1, 2. (a) Ia duwen Sehdan eh kin song en pitihedi aramas? (b) Dahme pahn sewese kitail en karanihala Koht?

 SIOHWA KOHT ketin kapikada aramas akan oh ketikihong irail anahn en ahneki nanpwungmwahu reh. Ahpw Sehdan men kitail en medewe me kitail sohte anahne Siohwa. Sehdan kin songosong en kahrehiong aramas akan ren kamehlele met sangete ahnsou me e pitihedi Ihp nan mwetuwel en Ihden. (Sen. 3:4-6) Sang ahnsowo lel met, aramas tohto kin medewe me re sohte anahne Koht.

² Kitail sohte anahne wiahda soangen sapwungohte. Paipel padahkihong kitail duwen ahl akan me Sehdan kin song en pitihedi aramas. (2 Kor. 2:11) Sehdan kin kasonge kitail en wiahda pilipil kan me pahn katohreikitailsang Siohwa. Iren onop en mwoweo padahkihong kitail duwen atail kak wiahda pilipil mwahu kan me pid doadoahk en mwohni, mehn kamweit kan, oh pil nan peneinei. Iren onop wet pahn koasoia soahng pahieu me Sehdan pil kin doadoahngki pwehn kasonge kitail. Met akan iei dipwisou kan duwehte computer oh pil soahng kan me duwehte met, roson en paliwar, mwohni oh pohnmwahso. Ma kitail kin wiahda pilipil mwahu me pid mepwukat, kitail kak karanihala de ‘keila mpen Koht.’​—Seims 4:8.

3. Ni soangsoangen ahl dah kan me emen kak doadoahngki computer de dipwisou kan me duwehte met?

³ Aramas akan me doadoahngki computer de dipwisou kan me duwehte met kin wie tohtohla. Ma kitail doadoahngki soangen dipwisou pwukat ni ahl pwung, re kak uhdahn wia sawas laud. Ahpw ma kitail doadoahngki ni ahl sapwung, re kak katohreikitailsang Samatailo nanleng. Computer kan kak sewese kitail. Riatail kan kin doadoahngki computer pwehn ntingihada oh pil wiahda Kahn Iroir kan. Computer kan kak sewese kitail en wia roporop oh pil kapehse rehn meteikan oh met kak kaperen ong kitail. Ahpw ma kitail nohnla perenki computer, kitail kakete kihong ahnsou laud en medemedewe duwen computer oh pil doadoahngki computer. TV de  redio kan kin padahkihong kitail me kitail anahne naineki dipwisou kapw koaros me wiawihda. Emen pwutak pwulopwul uhdahn men pwainda soangen computer ehu. Ih eri kihsang ehu eh mwidihlihk ko ni rir oh netikihla pwehn alehda computer wet. Ia uwen kansensuwed en mwekid wet!

4. Ia duwen emen brother eh wekidala eh irair suwed en nohn doadoahngki computer?

⁴ E pil uhdahn suwed en mweidohng computer de dipwisou kan me duwehte met en kauwe atail nanpwungmwahu rehn Siohwa. Kitail kakete kauwehla ahnsou laud en doadoahngki soahng pwukat de doadoahngki ni ahl sapwung. Jon, emen brother me kereniong sounpar 30, nda me e kin kihong ahnsou laud en doadoahngki computer ahpw kaidehn en wia eh onop. * E kin kalapw pepehd werei pwehn doadoahngki Internet. E nda me ni ahnsou me e uhdahn pwangada, e kin pil uhdahn apwal en uhdihsang koasoakoasoi de kilikilang kasdo kan, mehnda ma ekei suwed. E men wekidala irair wet, ih eri wiahiong nah computero en pein kunla ahnsou me e koasoanehdi e pahn meir.​—Wadek Episos 5:15, 16.

5, 6. (a) Dahme pahpa nohno kan anahne wia ong neirail seri kan? (b) Ia duwen pahpa nohno kan ar kak tehk mwahu me neirail seri kan kin ahneki werek mwahu?

⁵ Pahpa nohno kan, kumwail sohte anahne kaunda soahng koaros me noumwail seri kan kin wia, ahpw kumwail anahne kaweid arail kin doadoahngki computer kan. Dehr mweidohng irail en kilang Website kan me kin kasalehda tiahk samin, wunahni, mwadong lemei kan, de pil werekiong aramas suwed nan Internet. Ma ke mweidohng ren wia sohte lipilipil dahme re men wia pwe ren dehr kedirepweiuk, ele re pahn medewe me soahng pwukat sohte sapwung. Nin duwen pahpa nohno kan, kumwail pwukoahki pere noumwail seri kan oh noumwail me pwulopwul kan sang mehkoaros me kak katohreirailsang Siohwa. Mahn akan pil kin peiong emen me wia keper ong neirail seri kan. Eri pahpa nohno kan pil anahne perehsang neirail seri kan keper.​—Pil kilang Oseia 13:8.

⁶ Sewese noumwail seri kan ren werekiong Kristian me mah de pwulopwul kan me kin wiahda pilipil mwahu. Pil tamataman me noumw seri kan anahne iuk ken kihong irail omw ahnsou. Iang irail kouruhr, mwadong oh doadoahk. Met pahn sewese kumwail koaros en karanih Siohwa. *

7. Dahme kahrehda kitail koaros men kehlail de ahneki roson mwahu?

⁷ Kitail kin kalapw idek rehn meteikan ia irarail. Aramas kin soumwahu sangete ahnsou me Adam oh Ihp rongala Sehdan oh katohreirahsang Siohwa. Sehdan kin perenki atail soumwahuda pwehki ni ahnsou me kitail soumwahu, e kin apwal ong kitail en papah Siohwa. Oh ma kitail mehla, kitail sohte kak papah ih douluhl. (Mel. 115:17) Eri kitail men wia dahme kitail kak pwe kitail en kehlail de ahneki roson mwahu. * Kitail pil anahne nsenohki roson mwahu en riatail Kristian kan.

8, 9. (a) Ia duwen atail kak tehk mwahu me kaidehn ihte roson mwahu me kitail en medemedewe oh nsenohki? (b) Dahme kahrehda e mwahu kitail en pereperen?

 ⁸ Ahpw kaidehn ihte atail roson mwahu me kitail en medemedewe oh nsenohki. Ekei kin kihong ahnsou laud en koasoakoasoia duwen mwenge me mwahu ong paliwar, wiepe kan ong palien wini, de wini oh dipwisou kan ong roson mwahu oh mehn kamwahwihala kilirail de masarail. Irail kin koasoia mepwukat laudsang arail kin koasoia duwen Wehin Koht. Mwein re uhdahn kamehlele me re kin sewese meteikan. Ahpw kitail sohte kin doadoahngki Wasahn Kaudok de wasahn mihting tohrohr kan pwehn netiki de kangoangehki meteikan atail madamadau duwen roson mwahu. Dahme kahrehda?

⁹ Kitail kin tuhpene pwehn koasoiapene Paipel oh ahneki peren me kohsang sapwellimen Koht manaman. (Kal. 5:22) Kaidehn ih kahrepen mihting kan pwe kitail en koasoia duwen wini oh dipwisou kan ong roson mwahu, mehnda ma emen tohrohr kin men koasoia duwen met. Kitail kakete kihsang ahn meteikan ar peren. (Rom 14:17) Mweidohng meteikan ren wiahda pein arail pilipil duwen arail pahn apwalih roson en paliwararail. Sohte emen, de pil toahkte kan, me kak kamwahwihala soumwahu koaros. E sohte kin sewese kitail en pwunodki atail roson mwahu ahnsou koaros. (Luk 12:25) Ahpw, Paipel mahsanih me ma kitail pahn “pereperen,” met kak sewese kitail en kehlail.​—Lep. Pad. 17:22.

10. (a) Ia sapwellimen Siohwa madamadau ong emen me kaselel? (b) Iahd me kitail pahn ahneki roson unsek?

¹⁰ Pil duwehte, kitail anahne nsenohki duwen mwomwatail. Ahpw kitail sohte anahne mwomwehda pwulopwul sang uhdahn atail sounpar. Paipel mahsanih: “Mour werei iei ketingpen pwung; moangepwet iei kapwat lingan ehu.” (Lep. Pad. 16:31) Siohwa ketin medewe me soangen aramas dah kitail kin kesempwal sang mwomwatail, oh kitail en pil ahneki soangen madamadau wet. (Wadek 1 Piter 3:3, 4.) Eri ia duwe, kitail anahne pilada en ale wiepen wini de leke masatail de paliwaratail pwehn kamwahwihala mwomwatail mehnda ma soahng pwukat keper ong atail roson de mouratail? Sohte lipilipil atail sounpar de ia uwen roson en paliwaratail, atail kaselel kin kohsang atail ahneki ‘peren me KAUN-O pahn ketikihong kitail.’ (Neh. 8:10) Nan sampah kapw, kitail pahn ahneki roson unsek oh pil pwurehng pwulopwulla. (Sohp 33:25; Ais. 33:24) Lao lel ahnsowo, kitail anahne wiahda pilipil mwahu kan oh pwoson sapwellimen Siohwa inou kan. Met pahn sewese kitail en perenki mour ahnsou wet oh sohte kin nsenohkihte roson en paliwaratail.​—1 Tim. 4:8.

11. Ia duwen mwohni eh kak katohreikitailsang Siohwa?

¹¹ E sohte sapwung en naineki mwohni de song en koadoahkihada mwohni. (Ekl. 7:12; Luk 19:12, 13) Ahpw ma kitail kin poakohng mwohni, e pahn katohreikitailsang Siohwa. (1 Tim. 6:9, 10) “Anahn en sampah kan” kin wehwehki atail nohn pwunodki soahng kan me kitail anahne. Soangen anahn wet kin katohreikitailsang Siohwa. “Poakepen dipwisou kan” kin wehwehki me kitail kakete medewe me mwohni pahn kahrehda kitail en peren oh sohte perki mehkot oh met kak pitihkitaildi. (Mad. 13:22) Sises mahsanih me “sohte aramas emen” kak papah Koht oh ni ahnsowohte papah kepwehn sampah kan.​—Mad. 6:24.

12. Ni ahl dah kan me aramas akan kin song en mwadang wiahda mwohni tohto? Ia duwen atail kak soikala wiahda pilipil sapwung?

¹² Ma kitail medewe me mwohni iei me keieu kesempwal, kitail kakete lelohng kasongosong en wia me sapwung. (Lep. Pad. 28:20) Me tohto kin men mwadang wiahda mwohni tohto, kahrehda re kin pwainda soangen ticket kan me kak kahrehiong ren wihnkihda mwohni tohto. Ekei brother kin iang pidada pesines kan me dene re kak mwadang wiahda mwohni tohto, oh re kin inoukihong meteikan nan mwomwohdiso me re kak pil wiahda mwohni tohto. Ekei pak, brother kan kin peki mwohni sang tohn mwomwohdiso pwehn wia pesines ehu oh inoukihong irail me re pahn pwainohng irail laudsang. Ma kitail noahrok, kitail kakete iang pesines ehu me kak kahrehda kitail en kesehla mwohni laud. Eri kanahieng ken dehr  noahrok. E sohte kin kalapw wiawi me emen kin mwadangete wiahda mwohni tohto.

13. Ia duwen Siohwa eh ketin kupwurki kitail en kilangwohng mwohni?

¹³ Ma kitail kin mwohneki mahs “Wehin Koht oh dahme e kin ketin kupwurki,” Siohwa pahn ketin kapaiada atail doadoahk laud en alehdi dahme kitail uhdahn anahne. (Mad. 6:33; Ep. 4:28) E sohte ketin kupwurki kitail en memeir erein mihting kan pwehki atail nohn doadoahk laud. E sohte ketin kupwurki kitail en pwunupwunodki duwen mwohni ahnsou me kitail mi nan Wasahn Kaudok. Aramas tohto nan sampah wet kin medewe me re anahne wia soahng koaros me re kak pwehn koadoahkihada mwohni. Re sohte men doadoahk ahnsou me re mahla. Re kin kalapw padahkihong neirail seri kan ren wia duwehte. Ahpw Sises ketin kasalehda me met sohte wia elen loalokong. (Wadek Luk 12:15-21.) Keasi medewe me e kak noahrok oh pil ahnsowohte ahneki nanpwungmwahu rehn Siohwa.​—2 Nan. 5:20-27.

14, 15. Dahme kahrehda e sohte loalokong en medewe me mwohni pahn kihda epwel mwahu ong kitail? Menlau karasahda.

¹⁴ Ikel kan kin duhla pwehki re kin song en koledi mwahmw me nohn toutou. Soahng wet kakete wiawihong kitail ma kitail kin nantihong laud en kepwehpwehla. Emen elder me ede Alex kawehwehda me e kin uhdahn kanahieng nah mwohni. E sohte pil kin men kauwehla mwahl shampoo. Ahpw e medewehda me ma e koadoahkihada mwohni laudsang me e naineki, e kak sohla doadoahk oh pioneer. Ih eri sukuhlki laud ia duwen eh pahn kak pwainda oh netikihla kepwehn pesines kan me kin wiahda mwohni laud. E doadoahngkihla nah mwohni koaros pwehn pwainda dahme e kak alehdi. E pil pekihda mwohni pwehn pil pwainda tohtohsang met. Ahpw dahme e pwainda ko sohla mie katepe de e sohla kak ale wihn en mepwukat. Alex nda: “I koasoanehdi teng I en kapwurehdo nei mwohni ko.” E medewe me ma e awih, soangen dipwisou pwukat pahn pwurehng miehla katepe.

¹⁵ Alex kin apwalki medewe mehkot tohrohr likin dahme e pwainda ko. E kin apwal ong ih en mwohneki mahs eh papah Siohwa oh e sohla kak meir mwahu. Ahpw e sohla kak pwurehng ale wihn en dahme e pwainda ko. Alex luhs sang nah mwohni ko koaros oh e anahne netikihla imweo. E nda me e kahrehda kahpwal laud ong eh peneineio. Ahpw e sukuhlki mehkot kesempwal. E nda me emen me kin koapworopworki me koasoandi en Sehdan pahn kak kihda epwel mwahu oh nsenamwahu pahn uhdahn nsensuwedla. (Lep. Pad. 11:28) Ma kitail kin kihong atail likilik koaros nan mwohni oh pil atail koahiek en koadoahkihada mwohni, kitail kin uhdahn koapworopworki Sehdan me iei “koht suwed en sampah wet.” (2 Kor. 4:4; 1 Tim. 6:17) Met Alex wiahdahr wekidekla kan nan eh mour pwehn kak pwurehng kihong ahnsou laud en kalohki rongamwahwo. Met kahrehiong ih oh eh peneinei ren nsenamwahu oh sewese irail ren karanih Siohwa.​—Wadek Mark 10:29, 30.

16. Ia duwen suwei eh kak wia mehkot mwahu? Dahme kak wiawi ma kitail kin nohn medemedewe pein kitail?

¹⁶ Kitail anahne suweiki atail wia Sounkadehdehn Siohwa kan. (Ser. 9:24) Pwehki met, kitail kin ahnsou koaros song en wiahda pilipil mwahu kan oh idawehn sapwellimen Koht koasoandi ileile kan. Ahpw kitail en kanahieng en dehr pohnmwahsohla oh medewe me kitail ese laudsang Siohwa, pwehki met kak katohreikitailsang ih.​—Mel. 138:6; Rom 12:3.

17, 18. (a) Ihs me Paipel kasalehda me aktikitik? Ihs me nohn pohnmwahso? (b) Dahme emen brother wia pwe pohnmwahso en dehr katohre ih sang Siohwa?

¹⁷ Paipel padahkihong kitail duwen irail kan me pohnmwahso oh pil irail kan me aktikitik. Nanmwarki Depit ni karakarahk peki kaweid sang Siohwa oh Siohwa ketin kapaiada ih pwehki met. (Mel. 131:1-3) Ahpw Siohwa ketin kaloke Nanmwarki Nepukadnesar oh Pelsassar pwehki ara pohnmwahso. (Dan. 4:30-37; 5:22-30) Ekei pak kitail kin kakete mihla nan irair apwal ma kitail kin pohnmwahso. Ryan, sounsawas men, me sounpar 32, keseula ni ehu mwomwohdiso kapw.  E medewe me e pahn mwadangete wiahla elder men. Ahpw mwurin sounpar ehu, e saikinte wiahla elder men. Ia duwe, Ryan pohnmwahsohla oh lingeringerda pahn elder ko pwehki eh sohte wiahla elder men? E uhdihsang towehda mihting kan oh mweidohng eh pohnmwahso en katohre ih sang Siohwa oh mwomwohdiso? Dahme ke pahn wia ma ke mi nan irair wet?

¹⁸ Ryan wia roporop ong ia duwen eh pahn awih mehkot mwahu. (Lep. Pad. 13:12) E nda: “I tepida pohnese me I anahne esehla kanengamah oh aktikitik. I anahne mweidohng Siohwa en ketin kaiahne ie.” Ryan tepida medewe ahl akan me e kak sewesehki meteikan nan mwomwohdiso oh aramas akan me e tuhwong nan kalohk. Mwurin ahnsou kis, e kin wia onop en Paipel rehn ekei me kin kekeirda mwahu. E nda: “Ni ahnsou me I idihdida pwehn wiahla elder mwurin sounpar ehu elep, I pwuriamweikihla. I solahr kin medewe duwen met pwehki I uhdahn perenki ei doadoahk en kalohk.”​—Wadek Melkahka 37:3, 4.

19, 20. (a) Ia duwen atail kak tehk mwahu me soahng kan me kitail sukuhlki nan iren onop pwukat sohte pahn katohreikitailsang Siohwa? (b) Ihs irail kan me arail mehn kahlemeng en karanih Siohwa kitail kak alasang?

¹⁹ Sohte ehu nanpwungen soahng isuh pwukat me kitail koasoiapene nan iren onop riau pwukat sapwung. Kitail kin suweiki atail wia Sounkadehdehn Siohwa kan. Kitail kak perenki mouren peneinei nsenamwahu oh roson mwahu. Atail doadoahk oh neitail mwohni kin anahn pwe kitail en kak apwalih kitail oh atail peneinei. Mwadong oh mehn kamweit kan kin mwahu ong kitail, oh computer de soahng kan duwehte met kak sewese kitail. Ahpw kitail en tamataman me ma kitail wia sohte lipilipil dah ni ahnsou sapwung, ni uwe ieu me sohte pwung de ni ahl sapwung, kitail kak katohreikitailsang Siohwa.

²⁰ Sehdan men ken katohreiuksang Siohwa. Ahpw ke kak nantihong en pere iuk oh pil omw peneinei. (Lep. Pad. 22:3) Keiong mpen Siohwa oh karanih ih. Mie mehn kahlemeng tohto nan Paipel duwen aramas akan me wia met. Enok oh Noha poadidiong Koht. (Sen. 5:22; 6:9) Moses kamehlele Koht, duwehte me e kak kilang ih. (Ipru 11:27) Sises kin ahnsou koaros ketin wia dahme Semeo ketin kupwurki en wia oh Semeo ketin kapaiada ih pwehki met. (Sohn 8:29) Alasang mehn kahlemeng pwukat. “Kumwail pereperen ahnsou koaros, oh poadidiong kapakap pil ahnsou koaros. Kumwail kasapahlkalahngan ong Koht ni mehkoaros.” (1 Des. 5:16-18) Dehr mweidohng emen de mehkot en katohreiuksang Siohwa!