHIAN JEHOVA chuan mihringte chu amah hnaih ngaiin a siam a. Mahse, Setana chuan a ngaih dân anga—Jehova mamawh lo anga—kan inngaih chu a duh a ni. Chu dâwt thu hmanga Eden huana Evi a bum aṭang khân, Setana chuan chu chu a vawrh lâr chho zêl a. (Gen. 3:4-6) Mihringte chanchin tluan chhuakah mi a tam zâwkte chuan chu thil sual chu a tinawn fo a ni.

² Setana thanga kan awh kher a ngai lo hi a lâwmawm hle. “A ngamthlêmna chu kan hai si lo.” (2 Kor. 2:11) Setana chuan duhthlanna dik lo siam tûra min turin Jehova min hlattîr a tum a. Mahse, thuziak hmasain a târ lan angin, hnathawh te, intihhlimna te, leh chhûngkaw lam chungchângah duhthlanna dik kan siam thei a ni. He thuziak hian tûn lai thiamna te, hrisêlna te, sum leh pai te, leh chapona te a hmun tûr dik taka dahna chuan “Pathian hnaih” tûra min ṭanpui dân a târ lang ang.—Jak. 4:8.

3. Tûn lai thiamna chu thil ṭhaah emaw, ṭha lovah emaw hman theih a nihzia târ lang rawh.

³ Khawvêl pumah hian electronic khâwl changkâng tak takte chu a hluar hle a. Ṭha taka hman a nih chuan chu thil siamte chu hmanraw ṭangkai tak a ni thei a ni. Ṭha taka hman a nih loh erawh chuan kan Pa vâna mi min hlattîr thei a ni. Computer hi han ngaihtuah teh. Tûna i chhiar mêk magazine hi computer ṭanpuinaa ziah leh tihchhuah a ni a. Computer chu zir bingna ṭha leh inbiak pawhna hmanrua ṭha tak a ni thei a, a châng chuan mi tihahdam theih intihhlimna hmuh theihna a ni thei bawk. Mahse, computer kan âtchilh thei bawk a ni. Thil zuartute chuan mite chu thil chhuak thar ber berte nei tûrin fing thiam takin an hmin a. Tlangvâl pakhat chuan tablet computer a engemaw ber neih a châk êm avângin, a lei theih nân a kal pakhat chu a rûkin a hralh a ni. A va dâwn tâwithlâk tak êm!

4. Engtin nge Kristian pakhat chuan nasa taka computer a hmanna chu a do?

 ⁴ Tûn lai thiamnate hman sual emaw, hman nasat emaw avânga Jehova nêna in inlaichînna tihchhiat chu a lungchhiatthlâk lehzual a ni. Kum 30 la tling lo deuh Kristian unaupa Jon-a * chuan heti hian a sawi: “Bible chuan thlarau lam thil atâna ‘remchânnate lei’ tûrin min fuih tih chu ka hria a. Mahse, computer chungchângah chuan keimah hi ka tâna hmêlma hlauhawm ber chu ka ni,” tiin. Jon-a chuan zân rei tak tak thlenga computer a hmang ṭhîn a. “Ka chauh zawh poh leh Internet-a mi dangte nêna inbiak emaw, video tawi en emaw, a châng phei chuan thil ṭha lo takte telnate bânsan chu a harsa zual a ni,” a ti. Jon-a chuan chu a thil chîn ṭha lo thlah tûr chuan, a mut hun tûra amaha tâwp tûrin computer chu a set hial a ni.—Ephesi 5:15, 16 chhiar rawh.

5, 6. (a) Nu leh pate chuan an fate lakah eng mawhphurhna nge an neih? (b) Engtin nge nu leh pate chuan an fate’n ṭhian ṭha an kâwm tih an chian theih?

⁵ Nu leh pate u, in fate thiltih apiang chu inthunun a ngai lo va; mahse, computer an hman dân chu in endik a ngai a ni. An tihbuai loh in duh avâng maiin, Internet-a nungchang ṭhat lohna te, tharum thawhna te, dawithiamna te, leh ṭhian ṭha lo an kawmte chu phal suh u. Chutianga in phal chuan, ‘Ka Nu leh Pa’n pawi an tih loh chuan, a ṭha a ni ngei ang,’ tiin an ngaihtuah mai thei a ni. Nu leh pa in nih anga in hna chu tleirâwlte pawh tiamin in fate Jehova hlattîr thei thil eng pawh laka vênhim hi a ni. Nungchate takngial pawhin an fate chu thil hlauhawm lakah an vênghim ṭhîn a. Tuemawin savawm no a khawih avânga a puiin thil a tih tûr chu han mitthla teh u!.—Hosea 13:8 nên khaikhin rawh.

⁶ In fate chu entawn tlâk Kristian dang, apui apangte nêna inkawmna ṭha nei tûra ruahmanna siam tûrin ṭanpui rawh u. Tin, in fate’n hun hmanpui tûrin an mamawh che tih hre reng rawh u! Chuvângin, nuih nân te, infiam nân te, hnathawh nân te, leh in zaa “Pathian hnaih” nân te hun insiam rawh u. *

7. Engvângin nge hrisêl taka awm kan duh ṭheuh?

⁷ “I dam em?” tiin kan inzâwt fo ṭhîn a. Hei hian kan dam lo ṭhîn tih a târ lang a ni. Kan nu leh pa hmasa ber, Adama leh Evi’n Setana thu an âwih a, Jehova an hlat tâk avângin, kan dam lo ta ṭhîn a. Dam lohna hian Jehova rawngbâwl a tihharsat avângin chu chuan Setana thiltum a tihlawhtling a. Kan thih phei chuan Jehova rawng chu kan bâwl thei dâwn miah lo a ni. (Sâm 115:17) Chutiang a nih chuan, hrisêl taka awm tûrin kan tih theih apiang tih chu kan duh a ni. * Tin, kan unaute hrisêlna leh ṭhatna tûr chu kan ngaihsak tûr a ni bawk.

8, 9. (a) Hrisêlna chungchângah engtin nge a lutuka thiltih kan pumpelh theih? (b) Hlimna neih hlâwkna chu engte nge ni?

⁸ Mahse, a lutuka hrisêlna ngaih pawimawh loh chu a ṭha a ni. Ṭhenkhat chuan ei leh in insûm  leh inenkawlna te, a nih loh leh damdawi engemaw bîk takte chu Pathian Ram chanchin ṭha hrilh ai maha nasain ṭhahnemngai takin an fak mawi ṭhîn. Anni chuan mi dangte an ṭanpui niin an ngai tlat pawh a ni thei. Chuti chung pawh chuan, hrisêlna leh incheina lam pang chite chu Kingdom Hall emaw, inkhâwmpuina hmun emawa inkhâwm hma leh inkhâwm hnua sawi leh zawrh vêl chu thil tihchi a ni lo. Engvângin nge?

⁹ Thlarau lam thilte sawiho tûr leh Pathian thlarau thianghlim rah chhuah kan hlimna tipung tûrin kan inhmu khâwm a ni a. (Gal. 5:22) Mi dangte’n an zâwt emaw, zâwt lo emaw pawh ni se, chutiang huna hrisêlna lam leh damdawi lam thilte chungchâng a thurâwn pêkna chuan thlarau lama kan inhmuh khâwm chhan a hliah khuhin, an hlimna chu a rûk bosak thei a ni. (Rom 14:17) Miin a hrisêlna a enkawl dân chu ama thutlûkna siam tûr a ni a. Chu bâkah, tumah hian natna zawng zawng tihdam theihna an nei lo. Doctor ṭha ber berte pawh an tarin, an na a, a tâwpah an thi ṭhîn. Tin, kan hrisêlna a lutuka lungkhamna chuan kan nun a pawt sei thei chuang lo. (Lk. 12:25) Kawng leh lamah chuan, “thinlung hlim hi damdawi ṭha tak a ni.”—Thuf. 17:22.

10. (a) Eng miziate nge Jehova tân mawi tak a nih? (b) Engtin nge hrisêlna ṭha thei ang ber chu kan neih theih?

¹⁰ Chutiang bawkin, kan lan dân ngaihsak chu thil inâwm tak a ni a. Mahse, tarna lantîrtu zawng zawngte tihreh tuma beih vak erawh a ngai lo. Chûng thilte chu puitlinna, zahawmna, leh chhûng lam mawina târ langtu a ni thei a ni. Entîr nân, Bible chuan heti hian a sawi a ni: “Lu ṭuak chu ropuina lallukhum a ni a, felna kawngah hmuh a ni ang,” tiin. (Thuf. 16:31) Chu chu Jehova min thlîr dân a ni a, chutianga inthlîr ve chu kan tum tûr a ni. (1 Petera 3:3, 4 chhiar rawh.) Chuvângin, lan duhawm lehzual kan duh vâng maia ṭul lo tak leh thil hlauhawm thlen thei inzaina emaw, damdawi lama inenkawlna emaw thlan chu a finthlâk ang em? Kan kum emaw, hrisêlna emaw chu engpawh ni se, “LALPA chunga lâwmna” chu chhûng lam aṭanga êng chhuak mawina dik tak chu a ni. (Neh. 8:10) Khawvêl tharah chauh kan hrisêl tak zetin, vânglai mawina chu kan nei leh thei dâwn a ni. (Job. 33:25; Is. 33:24) Chu hun a lo thlen hma chuan, tûna kan dihhmunte a ṭha thei ang bera hmang reng chunga finna leh rinna lantîrna chuan Jehova hnaih tûrin min ṭanpui ang.—1 Tim. 4:8.

11. Engtin nge sum chu thang a nih theih?

¹¹ Sum hi sual a ni lo va, dik taka sumdâwn chu thil dik lo a ni hek lo. (Thur. 7:12; Lk. 19:12, 13) Mahse, “tangka sum ngainat” chhoh zêlna chuan pumpelh theih miah lohvin Jehova min hlattîr dâwn a ni. (1 Tim. 6:9, 10) “Khawvêl lungkhamna,” nuna kan thil mamawhte neih a lutuka lungkhamna chuan thlarau lama kan ṭhanna tûr min dîp thei a. “Hausakna bumna,” hausaknain hlimna leh himna tluantling min pe thei tih ngaih dân dik lo pawhin thlarau lamah min dîp thei bawk. (Mt. 13:22) Isua chuan “tuman” Pathian leh hausakna rawng chu hlawhtling takin an bâwl kawp thei lo tih a sawi chiang a ni.—Mt. 6:24.

12. Tûn laiah sum leh pai lama thang hluar tak chu eng nge ni a, engtin nge kan pumpelh theih ang?

¹² Sum thlîr dân dik lo chuan thil dik lo tihna a thlen thei a. (Thuf. 28:20) Awlsam taka sum neih thut tiamnain a bum avângin, ṭhenkhat chuan lottery ticket-te, a nih loh leh hausak thut theihna sumdâwnna te an bei a, kohhrana mi dangte pawh chutianga ti ve tûr chuan an sâwm hial a ni. Mi dangte chu awihawm lo taka a lêt tam tak pung hmu tûra bumin an awm bawk. Duhâmna avângin miin bum che suh se. Ngaihtuahna fîm tak hmang rawh. Chutiang thil chu âwih awm lo khawpa a ṭhat chuan, inbumna a ni tlângpui ṭhîn.

13. Engtin nge Jehova’n sum a thlîr dân chu khawvêl thlîr dân nên a inan loh?

¹³ Jehova chuan “a ram leh a felna” kan zawn  hmasak chuan, nuna kan mamawhte nei tûra inbûk tâwka kan thawhrimna chu mal a sâwm a ni. (Mt. 6:33; Eph. 4:28) Ani chuan hna thawh rim lutuk avânga inkhâwm laia kan mutthlûk emaw, Kingdom Hall-a sum leh pai lungkham reng chunga kan ṭhut emaw chu a duh lo. Mahse, kan chheh vêla awm khawvêla mi tam takte chuan sum thawk chhuak tûra an inpumpêk chauhvin nakin hun him leh nghet nei theiin, upat hnuah hahdam taka awm thei tûrah an inring a ni. Anni chuan an fate chu chutiang bawka hausak tum tûr chuan an nawr fo ṭhîn. Isua erawh chuan chutiang ngaihtuahna âtthlâkzia a târ lang a ni. (Luka 12:15-21 chhiar rawh.) Chu chuan Jehova laka dinhmun ṭha tak nei chunga insûm lo taka duhâmna ûm thei nia ngaitu Gehazia chu min hriat chhuahtîr a ni.—2 Lal. 5:20-27.

14, 15. Himna atân engvângin nge sum kan rinchhan loh vang? Entîrna pe rawh.

¹⁴ Mupui ṭhenkhatte chu sangha an khai kân theih loh khawpa ritte an an han man hian, an thlah duh si loh avângin tuiah an tla hlum ṭhîn a. Chutiang deuh bawk chu Kristiante chungah a thleng thei ang em? Alex-a tia koh upa pakhat chuan heti hian a sawi: “Mi inren thiam tak ka ni a. Shampoo ka han bun chhuah tam deuh pawh hian a bûrah ka thun lêt leh ṭhîn,” tiin. Mahse, Alex-a chuan a hna bânsan thuai a, pioneer thawh a rilrûk avângin stock market lama sumdâwnnaah a intât lût a. Stock lei dân leh hralh dân te, leh market report hrang hrang zirna lamahte a inhmang nasa lehzual a ni. A sum khâwl sate leh pawisaa sumdâwngte hnên aṭanga sum a pûk chu a hnu lawka a hlutna sâng chho tûra mi thiamte’n an ngaih stock dang lei nân a hmang a. Mahse, a hlutna chu a tla hniam ta duai zâwk a ni. “Ka pawisa chu neih lêt leh kan tum tlat a. Rei lo tê nghâk ila, a hlutna a sân chhoh leh ka ring a ni,” tiin Alex-a chuan a sawi.

¹⁵ Alex-a chuan thla engemaw zât chu thil dang a ngaihtuah thei vak lo va. Thlarau lam thil ngaihtuah harsa a ti a, a mu thei bawk hek lo. Mahse, stock hlutna chu a sâng chho leh tawh lo. Alex-a chuan a sum khâwl sa chu a chân a, a in pawh a hralh a ngai ta hial a ni. “Ka chhûngte tân harsatna nasa tak ka thlen a ni,” tiin a sawi a. Mahse, Thil pawimawh tak a zir chhuak a ni. “Tûnah chuan Setana khawvêl rinchhan apiangte chu nasa takin an lunghnual dâwn tih ka hre ta,” a ti. (Thuf. 11:28) He khawvêla kan sum khâwl te, kan peipun te, a nih loh leh kan thawh chhuahte chunga beiseina nghah chu “khawvêl pathian,” Setana chunga beiseina nghah tluk a ni. (2 Kor. 4:4; 1 Tim. 6:17) Chuta ṭang chuan, ‘chanchin ṭha avângin’ Alex-a chu mawlmang takin a nung ṭan a. Ani chuan chutianga tihnain amah leh a chhûngkuate a tihlim zâwkin, Jehova a hnaih zualtîr zâwk thu a hrilh thei ang che u.—Marka 10:29, 30 chhiar rawh.

16. Engtin nge chapona ṭha chu a ṭha lo laka a danglam?

¹⁶ Thil dikte chapopui, a nih loh leh chhuan chu thil ṭha tak a ni thei a. Entîr nân, Jehova Thuhretu kan ni chu engtik lai pawhin kan chhuang tûr a ni. (Jer. 9:24) A âwm tâwka mahni inzahderna chuan thutlûkna ṭha siam tûr leh nungchang lama tehna kan neihte tihniam lo tûrin min pui ang. Mahse, kan thil thlîr dân emaw, kan dinhmun emaw dah sân lutukna chuan Jehova min hlattîr thei a ni.—Sâm 138:6; Rom 12:3.

17, 18. (a) Bible-a mi inngaitlâwmte leh chapote entîrna chu târ lang rawh. (b) Engtin nge unaupa pakhat chuan chapona chu Jehova hlattîrtua a hman loh?

¹⁷ Bible-ah chuan mi chapote leh mi inngaitlâwmte entîrna kan hmu a. Lal Davida chuan inngaitlâwm takin Jehova kaihhruaina a zawng a, a malsâwmna a dawng a ni. (Sâm 131:1-3) Mahse, Jehova chuan lal chapo Nebukadnezzara leh Belsazzara chu a titlâwm thung. (Dan. 4:30-37; 5:22-30) Tûn laiah pawh kan inngaihtlâwmna fiahna kan tawng ṭhîn. Kohhranho rawngbâwltu, kum 32 mi Ryan-a chu kohhran din tharna hmunah a insawn a. Ani chuan heti hian a sawi: “Upa ni tûra min ruat thuai ka inbeisei a;  mahse, kum khat a liam hnuah pawh min la ruat lo,” tiin. Upate’n a chungah a âwm tâwk zahna an lantîr lo anga ngaiin, Ryan-a chu thinrimin emaw, rilru nain emaw a awm tûr a ni em? Inkhâwm bansanin, chapona chu Jehova leh A mite hlattîrtuah a hmang tûr a ni em? Nang ni ta la eng nge i tih ang?

¹⁸ “Beiseina tihkhawtlai chungchânga kan thu leh hla chhuaha ka hmuh theih zawng zawng chu ka chhiar vek a. Dawhtheihna leh inngaihtlâwmna neih a ngai tih ka hre chhuak a. Jehova ka inzirtîr a ngai a ni,” tiin Ryan-a chuan a sawi. (Thuf. 13:12) Amah ringawt inngaihtuah lovin, kohhranah leh thu hrilhna hmuna mi dangte rawngbâwlsak lam pangah a rilru a pe ta zâwk a. Rei lote hnuah Bible zirpui hmasâwn tak a nei ta ṭeuh a ni. Ani chuan: “Kum khat leh a chanve a liam hnua upaa min ruat chuan mak ka ti hle a, ka rawngbâwlna nuam ka tih êm avângin upa nih leh nih loh chu ka buaipui tawh lo rêng rêng a ni.” tiin a sawi. —Sâm 37:3, 4 chhiar rawh.

19, 20. (a) Ni tina kan thiltihte’n Jehova min hlattîr lo tih engtin nge kan chian theih ang? (b) Jehova hnaihtute siam eng entîrnate nge kan entawn theih?

¹⁹ He thuziak leh thuziak hmasa lama kan sawiho tawh zawng zawngte khân kan nunah hmun dik tak chan tûr a nei ṭheuh va. Jehova chhiahhlawh kan ni hi kan inchhuangin, kan chapopui a ni. Chhûngkaw hlim tak leh hrisêlna ṭha chu Jehova thilpêk ropui berte zînga mi a ni a. Hnathawh leh sum leh pai chuan kan mamawhte nei thei tûrin min ṭanpui a ni tih kan hre thiam a ni. Intihhlimna chuan min tihahdam thei a, tûn lai thiamna pawh a ṭangkai tih kan hre bawk. Mahse, hêng thil a enga pawh a hun lova tih leh a lutuka tihna, a nih loh leh Pathian kan biakna tibuai zâwnga tihna chuan Jehova min hlattîr thei a ni.

²⁰ Setana chuan chutianga kan Pathian kan hlat chu a duh a. Chuti chung pawh chuan, chutiang chhiatna chu nangmah leh i chhûngkaw chunga thleng lo tûrin i do thei a ni! (Thuf. 22:3) Pathian Jehova hnaih la, a bulah awm reng ang che. He mi chungchânga min zirtîrtu atân hian Bible-a entîrna tam tak kan nei a. Enoka leh Nova chu “Pathian nên an lêng dûn ṭhîn.” (Gen. 5:22; 6:9) Mosia chuan ‘hmuh theih lohva chu a hmuh avângin a tuar ṭâng ṭâng a.’ (Heb. 11:27) Isua chuan a Pa vâna mi duhzâwng a tih ziah avângin eng tik lai pawhin Pathian ṭanpuina a dawng a ni. (Joh. 8:29) Chûng mite chu entawn ang che. “Lâwm fo ula; bâng lovin ṭawngṭai ula; engkimah lâwmthu hril fo rawh u.” (1 Thes. 5:16-18) Engmahin Jehova hlattîr che suh se! (w13-E 01/15)