1, 2. (a) Ano an “mga paagi” ni Satanas? (b) Ano an mabulig ha aton nga magin duok ha Dios?

GINLARANG ni Jehova nga Dios an mga tawo nga may panginahanglan nga magin duok ha iya. Kondi karuyag ni Satanas nga subaron naton an iya panhunahuna—nga diri naton kinahanglan hi Jehova. Ito an buwa nga karuyag ni Satanas toohan han mga tawo tikang han hi Eva nalimbongan hito ha hardin han Eden. (Gen. 3:4-6) Tikang hadto, damu nga tawo an nalimbongan liwat hito.

² Maopay na la nga mahimo naton malikyan an mga lit-ag ni Satanas. ‘Maaram kita han iya mga paagi.’ (2 Kor. 2:11) Nangangalimbasog hi Satanas nga ipahirayo kita kan Jehova pinaagi ha pag-aghat ha aton nga maghimo hin sayop nga mga pagpili. Kondi sugad han ginhisgotan ha nahiuna nga artikulo, makakahimo kita hin husto nga pagpili may kalabotan ha propesyon, pagpahalibway, ngan relasyon ha pamilya. Hihisgotan hini nga artikulo kon paonan-o an pagin timbang may kalabotan ha teknolohiya, kahimsog, kwarta, ngan pagpasigarbo makakabulig ha aton nga ‘magpahirani,’ o magin duok, ha Dios.—Jak. 4:8.

3. Paghatag hin ehemplo kon paonan-o an teknolohiya magagamit ha husto o sayop nga paagi.

³ Ha bug-os nga kalibotan, komon na an paggamit hin hi-tech nga mga gadyet. Kon gagamiton ha husto nga paagi, an sugad nga mga imbensyon mahimo magin mapulsanon. Kon gagamiton ha sayop nga paagi, maipapahirayo kita hito ha aton langitnon nga Amay. Tagda an mga kompyuter. Ini nga magasin nga imo ginbabasa ginsurat ngan iginpublikar gamit an mga kompyuter. An kompyuter epektibo nga magagamit ha pag-research ngan pakigkomunikar ngan usahay ha nakakarepresko nga pagpahalibway. Kondi, mahimo liwat kita magin adik ha kompyuter. Damu nga adbertisment an tuso nga nagkukombinse ha mga tawo nga kinahanglan magkaada hira han pinakabag-o nga mga produkto. Usa nga batan-on nga lalaki an karuyag gud magkaada hin usa nga klase hin kompyuter salit sekreto nga ginbaligya niya an usa niya  nga kidney basi makapalit hito. Makasurubo gud ito!

4. Ano an ginhimo han usa nga brother basi maundang an iya sobra nga paggamit han kompyuter?

⁴ Mas maraot pa gud kon aton isasakripisyo an aton relasyon kan Jehova pinaagi han sayop o sobra nga paggamit han teknolohiya. “Maaram ako nga an Biblia nasiring nga sadang naton ‘pahimulosan an oras’ ha espirituwal nga mga butang,” siring ni Jon, usa nga brother nga hirani na mag-30 anyos. * “Pero kon kompyuter an pag-istoryahan, an akon kalugaringon an akon pinakadaku nga kaaway.” Hi Jon agsob nga nag-i-Internet la gihapon bisan hilarom na an gab-i. “Kon mas kapoy ako, mas makuri umundang ha pakig-chat o pagkita hin haglipot nga video—nga an iba hito diri maopay,” siring niya. Basi makaundang hito, iya gin-program an iya kompyuter nga maglugaring pagparong kon oras na nga kumaturog hiya.—Basaha an Efeso 5:15, 16.

5, 6. (a) Ano an mga responsabilidad han mga kag-anak ha ira mga anak? (b) Paonan-o masisiguro han mga kag-anak nga an ira mga anak magkakaada maopay nga mga kaupod?

⁵ Mga kag-anak, diri niyo kinahanglan kontrolon an ngatanan nga ginbubuhat han iyo mga anak, pero kinahanglan panginanoon niyo an ira paggamit hin kompyuter. Ayaw pasagdi nga gumamit hira hin Internet ngan makakita hin imoralidad o espiritismo, makauyag hin madarahog nga mga uyag, o magkaada magraot nga kaupod basi la hira magin okupado ngan diri kamo disturbuhon. Kay kon papasagdan niyo hira, puydi nira hunahunaon, ‘Diri siguro ini maraot, kay waray man la kanda Tatay ngan Nanay.’ Sugad nga mga kag-anak, responsabilidad niyo nga panalipdan an iyo kabataan ngan tin-edyer nga mga anak ha bisan ano nga makakapahirayo ha ira kan Jehova. Bisan an mga hayop nagpapanalipod ha ira mga anak ha peligro. Hunahunaa an bubuhaton han nanay nga oso kon labtan an iya mga anak!—Itanding an Hosea 13:8.

⁶ Buligi an iyo mga anak nga makig-upod ha susbaranan nga mga Kristiano, batan-on man o lagas. Ngan hinumdumi, ginkikinahanglan han iyo mga anak nga maggahin kamo hin panahon ha ira! Salit paggahin hin panahon nga magkaupod kamo nga magkarisyo, mag-uyag, magtrabaho, ngan magin duok ha Dios. *

7. Kay ano nga karuyag naton ngatanan magpabilin nga mahimsog?

⁷ “Kumusta an imo pag-abat?” Ini nga mga pulong nagpapakita hin makasurubo nga kamatuoran. Tungod kay gintugotan han aton siyahan nga mga kag-anak nga ipahirayo hira ni Satanas kan Jehova, kita ngatanan nagkakasakit. Natutuman an katuyoan ni Satanas kon kita nagkakasakit, kay kon masakit kita, mas makuri ha aton an pag-alagad kan Jehova. Ngan kon mamatay kita, diri na gud kita makakag-alagad kan Jehova. (Sal. 115:17) Salit natural la nga karuyag naton buhaton an aton mahihimo basi magpabilin nga mahimsog. * Ngan sadang kita mabaraka ha kahimsog ngan kaopayan han aton kabugtoan.

8, 9. (a) Paonan-o naton malilikyan an sobra nga pagkinabaraka ha aton kahimsog? (b) Ano an kapulsanan han pagpabilin nga malipayon?

 ⁸ Kondi importante nga likyan naton an sobra nga pagkinabaraka ha aton kahimsog. An iba nga kabugtoan mas madasigon pa ha pagrekomendar hin partikular nga mga diet, pagtambal, o mga produkto kay han ira pagsangyaw han maopay nga sumat han Ginhadian han Dios. Bangin sinsero nga natoo hira nga nabulig hira ha iba. Bisan pa hito, diri angayan nga magbaligya hin mga produkto o magrekomendar hin mga ideya para ha kahimsog o pagpahusay antes o katapos han mga katirok ha Kingdom Hall o ha mga asembleya o kombensyon. Kay ano?

⁹ Nagkakatirok kita basi hisgotan an espirituwal nga mga butang ngan madugangan an aton kalipay, nga bahin han bunga han baraan nga espiritu han Dios. (Gal. 5:22) Hito nga mga okasyon, an paghatag hin sagdon o pagtanyag hin produkto para ha ikakaopay han kahimsog—ginhangyo man kita o kita an nagpatikang han istorya—makakaulang ha katuyoan han aton pagtambong ngan makakawara han kalipay han iba. (Roma 14:17) Personal nga desisyon an pagpili hin paagi han pag-ataman ha kahimsog. Dugang pa, waray tawo nga makakahatag hin solusyon ha ngatanan nga sakit. Bisan an pinakamaopay nga mga doktor nalalagas, nagkakasakit, ngan namamatay. Ngan an sobra nga pagkinabaraka ha aton kahimsog diri makakapahilawig han aton kinabuhi. (Luk. 12:25) Ha luyo nga bahin, “an malipayon nga kasingkasing maopay nga tambal.”—Prob. 17:22.

10. (a) Ano nga mga kalidad an makaruruyag kan Jehova? (b) San-o kita magkakaada hingpit nga kahimsog?

¹⁰ Ha pariho nga paagi, husto la nga diri naton pabay-an an aton hitsura. Kondi diri kita sadang mangalimbasog hinduro ha pagwara han ngatanan nga tigaman han pagtikalagas. Ito nga mga tigaman mahimo magpamatuod han pagin hamtong, may dignidad, ngan maopay nga pagkatawo. Pananglitan, an Biblia nasiring: “An ubanon nga ulo amo an pudongpudong han himaya; ini hiaagian dida ha dalan han pagkamatadong.” (Prob. 16:31) Ito an panhunahuna ha aton ni Jehova, ngan sadang naton subaron an iya panhunahuna. (Basaha an 1 Pedro 3:3, 4.) Salit maaramon ba nga ibutang ha peligro an aton kahimsog o kinabuhi pinaagi han delikado nga mga treatment o operasyon basi la magin mas makaruruyag pagkit-on? Anoman an aton edad o kahimtang ha kahimsog, an tinuod nga kahusay resulta han pagkaada han “kalipay ni Jehova.” (Neh. 8:10) Ha bag-o nga kalibotan la maibabalik an aton hingpit nga kahimsog ngan pagkabatan-on. (Job 33:25; Isa. 33:24) Samtang waray pa ito, kinahanglan magin maaramon kita ha pagpili ngan magpakita hin pagtoo ha mga saad ni Jehova. Mabulig ini ha aton nga magin malipayon yana ngan diri sobra nga magkinabaraka ha aton kahimsog.—1 Tim. 4:8.

11. Paonan-o an kwarta mahimo magin lit-ag?

¹¹ Diri maraot an pagkaada kwarta, ngan diri liwat sayop an tangkod nga pagnegosyo. (Ekles. 7:12; Luk. 19:12, 13) Kondi an “gugma ha salapi” makakapahirayo ha aton kan Jehova. (1 Tim. 6:9, 10) An “pangarit ha kalibotan,” an sobra nga kabaraka ha pagkaada han aton mga kinahanglanon, mahimo makalumos ha aton ha espirituwal. Ito liwat an mahihimo han “limbong han mga manggad,” an sayop nga pagtoo nga an karikohan nagriresulta hin nagpapadayon nga kalipay ngan seguridad. (Mat. 13:22) Iginpatin-aw ni Jesus nga “waray tawo” nga makakag-alagad ha duha nga agaron—ha Dios ngan ha karikohan.—Mat. 6:24.

12. Ano nga mga lit-ag may kalabotan ha kwarta an komon yana, ngan paonan-o naton ito malilikyan?

¹² An sayop nga panhunahuna ha kwarta mahimo magresulta hin sayop nga mga buhat. (Prob. 28:20) Tungod kay ginsaaran hin madagmit ngan masayon nga paagi ha pagkaada damu nga kwarta, an iba nasusulay nga pumalit hin mga tiket ha loterya o umapi ha kwestyonable nga mga multilevel marketing, ginpapaapi pa ngani an iba nga mga membro han kongregasyon. An iba nalimbongan ha mga tanyag nga daku an magigin tubo han ira puhonan. Ayaw tuguti nga malimbongan ka tungod han kahakog. Pamurubuot hin maopay. Kon an igintatanyag ha imo baga hin diri katoohan, bangin gud man diri ito tinuod.

13. Paonan-o an panhunahuna ni Jehova ha kwarta naiiba ha panhunahuna han kalibotan?

¹³ Kon gin-uuna naton ‘an ginhadian han Dios  ngan an iya katadongan,’ bibendisyonan ni Jehova an aton timbang nga pangalimbasog nga magkaada han aton mga panginahanglan. (Mat. 6:33; Efe. 4:28) Diri niya karuyag nga mahingaturog kita ha mga katirok tungod han sobra nga pagtrinabaho o magkinabaraka ha kwarta samtang aadto ha Kingdom Hall. Kondi damu an natoo nga magkakaada la hira hin maopay nga kabubuwason ngan hayahay nga kinabuhi ha urhi kon gagamiton nira an ira panahon ha pamiling hin kwarta. Agsob nga gin-aaghat nira an ira mga anak nga magkaada liwat sugad hito nga materyalistiko nga tumong. Iginpakita ni Jesus nga diri makatadunganon ito nga panhunahuna. (Basaha an Lukas 12:15-21.) Mahimo ini magpahinumdom ha aton kan Gehasi, nga naghunahuna nga puydi hiya magin hakog ngan magkaada la gihapon maopay nga relasyon kan Jehova.—2 Hadi 5:20-27.

14, 15. Kay ano nga diri kita sadang sumarig nga an kwarta maghahatag ha aton hin seguridad? Paghatag hin ehemplo.

¹⁴ Nalunod an pipira nga agila han waray nira buhii an ira nadagit nga isda nga mabug-at hinduro. Mahimo ba mahitabo ha usa nga Kristiano an puropariho hito? “Kasagaran na nga mahirot gud ako ha paggasto,” siring han tigurang nga hi Alex. “Kon nagsobra an akon paghuwad hin shampoo, iginbabalik ko ito ha surudlan.” Bisan pa hito, nadani hiya nga umapi ha stock market kay naghunahuna hiya nga kon magkakaada hiya dugang nga kità, puydi hiya umundang pagtrabaho ngan magpayunir. Salit gin-adman niya hin maopay kon paonan-o mamamalit ngan magbabaligya hin mga stock ngan gin-gamit an ngatanan nga iya kwarta basi mapalit an ngatanan nga iya maaakos. Nangutang pa ngani hiya basi makapalit hin dugang pa nga mga stock! Kondi an mga stock nga iya ginpalit naghamubo hinduro an presyo. “Determinado ako nga maibalik an akon kwarta,” siring ni Alex. “Nahunahuna ko nga kon maghulat la ako, mabalik paghitaas an presyo han mga stock.”

¹⁵ Ha sulod hin damu ka bulan, haros ito na la an ginhihinunahuna ni Alex. Nakurian hiya pagpokus ha espirituwal nga mga butang, ngan diri hiya nahingangaturog hin maopay. Kondi waray na maghitaas utro an presyo han mga stock. Naubos an ngatanan nga kwarta ni Alex ngan kinahanglan niya ibaligya an iya balay. “Napasubo ko gud an akon pamilya,” siring niya. Kondi nahibaro hiya hin importante nga leksyon. “Yana maaram na ako nga an bisan hin-o nga nasarig ha sistema ni Satanas mapapakyas gud.” (Prob. 11:28) Oo, an pagsarig ha aton kwarta, puhonan, o abilidad ha pagkaada kità dinhi hini nga sistema nagpapakita nga nasarig kita ha “dios hini nga kalibotan,” hi Satanas. (2 Kor. 4:4; 1 Tim. 6:17) Yana ginpasimple na ni Alex an iya kinabuhi ‘tungod han maopay nga sumat.’ Tungod hini nagin mas malipayon hiya ngan an iya pamilya ngan nabuligan hira nga magin mas duok kan Jehova.—Basaha an Markos 10:29, 30.

16. Ano an kaibahan han maopay nga pagpasigarbo ha maraot nga pagpasigarbo?

¹⁶ Maopay an pagpasigarbo han husto nga mga butang. Pananglitan, sadang naton ipasigarbo pirme nga mga Saksi ni Jehova kita. (Jer. 9:24) Tungod hini, nangangalimbasog kita pirme nga maghimo hin mag-opay nga desisyon ngan sumunod ha higtaas nga suruklan han Dios. Kondi an pagpahitaas, o sobra nga pagpabili ha aton kalugaringon nga mga ideya o posisyon, makakapahirayo ha aton kan Jehova.—Sal. 138:6; Roma 12:3.

17, 18. (a) Pag-unabi hin mga ehemplo ha Biblia han mapainubsanon nga mga tawo ngan han mapahitas-on nga mga tawo. (b) Ano an ginbuhat han usa nga brother basi an pagpasigarbo diri magpahirayo ha iya kan Jehova?

¹⁷ Mababasa naton ha Biblia an mga ehemplo han mapahitas-on nga mga tawo ngan han mapainubsanon nga mga tawo. Hi Hadi David mapainubsanon nga nagpagiya kan Jehova, ngan ginbendisyonan hiya ni Jehova. (Sal. 131:1-3) Kondi ginsirotan ni Jehova an mapahitas-on nga mga hadi nga hira Nabukodonosor ngan Belsasar. (Dan. 4:30-37; 5:22-30) Yana may mga kahimtang liwat nga nagsasari ha aton pagkamapainubsanon. Hi Ryan, nga 32-anyos nga ministeryal nga surugoon, binalhin hin kongregasyon. “Naglaom ako nga irirekomendar dayon ako sugad nga tigurang,” siring ni Ryan, “pero linabay an usa ka tuig  nga waray ito mahitabo.” Nasina ba hi Ryan o nagdumot ngan inabat nga waray hiya respetoha han mga tigurang? Inundang ba hiya pagtambong ha mga katirok ngan gintugotan nga an pagpahitaas magpahirayo ha iya kan Jehova ngan ha Iya katawohan? Kon ha imo ito nahitabo, ano an imo bubuhaton?

¹⁸ “Ginbasa ko ha aton mga publikasyon an ngatanan nga artikulo may kalabotan ha waray matuman nga mga ginlalaoman,” siring ni Ryan. (Prob. 13:12) “Nasantop ko nga kinahanglan mahibaro ako nga magpailob ngan magin mapainubsanon. Kinahanglan magpabansay ako kan Jehova.” Hi Ryan waray na magpokus ha iya kalugaringon, lugod nagpokus hiya ha pagbulig ha iba—ha kongregasyon ngan ha ministeryo. Waray pag-iha nagkaada hiya pipira nga mag-opay nga Bible study. “Han ginpili ako nga magin tigurang paglabay hin usa ngan tunga ka tuig, waray ko ito laumi,” siring niya. “Waray ko na man gud ito paghinunahunaa kay malipayon ako hinduro ha akon ministeryo.”—Basaha an Salmo 37:3, 4.

19, 20. (a) Paonan-o naton masisiguro nga an aton ginbubuhat kada adlaw diri magpapahirayo ha aton kan Jehova? (b) Ano nga mga ehemplo han mga nagpabilin nga duok kan Jehova an mahimo naton subaron?

¹⁹ An pito nga butang nga ginhisgotan dinhi ngan ha nahiuna nga artikulo diri sayop. Iginpapasigarbo naton nga mga surugoon kita ni Jehova. An malipayon nga pamilya ngan maopay nga kahimsog upod han gimaopayi nga mga regalo ni Jehova. Maaram kita nga an trabaho ngan kwarta makakabulig ha aton nga magkaada han aton mga panginahanglan. Maaram liwat kita nga an pagpahalibway makakarepresko ha aton ngan an teknolohiya mahimo magin mapulsanon. Kondi an pagbuhat han bisan hain hini ha sayop nga panahon, pagbuhat hini hin sobra, o ha paagi nga makakaulang han aton pagsingba makakapahirayo ha aton kan Jehova.

²⁰ Syempre, karuyag ni Satanas nga magpahirayo ka kan Jehova. Kondi mahimo ka mangalimbasog nga diri ito mahitabo ha imo ngan ha imo pamilya! (Prob. 22:3) Magin duok kan Jehova, ngan magpabilin nga duok ha iya. Damu nga ehemplo ha Biblia an makakabulig ha aton may kalabotan hini. Hi Enok ngan hi Noe “naglakat upod han Dios.” (Gen. 5:22; 6:9) Hi Moises ‘nagpadayon nga tinatan-aw an diri nakikita.’ (Heb. 11:27) Hi Jesus pirme ginbubuligan han Dios tungod kay pirme niya ginbubuhat an nakakapalipay ha iya langitnon nga Amay. (Juan 8:29) Subara ini nga mga ehemplo. “Magkalipay kamo gihapon; mag-ampo kamo ha waray udong-udong; magpasalamat kamo ha ngatanan nga mga bagay.” (1 Tes. 5:16-18) Ngan ayaw tuguti nga may magpahirayo ha imo kan Jehova!