1, 2. (a) Fa Satan e pruberi fu kori sma? (b) San o yepi wi fu kon krosibei na Gado?

YEHOVAH GADO meki wi nanga a firi fu wani de wan mati fu en. Ma Satan wani taki wi musu denki leki fa en e denki. A wani taki wi musu denki taki wi no abi Yehovah fanowdu. A sani dati no tru kwetikweti, ma sensi a ten di a kori Eva nanga a lei disi na ini a dyari fu Eden, a e tan panya a lei disi (Gen. 3:4-6). Dusundusun yari kaba furu libisma e meki a srefi fowtu.

² Koloku taki wi no abi fu meki a srefi fowtu dati. Bijbel e taki: „Wi sabi san a abi na prakseri” (2 Kor. 2:11). Satan wani pori a matifasi di wi abi nanga Yehovah èn dati meki a e suku fu kori wi fu teki don bosroiti. Ma soleki fa a tra artikel ben sori wi, dan wi kan teki koni bosroiti te a abi fu du nanga wi wroko, prisiriten èn nanga famiri. Na artikel disi o taki fu ete fo sani di Satan e gebroiki fu kori wi. Wan fu den sani disi na computer noso tra nyun sani di sma meki. Den tra sani di a e gebroiki fu kori wi na wi gosontu, moni, nanga heimemre. Efu wi e teki koni bosroiti, wi kan „kon krosibei na Gado”.—Yak. 4:8.

3. Sortu bun sani noso fowtu sani sma kan du nanga sani soleki computer?

³ Na heri grontapu, sma abi computer nanga tra nyun sani soleki cèl, telefisi nanga DVD. Den sani disi kan bun fu gebroiki. Ma efu wi no e gebroiki den na wan bun fasi, dan den kan pori a matifasi di wi abi nanga wi hemel Tata. Fu eksempre, wan computer na wan bun sani. Den brada gebroiki computer fu meki a tijdschrift di yu e leisi nownowde. Wi kan gebroiki wan computer fu ondrosuku sani, noso fu taki nanga sma. Son leisi wi kan gebroiki en tu fu abi pikin prisiri. Ma efu wi lobi computer trutru, dan a kan pasa taki wi e prakseri soso computer èn wi kan lasi furu ten na en tapu. Furu reklame de di e gi wi a denki taki wi musu abi ibri nyun sani di e kon na doro. Wan yonguman ben wani wan fu den pikin plata computer so te, taki sondro fu sma sabi a seri wan niri fu en fu bai a computer. Dati na wan sari tori!

4. San wan Kresten brada du fu tapu nanga a gwenti fu gebroiki en computer tumusi furu?

 ⁴ Ma san moro ogri, na taki te wi e gebroiki den sani disi tumusi furu noso te wi e gebroiki den na wan fowtu fasi, dan den kan pori a matifasi di wi abi nanga Yehovah. Jon, * wan Kresten brada di abi 28 yari, taki: „Mi sabi taki Bijbel e sori wi taki wi musu ’gebroiki a ten fu wi na wan koni fasi’. Ma te mi e sidon na baka a computer, mi no man tapu.” Jon ben gwenti fu go tapu Internet te latilati neti. A taki: „O moro mi ben weri, o moro muilek a ben de gi mi fu stop taki nanga sma na tapu Internet noso fu luku syatu video. A no ala ten den video disi ben de bunwan.” Fu man tapu nanga a takru gwenti disi, Jon poti wan programa na tapu en computer di e kiri a computer na a yuru di Jon musu go sribi.—Leisi Efeisesma 5:15, 16.

5, 6. (a) Sortu frantwortu papa nanga mama abi? (b) San papa nanga mama kan du fu yepi den pikin fu feni bun mati?

⁵ Papa nanga mama, a no ala leisi te den pikin fu yu de na tapu a computer yu musu sidon nanga den. Ma toku a bun fu sabi san den e du na tapu a computer. No libi den meki den luku morsu sani tapu Internet, noso prei game pe sma e du soso ogri. No libi den tu fu luku afkodrei sani noso fu taki nanga sma di no de bun mati. Efu yu e libi den meki den du san den wani soso fu di yu no wani meki den weri yu ede, dan den kan denki taki yu no abi problema nanga den sani disi. Na yu abi a frantwortu fu yepi yu pikin, awinsi den na tini kaba. Noso den sani dati o pori a matifasi di den abi nanga Yehovah. Srefi wan meti e kibri den pikin fu en gi ogri. Fu eksempre, Bijbel e sori san wan beer e du te wan sma e suku fu du ogri nanga den pikin fu en.—Luku Hosea 13:8.

⁶ Yepi yu pikin fu suku bun mati na mindri yongu nanga owru Kresten brada nanga sisa di de wan bun eksempre. Hori na prakseri taki den pikin abi yu fanowdu èn na yu musu meki ten gi den. Sobun, meki ten fu lafu nanga den, fu prei nanga den, fu wroko makandra nanga den èn fu yepi den meki den „kon krosibei na Gado”. *

7. Fu san ede wi alamala wani tan gosontu?

⁷ Furu leisi sma e aksi wi: „Fa yu e firi tide?” Na aksi disi e memre wi na wan problema di wi leki libisma abi dusundusun yari kaba. Sensi wi fosi papa nanga mama meki Satan kori den fu gowe libi Yehovah, wi alamala e siki. Satan lobi te wi e siki, fu di a sabi taki a o moro muilek gi wi fu dini Yehovah. Boiti dati, te wi dede wi no man dini Gado kwetikweti (Ps. 115:17). Sobun, wi e du ala sani wi man fu tan gosontu. Wi musu broko wi ede tu nanga a gosontu fu wi brada nanga sisa.

8, 9. (a) Fu san ede a gosontu fu wi no musu de a wan-enkri sani di wi e prakseri? (b) Fu san ede a bun fu tan abi prisiri?

⁸ Ma a gosontu fu wi no musu de a wan-enkri sani di wi e prakseri. Son sma lobi taki  fu ala sortu spesrutu nyanyan di sma musu nyan fu tan gosontu. Den e gi trawan deki-ati tu fu suku ala sortu datrayepi noso fu dringi ala sortu dresi. Den sma disi e taki nanga moro faya fu den sani disi leki te den ben o taki fu a bun nyunsu fu Gado Kownukondre. Kande den e bribi taki den e yepi trawan. Ma te wi de na a Kownukondre zaal noso na den bigi konmakandra, dan a no fiti fu gi sma deki-ati fu bai ala sortu dresi noso ala sortu sani fu moi a skin. Wi no musu seri den sani disi drape tu. Fu san ede?

⁹ Wi e go na den konmakandra fu taki fu Bijbel èn fu kisi moro prisiri di Gado e gi wi nanga yepi fu en santa yeye (Gal. 5:22). Den konmakandra fu wi no seti fu taki fu ala sortu datrayepi noso dresi, awinsi na sma srefi aksi wi fu taki fu a tori disi. Efu wi gebroiki den konmakandra fu taki fu den sani disi, sma kan lasi den prisiri (Rom. 14:17). Ibri sma musu bosroiti gi ensrefi san a wani du fu abi wan moro bun gosontu. Boiti dati, nowan sma man dresi ala siki. Srefi a moro bun datra e kon owru èn e siki, èn te fu kaba a e dede. Awinsi o furu wi e broko wi ede nanga wi gosontu, wi no kan meki wi libi kon moro langa (Luk. 12:25). Ma „wan ati di e prisiri, bun leki dresi”.—Odo 17:22.

10. (a) O ten wan sma moi gi Yehovah? (b) O ten wi o de gosontu dorodoro?

¹⁰ A no fowtu fu wani abi wan moi skin nanga wan moi fesi. Ma wi no musu pruberi ala sortu fasi fu tan yongu nomonomo. No feti fu puru den sani di e sori taki yu e kon owru. A kan yepi trawan fu si taki yu na wan lepi sma. Boiti dati, den kan abi moro lespeki gi yu. Bijbel e taki: „Weti wiwiri na wan kroon di e moi na ede fu den wan di e waka a reti pasi” (Odo 16:31). Na so Yehovah e prakseri fu sma di kon owru èn wi musu pruberi fu si wisrefi leki fa en e si wi. (Leisi 1 Petrus 3:3, 4.) Sobun, a no ben o de wan koni sani srefisrefi fu du ala sortu oparâsi èn dringi ala sortu dresi di kan pori a gosontu fu wi noso di kan kiri wi srefi, soso fu di wi wani tan moi. Na „a prisiri di Yehovah e gi” e meki wan sma moi, awinsi o owru a de noso awinsi o gosontu a de (Neh. 8:10). Soso na ini a nyun grontapu wi o gosontu dorodoro èn wi o kon yongu baka (Yob 33:25; Yes. 33:24). Ma solanga a ten dati no doro, wi musu teki koni bosroiti èn wi musu abi bribi. Disi o yepi wi fu tan krosibei na Yehovah èn fu no broko wi ede tumusi furu nanga a gosontu fu wi.—1 Tim. 4:8.

11. Fa moni kan kori wan sma?

¹¹ A no fowtu fu abi moni èn a no fowtu tu fu abi wan bisnis (Preik. 7:12; Luk. 19:12, 13). Ma te wi ’lobi moni’, dan wi kan de seiker taki disi o pori a matifasi di wi abi nanga Yehovah (1 Tim. 6:9, 10). Den wortu „broko-ede fu a grontapu disi” wani taki dati wan sma e broko en ede tumusi nanga den sani di a abi fanowdu. Den kan pori a matifasi di yu a abi nanga Yehovah. Na so a de tu nanga „a bedrigifasi fu gudu”. Dati na te wan sma denki taki gudu kan meki a de koloku èn taki a no o abi nowan broko-ede (Mat. 13:22). Yesus ben sori krin taki „nowan sma” kan dini Gado nanga gudu na srefi ten.—Mat. 6:24.

12. Sortu sani sma e du na ini a ten disi soso fu di den wani meki bigi moni? San o yepi wi fu no meki den kori wi?

¹² Te wan sma denki taki moni na a moro prenspari sani, dan dati kan kori en fu du sani di no bun (Odo 28:20). Fu di son sma ben wani kon gudu esi-esi, meki den go bai lòt. Son brada noso sisa bigin nanga wan bisnis fu di den ben denki taki den ben o meki furu moni na ini wan syatu pisi ten. Den pramisi trawan na ini a gemeente srefi taki efu den ben o go na ini a bisnis dati, den ben o meki furu moni tu. Tra brada aksi sma na ini a gemeente fu leni moni fu den fu opo wan bisnis èn den pramisi den taki den ben o pai den a moni dati baka nanga bun furu rente. No meki bigi-ai breni yu, noso sma o kori yu. Teki koni bosroiti. Awinsi wan sma pramisi yu taki yu o meki bigi moni, no de gaw fu bribi en.

13. Fa Yehovah wani taki wi musu si moni?

 ¹³ Te wi e si „a Kownukondre nanga Gado en retidu” leki a moro prenspari sani na ini wi libi, dan Yehovah o blesi a muiti di wi e du fu feni san wi abi fanowdu (Mat. 6:33; Ef. 4:28). Te wi e wroko tumusi langa, dan wi skin kan kon weri èn wi kan fadon na sribi na den konmakandra. Ma Yehovah no wani dati pasa nanga wi. A no wani tu taki wi e sidon na den konmakandra e broko wi ede nanga moni. Na ini a grontapu yu abi furu sma di e bribi taki te den e meki furu moni, den o abi wan bun owru dei èn a libi fu den o go bun. Nofo tron den wani taki den pikin fu den e feti na baka gudu tu. Yesus ben sori taki a no de wan koni sani fu denki so. (Leisi Lukas 12:15-21.) A tori disi e meki wi prakseri Gehasi di ben denki taki a ben kan feti na baka gudu sondro taki dati ben o pori a matifasi di a ben abi nanga Yehovah.—2 Kow. 5:20-27.

14, 15. Fu san ede a no de wan koni sani fu denki taki moni o meki wi moro koloku? Gi wan eksempre.

¹⁴ Son leisi sma si fa wan aka fanga wan fisi di ben hebi tumusi gi en. Den si fa na aka sungu fu di a no ben wani lusu a fisi. So wan sani kan pasa tu nanga wan Kresten? Wan owruman di nen Alex e taki: „Mi ben abi a gwenti fu luku bun fa mi e gebroiki mi moni. Fu eksempre, efu mi ben puru tumusi furu sopo na ini a batra, dan mi ben e poti pikinso fu en na ini a batra baka.” Ma toku Alex bigin nanga wan bisnis fu meki moro moni fu di a ben prakseri taki a ben o man tapu nanga wroko èn go pionier. A bigin poti moro prakseri na a bisnis fu en. Te fu kaba a gebroiki ala en moni èn a go leni moni srefi fu meki moro moni. Ma a lasi ala sani. Alex taki: „Mi ben de nomonomo fu feni mi moni baka.” A ben denki taki te a ben o go doro nanga a bisnis fu en, dan a ben o bigin meki furu moni baka.

¹⁵ Omeni mun langa Alex ben e prakseri soso a bisnis fu en. A ben muilek gi en fu poti a diniwroko fu Gado na a fosi presi èn a lasi sribi tu. Ma noiti moro a bisnis fu en drai bun baka. Alex lasi ala en moni èn a ben abi fu seri en oso. A feni taki a tyari wan lo problema kon gi en osofamiri, ma a leri wan prenspari sani tu. A taki: „Now mi sabi taki efu wan sma denki taki a grontapu fu Satan o man yepi en fu abi wan bun libi noso fu meki a de koloku, a o si taki dati no de so kwetikweti” (Odo 11:28). Efu wi e frutrow na tapu moni noso efu wi wani meki bigi moni, dan wi e sori taki wi e frutrow na tapu a grontapu fu Satan, „a gado fu a grontapu disi” (2 Kor. 4:4; 1 Tim. 6:17). Sensi a ten dati Alex kenki a fasi fa a ben gwenti libi èn now a abi moro ten fu preiki „a bun nyunsu”. Alex taki dati en nanga en osofamiri kon moro koloku èn den kisi wan moro bun matifasi nanga Yehovah.—Leisi Markus 10:29, 30.

16. (a) Fu san ede a no fowtu fu breiti nanga wan sani di yu du? (b) San kan pasa te wi abi heimemre?

¹⁶ Wi musu breiti taki wi de wan Kotoigi fu Yehovah (Yer. 9:24). Sobun, pruberi ala ten fu teki bun bosroiti èn fu du san Gado e aksi fu wi. Ma te wi e poti tumusi furu prakseri na a posisi di wi abi noso na a fasi fa wi e denki fu sani, dan dati kan pori a matifasi di wi abi nanga Yehovah.—Ps. 138:6; Rom. 12:3.

17, 18. (a) Sortu eksempre wi abi na ini Bijbel fu sma di ben abi sakafasi èn sma di ben abi heimemre? (b) San yepi wan brada fu no meki heimemre pori a matifasi di a ben abi nanga Yehovah?

¹⁷ Bijbel abi furu eksempre fu sma di ben abi heimemre èn fu sma di ben abi sakafasi. Fu di Kownu David ben abi sakafasi, meki a suku yepi na Yehovah èn Yehovah blesi en (Ps. 131:1-3). Ma Yehovah strafu Kownu Nebukadnesar nanga Kownu Belsasar fu di den ben abi heimemre (Dan. 4:30-37; 5:22-30). Son leisi wi srefi kan kon na ini wan situwâsi di e sori wi krin efu wi abi sakafasi noso heimemre. Ryan, wan dinari ini a diniwroko di abi 32 yari, ben froisi go na wan tra gemeente. Ryan taki: „Mi ben denki taki mi no ben o abi fu wakti langa fu tron owruman. Ma  baka wán yari mi no ben tron owruman ete.” Yu denki taki Ryan ben o hori den owruman fu a gemeente na ati noso taki en ati ben o bron nanga den taki den no meki a tron owruman? Yu denki taki disi ben o tapu en fu go na den konmakandra noso taki heimemre ben o pori a matifasi di a abi nanga Yehovah èn nanga a pipel fu En? San yu ben o du?

¹⁸ Ryan taki: „Mi leisi ala artikel di e sori san wan sma musu du te sani no e waka leki fa a ben fruwakti” (Odo 13:12). A taki moro fara: „Mi kon si taki mi ben musu leri fu abi pasensi nanga sakafasi. Mi ben musu gi Yehovah na okasi fu gi mi leri.” Ryan leri fu no poti prakseri na ensrefi, ma na sani di a ben kan du fu yepi tra sma na ini a gemeente èn na ini a preikiwroko. Syatu baka dati a ben abi furu Bijbelstudie di ben e go na fesi. A taki: „Mi no ben fruwakti disi, ma baka wán nanga afu yari mi tron owruman. Mi ben prisiri so te nanga a preikiwroko, taki mi no ben broko mi ede moro nanga a tori disi.”—Leisi Psalm 37:3, 4.

19, 20. (a) San wi musu du fu no meki sani di wi gwenti du ibri dei, pori a matifasi di wi abi nanga Yehovah? (b) Sortu eksempre wi abi fu sma di ben tan krosibei na Yehovah?

¹⁹ Nowan fu den seibi sani di kari na ini na artikel disi èn na ini a trawan na wan fowtu sani. Wi e prisiri taki wi na futuboi fu Yehovah. Wan koloku osofamiri nanga wan bun gosontu na tu fu den moi sani di Yehovah gi wi. Wi kon si tu taki wroko nanga moni kan yepi wi fu feni den sani di wi abi fanowdu. Wi sabi taki prisiriten kan meki wi firi bun èn wi kan gebroiki sani soleki computer heri bun. Ma te wi e feti na baka den sani disi, te wi e gebroiki ala wi ten fu abi den, noso te den e meki taki wi no e poti na anbegi fu wi na a fosi presi moro, dan dati kan pori a matifasi di wi abi nanga Yehovah.

²⁰ Wi sabi taki na dati Satan wani. Ma yu musu meki tranga muiti fu no meki dati pasa nanga yu noso nanga yu osofamiri (Odo 22:3). Kon moro krosibei na Yehovah èn no gowe libi en. Furu eksempre de na ini Bijbel fu sma di ben man du disi. Heinok nanga Noa „ben e waka nanga a tru Gado” (Gen. 5:22; 6:9). Moses tan bribi na ini Gado èn a „horidoro neleki a ben e si a sma di wi no man si nanga wi ai” (Hebr. 11:27). Ala ten Gado horibaka gi Yesus fu di a ben e tan du san en hemel Tata ben wani (Yoh. 8:29). Teki na eksempre fu den sma disi. „Ala ten un musu prisiri. Begi doronomo. Taki Gado tangi gi ala sani” (1 Tes. 5:16-18). No meki nowan sani pori a matifasi di yu abi nanga Yehovah!