1. ¿Chaaj wo’ reet re’ xub’iraj i Pablo chi kiij taqeh ajnimaneel aj Corinto xuyeew rusuqkiil ruk’ux?

 CHUPAAM i haabʼ 55 pan qaqʼijil, reʼ apóstol Pablo wilik naq ar chiʼ palaw, pan tinamit Troas, xa reʼ laʼ maʼ irukanaaʼ ta naq kapebʼenik chi kiij taqeh ajnimaneel aj Corinto. Re’ reh rubʼiram naq chik chi wilik naq kʼaxkilal chi kixilak. Jeʼ re’ noq, je’ rukabʼ jenaj ajabʼees tiʼ irikʼraaj taqeh ruhalakʼuun, xutzʼihbʼaaj jenaj huuj keh reh ruyeʼariik kinaʼojbʼal (1 Cor. 1:11; 4:15). Ruum aj reʼ, xuqʼor reh i ramigo Tito chi ne inooj rilow taqeh, eh chi riij i reʼ na naq kireqem kiibʼ ar Troas, eh jeʼ reʼ ne naq irunabʼeej chi riij i kʼahchiʼ rukʼulariik ar Corinto. Reʼ Pablo kʼahchiʼ naq ruyʼeem i Tito ruum chi xa iraaj naq chik rubʼiram i naruqʼorom. Xa reʼ laʼ, q’e’ xti’b’ik ruk’ux, ruum chi reʼ Tito maʼ xponik ta. ¿Chajariik xubʼan i Pablo? Xuchop jenaj barco eh xooj Macedonia. Ar qʼeʼ insuqbʼik rukʼux noq xureq i Tito, ruum chi reʼ reh irukʼam cho i holohik laj qʼorik: reʼ taqeh hermano aj Corinto xsuqbʼik kikʼux ruukʼ i naʼojbʼal xyeʼarik keh ruum i Pablo, eh inkaaj woʼ naq chik kilom wach. Noq reʼ Pablo irubʼiraj taqeh wilih qʼeʼ woʼ chik insuqbʼik rukʼux (2 Cor. 2:​12, 13; 7:​5-9).

2. a) ¿Chajariik xutzʼihbaaj i Pablo keh taqeh aj Corinto chi riij i kojbʼal eh i suqkiil kʼuxliis? b) ¿Chajariik taqeh i pahqanik naqatzʼirim riij?

² Maʼ najt ta xik’ik noq reʼ Pablo xutzʼihbʼaaj i rukabʼ carta keh taqeh aj Corinto, ahaʼ wiiʼ xuq’or: «Re’ hoj ma’ reʼ ta ruq’atariik taq awach inqaaj ruukʼ taq animaniik ruum reʼ taq i hat kow taq chik akʼux. Atoob’jiik la’ taq inqaaj, reh chi neen wihik taq rusukiil akʼux chi nimanik» (2 Cor. 1:24). ¿Chajariik xraaj ruqʼorom? ¿Chajariik ne inkitijej taqeh ajkʼamal bʼeeh ruukʼ taqeh qʼorik wilih?

3. a) ¿Chajariik naq xraaj ruqʼorom i Pablo noq xutzʼihbʼaaj: «Ruum re’ taq i hat kow taq chik akʼux»? b) ¿Nikʼwach inkitijej keh i runaʼojbʼal i Pablo taqeh ajkʼamal bʼeeh pan qaqʼijil?

³ Reʼ apóstol Pablo xqʼorik chi riij kiʼibʼ na’ojb’al i ajwaal wach pan qaloqʼinik: reʼ kojbʼal eh reʼ suqkiil kʼuxliis. Chi riij i kojbʼal, xutzʼihbʼaaj: «Re’ hoj ma’ reʼ ta ruq’atariik taq awach inqaaj ruukʼ taq animaniik, ruum re’ taq i hat kow taq chik akʼux». Reʼ reh xukoj rehtaal chi reʼ taqeh ajnimaneel aj Corinto korik naq wach kikʼux intyoox reh i kikojbʼaal chi riij i Dios, maʼ ruum ta i reh oon tokoom chik kʼachareel. Xuq’or woʼ chi maʼ ko ruman ta naq chi ne intaqʼanik chi naah i kikojbʼaal taqeh hermano eh maʼ iraaj ta woʼ naq rub’anam i wilih, ch’iklik la’ naq chi re’ keh inkaaj naq kib’anam i holohik (2 Cor. 2:3). Reʼ taqeh ajkʼamal bʼeeh pan qaqʼijil inkitijej keh ia runaʼojbʼal i Pablo, inkikʼuhtaaj chi chʼiklik kikʼux ruukʼ i kikojbʼaal eh i kamanik inkibʼan taqeh hermano reh ruloqʼjiik wach i Dios (2 Tes. 3:4). Reʼ keh maʼ inkikoj ta i kina’ojb’al i keh pan molaabʼ, inkikʼam laʼ naah i naʼojbʼal inkan pan Santo Laj Huuj eh inkikʼam naah iruqʼor i rutinamiit i Jehová. Ruum aj reʼ, inkireq chi riij chi, maʼ reʼ ta i keh kiʼehchanik reh i kikojbʼaal i tokoom (1 Ped. 5:​2, 3).

4. a) ¿Chajariik xraaj ruqʼorom i Pablo noq xutzʼihbʼaaj: «Atoobʼjiik la’ taq inqaaj, reh chi neen wihik taq rusuqkiiI akʼux chi nimanik»? b) Je’ rukab’ i Pablo, ¿chajariik inkaaj taqeh ajkʼamal bʼeeh pan qaqʼijil?

⁴ Reʼ Pablo xuqʼor woʼ: «Atoobʼjiik la’ taq inqaaj, reh chi neen wihik taq rusuqkiiI akʼux chi nimanik». Ruukʼ taqeh qʼorik wilih kʼahchiʼ naq ruqʼoriik chi riij i reh eh chi riij taqeh ruchʼihiil maʼ najt ta ruukʼ. ¿Chaaj woʼ reet qehtʼal i wilih? Chupaam i carta re’re’ xq’orik chi riij ki’ib’ i ruch’ihil. Reʼ reh xutzʼihbʼaaj: «Re’ Jesucristo [...] re’ i xqaqʼor cho rib’iral taq panaxilak wuchʼihil i Silvano, wuchʼihil i Timoteo» (2 Cor. 1:19). Eh, noq reʼ apóstol irukoj i qʼorik ajtobʼineel, kʼahchiʼ naq ruq’oriik chi kiij taqeh maʼ najt ta ruukʼ, jeʼ rukʼabʼ i Apolos, i Áquila, i Prisca, i Timoteo eh i Tito (Rom. 16:​3, 21; 1 Cor. 3:​6-9; 2 Cor. 8:23). Noq xuqʼor keh chi iraaj naq rutoob’eem taqeh reh chi suq kik’ux, xuyeew chi nabʼjik keh taqeh aj Corinto chi reʼ reh eh re’ taqeh ruchʼihil inkaaj naq kibʼanam chuʼnchel i wilik pan kiqabʼ reh chi re’ taqeh i wilkeeb’ pan molaabʼ suq kik’ux. Eh reʼ woʼ reʼ inkaaj taqeh ajkʼamal bʼeeh pan qaqʼijil yuʼnaak, inkaaj kibʼanam chuʼnchel i wilik pan kiqʼabʼ reh rutobʼjiik taqeh hermano reh ruloqʼjiik wach i Jehová «ruukʼ suqkiil kʼuxliis» (Sal. 100:2; Filip. 1:25).

5. ¿Chajariik naqatzʼirim riij chupaam i naʼojbʼal wilih eh chi riij chajariik ko ruman chi ne qojkapeb’inik?

⁵ Maʼ najt ta ik’inaq, xpahqaljik keh i jun tzʼuhb chi hermano, reʼ inkiqʼor i kʼuhbʼaal ruukʼ suqkiil kikʼux pan reh reh wach tinamit. «¿Nik’wach xatrutoob’eej jeno’ ajk’amal b’eeh reh chi re’ rusuqkiil akʼux ne ink’ihik wach?». Noq k’ahchi’ oq qatz’irim riij i xkiqʼor, qojkapebʼinoq chi riij chajariik naq xqaqʼor i hoj, eh qojkapebʼinoq woʼ chi riij chajariik ne inqabʼan reh chi ne inkʼihik i rusuqkiil qakʼux pan qamolaabʼ. a

6, 7. a) ¿Nikʼwach reʼ taqeh ajkʼamal bʼeeh ne inkitijej keh i runaʼojbʼal i Jesús, i Pablo eh tokoom chik rajkamanoom i Dios? b) ¿Chaaj woʼ reet inkʼihik wach i rusuqkiil kikʼux taqeh hermano noq inqaqʼor i kibʼihnaal?

⁶ Kʼih taqeh ajnimaneel xkiqʼor chi suq inkikʼraaj kiibʼ noq kikapebʼjiik kuum taqeh ajkʼamal bʼeeh. Reʼ taqeh ajkʼamal bʼeeh inkikʼuhtaaj chi inkaaj wach taqeh tokoom, noq inkik’am keh ruuk’ i David, ruukʼ i Elihú eh ruukʼ i Jesús (chawil 2 Samuel 9:6; Job 33:1 eh Lucas 19:5). Reʼ taqeh ixibʼ wilih xkiqʼo’reej taqeh kʼachareel ruukʼ i kibʼihnaal. Eh re’ Pablo ko ruman woʼ naq chi reh chi ne ink’ulik pan rukʼux eh chi ne iruq’or i kibʼihnaal taqeh hermano. Pan rukuxiik i rukarta, i xutz’ihb’aaj keh taqeh hermano aj Roma, iruyeew rusuqkiil kikʼux eh iruqʼor i kibʼihnaal taqeh ikʼinaq chi veinticinco chi hermano eh hermana. Jenaj ehtalil, xutzʼihbʼaaj: «Chayeew woʼ taq rusuqkiiI rukʼux weh i qahermana, Pérsida» (Rom. 16:​3-15).

⁷ Juʼjun taqeh ajkʼamal bʼeeh kʼaxik chi keh chi ne ink’ulik pan kikʼux i kibʼihnaal taqeh wilkeebʼ pan molaabʼ. Xa reʼ laʼ, noq inkikowej kikʼux reh chi ne inkahnik pan kinaah i kibʼihnaal, jeʼ na inkaaj kiqʼorom reh i juʼjun chi hermano: «Reʼ hat, hat xti qʼeʼ ko ruman chi weh» (Éx. 33:17). Reʼ taqeh ajkʼamal bʼeeh inkitoob’eej ruukʼ rusuqkiiI kikʼux taqeh hermano, noq inkiq’or i kib’ihnaal noq inkiyeew jenoʼ kiqʼorbʼal pan tijinik reh i huuj La Atalaya, oon pan jenoʼ chik moloj iibʼ (chapaj ruukʼ iruqʼor i Juan 10:3).

8. ¿Nikʼwach xuk’am reh ruuk’ i Jehová eh i Jesús i Pablo?

⁸ Jenaj chik ruwiiʼ chi ne inkʼihik i rusuqkiiI kikʼux taqeh hermano, reʼ chi ne inqaqʼor keh chajariik inqikʼraaj chi kiij, jeʼ rukʼabʼ xubʼan i Pablo. Reʼreʼ inqil pan rukabʼ carta i xutz’ihb’aaj keh taqeh aj Corinto. Re’ reh xutz’ihb’aaj: «Re’ taq i hat qʼeʼ taq i nayeew runimaal wach nukʼux» (2 Cor. 7:4). Reʼ taqeh qʼorik wilih, mareh xuyeew rukowiil kikʼux taqeh hermano aj Corinto. Reʼ Pablo xuqʼor woʼ taqeh qʼorik wilih keh taqeh tokoom chik molaabʼ (Rom. 1:8; Filip. 1:​3-5; 1 Tes. 1:8). Noq xqʼorik chi riij i Pérsida, pan huuj xutaq’aaj keh taqeh molaabʼ ar Roma, xuqʼor: «i ruyeew rukʼux chubʼanariik i rukamaj i Jesucristo» (Rom. 16:12). Mareh re’ qahermana wilih, re’ i korik wach rukʼux, xti qʼeʼ xsuqbʼik rukʼux ruum i xq’orarik chi riij. Noq re’ Pablo iruyeew naq rukowiil kikʼux taqeh tokoom, irukʼuhtaaj naq i runaʼojbʼal i Jehová eh i Jesús (chawil Marcos 1:​9-11 eh Juan 1:47; Apoc. 2:​2, 13, 19).

9. ¿Chaaj woʼ reet insuqbʼik kikʼux taqeh hermano pan molaabʼ noq inqayeew eh inqakʼul kowiil kʼuxliis ruukʼ i qaqʼorbʼal?

⁹ Reʼ taqeh ajkʼamal bʼeeh pan qaqʼijil looq’ chi keh ruq’orariik keh taqeh hermano chi inkaaj kiwach eh rukʼuhtjiik ruukʼ i kiqʼorbʼal i inkikʼraaj chi kiij taqeh kihermano (Prov. 3:27; 15:23). Noq jeʼ reʼ inkibʼan, xa jeʼncho kʼahchiʼ kiqʼorom: «Xnukoj rehtaal i kʼahchiʼ abʼanam, ruum chi inwaaj awach». Ruum aj reʼ, ko ruman chi reʼ taqeh hermano ne inyeʼarik rukowiil kikʼux ruum taqeh ajkʼamal bʼeeh. Jenaj hermana 55 haabʼ wilik reh iruqʼor: «Pan kamanik maʼ ajwach ta ne irukʼuhtaaj chi iraaj awach. Maʼ suq ta kiqʼorik eh xa chi kiij wo’ i keh kiqʼorik. Ruum aj reʼ, insuqb’ik nukʼux noq jenoʼ ajkʼamal bʼeeh iruqʼor weh chi looq’ chi reh i inubʼan pan molaabʼ. Re’ wilih iruyeew wansil. Re’ wilih irukʼuhtaaj weh chi re’ wajaaw wilik cho pan taxaaj iraaj nuwach». Jenaj ajkʼamal bʼeeh xuyeew rukowiil rukʼux jenaj ajabʼees kʼahchiʼ rukʼihsam taqeh i ruhalakʼuun chi rutkeel. ¿Chajariik xkʼuljik noq re’ ajk’amal b’eeh xub’an i wilih? Reʼ ajabʼees iruqʼor: «Reʼ xuqʼor xokik pan wanima eh xuyeew rukowiil nukʼux». Jeʼ reʼ noq, reʼ kowiil kʼuxliis iruyeew jenaj ajkʼamal bʼeeh, iruyeew rukowiil kikʼux taqeh hermano eh irubʼan chi ne inkʼihik wach i rusuqkiil kikʼux. Eh ruukʼ i wilih inyeʼarik kansil reh chi maʼ ne ta kiqʼuhtik reh ojik chupaam i bʼeeh reh i kʼacharik (Is. 40:31).

10, 11. a) ¿Chajariik ne inkibʼan taqeh ajkʼamal bʼeeh reh rukʼamariik keh ruuk’ i rehtalil i Nehemías? b) ¿Chajariik ne intoobʼinik keh taqeh ajkʼamal bʼeeh reh ruyeʼariik jenoʼ kooch pan uxlabʼal noq inkulaʼineej taqeh hermano?

¹⁰ ¿Nikʼ chik wach inkikʼuhtaaj taqeh ajkʼamal bʼeeh chi inkaaj wach taqeh hermano eh chi inkaaj chi ne ink’ihik i rusuqkiiI kikʼux? Noq inkiyeew rukowiil kik’ux ajwach ajwaal wach chi keh (chawil Hechos 20:28). Noq jeʼ reʼ inkibʼan, inkikʼam keh ruukʼ taqeh ajkʼamal bʼeeh reh najtir cho q’iij. Chakoj rehtaal i xubʼan i Nehemías noq xril chi juʼjun taqeh hermano judío qajinaq naq i kikojb’aal. Reʼ Santo Laj Huuj iruqʼor chi reʼ reh xutoqʼaaʼ ruyeʼem rukowiil kikʼux (Neh. 4:14). Reʼ taqeh ajkʼamal bʼeeh reh i qaqʼijil jeʼ wo’ re’ inkibʼan, kik’amwik bʼeeh reh ruyeʼariik rukowiil kikʼux taqeh kihermano. Ruum aj reʼ, inkulaʼineej taqeh hermano pan kipaat wilaʼ xuyeew riibʼ chi kiwach, reh ruyeʼariik jenoʼ kikooch pan uxlab’al (Rom. 1:11, TNM). ¿Chajariik ne intoobʼinik keh taqeh ajkʼamal bʼeeh reh rutoob’jiik taqeh hermano noq inkula’ineej taqeh?

¹¹ Noq ko majaaʼ kiʼooj chi ulaʼinik, ko ruman chi ne inkikapaaj chi riij i kʼachareel nakiqʼo’reem. Ne irubʼan chi ne inkikapaaj chi riij i wilih: «¿Chajariik kʼaxkilal kʼahchiʼ rikʼiik wiiʼ i hermano? ¿Chajariik naq ne iruban chi ne inqaqʼor reh reh ruyeʼariik rukowiil rukʼux?¿Aha’ wilik i texto reh i Santo Laj Huuj ne intoobʼinik reh? ¿Wilik na jenoʼ ehtalil reh i Santo Laj Huuj chi riij jeno’ i xikʼiik pan jenaj kʼaxkilal jeʼ rukabʼ i reh?». Reʼ taqeh pahqanik wilih ne irubʼan chi reʼ i qʼorik ruukʼ i kʼachareel ne inelik korik. Re’ taqeh ulaʼinik wilih inkib’an chi reʼ taqeh hermano ne inkiqʼor i wilik pan kanima eh ne kibʼirjik ruukʼ qʼuniil (Sant. 1:19). Jenaj hermana xuqʼor: «¡Xti iruyeew kowiil kʼuxliis noq jenoʼ ajkʼamal bʼeeh iruyeew ruk’ux chi nub’irjiik!» (Luc. 8:18).

12. ¿Ajwach inkaaj rukowiil kikʼux pan molaabʼ eh chaaj woʼ reet?

¹² ¿Ajwach ajwaal chi reh chi ne inkula’ineej? Reʼ Pablo xuqʼor keh taqeh ajkʼamal bʼeeh: «Chawikʼraaj woʼ taqe i aj nimaneel». Jeʼ reʼ noq, chu’nchel taqeh i wilkeebʼ pan molaabʼ inkaaj rukowiil kikʼux, jeʼ woʼ taqeh ajqʼorol kʼuhbʼaal eh taqeh precursor reʼ kʼih haabʼ chik inkikʼam chi qʼoroj kʼuhbʼaal. Atoobʼ ta reʼ taqeh hermano wilih kow taqeh pan uxlabʼal eh korik wach kikʼux, ¿chaaj woʼ reet ko ruman chi keh i kitoobʼaal taqeh ajkʼamal bʼeeh? Ruum chi reʼ keh, mareh ne wo’ inkikʼraaj chi maʼ ne ta inkikuy i kʼaxkilal wilik wach akʼal. Reʼ xukʼul i David pan rukʼachariik irukuhtaaj qeh chi reʼ taqeh rajkamanoom i Dios, atoobʼ ta korik wach kikʼux inkaaj chi ne kitoobʼjik ruum jenoʼ kamigo.

13. a) ¿Chaaj woʼ reet i Isbí-benob xraaj naq rukansam i David? b) ¿Chaaj woʼ reet i Abisai xukoʼleej riij i rukʼacharik i David noq aajwaal naq wach?

¹³ Noq reʼ David ma’ najt ta rokik chi reeyiil ar Israel, xubʼan peleeto ruukʼ i Goliat, jenaj keh i aj refaím, jenaj kej i kichalik ruuk’ taqeh i k’achareel nim kooq. Reʼ David maʼ xyoʼjik ta eh xukansaj i Goliat (1 Sam. 17:​4, 48-51; 1 Crón. 20:​5, 8). Noq xi’ikʼik taqeh haabʼ, pan jenaj peleeto kuukʼ taqeh filisteo, re’ David xureq wo’ chik jenaj winaq nim rooq aj refaím. Reʼ rubʼihnaal Isbí-benob (2 Sam. 21:16). Xa reʼ laʼ, reʼ winaq wilih kʼisiin maʼ xukansaj i David. ¿Chaaj woʼ reet? Maʼ ruum ta chi reʼ David wilik naq ruyoʼjiik, ruum laʼ chi maʼxta naq chik ransil. Reʼ Santo Laj Huuj iruqʼor chi maʼxta naq chik ransil eh noq re’ Isbí-benob xukoj rehtaal i wilih, xraaj naq rukansam i David. Xa reʼ laʼ, noq reʼ i winaq wilih na naq chik rubʼanam i kansanik, «reʼ i Abisai rakʼuun i Sarvia xooj kʼoloq chi koʼljiik i David, xukansaj i nim rooq winaq reʼ reʼ» (2 Sam. 21:​15-17). ¡Kʼisiin maʼ xkimik! Mareh re’ David xti qʼeʼ xutyooxeej reh i Abisai, ruum chi k’ahchi’ naq rukojom rehtal i k’ahchi’ naq ruk’ulariik eh chi xkoʼljik riij i rukʼacharik noq wilik naq pan kʼaxkilal. ¿Chajariik inqatijej chi riij i ehtalil wilih?

14. a) ¿Chajariik ne intoobʼinik qeh chi ikikʼ chupaam taqeh kʼaxkilal xa nimaq chik jeʼ rukabʼ i Goliat? b) ¿Nikʼwach qatobʼjiik ne inkibʼan taqeh kʼamal bʼeeh reh ruyeʼariik qansil eh ruman i rusuqkiiI qakʼux? Chakoj jenaj ehtalil.

¹⁴ Atoobʼ ta reʼ Ajyahm eh re’ taqeh kitahqanik reh ne inkiqʼat paam i qabʼeeh, reʼ hoj rajloqʼineel i Jehová maʼ inqakanaaʼ ta i qʼoroj kʼuhbʼaal. Jun suut i akʼal juʼjun qeh hoj, hoj ikʼinaq chupaam taqeh nimaq taq kʼaxkilal jeʼ rukab’ i Goliat, xa re’ la’, intyoox reh chi chʼiklik qakʼux ruukʼ i Jehová qojʼelik korik. Wilik pech, reʼ taqeh kʼaxkilal inkʼularik ayuʼ wach akʼal irubʼan chi qojqʼuhtik eh chi maʼxta ta chik inqaaj qabʼanam. Noq jeʼ wilih inqikʼraaj qiibʼ, maʼ hoj ta chik kow eh pan yohbʼaal chik ne qojwih’ik, ruum chi xareyu’ ne qojqʼehbʼik ruuk’ jenoʼ kʼaxkilal reʼ maʼ kʼaxik ta naq rikʼsjiik wilaʼ suq ta naq qakʼux. Chupaam taqeh junkʼaam reʼreʼ, reʼ rutobʼaal jenoʼ kʼamal bʼeeh ne irubʼan chi ne inkowjik qakʼux eh ne inqareq rusuqkiiI qakʼux. Jenaj precusora aj 65 haabʼ iruqʼor: «Najtir, maʼ suq ta naq inwikraaj wiibʼ eh reʼ qʼoroj kʼuhbʼaal kiruqʼuhtisaj naq. Jenaj kʼamal bʼeeh xukoj rehtaal chi hin naq qʼuhteel, eh xupahqaaj weh chajariik naq i kʼahchiʼ nukʼulum. Xojq’orik chi riij i wilih eh xukowej nukʼux ruuk’ jenaj naʼojbʼal reh i Santo Laj Huuj. Xnukʼam naah i naʼojbʼal xuqʼor weh eh xinelik korik. ¡Xti qʼeʼ inutyooxeej chi kʼahchiʼ naq rukojom rehtaal i kʼahchiʼ nukʼulum eh chi xirutobʼeej!» Xti qʼeʼ looqʼ chi wilkeebʼ kʼamal bʼeeh chaqʼlaam taqeh eh kikapebʼenik chi qiij, jeʼ rukabʼ i Abisai tiqlikeeb’ chi qatoob’jik.

15, 16. a) ¿Chaaj woʼ reet re’ taqeh hermano xti qʼeʼ naq inkaaj wach i Pablo? b) ¿Chaaj woʼ reet inqaaj kiwach taqeh ajkʼamal bʼeeh?

¹⁵ Rilariik i molaabʼ kamanik iraaj. Wilik pech, reʼ taqeh ajkʼamal bʼeeh maʼ kiwirik ta, ruum chi inkibʼan kitiij chi kiij i rutentzuun i Dios oon ruum kitoobʼjiik taqeh pan uxlabʼal i kihermano (2 Cor. 11:​27, 28). Xa reʼ laʼ, reʼ keh inkibʼan i kikamaj ruukʼ chuʼnchel kikʼux. Jeʼ reʼ inkikʼam keh ruuk’ i Pablo, re’ xutzʼihbʼaaj keh taqeh ajnimaneel aj Corinto: «Chuʼnchel chibʼih wilik weh maʼ tiʼ ta nukʼux chusachariik. Eh maʼ tiʼ ta woʼ nukʼux chi nee nuqʼuhtisaj wiibʼ taq cha toobʼjiik» (2 Cor. 12:15). Qʼeʼ naq iraaj kiwach taqeh i ruhermano eh xuyeew rukʼux chi kitoobʼjik (chawil 2 Corintios 2:4; Filip. 2:17; 1 Tes. 2:8). ¡Ruum xti qʼeʼ naq inkaaj wach! (Hech. 20:​31-38.)

¹⁶ Reʼ taqeh rajkamanom i Dios pan qaqʼijil inqaaj woʼ kiwach taqeh ajkʼamal bʼeeh eh pan qatiij inqatyooxeej reh i Jehová chi wilkeebʼ quukʼ chi qatoobʼjiik. Reʼ kʼaxooj inkikʼuhtaaj chi qiij irubʼan chi ne inkʼihik i rusuqkiil qakʼux eh noq kiq’orik quuk’, inkikowej qak’ux. Eh looq’ wo’ chi qeh chi qojkitobʼeej noq inkikoj rehtaal chi maʼ suq ta qak’ux ruum i runaʼojbʼal i wach akʼal wilih. Reʼ keh qatoobʼjiik inkaaj, reh chi ne inwihʼik rusuqkiil qakʼux.