¿Kipia Dios okachi chikaualis ke mikilis? ¡Kemaj! ¿Keniuj mikilis oso okse ‘akin kiixnamiki’, uelis kipias okachi chikaualis ke Dios akin nochi ueli kichiua? (1 Corintios 15:26; Éxodo 6:3.) Dios ueli kitani mikilis ta yejuatsin ueli oksepa kitemaka nemilis, uan yejua nejon motenkaua kichiuas keman tayektalis itech taltikpak uan onkas tein melauak. * ¿Uelis titakuaujtamatiskej itech nejon netenkaualis? Jesús, iKonetsin Dios, tanankilia ika seki tajtolmej tein kinextia ke uelis tikchiaskej tein kuali. (Xikonixtajtolti Mateo 22:31, 32.)

Keman Jesús kinojnotstoya saduceos akin amo kineltokayaj ke oksepa nemiskiaj akin momikilijkejya, kijtoj nejin tajtolmej: “Namechnextilia de ne tonal kuak pankisaske yoltokke in [mikemej] [...]: Acha namejuan amo keman nankileerojtinemij tech in Tajkuilolamatsin de Dios ten technojnotsa ijkuin: ‘Nejuatsin ni Dios de Abraham uan ni Dios de Isaac uan ni Dios de Jacob’. [...] Totajtsin Dios amo in Dios den [mikemej] [...]. Ta, Yejuatsin in Dios ten [...] yoltokke”. Itech nejin tajkuilol, Jesús ika tajtoj keman Dios monojnotsak iuan Moisés kemej 3,500 xiujmej achtoya iixpan se uitskoujtaktsoj tein xotatoya (Éxodo 3:1-6). Ijkon kemej Jesús kijtoj, tajtolmej “Nejuatsin ni Dios de Abraham uan ni Dios de Isaac uan ni Dios de Jacob” kiyeknextia ke oksepa nemiskej akin momikilijkejya. ¿Keyej ijkon tikajsikamatij?

Keman Jiova tajtoj iuan Moisés, miak xiujmej achto momikilijkajya Abrahán, Isaac uan Jacob. Abrahán momikilijka 329 xiujmej achto, Isaac 224, uan Jacob 197. Sayoj ke Jiova amo kijtoj “Nejua katka ininDios”, ta “Nejua niininDios”, kemej yeskia nejin eyi takamej kisentokaskiaj yoltoskiaj. ¿Keyej?

Jesús kimelauak ke Jiova “amo in Dios den [mikemej] [...]. Ta, Yejuatsin in Dios ten [...] yoltokke”. Xikonnemili tein kijtosneki nejin tajtolmej. Komo amo ueliskiaj oksepa nemiskej akin momikilijkejya, Abrahán, Isaac uan Jacob kisentokaskiaj moajsiskiaj itech taltekoch nochipaya, uan Jiova yeskia ininDios mikemej. Nejon kijtosnekiskia ke amo kipia chikaualis tein ika kinkixtis itech mikilis itekitikauan tein amo kikauaj, uan ke mikilis okachi chikauak ke Jiova.

Komo ijkon, ¿toni panos iuan Abrahán, Isaac uan Jacob, uan nochin itekitikauan Jiova tein amo keman kikaujkej uan momikilijkejya? Jesús kimelauak ika nejin tajtolmej tein kiyeknextia toni panos: “Ten takuautamatinemij iuan Dios, yejuan nojonkes yoltinemij” (Lucas 20:38). Jiova kimati ke yekmelauj kinmakas nemilis itekitikauan ijkon kemej motenkaua, uan yejua ika kinita kemej yeskia yoltokej (Romanos 4:16, 17). Kemej yejuatsin senkis nochi ueli kielnamiki, kinpia itech itanemilil hasta keman oksepa kinmakas nemilis.

¿Tikonuelitaskia oksepa tikonitas semej akin tikontasojtaya uan momikilij? Komo ijkon, xikonelnamiki ke Jiova kipia okachi chikaualis ke mikilis. Amo teyi uelis kitsakuilis maj oksepa kinmaka nemilis akin momikilijkejya ijkon kemej motenkaua. ¿Tikonuelitaskia okachi tionmomachtis ika nejon netenkaualis uan tikonixmatis Dios akin motenkauak nejon? Tikonitas ke nejon mitsonpaleuis okachi xionmotoki iuan Jiova “in Dios ten [...] yoltokke”.