HALA SERKA DIOS
‘E Ta Dios di e Bibunan’
Morto tin mas poder ku Dios? Di ningun manera! Kon morto, òf kualke otro “enemigu,” por tin mas poder ku Dios, kende ta “Todopoderoso”? (1 Korintionan 15:26; Éksodo 6:3) Dios tin poder pa eliminá morto, i el a primintí di hasi esei pa medio di resurekshon den su mundu nobo. * Kon sigur e promesa ei ta? Loke Hesus, e Yu di Dios, a bisa tokante e promesa ei por yena nos kurason ku speransa.—Lesa Mateo 22:31, 32.
Ora Hesus tabata papia ku e saduseonan, kendenan no tabata kere den resurekshon, el a bisa: “Pa loke ta resurekshon di e mortonan, boso no a lesa loke Dios a papia ku boso ora el a bisa: ‘Ami ta Dios di Abraham, Dios di Isak i Dios di Yakòb’? E no ta Dios di e mortonan, sino di e bibunan.” Aki Hesus a referí na e kòmbersashon ku Dios tabatin ku Moises banda di e mata ku tabata na kandela, mas o ménos 3.500 aña pasá. (Éksodo 3:1-6) Segun Hesus, loke Yehova a bisa Moises—“Ami ta Dios di Abraham, Dios di Isak i Dios di Yakòb”—ta un garantia ku e resurekshon lo tuma lugá sigur. Kon asina?
Laga nos wak e konteksto. Dia Yehova a papia ku Moises, e patriarkanan Abraham, Isak i Yakòb tabata morto pa basta tempu kaba; Abraham tabatin 329 aña morto, Isak 224 aña i Yakòb 197 aña. Apesar di esei, Yehova a bisa Moises “Ami ta” nan Dios, i no “Ami tabata” nan Dios. Yehova a papia di e tres patriarkanan ei komo si fuera nan tabata na bida ainda. Dikon?
Hesus a splika: “E [Yehova] no ta Dios di e mortonan, sino di e bibunan.” Pensa un ratu riba loke esei ta nifiká. Si no ta bai tin un resurekshon, Abraham, Isak i Yakòb lo keda morto pa semper. Den tal kaso, Yehova lo ta un Dios di kadaver. Esei lo nifiká ku morto tin mas poder ku Yehova, komo si fuera e ta muchu débil pa libra su fiel sirbidónan for di e gara di morto.
Pues, na ki konklushon nos por yega relashoná ku Abraham, Isak i Yakòb, i tur fiel sirbidó di Yehova ku a muri kaba? Hesus a bisa enfátikamente: ‘Pa E nan tur ta bibu.’ (Lukas 20:38) Sí, e propósito di Yehova pa resusitá su fiel sirbidónan lo kumpli sigur. Pa Yehova, ta komo si fuera nan ta na bida. (Romanonan 4:16, 17) Nan tur ta grabá den su memoria perfekto te na e tempu ku el a stipulá pa lanta nan for di morto.
Yehova tin muchu mas poder ku morto
E idea di por ta huntu atrobe un dia ku bo sernan kerí ku a muri no ta atraé bo? Kòrda ku Yehova tin muchu mas poder ku morto. No tin nada ku por strob’é di kumpli ku su promesa di resusitá e mortonan. Lo bo no ke sa mas tokante e promesa akí i tokante e Dios ku lo kumpli kuné? Si bo hasi esei, lo bo hala mas serka Yehova, ‘e Dios di e bibunan.’
Den febrüari nos ta rekomendá bo lesa
^ par. 3 Si bo ke sa mas tokante Dios su promesa di resurekshon den un hustu mundu nobo, wak kapítulo 7 di e buki Kiko Beibel Ta Siña Realmente? publiká pa Testigunan di Yehova.
