Kuyakuyqa tukuy sonqowan pimantapas sientiymi. Kuyakuqqa ruwasqanwanmi hinaspa rimasqanwanmi qawachin chayna kasqanta, wakinpiqa sasa kaptinpas.

Moisesqa qawachirqam Dios kuyasqanta. ¿Imaynata? Kasukuq kasqanwanmi. Bibliam nin: ‘Diosta kuyaspanchikqa kamachikuyninkunatam kasukunanchik’, nispa (1 Juan 5:3). Imataña ruwananpaq kamachiptinpas Moisesqa Diospa kamachisqanman hinapunim ruwarqa, Egiptopi manchakuypaq faraonwan rimananpaq chaynataq Puka lamar qocha lawman tawnanta haywarinanpaq kamachiptinpas kasukurqam (Exodo 40:16).

Moisesqa kuyarqataqmi llaqtamasinkunatapas. Paykunaqa reqsikurqakum pusaqninku kananpaq Moisesta Jehova Dios churasqanmanta, chaymi sasachakuyninkumanta willakunankupaq payman asuykuqku. Bibliam nin: ‘Quejankuta arreglananpaq Moises tiyaykuptinmi, runakunañataq Moisespa ñawpaqninpi sayaqku tempranomanta tardeykuqkama’, nispa (Exodo 18:13-16). Chayna ruwasqanqa amiruypaqchá karqa, ichaqa runamasinkunata kuyasqanraykum chayta ruwarqa.

Moisesqa manam uyariyllachu-uyarirqa, paykunapaqmi Diosta mañapurqa. Paypa contranpi kaqkunapaqpas mañapurqam. Huk kutipim panin Maria Moisespa contranpi rimaptin Jehova Diosqa lepra onqoywan hapirachirqa. Chayna castigasqanmanta Moises kusikunanmantaqa, kaynatam Jehova Diosta mañapurqa: “Ruegakuykim, Diosnilláy, Mariata sanoyaykachinaykipaq”, nispa (Numeros 12:13). Chaynataqa mañakurqa kuyakuyniyoq kasqanraykum.

Jehova Diostam kuyananchik, kuyasqanchikraykum kamachikuyninkunata ‘tukuy sonqonchikwan’ kasukunanchik (Romanos 6:17). Chayna kasukusqanchikqa Diostam anchata kusichin (Proverbios 27:11). Kuyasqanchikrayku payta servisqanchikqa kikinchiktapas anchatam kusichiwanchik (Salmo 100:2).

Runamasinchikkunatapas kuyananchikmi. Amistadninchik otaq familianchik ima sasachakuyninmantapas willawaptinchikqa kuyakuq kayninchikmi kallpanchawananchik 1) sumaqta uyarinapaq 2) kuyapayanapaq chaynataq 3) paypi reparanapaqpas.

Moises hinam ñoqanchikpas kuyasqanchikkunapaq Diosta mañapunanchik. Wakinpiqa manam ima ruwaytapas atinchikchu yanapaykunapaq, chaymi ichapas nichwan: “Anchatam llakikuyki, Diostayá mañapusqayki”, nispa. Bibliam nin: “Justo runapa tukuy sonqonwan mañakusqanqa llumpay atiyniyoqmi”, nispa (Santiago 5:16). Mañapuptinchikqa Jehova Diosmi yanapanman. Imayna yanapaymantaqa mañapuymi aswan allinqa. a

Moisesmantaqa tukuytam yachachwan. Ñoqanchik hina pantaq runa kaspanpas iñiyniyoq, mana hatunchakuq hinaspa kuyakuqmi karqa chayna kayninqa qatipakunapaqmi. Payta qatipakunapaq anchata kallpanchakuspaqa bendicionkunatam chaskisun kikinchikpas chaynataq hukkunapas (Romanos 15:4).