Lutsandvo luhlanganisa kusondzelana kakhulu nalabanye. Umuntfu lonelutsandvo uyikhombisa ngemavi nangetento indlela lativa ngayo ngalabo labatsandzako ngisho nome ngabe kwenta kanjalo kudzinga alahlekelwe ngulokutsite.

Mosi wakhombisa kutsi uyamtsandza Nkulunkulu. Wakhombisa ngayiphi indlela? Ase sicabangele emavi latfolakala ku-1 Johane 5:3 latsi: “Kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.” Mosi waphila ngemiyalo yaNkulunkulu. Kuko konkhe Nkulunkulu lamcela kutsi akwente, Mosi walalela kusukela emsebentini lomatima wekukhuluma buso nebuso nenkhosi Faro kuya kulobewubonakala umelula wekwelula indvuku etikweLwandle Lolubovu. Nome ngabe imiyalo yaNkulunkulu beyimelula nome ilukhuni, Mosi ‘wayenta yonkhe.’—Eksodusi 40:16.

Mosi wakhombisa kutsi uyawatsandza ema-Israyeli akubo. Ema-Israyeli abati kutsi Jehova bekabele Mosi kutsi awahole, ngako bewaya kuye ngetinkinga tawo letehlukehlukene. LiBhayibheli litsi: “Bantfu babema tindvwendvwe kusukela ekuseni kuze kushone lilanga.” (Eksodusi 18:13-16) Cabanga kutsi bekadzinwa kangakanani Mosi ngekuhlala lilanga lonkhe alalele ema-Israyeli nawaletsa tinkinga tawo kuye. Nome kunjalo, Mosi bekumjabulisa kusita bantfu labatsandzako.

Ngaphandle kwekuwalalela Mosi bekawakhumbula emithantazweni yakhe. Waze wathantazela ngisho nalabebangakamphatsi kahle. Sibonelo saloko kutsi ngesikhatsi dzadze waboMosi, Miriyamu avungama ngaMosi, Jehova washaya Miriyamu ngebulephelo. Kunekutsi Mosi simjabulise lesigwebo lesatfolwa nguMiriyamu, ngekushesha wavelana naye ngekumthantazela kuJehova watsi: “Mphilise Nkulunkulu, ngiyakuncenga.” (Numeri 12:13) Umthantazo lowentiwa nguMosi bewubufakazi bekutsi unelutsandvo.

Singamlingisa Mosi ngekutsi sibe nelutsandvo lolujulile ngaNkulunkulu. Lutsandvo lolunjalo lutasibangela kutsi silalele imitsetfo nemiyalo yaNkulunkulu ‘ngenhlitiyo yetfu yonkhe.’ (Roma 6:17) Nasilalela Jehova ngalokusuka enhlitiyweni, senta inhlitiyo yakhe ijabule. (Taga 27:11) Natsi siyasitakala nasenta njalo. Ngetulu kwaloko, nasikhonta Nkulunkulu ngobe simtsandza ngeke sigcine ngekwenta tintfo letinhle kuphela kodvwa sitakujabulela kutenta.—Tihlabelelo 100:2.

Lenye indlela lesingamlingisa ngayo Mosi kutsi sibe nelutsandvo lolutakwenta silahlekelwe ngulokutsite ngenca yalabanye. Nangabe bangani nemalunga emndeni beta kitsi ngalokubakhatsatako, lutsandvo lwenta (1) sibanake, (2) sivelane nabo, lokusho kuticondza tinkinga labakuto (3) sibatjele kutsi sivelana nabo.

NjengaMosi, natsi singabafaka emithantazweni yetfu bantfu lesisondzelene nabo. Ngalesinye sikhatsi singase sitive singasilo lusito nabasitjela tinkinga tabo. Singase sibalilele sitsi, “ncesi, lengingakhona kukwentela kona kutsi inkinga yakho ngiyibike kuNkulunkulu.” Nome kunjalo, khumbula kutsi “kuncusa kwemuntfu lolungile kunemandla kakhulu.” (Jakobe 5:16) Imithantazo yetfu ingase itsintse Jehova kutsi amentele lokutsite loyo muntfu lokungenteka bekangeke amentele kona kube asikathantazi. Kukhona yini lokuncono lesingakwentela bantfu lesisondzele nabo kunekutsi sibafake emithantazweni yetfu? a

Awuvumi yini kutsi kunyenti lesingakufundza kuMosi? Nanome abengumuntfu lofana nalabanye bantfu, wasibekela sibonelo lesihle sekukholwa, kutfobeka nelutsandvo. Nasetama kulingisa sibonelo sakhe loko kutasenta sisitakale kakhulu tsine kanye nalabanye.—Roma 15:4.