1, 2. (a) Ayini “emachinga” aSathane? (b) Yini letawusisita kutsi sisondzele kuNkulunkulu?

NKULUNKULU JEHOVA wadala bantfu banesidzingo sekufuna kusondzela kuye. Kodvwa-ke Sathane ufuna sicabange njengaye—kutsi asimdzingi Jehova. Lawa ngemanga Sathane labesolo awakhutsata kusukela adukisa Eva ngawo ensimini yase-Edeni. (Gen. 3:4-6) Kute kube ngulamuhla, bantfu labanyenti bayachubeka benta leliphutsa.

² Lokujabulisako kutsi tsine asifuni kuwela kulesilingo saSathane. “Siyawati emachinga aSathane.” (2 Khor. 2:11) Sathane wetama kusehlukanisa naJehova ngekusenta sitsatse tincumo letimbi. Njengobe sihloko lesendlulile sivetile, singakwati kwenta tincumo letinhle mayelana nemsebenti, tekutijabulisa nasetindzabeni letimayelana nemndeni. Lesihloko sitawukhombisa kutsi kubeka bucwepheshe, imphilo, imali nekutigcabha endzaweni yako, kungasisita njani kutsi ‘sisondzele kuNkulunkulu.’—Jak. 4:8.

3. Niketa sibonelo sekutsi bucwepheshe bungasetjentiswa njani kahle nobe kabi.

³ Tintfo letisembili tebucwepheshe tandzile emhlabeni wonkhe. Natisetjentiswe kahle, tingaba ngemathulusi lalusito. Kutisebentisa kabi letintfo tebucwepheshe, kungasehlukanisa naBabe wetfu wasezulwini. Cabanga ngabongcondvomshini. Lomagazini lowufundzako ubhalwe waphindze washicilelwa kusetjentiswa bongcondvomshini. Ngcondvomshini ungaba lithulusi lelihle lekucwaninga, lekuchumana nalabanye nelekutijabulisa. Nobe kunjalo, singaba tigcili tebucwepheshe babongcondvomshini. Ngekuhlakanipha, betekukhangisa bacinisekisa bantfu kutsi kufanele babe nato tintfo letinsha letisandza kuphuma. Lelinye lijaha belinesifiso lesikhulu sekuba nangcondvomshini loyi-tablet, ladzimate latsengisa inso yalo ngansense kute likwati kuwutsenga. Cabanga nje kutsi latihlekisela kabuhlungu kangakanani kube kute sidzingo!

4. Lomunye umKhristu wasilungisa njani simo labekuso sekusebentisa kabi ngcondvomshini?

 ⁴ Kubuhlungu kakhulu kuvumela kusebentisa kabi bucwepheshe kusicedzele buhlobo betfu naJehova. Jon, longumKhristu loseminyakeni yabo-20, * utsi: “Ngiyati kutsi liBhayibheli litsi kufanele ‘sibambisise ematfuba,’ kodvwa ngiyehluleka kwenta njalo kubongcondvomshini.” Jon uvame kutikhandza asahleti sikhatsi lesidze ebusuku avule i-Internet. Utsi: “Nangitiva sengidziniwe, kuba matima kakhulu kutsi ngiyekele kucoca nalabanye nobe kubukela ema-video—futsi lamanye awo awawafaneli emaKhristu.” Kute Jon ayekele lomkhuba wakhe lomubi, wente ngcondvomshini wakhe kutsi uticishe nasekufike sikhatsi sekutsi alale.—Fundza Efesu 5:15, 16.

5, 6. (a) Yini batali lokufanele bayentele bantfwana babo? (b) Batali bangenta njani kute bantfwana babo batihlanganise nebantfu labakahle?

⁵ Batali, akudzingeki nilandzelele konkhe lokwentiwa bantfwana benu, kodvwa kufanele niyinake indlela labasebentisa ngayo ngcondvomshini. Ningabashiyi bodvwa bavule i-Internet babukela kutiphatsa lokubi, imidlalo lenebudlova, kusebentisa imimoya futsi batihlanganisa nebangani lababi, kute nje nibagcine bamatasa futsi banganiphatamisi. Nanenta njalo bangase batsi, ‘BoMake naBabe abanendzaba naloko, kusho kutsi kulungile.’ Kungumsebenti wenu njengebatali kuvikela bantfwana benu—lokufaka ekhatsi labo labaseminyakeni yekutfomba—kunobe yini lengabehlukanisa naJehova. Ngisho netilwane tiyabavikela bantfwana bato engotini. Ase ucabange nje kutsi libhele lelisikati lingenta njani nalingabona kutsi kunalotsite lofuna kutsatsa litfole lalo.—Catsanisa naHoseya 13:8.

⁶ Sitani bantfwana benu kutsi bahlele imicimbi leyakhako letawuba nemaKhristu lasibonelo lasemasha nalakhulile. Khumbulani kutsi bantfwana benu badzinga kucitsa sikhatsi nani. Ngako-ke, banini nesikhatsi sekuhleka nabo, sekudlala, sekusebenta ‘nesekusondzela kuNkulunkulu’ nikanye nabo. *

7. Yini lesenta sifune kuhlala siphilile?

⁷ “Unjani?” Lawa ngemavi ekubingelela laveta liciniso lelibuhlungu. Ngesizatfu sekutsi batali betfu bekucala bavumela Sathane wabehlukanisa naJehova, sonkhe siyagula. Kugula kufeza injongo yaSathane, ngobe nasigula kuba matima kutsi sikhonte Jehova. Nasifa, sehluleka ngalokuphelele kumkhonta. (Hla. 115:17) Ngako-ke, sifuna kwenta konkhe lokusemandleni etfu kute sitigcine siphilile. * Kufanele futsi sikhatsateke ngemphilo yebazalwane betfu nangenhlalakahle yabo.

8, 9. (a) Singakubalekela njani kukhatsateka kakhulu ngemphilo yetfu? (b) Ngutiphi tinzuzo tekujabula?

⁸ Nobe kunjalo, kubalulekile kutsi singakhatsateki kakhulu ngemphilo yetfu. Labanye  bashisekela kakhulu kukhangisa ngetintfo tekwehlisa umtimba, imitsi yemphilo, nobe tintfo tekutilungisa, kwendlula indlela labashumayela ngayo tindzaba letimnandzi teMbuso waNkulunkulu. Bangase bacabange kutsi basita labanye. Ngisho nobe kunjalo, akusikuhle kukhangisa ngemitsi yetemphilo neyekutilungisa nobe ngemibono yetfu, ekucaleni nobe ekupheleni kwemihlangano eHholweni leMbuso nasemihlanganweni lemincane nalemikhulu. Yini leyenta kungabi kuhle kwenta njalo?

⁹ Kungobe nasihlangene sisuke sicoca ngetintfo letitsintsa buhlobo betfu naNkulunkulu, sitfutfukise injabulo yetfu, lesitselo semoya waNkulunkulu longcwele. (Gal. 5:22) Etimeni letinjalo, kunika bantfu teluleko temphilo nobe imitsi, uceliwe nobe ungakacelwa, kungaphatamisa injongo yetfu yekuhlangana futsi kwente labanye baphelelwe yinjabulo. (Rom. 14:17) Indlela umuntfu latelapha ngayo kufanele atikhetsele yena. Ngetulu kwaloko, kute umuntfu longelapha konkhe kugula. Ngisho nabodokotela labatiwako bayaguga, bagule ekugcineni bafe. Kukhatsateka kakhulu ngemphilo yetfu angeke kwandzise emalanga etfu ekuphila. (Luk. 12:25) Ngakulokunye, “kuhlala ujabulile kungumutsi lophilisako.”—Taga 17:22.

10. (a) Ngutiphi tici tebuntfu letibukeka titinhle kuJehova? (b) Singayijabulela njani imphilo lencono?

¹⁰ Ngendlela lefanako, kuhle kukhatsateka ngendlela lesibukeka ngayo. Kodvwa-ke, akukadzingeki kutsi setame kamatima kususa timphawu tekuguga. Leto timphawu tingakhombisa kutsi uvutsiwe, uyahlonipheka futsi tivete nebuhle bakho bangekhatsi. Nasi sibonelo: LiBhayibheli litsi: “Budzala bungumvuzo wemphilo yekulunga; timvu tingumchele walabalungile.” (Taga 16:31) Jehova usibuka ngaleyo ndlela futsi natsi kufanele setame kutibuka ngendlela lasibuka ngayo. (Fundza 1 Phetro 3:3, 4.) Ngako-ke, kukuhlakanipha yini kutifaka engotini ngalokungakafaneli ngekutsi sihlindvwe nobe sisebentise imitsi letsite kute sishintje indlela lesibukeka ngayo? ‘Injabulo levela kuJehova’ ingumtfombo webuhle lobuvela ngekhatsi kumuntfu, ngisho nobe angakanani ngeminyaka nobe akusiphi simo semphilo. (Neh. 8:10) Kuseveni lelisha kuphela lapho sitawuphila saka futsi sibuyele sibe basha. (Jobe 33:25; Isa. 33:24) Njengobe singakefiki leso sikhatsi, kuba nekuhlakanipha kanye nekukholwa, kutasisita sihlale sisondzelene naJehova njengobe setama kujabulela kuphila kwetfu kwanyalo.—1 Thim. 4:8.

11. Imali ingaba njani sitsiyo?

¹¹ Imali ayisiso sono futsi akusikubi kuvula libhizinisi ngendlela lefanele. (Shu. 7:12; Luk. 19:12, 13) Nobe kunjalo, “kutsandza imali” kungasehlukanisa naJehova. (1 Thim. 6:9, 10) “Tinhlupheko macondzana nalemphilo” nekukhatsateka ngekutfola tintfo lesitidzingako, kungacedza buhlobo betfu naNkulunkulu. “Nelutsandvo lwebunjinga,” lokukucabanga lokuliphutsa kutsi injabulo lengapheli nekulondzeka kutfolakala ngekuba nemali, nako kungabucedza buhlobo betfu naNkulunkulu. (Mat. 13:22) Jesu wakwenta kwacaca kutsi “kute umuntfu” longakhonta Nkulunkulu nemcebo.—Mat. 6:24.

12. Ngutiphi titsiyo tetemnotfo letivamile lamuhla, futsi singatibalekela njani?

¹² Kuba nembono loliphutsa ngemali kungasenta sitsatse tincumo letimbi. (Taga 28:20) Tetsembiso tekutfola imali melula tente bantfu labanyenti batsenga emathikithi e-lotto nobe baba nemabhizinisi latabentela imali melula, baze ngisho bangenise nemalunga elibandla kute nawo atfole imali. Labanye bayengwe ngekutsi nababolekisa ngemali yabo itawubuya seyinentalo. Ungavumeli bugovu bukwente uyengeke. Bani nekwahlulela lokuhle. Nangabe ubona kutsi loko lowetsenjiswa kona akusilo liciniso, kungenteka kusuke kunjalo.

13. Umbono waJehova ngemali wehluke njani kulowo welive?

¹³ Nasenta “umbuso waNkulunkulu kanye  nekulunga kwakhe” kute kucala, Jehova uyayibusisa imetamo yetfu yekulinganisela nasifuna loko lesikudzingako. (Mat. 6:33; Ef. 4:28) Akafuni silale nakuchubeka imihlangano ngesizatfu sekutsi sisebenta kakhulu nobe sikhatsateke ngemali nasiseHholweni leMbuso. Nobe kunjalo, bantfu labanyenti lesiphila nabo emhlabeni bakholelwa kutsi nabatimisela ngekufuna kuba nemali lenyenti bangaba nelikusasa lelihle futsi ngekuhamba kwesikhatsi bangakhatsateki ngalutfo ekuphileni. Bavame kucindzetela bantfwana babo kutsi nabo batibekele imigomo letabenta babe nemali. Jesu waveta kutsi kucabanga lokunjalo kuliphutsa. (Fundza Lukha 12:15-21.) Loku kungase kusikhumbute Gehazi labecabanga kutsi angaba nemcebo ngesikhatsi lesifanako abe nebuhlobo lobuhle naJehova.—2 Khos. 5:20-27.

14, 15. Yini leyenta kube liphutsa kwetsembela emcebeni walelive kute sitfole kulondzeka? Niketa sibonelo.

¹⁴ Kubikwa kutsi letinye tinyoni letibitwa ngekutsi tingculungculu tamita emantini tafa ngobe tingafuni kuyekela imfishi lesindzako futsi tifune kuyetfwala. Intfo lefanana nalena ingenteka yini kumKhristu? Alex, longulomdzala welibandla utsi: “Ngiyatsandza konga, nangabe ngibona kutsi ngitsele insipho lenyenti yekugeza, ngiphindze ngiyibuyisele lenye ebhodleleni.” Nobe kunjalo, Alex wangenela libhizinisi lekutsenga nekutsengisa emasheya, acabanga kutsi utawusheshe awuyekela umsebenti wakhe bese uba lihlahlandlela. Wagcine sekanake kakhulu kufundza ngetindlela letehlukehlukene tekutsenga nekutsengisa emasheya kanye nemibiko yetimakethe. Wasebentisa imali labetigcinele yona waboleka lenye kulabanye batsengisi, watsenga emasheya betemnotfo labebacabanga kutsi atamletsela imali lenyenti. Esikhundleni saloko, aphelelwa sisindvo sawo. Alex uyalandzisa: “Bengitimisele kutsi ngiphindze ngiyitfole imali yami, futsi ngatitjela kutsi kufanele ngibeketele kute lamasheya ami angingenisele imali.”

¹⁵ Kwaphela tinyanga, Alex acabanga ngalesimo lakuso. Wakutfola kumatima kucabanga ngebuhlobo bakhe naNkulunkulu futsi abengakhoni nekulala. Emasheya akhe awazange andze. Walahlekelwa yimali labetigcinele yona kwadzingeka nekutsi atsengise indlu yakhe. Alex utsi: “Ngawuvisa buhlungu lobukhulu umndeni wami.” Kodvwa wafundza sifundvo lesibalulekile kuloko, ngobe uchubeka atsi: “Nyalo ngiyati kutsi nobe ngubani lowetsembela kulelive laSathane utawudvumateka kabuhlungu.” (Taga 11:28) Kuliciniso kutsi kwetsembela emalini lesitigcinele yona, ekubeni nemali lenyenti nobe ekusebentiseni emakhono latsite latasenta sibe nemali kulelive lelibi, kusho kutsi setsembele ‘kunkulunkulu walomhlaba,’ Sathane. (2 Khor. 4:4; 1 Thim. 6:17) Kusukela lapho, Alex wente kuphila kwakhe kwaba melula ‘ngenca yeliVangeli.’ Angakutjela kutsi kwenta njalo kwente kuphila kwakhe nekwemndeni wakhe kwajabulisa futsi kwabasondzeta kuJehova.—Fundza Makho 10:29, 30.

16. Kutigcabha lokuhle kwehluke njani kunekutigcabha lokubi?

¹⁶ Kutigcabha ngetintfo letifanele, kungaba kuhle. Sibonelo saloku kutsi kufanele sitigcabhe ngekuba boFakazi BaJehova. (Jer. 9:24) Kutihlonipha ngendlela lefanele kungasisita sente tincumo letinhle futsi singatibukeli phansi. Kantsi kucabanga kutsi imibono yetfu nobe sikhundla setfu sibaluleke kakhulu, kungasehlukanisa naJehova.—Hla. 138:6; Rom. 12:3.

17, 18. (a) Shano tibonelo letiseBhayibhelini tebantfu labebatfobekile netalabo labebatigcabha. (b) Lomunye umzalwane wakubalekela njani kutsi kutigcabha kumehlukanise naJehova?

¹⁷ LiBhayibheli linetibonelo tebantfu labatigcabhako nalabatfobekile. Ngekutfobeka iNkhosi Davide yetsembela kuJehova kute ayicondzise, futsi yabusiswa. (Hla. 131:1-3) Jehova wafundzisa iNkhosi Nebukhadnezari kanye naBhelshasari kutfobeka ngesizatfu sekutsi bebatigcabha. (Dan. 4:30-37; 5:22-30) Nalamuhla, kunetimo letivelako  letivivinya kutfobeka kwetfu. Ryan, loyinceku lesebentako leneminyaka lengu-32 budzala, watfutsela kulelinye libandla. Utsi: “Bengilindzele kutsi bangibeke ngibe ngulomdzala, kodvwa kwaphela umnyaka loku kungenteki.” Ryan abetawutfukutsela yini nobe eve buhlungu acabange kutsi labadzala belibandla abafuni kumbeka abe ngulomdzala? Abetawuyekela yini kuya emihlanganweni yelibandla, avumele kutigcabha kumehlukanise naJehova nebantfu baKhe? Wena bowutawenta njani?

¹⁸ Ryan uyakhumbula: “Ngafundza tonkhe tincwadzi lebetikhuluma ngekwephuta kwekufezeka kwematsemba.” (Taga 13:12) “Ngabona kutsi kudzingeka ngifundze kubeketela nekutfobeka. Bekufanele ngivumele Jehova angiceceshe.” Ryan wayekela kutinaka yena, wase usita labanye ebandleni nasensimini. Ngekushesha abesachuba tifundvo teliBhayibheli letinyenti letitfutfukako. Utsi: “Ngamangala kakhulu ngesikhatsi ngibekwa kutsi ngibe ngulomdzala ngemuva kwemnyaka netinyanga letimbalwa, futsi ngaleso sikhatsi bengingakakhatsateki ngako, ngobe besengijabulela umsebenti wekushumayela.”—Fundza Tihlabelelo 37:3, 4.

19, 20. (a) Singaciniseka njani kutsi tintfo lesitentako atisikhweshisi kuJehova? (b) Ngutiphi tibonelo talabo labahlala basondzele kuJehova lesingatilingisa?

¹⁹ Tonkhe tintfo lesicoce ngato kulesihloko nakulesi lesendlulile tinencenye lebalulekile ekuphileni kwetfu. Siyatigcabha ngekuba tinceku taJehova. Umndeni lojabulako nekuba nemphilo lenhle kusemkhatsini wetipho taJehova letinkhulu. Siyati kutsi umsebenti wekutiphilisa nemali kungasisita sinakekele tidzingo tetfu. Siyati nekutsi kutijabulisa kungenta imphilo ibe mnandzi futsi netebucwepheshe tingaba lusito. Kodvwa kusebentisa letintfo ngesikhatsi lesingakafaneli, nekutisebentisa kakhulu nobe ngendlela lengasenta singasakunaki kukhonta Nkulunkulu, kungasikhweshisa kuJehova.

²⁰ Kuliciniso kutsi Sathane angatsandza kubona loko kwenteka. Nobe kunjalo, ungakwati kuvimbela inhlekelele lenjalo kutsi ingakuveleli wena nemndeni wakho. (Taga 22:3) Sondzela kuJehova futsi uchubeke usedvute naye. Sinetibonelo letinyenti letiseBhayibhelini letingasisita kutsi sente njalo. Bo-Enoki naNowa ‘bahamba naNkulunkulu.’ (Gen. 5:22; 6:9) Mosi “wacinisela kwaba shangatsi uyambona longabonwa.” (Heb. 11:27) Jesu abehlale asekelwa nguNkulunkulu ngobe abenta loko lokujabulisa Babe wakhe wasezulwini. (Joh. 8:29) Tilingise tibonelo letifanana naleti. “Tfokotani njalo. Thandazani ningayekeli. Bongani kuko konkhe.” (1 Thes. 5:16-18) Ungavumeli lutfo lukukhweshise kuJehova!