Mas makusog daw an kagadanan kisa sa Diyos? Siyempre dai! Paanong an kagadanan—o ano pa man na “kaiwal”—magigin mas makusog kisa sa ‘Diyos na Makakamhan sa Gabos’? (1 Corinto 15:26; Exodo 6:3) May kapangyarihan an Diyos na halion an epekto nin kagadanan paagi sa pagkabuhay liwat, asin nanuga siya na iyan mismo an gigibuhon niya sa bagong kinaban. * Gurano kasiyerto an panugang iyan? An mismong Aki nin Diyos, si Jesus, an nagsiyerto kaiyan sa sato paagi sa mga tataramon na nagtatao sa sato nin paglaom.—Basahon an Mateo 22:31, 32.

Mantang kaulay an mga Saduceo, na dai nagtutubod sa pagkabuhay liwat, sinabi ni Jesus: ‘Dapit sa pagkabuhay liwat nin mga gadan, dai nindo nabasa idtong itinaram saindo nin Diyos, na suminabi, Ako iyo an Diyos ni Abraham, asin an Diyos ni Isaac, patin an Diyos ni Jacob? An Diyos bakong Diyos nin mga gadan, kundi nin mga buhay.’ Si Jesus nagtataram manungod sa pakikipag-ulay nin Diyos ki Moises sa naglalaad na palungpong kaidtong mga 1514 B.C.E. (Exodo 3:1-6) Uyon ki Jesus, an mga tataramon ni Jehova ki Moises—‘Ako iyo an Diyos ni Abraham, asin an Diyos ni Isaac, patin an Diyos ni Jacob’—nagpaparisang an panugang pagkabuhay liwat siyertong mauutob. Paano?

Isip-isipa nguna an konteksto. Kan panahon na kaulayon ni Jehova si Moises, haluyon nang gadan an mga patriyarkang si Abraham, Isaac, asin Jacob—si Abraham sa laog na nin 329 taon, si Isaac 224, asin si Jacob 197. Alagad, sinabi ni Jehova na “Ako iyo”—bakong “Ako nagin”—an Diyos ninda. Nagtaram si Jehova manungod sa tulong gadan nang patriyarka na garo baga sinda buhay pa. Taano?

Ipinaliwanag ni Jesus: ‘An Diyos [si Jehova] bakong Diyos nin mga gadan, kundi nin mga buhay.’ Isipa kun ano an ipinaparisa kan mga tataramon na iyan. Kun mayo nin pagkabuhay liwat, si Abraham, Isaac, asin Jacob magdadanay na gadan sagkod lamang. Kun totoo iyan, si Jehova magigin Diyos nin mga bangkay. Iyan mangangahulugan na mas makusog an kagadanan kisa ki Jehova—na garo baga maluyahon siya na dai niya kayang mapatalingkas sa kagadanan an maimbod niyang mga lingkod.

Kun siring, ano an puwede niyatong isipon manungod ki Abraham, Isaac, Jacob asin sa gabos na maimbod na lingkod ni Jehova na gadan na? Sinabi ni Jesus an mapuwersang pahayag na ini: “Sinda gabos buhay para sa saiya.” (Lucas 20:38, NW) Tunay nanggad, an katuyuhan ni Jehova na buhayon liwat an maimbod niyang mga lingkod siyertong marhay na mauutob ta sa isip niya sinda buhay pa. (Roma 4:16, 17) Sinda gabos yaon sa daing limiteng memorya ni Jehova sagkod na umabot an itinalaan niyang panahon na buhayon sinda liwat.

Nagugustuhan daw nindo an paglaom na makaibanan giraray an nagadan nindong namumutan sa buhay? Kun iyo, girumdumon na si Jehova labi-labi kakusog kisa sa kagadanan. Mayong makakapugol sa saiya sa pag-utob kan panuga niya na buhayon liwat an mga gadan. Taano ta dai pag-adalan nin urog pa an manungod sa panuga na pagkabuhay liwat asin sa Diyos na mautob kaiyan? An paggibo kaiyan siyertong mapadayupot sa saindo ki Jehova, ‘an Diyos nin mga buhay.’