‘HiNzambi Yawamomi’
KUNDAMENU KWAKWIHI NANZAMBI
‘HiNzambi Yawamomi’
Komana kufwa kukweti ñovu kubadika Nzambi? Inehi. Indi kufwa hela “chilumbu” wudi wejima wukumubadika ñahi ‘Nzambi Watwesha Yejima’ ñovu? (1 Akorinda 15:26; Kwidika 6:3) Nzambi wukweti ñovu yakufumishahu kufwa kuhitila mukusañula afu nawa wakana kwila mwenimu mwituña dindi dadiha. * Tunateli kwiluka ñahi netu ichi chikaninu chalala? Mwana kaNzambi, Yesu watuleja mazu atuleñelaña kwikala nakuchiñeja.—Tañenu Matewu 22:31, 32.
Yesu wahosheli nawaSadusi abulili kukuhwelela mukusañuka nindi: “Hakwila nsañu yakusañuka kwawafu, ochu chahosheliyi Nzambi nanenu, nindi, Yami Nzambi yaAbarahama, Nzambi yaIsaka, Nzambi yaYakoba; himunachitañuku? Dichi Nzambi hiNzambi yawafuku, hiNzambi yawamomi.” Yesu hanu wateneneña mpanji yahanjekeliyi Nzambi naMosi hachiputa chakwatili kesi kwakwihi na 1514 B.C.E. (Kwidika 3:1-6) Kwesekeja naYesu, nsañu yamulejeluwu Mosi kudi Yehova nindi, “Yami Nzambi yaAbarahama, Nzambi yaIsaka, Nzambi yaYakoba” yamwekeshaña nawu chikaninu chakusañuka chikashikijewa. Munjilanyi?
Sambilenu kushinshika yuma chiyadiña. Hampinji yahosheliyi Yehova naMosi, ankakulula Abarahama, Isaka niYakoba adiña afwa dehi, Abarahama mwahitili yaaka 329, Isaka mwahitili yaaka 224, nawa Yakoba mwahitila yaaka 197. Hela chochu, Yehova wahosheli nindi: ‘Yami,’ bayi neyi ‘Nadiña’ Nzambi yawuku. Yehova wahosheli hadi awa ankakulula asatu afwa dehi neyi kwiji achidi amomi. Muloñadi?
Yesu walumbulwili nindi: “Dichi Nzambi hiNzambi yawafuku, hiNzambi yawamomi.” Toñojokenu ntahi mwatalisha awa mazu. Neyi chakwila kusañuka kwosi, dikwila nawu Abarahama, Isaka niYakoba hiyamba kasañukaku. Neyi kusañuka kwosi, Yehova wukwikala Nzambi yawafu. Chumichi chikumwekesha nawu kufwa kukweti ñovu kubadika Yehova, neyi kwiji wazeya chikupu chakukañanya kusañula ambuñindi ashinshika.
Hanu dinu, tukuhosha netudi kutalisha hadi Abarahama, Isaka, Yakoba niambuña Yehova ejima ashinshika afwa dehi? Yesu wahosheli awa mazu alema nindi: “Ejima amuhandilaña yena.” (Luka 20:38) Eñañi, nkeñelu yaYehova yakusañula ambuñindi ashinshika afwa dehi yikashikijewa chakwila watoñojokaña hadi wena neyi kwiji amomi. (Aroma 4:16, 17) Chineli Yehova wukweti yitoñojoka yawanina, wanukaña antu ejima afwa dehi nawa wakayisañula hampinji yindi yatelela.
Komana kuchiñeja kwakwikala nawantu imwakeña afwa dehi kwayihizumwishaña? Neyi dimu, anukeñu nenu Yehova wukweti ñovu chikupu yakusañula afu. Kwosi chuma chinateli kumukañesha kushikija chikaninu chindi chakusañula afuku. Kwila mudiza nsañu yayivulu yahosha hachikaninu chakusañula afu nihadi Nzambi wamba kashikija ichi chikaninu nehi? Neyi mwila mwenimu mukukundama kwakwihi naYehova, ‘Nzambi yawamomi.’
Nsona yimwatela kutaña:
[Tumazu twaheshina]
^ Hakwila nawu mudizi yuma yayivulu yahosha hachikaninu chaNzambi chakusañukila mwituña dadiha daloña, talenu kapetulu 7 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova.
[Mazu ekoku adi hefu 7]
Yehova wukweti ñovu chikupu yakusañula afu
