Ngandji ka mɛtɛ kɛdikɛdi nanga anto akina l’otema ɔtɔi ndo mbaɛnya oma l’etsha ndo oma l’ɛtɛkɛta aso dia sho ndjakiyanyaka dikambo diawɔ oyadi dui sɔ diayotɔlɔmba dia sho ndjahombia akambo amɔtshi.

Mɔsɛ akɛnya ngandji kakandokaka Nzambi. Lo woho akɔna? Bible mbutaka lo 1 Joani 5:3 ɔnɛ: “Nɛ dia nanga Nzambi kɛdikɛdi nkitanyiya ɛlɛmbɛ ande.” Lam’ele Mɔsɛ akokaka Nzambi ngandji, nde akakitanyiya wadjango ande. Lo kɛnɛ kakɔlɔmbɛ Nzambi dia nde nsala, ntatɛ oma l’ɔkɛndɛ wa wolo wa tɛnana la Farawɔ polo l’ɔkɛndɛ wɛnama dia vɔ mbakaleke wɔdu wa nkɔmɔla danga diande lo ndjale ka Beela, Mɔsɛ akasale kɛnɛ kakawodjangɛ Jehowa. Oyadi kɛnɛ kakɔɔlɔmbɛ Nzambi dia nsala kaki wolo kana wɔdu, Mɔsɛ akakitanyiya. ‘Nde akatshe kɛnɛ tshɛ kakawɔlɔmbɛ.’​—Etumbelu 40:16.

Mɔsɛ akɛnya ngandji kakandokaka ase Isariyɛlɛ. Vɔ wakashihodia ɔnɛ Jehowa aki lo nkamba la Mɔsɛ dia nɔmbɔla wodja ande, ɔnkɔnɛ, vɔ wakaye le Mɔsɛ dia ndjowotɛ ekakatanu awɔ. Bible mbutaka ɔnɛ: “Antu wakemala la ntundu kandi uma ka pindju edja ndu dikolo.” (Etumbelu 18:13-16) Ohokanyiya yema woho wakahombe Mɔsɛ nɛmba l’ɔkɔngɔ wa nde mpokamɛ ase Isariyɛlɛ wakawotɛka ekakatanu awɔ lushi la lushi. Koko, Mɔsɛ aki l’ɔngɛnɔngɛnɔ dia nkimanyiya anto wakandokaka ngandji asɔ.

Laadiko dia mbahokamɛ, Mɔsɛ akalɔmbɛ lo dikambo dia wakinde wa ngandji. Nde akalɔmbɛ ndo lo dikambo dia wanɛ wakosalɛka kɔlɔ. Ɛnyɛlɔ, etena kakangunanguna Miriyama wa kadiyɛnde, l’ɔtɛ w’ɔkɛndɛ wakalongola Mɔsɛ, Jehowa akawoke hemɔ ka sudi. Koko, lo dihole dia Mɔsɛ ngɛnangɛna l’ɔtɛ wa dilanya diakalongola Miriyama sɔ, nde akɔlɔmbɛ mbala kakɔ ɔtɔi ate: ‘Nzambi le! Lambokɔsɛngasɛnga nte: Ɔkɔnɔya.’ (Walelu 12:13) Paka ngandji mbakatshutshuya Mɔsɛ dia nde salɛ kadiyɛnde dɔmbɛlɔ dia l’otema ɔtɔi sɔ.

Sho kokaka mbokoya Mɔsɛ lo monga la ngandji k’efula otsha le Nzambi. Ngandji kɛsɔ totshutshuyaka dia sho nkitanyiya wadjango ande “oma k’ɛse otema.” (Rɔmɔ 6:17) Etena kakitanyiyaso Jehowa oma k’ɛse otema, sho ngɛnyangɛnyaka otema ande. (Tukedi 27:11) Sho lawɔ kondjaka wahɔ. Ndo nto, naka sho kambɛ Nzambi oma lo ngandji ka mɛtɛ kawokaso, kete tayosala akambo w’ɛlɔlɔ ndo tayɔngɛnangɛna nsala akambo akɔ.​—Osambu 100:2.

Yoho kina yakokaso mbokoya Mɔsɛ ele lo monga la ngandji ka ndjahombia otsha le anto akina. Etena katotɛ angɛnyi aso kana ewotɔ aso ekakatanu wele la wɔ, ngandji totshutshuyaka: 1) dia mbidja yimba yaso tshɛ lo kɛnɛ katotɛwɔ, 2) dia mbakimanyiya, kana ndjadja lo dihole diawɔ, ndo 3) mbaɛnya dia sho ndjakiyanyaka dikambo diawɔ.

L’ɛnyɛlɔ ka Mɔsɛ, sho kokaka nɔmba dikambo dia wakiso wa ngandji. Lo tena dimɔtshi, etena katotɛwɔ ekakatanu awɔ, sho kokaka monga la lonyangu, naka ndooko kakokaso nsala dia mbakimanyiya. Sho koka monga la lonyangu ndo mbatɛ tsho ɔnɛ: “Dui ɔtɔi diakokami nyosalɛ ele, nyodja lo dɔmbɛlɔ.” Tohɔ dia: “Ɔlɔmbɛɛlɔ wa l’etete wa nkanga losembwee, weekɔ la woolo w’efula.” (Jakɔba 5:16, Dyookanelo dy’Oyooyo) Alɔmbɛlɔ aso kokaka ntshutshuya Jehowa dia nde salɛ onto lodjishaso lo dɔmbɛlɔ dikambo diahandasangoyisha mbosalɛ. Laasɔ, dui dimɔtshi di’ɔlɔlɔ efula diakokaso salɛ wakiso wa ngandji ele nɔmba dikambo diawɔ. *

Shi wɛ ambɛna dia wɛ kokaka nkondja wetshelo efula oma l’ɛnyɛlɔ kaki Mɔsɛ? Kaanga mbakinde onto oko sho, nde akatotshikɛ ɛnyɛlɔ ka dimɛna efula lo kɛnɛ kendana la mbetawɔ, okitshakitsha ndo la ngandji. Naka sho ndjela ɛnyɛlɔ kande dimɛna, kete tayokondja wahɔ ndo tayokondjiyɛ anto akina wahɔ oma lɔkɔ.​—Rɔmɔ 15:4.