1, 2. (a) Uw rogon ni ma bannag Satan e girdi’? (b) Mang e ra ayuwegdad ya nge yag ni ngad chugurgad ngak Got?

 KE SUNMIY Jehovah e girdi’ nib t’uf rorad ni ngar chugurgad ngak. Machane baadag Satan ni ngad lemnaged nde t’uf Jehovah rodad. I tabab Satan ni nge tay e re n’ey nga laniyan’ e girdi’ ni ka nap’an e ngiyal’ ni ke bannag Efa u lan fare milay’ nu Eden. (Gen. 3:4-6) Ma kab kakrom i yib, ma boor e girdi’ ni yad ma lemnag nde t’uf Got rorad.

² De t’uf rodad ni ngad rin’ed e re n’ey. Be weliy e Bible murung’agen boch e kanawo’ u rogon ni ma bannag Satan e girdi’. (2 Kor. 2:11) Ma waliydad ni ngad rin’ed ban’en nra palognagdad rok Jehovah. Fare article ni ke yan e ke weliy ko uw rogon e maruwel ni ngad mel’eged, nge pi n’en ni ma chuweg e chalban, nge pi n’en ni bay rogon ko tabinaw rodad. Re article ney e ra weliy murung’agen aningeg i ban’en ni ma fanay Satan ni nge waliydad ni aram e: boch e masin, nge rogon ni nge fel’ fithik’ i dowdad, nge salpiy, nge lem nib tolang. Faanra ngad dugliyed boch ban’en nib fel’ ni bay rogon ko pi n’ey, ma rayog ni ngad “chugurgad ngak Got.”​—Jas. 4:8.

3. Mang boch e kanawo’ nrayog ni nge fanay be’ e computer riy nge ku boch e masin?

³ Munmun ma be yoor e girdi’ ni yad be fanay e computer nge ku boch e masin. Faanra ngad fanayed e pi n’em nib fel’ rogon, ma riyul’ nra ayuwegdad. Machane, faanra de puluw rogon ni ngad fanayed, ma ra palognagdad rok e Chitamangidad nu tharmiy. Pi walagdad e yad ma fanay e computer ni ngar ngongliyed Fare Wulyang ko Damit. Maku ra ayuwegdad e computer ya nge yag ni ngad fal’eged i gay murung’agen boch ban’en ara ngan yol ngak be’ ara ngan non ngak be’. Maku rayog ni nge chuweg e chalban rodad. Machane, faanra riyul’ nri gad baadag e computer, ma rayog ni ngad fanayed boor e tayim ni ngad maruwelgad ngay ara ngad lemnaged ko uw rogon nrayog ni ngad maruwelgad ngay. Bay boch ban’en ni yima yog ara yima dag yaan nrayog ni nge k’aringdad ni ngad lemnaged ni thingari yag gubin mit e chugum nib beech ngodad. Be’ ni kab  pagel e ri baadag ni nge yag reb e computer ngak, ma arfan ni ke n’igin ni ngan luf reb e buoy rok nib mith, me pi’ ni chuway’ ya nge yag puluwon rok. Rib gel e kireban’ riy!

4. Uw rogon ni ke thilyeg reb e walag ni pumoon rogon ni ma fanay e computer rok?

⁴ Ri kab gel e kireb riy nfaanra ngad fanayed e pi masin ney u reb kanawo’ nrayog ni nge kirebnag e tha’ u thildad Jehovah. Rayog ni nge yoor e tayim ni ngad fanayed ni fan ko pi masin nem, ara ngad fanayed u boch e kanawo’ nib kireb. Reb e walag ni Jon fithingan ni ke 30 e duw rok e ke yog ni kafram e ma fanay boor e tayim rok ni fan ko computer ko bin ni nge fil e Bible. * Ba ga’ ni ma od nge n’uw e nep’ ni be fanay e Internet. Ke yog nnap’an nra chuchuw ma rib mo’maw’ ni nge tal ko sabethin u computer, ara i yaliy e kachido ni ku bay boch riy nib kireb. Ri baadag ni nge thilyeg e re ngongol rok nem, ere ke fal’eg fare computer rok ya nge yag ni nge tal ko tayim ni nge mol riy.​—Mu beeg e Efesus 5:15, 16.

5, 6. (a) Mang e thingari rin’ e piin gallabthir ni fan ko pi bitir rorad? (b) Mang e susun ni nge rin’ e piin gallabthir ya nge yag ni ngar ayuweged e bitir rorad ni ngar chaggad ngak e girdi’ nib fel’ e ngongol rorad?

⁵ Gimed e pi gallabthir, e de t’uf ni ngam gagiyegniged urngin ban’en nra rin’ e pi bitir romed, machane ba t’uf ni ngam gagiyegniged yad u rogon ni ngar fanayed e computer rorad. Dab mu paged yad ni nga ranod ko Web site ni ma dag yaan e ngongol ndarngal, ara yaan e pi kan nib kireb, ara ngar uned ko gosgos ni be dag yaan e cham, ara ngan chag ngak e girdi’ nib kireb u Internet. Faanra ngam paged yad ni ngar rin’ed e tin ni yad baadag ya dubmed ni ngar magawonnaged gimed, ma rayog ni ngar lemnaged ndariy e kireb ko pi n’en ni yad be rin’. Ke mil fan ngomed ni ngam ayuweged e pi bitir romed ni tin kab bitir nge tin ke fel’ yangaren ndariy ban’en nra palognagrad rok Jehovah. Mus ngak reb e gamanman nra cham ngak be’ ni be n’en ni nge magawonnag e pi bitir rok. Ere ku arrogon e gallabthir nib t’uf ni ngar ayuweged e pi bitir rorad ya nge yag ni ngar palognaged yad ko pi n’en nrayog ni nge tay e yafas rorad nga thatharen e riya’.​—Mu taareb rogonnag ko Hosea 13:8.

⁶ Ngam ayuweged e pi bitir romed nge yag ni ngar chaggad ngak e pi Kristiano ni yad ma dugliy ban’en nib fel’ rogon ndemtrug yangarrad. Ma dab mu paged talin nrib ga’ fan ni nge chag e bitir romed ngomed. Ba t’uf ni ngam ted e tayim ni fan ngorad. Ngam minmingad, ma ngam fafelgad, ma ngam maruwelgad u taabang. Re n’ey e ra ayuwegmed ni gimed gubin ni nge yag ni ngam pared ni gimed ba chugur ngak Jehovah. *

7. Mang fan ni gadad gubin ni gad baadag ni nge par nib fel’ fithik’ i dowdad?

⁷ Ba ga’ ni gad ma fith salpen yugu boch e girdi’. I tabab e girdi’ ni nge m’ar ni ka nap’an e ngiyal’ ni ke motoyil Adam nge Efa ngak Satan ni aram e ke kireb e tha’ u thilrad Jehovah. Satan e ma felfelan’ u nap’an nra yib e m’ar ngodad, ya ra mo’maw’ rodad ni ngad pigpiggad ngak Jehovah. Ma nap’an  ni gad ra yim’, ma dabkiyog ni ngad pigpiggad ngak Got. (Ps. 115:17) Ere ngad rin’ed e tin rayog rodad ya nge yag ni ngad pared nib fel’ fithik’ i dowdad. Maku thingar da lemnaged salpen nge rarogon e pi walagdad.

8, 9. (a) Uw rogon ni ngad nanged ni gathi kemus ni rarogon fithik’ i dowdad e aram e n’en ni ir e th’abi ga’ fan u wan’dad? (b) Mang fan nib fel’ ni ngad pared ni gad ba felfelan’?

⁸ Machane, susun ni gathi kemus ni rarogon fithik’ i dowdad e ngad lemnaged. Boch e girdi’ e boor e tayim ni yad ma fanay ni fan e ngar weliyed murung’agen e ggan nib fel’ ni ngan kay, nge ba mit e tafalay nib fel’ ni ngan un ngay, nge boch ban’en nra ayuweg fithik’ i dowdad nge yaadad. Ma buchuuw e tayim ni yad ma fanay ni ngar machibnaged murung’agen Gil’ilungun Got. Ma sana kari mich u wan’rad ni yad be ayuweg e girdi’. Machane, dab da fanayed e Kingdom Hall, ara assembly nge convention rodad ni ngad pied ni chuway’ boch e chugum ara ngad weliyed ngak e girdi’ e tin gad manang u murung’agen rarogon fithik’ i dowey. Mang fan?

⁹ Gad ma tay e muulung rodad ni fan e ngad weliyed murung’agen e Bible, ma nge yag e felfelan’ ngodad ni ma yibnag gelngin Got nib thothup. (Gal. 5:22) Gad ma muulung ni gathi bochan e ngad weliyed murung’agen e tafalay ara boch ban’en nyugu aram rogon ni bay boch e girdi’ ni yad baadag. Rayog ni ngad k’aringed boch e girdi’ ni nge dab kur felfelan’gad. (Rom. 14:17) Mu pag yugu boch e girdi’ ni yad e ngar dugliyed ko uw rogon ni ngar ayuweged dowrad. Dariy be’, ni mus ko togta nrayog ni nge golnag urngin mit e m’ar. Ma faanra gubin ngiyal’ ni be magafan’dad nga rarogon fithik’ i dowdad ma dabi ayuwegdad. (Luke 12:25) Ma be yog e Bible ni “faanra ga ba felfelan’ ni ga ma par ma ba falay nga fithik’ i dowam.”​—Prov. 17:22, BT.

10. (a) Uw rogon ni nge fel’ yaadad u mit Got? (b) Wuin e ra flont dowdad?

¹⁰ Maku ba t’uf ni ngad lemnaged rogon ni ngad fal’eged yaadad. Machane, faanra kad pilibthirgad ma de t’uf ni ngarda athamgilgad ni ngad fal’eged yaadad ni nge m’ug ni kab fel’ yangardad. Be yog e Bible ni gaar: “Yafos nib n’uw nap’an e tow’ath rok e piin nib mat’aw; ma manna’ u lolugenrad e ba teeliyaw nib gamog.” (Prov. 16:31) Ba ga’ fan u wan’ Jehovah e ngongol rodad nga yaadad, ere susun ni ku aram rogon ni ngad lemnaged. (Mu beeg e 1 Peter 3:3, 4.) Ere gur, ba fel’ ni ngad uned nga mit e tafalay nrayog ni nge tay e yafas rodad nga thatharen e riya’ ya gad baadag ni nge fel’ yaadad? Demtrug yangardad nge rarogon fithik’ i dowdad, ma “felfelan’ ni ma pi’ Somol” e aram e n’en nra ayuwegdad ni nge fel’ yaadad u mit Got. (Neh. 8:10) U lan fa bin nib beech e fayleng ma gad ra flont ma gad ra pagel bayay. (Job 33:25; Isa. 33:24) Ere ngiyal’ ney, e ba t’uf ni ngad dugliyed ban’en nib fel’ rogon me michan’dad ko tin ni ke micheg Jehovah ni bayi rin’. Ireray e n’en nra ayuwegdad ni ngad felfelan’gad ko yafas rodad e ngiyal’ ney, ma dab da lemnaged rarogon fithik’ i dowdad nib pag rogon.​—1 Tim. 4:8.

11. Uw rogon nrayog ni nge kirebnag e salpiy e tha’ u thildad Jehovah?

¹¹ De kireb nfaanra bay e salpiy rodad ara ngad athamgilgad ngad maruweliyed ni nge yag e salpiy ngodad. (Ekl. 7:12; Luke 19:12, 13) Machane faan gad be chogownag e salpiy, ma rayog ni nge palognagdad rok Jehovah. (1 Tim. 6:9, 10) “Magafan’ rodad ko re par rodad ney u fayleng” e be yip’ fan ni gad be magafan’ nib gel ko tin nib t’uf ko par rodad. Ma mit ney e lem e rayog ni nge palognagdad rok Jehovah. “Chogowen e fel’ rogon” e rayog ni nge bannagdad ni nge mich u wan’dad ni ngad lemnaged nra yib e felfelan’ ngodad, ma dariy ban’en nra buch rodad nfaanra bay e salpiy rodad. (Matt. 13:22) Ke yog Jesus ni “dariy be’” nrayog ni nge mang sib rok Got nge salpiy.​—Matt. 6:24.

12. Uw rogon ni ma guy boch e girdi’ rogon ni nge yag e salpiy ngorad ni boor? Uw rogon ni ngad siyeged ni nge dab da dugliyed ban’en nib kireb?

¹² Faanra gad be lemnag ni salpiy e th’abi ga’ fan, ma rayog ni nge waliydad e re n’ey ni ngad rin’ed e tin nib kireb. (Prov. 28:20) Boch e girdi’ e yad baadag ni nge yag e salpiy ni boor ngorad nib papey, ere kar chuw’iyed e lottery ticket ya nge yag ni ngar winnaged e salpiy ni boor. Ma boch e walag e kar uned ko siyobay ni yad be lemnag nra  yag e salpiy ngorad ni boor nib papey, maku rogned ngak yugu boch e walag ni ku rayog ngki yag e salpiy ngorad riy ni boor. Immoy yu ngiyal’ ma boch e walag ni pumoon e kar ninged boch e salpiy ngak boch e girdi’ u lan e ulung, ma kar micheged ngorad ni yad ra sulweg ni ke ga’ e win ni yad ra yon’ ngay. Faanra gadad ba chogow ma rayog ni ngad uned nga reb e siyobay nrayog ni nge k’aringdad ni ngad n’aged boor e salpiy ngay. Ere ngam kol ayuw ni nge dab mu chogownag e salpiy. Ba ga’ ndabiyog ni nge yag e salpiy ni boor ngodad nib papey.

13. Uw rogon ni baadag Jehovah ni ngad lemnaged e salpiy?

¹³ Faanra ngad ‘m’oneged u wan’dad e gagiyeg rok Got nge tin nib m’agan’ ngay,’ ma ra tow’athnag Jehovah e maruwel nib gel ni gad be rin’, ma ra yag ngodad e tin nib t’uf ko par rodad. (Matt. 6:33; Efe. 4:28) De fel’ u wan’ ni ngad molod u nap’an e muulung rodad, ya bochan nib gel e maruwel ni kad rin’ed. Maku dabun ni nge magafan’dad ko salpiy u nap’an ni gad bay u Kingdom Hall. Boor e girdi’ nu fayleng e yad be lemnag ni thingar ra rin’ed urngin rayog rorad ya nge yag e salpiy ngorad. Ya, yad baadag ni nge mom rogon e par rorad boch nga m’on. Ma yad ma yog ngak e pi bitir rorad ni ku aram e n’en ni ngar rin’ed. Machane ke dag Jesus ni girdi’ ni ma rin’ e re n’ey e balyang. (Mu beeg e Luke 12:15-21.) Ke lemnag Gehazi nrayog ni nge par e tha’ u thilrow Jehovah nib fel’ nfaanra chogownag e chugum.​—2 Ki. 5:20-27.

14, 15. Mang fan nde gonop ni ngan lemnag ni salpiy e ra pi’ urngin ban’en nib t’uf ko par rodad? Mu weliy.

¹⁴ Manuw ara eagle e ba mit e arche’ ni ba ga’ ni ma limach ni bochan ni ma kol e nig ni yugu ba ga’. Ku aram e n’en nrayog ni nge buch rodad nfaanra ngad guyed rogon ni nge yoor e salpiy rodad. Reb e piilal ni Alex fithingan e ke yog nib ga’ nri ma kol ayuw ko salpiy rok. Mus ko shampoo rok ndabun ni nge adbey. Machane i lemnag nfaanra yag boch e salpiy ngak, ma rayog ni nge tal ko maruwel rok me un ko pioneer. Ere ke fil rogon ni nge pi’ boch e chugum nchuway’ me fanay urngin e salpiy rok ni nge chuw’iy urngin ban’en nrayog rok. Ma ke ning boch e salpiy ya nge yag ngki chuw’iy boch e chugum! Machane pi chugum nem ni ke chuw’iy e ke sobut’ puluwon. Me yog Alex ni gaar: “Ri gu baadag ngki sul e salpiy rog bayay.” Ke lemnag nfaanra ra son buchuuw ma ra tolang puluwon e pi chugum rok nem biyay.

¹⁵ I par Alex ni be lemnag murung’agen e chugum rok. Ke mo’maw’ rok ni nge m’oneg e pigpig rok ngak Jehovah, ma dabki yog ni nge mol nib fel’ rogon. Ke n’ag urngin e salpiy rok mab t’uf ni nge pi’ e naun rok ni chuway’. Ke yog ni ke magawonnag chon e tabinaw rok. Machane ke fil ban’en ko re n’ey nib ga’ fan. Ke yog ni urngin e girdi’ ni yad be pagan’ ko m’ag rok Satan ni nge pi’ e tin nib t’uf rorad nge felfelan’ e ra mulan’rad. (Prov. 11:28) Faanra gad be pagan’ ko salpiy rodad ara salap rodad u rogon ni ngad gayed e salpiy, ma gad be pagan’ ngak Satan, ni ir “fare kan nib kireb nu roy u fayleng.” (2 Kor. 4:4; 1 Tim. 6:17) Ke thilyeg Alex e yafas rok e chiney ya nge yag ni nge thognag boor e tayim bayay ni nge machibnag fare thin nib fel’. Re n’ey e ke ayuweg Alex nge chon e tabinaw rok ni nge yib e felfelan’ ngorad, ma ke yag ni nge fel’ e tha’ u thilrad Jehovah.​—Mu beeg e Mark 10:29, 30.

16. Uw rogon mab fel’ ni ngan uf? Mang e rayog ni nge buch nfaanra ngad lemnaged gadad nib pag rogon?

¹⁶ Thingar da ufgad ni gadad e Pi Mich Rok Jehovah. (Jer. 9:24) Bochan e re n’ey ma ngad guyed rogon ni ngad dugliyed boch ban’en nib fel’ rogon, ma ngad folgad ko motochiyel rok Got. Machane, thingar da kol ayuwgad ndabi tolang e lem rodad ngad lemnaged ni gad ba salap ngak Jehovah, ya ireray e re n’en nra palognagdad rok Jehovah.—Ps. 138:6; Rom. 12:3.

17, 18. (a) Mini’ e en ni be weliy e Bible murung’agen ni be’ nib sobut’an’? Ma mini’ e en nib tolangan’? (b) Mang e ke rin’ reb e walag nib pumoon, ya nge dabi pag e lem rok nib tolang ni nge palognag ir rok Jehovah?

¹⁷ Be weliy e Bible murung’agen e girdi’ nib tolangan’ nge girdi’ ni yad ba sobut’an’. David ni Pilung e ke yog ngak Jehovah ni nge pow’iy, me tow’athnag Jehovah ya ke ning e re n’em u fithik’ e sobut’an’. (Ps. 131:1-3) Machane, bochan ni tolangan’ fa gal Pilung ni Nebukadnezzar nge Belshazzar,  me gechignagrow Jehovah. (Dan. 4:30-37; 5:22-30) Yu ngiyal’ ma gad ma magawon nfaanra gadad ba tolangan’. Bod rogon Ryan ni 32 e duw rok, ni ir reb e ministerial servant, e ke thilyeg e ulung ni ma chag ngay. Ke lemnag ni dabi n’uw nap’an ma yira dugliy ni nge mang piilal. Machane tomuren taareb e duw ma dawori mang piilal. Gur, ke damumuw Ryan ngak e piin piilal ya dawori mang reb e piilal? Ke tal ko muulung ma ke palognag ir rok Jehovah nge ulung rok ya bochan nib tolangan’? Faan manga gur e kam mada’nag e magawon ni aram rogon, ma mang e ga ra rin’?

¹⁸ Ke fal’eg i gay Ryan boch e babyor rodad ni be weliy murung’agen rogon ni ngan sonnag ban’en nib fel’. (Prov. 13:12) Ke yog ni gaar: “Ke tamilang u wan’ug nib t’uf ni nggu gum’an’ ma nggu sobut’nag lanin’ug. Ba t’uf ni nggu pag Jehovah ni nge skulnageg.” Ke tabab Ryan ni nge tiyan’ u rogon ni nge ayuweg e pi walag u lan e ulung nge girdi’ ni ke mada’nag u nap’an e machib. Ma de n’uw nap’an, ma ke yoor e girdi’ ni be fil e Bible ngorad ni kar mon’oggad ko tirok Got ban’en. Me yog ni gaar: “Nap’an ni kan dugliyeg ni nggu mang reb e piilal u tomuren taareb nge baley e duw ma kug gin ngay. Da kug lemnag murung’agen e re n’ey ya kari felan’ug ko machib ni gu be tay.”—Mu beeg e Psalm 37:3, 4.

19, 20. (a) Uw rogon ma gad ra nang ni pi n’en ni kad filed ko gal article ney e dabi palognagdad rok Jehovah? (b) Chon mini’ e ur pared ni yad ba chugur ngak Jehovah nib fel’ ni ngad folwokgad rorad?

¹⁹ Fa medlip i ban’en ni kad weliyed ko gal article ney e urngin nib puluw. Gad ma uf ni bochan e gad e Pi Mich Rok Jehovah. Rayog ni nge yag e felfelan’ u lan e tabinaw rodad, maku rayog ni nge fel’ fithik’ i dowdad. Ba fel’ ni ngad uned ko fafel, ma pi computer nge ku boch e masin e rayog ni nge ayuwegdad ko pi maruwel rodad. Machane thingar dab da paged talin nfaanra ngad rin’ed ban’en u ba ngiyal’ nde puluw, ara ke pag rogon, ara de puluw rogon ni gad be rin’, ma rayog ni ngad paloggad rok Jehovah.

²⁰ Satan e baadag ni ngam palognagem rok Jehovah. Machane, rayog ni ngam athamgil ni ngam ayuwegem nge chon e tabinaw rom. (Prov. 22:3) Ngaum chugur ngak Jehovah. Boor e girdi’ u Bible ni kar rin’ed e re n’ey. Enok nge Noah e ur ‘liyorgow ngak Got.’ (Gen. 5:22; 6:9) I mich Got u wan’ Moses ya gowa ke guy. (Heb. 11:27) I rin’ Jesus urngin ban’en ni baadag e Chitamangin ni nge rin’, ma aram me tow’athnag. (John 8:29) Ngaum folwokgad rorad. “Um pired ni gimed ba felfelan’ ni gubin ngiyal’, mu um meybilgad ni gubin ngiyal’, demtrug e n’en nra yib ngomed ma gubin ngiyal’ ni nguum pininged e magar ngak Got.” (1 Thess. 5:16-18) Dab mu pag ban’en ni nge palognagem rok Jehovah!