Me ren ewe Paipel, “lúkú” a weneiti eú lúkúlúk mi péchékkúl mi lóngólóng wóón pisekin ánnet mi núkúchar. Emén mi lúkú Kot, a lúkúlúk pwe Kot epwe apwénúetá an kewe pwon meinisin.

Meinisin ekkewe kefil Moses a féri lón manawan ra pwáraatá pwe a lúkú án Kot kewe pwon. (Keneses 22:15-18) A suuk ngeni an epwe eáni manaw mi kinamwe lón Isip, nge a likitaló, me “filätä an epwe eti nöün Kot kewe aramas le riaföü, lap seni an epwe pwapwaiti tipis lon ekis chök fansoun.” (Ipru 11:25) Itá Moses a chék féri ena kefil fán atapwal nge mwirin epwe niamam ren? Aapw, pún ewe Paipel a apasa pwe Moses “a chök likitü, pun usun chök nge a küna ewe Kot sisap tongeni küna.” (Ipru 11:27) Moses ese niamam ren ekkewe kefil a féri mi lóngólóng wóón an lúkú.

Moses a achocho le apéchékkúla án ekkewe ekkóch lúkú. Áwewe chék, ekieki pwóróusen chón Israel lupwen usun itá ra mwéchúló lefilen ewe Setipar me án Farao we mwichen soufiu. Ekkewe chón Israel ra kechiw me sié ngeni Moses me Jiowa fán watteen ar niwokkus pwe me rer repwele feiengaw. Met Moses epwe féri?

Eli Moses ese silei pwe Kot epwele áimufeseni ewe Setipar me suuki ewe alen ngaseló fán iten ekkewe chón Israel. Iwe nge, Moses a lúkú pwe Kot epwe féri och mettóch pwe epwe túmúnú Néún kewe aramas. A mochen pwe pwiin kewe chón Israel repwe pwal eáni ena esin lúkú mi péchékkúl. Iei met a mak: “Moses a üreni ekewe aramas, ‘Ousap niuokus, oupwe üpos o nengeni usun än ewe Samol mi Lapalap amanauakemi ikenai.’” (Ekistos 14:13) Iwe, Moses mi apéchékkúlaló ar lúkú? Ewer, pún iei met Paipel a apasa usun chón Israel meinisin, nge esap chék Moses. A erá: “Ren än ekewe chon Israel lükü, ra tolong o fetalela epek ewe Setipar usun chök ar fetal won fanü mi pwasapwas.” (Ipru 11:29) Án Moses lúkú a atoto feiéch ngeni pwisin i, me chókkewe mi mirititi lamoten án emén eáni lúkúlúk wóón Jiowa.

Sia tongeni áppirú Moses me féri ekkewe kefil mi pwáraatá pwe sia lúkú án Kot kewe pwon. Áwewe chék, Kot a pwonei pwe epwe awora osupwangach lón pekin aion ika sia akkomwa lón manawach ach fel ngeni. (Mateus 6:33) Pwúngún, eli a weires ngenikich ach sipwe ú ngeni ewe tongen pisek mi chéúfetál ikenái. Nge sipwe tongeni lúkúlúk pwe lupwen sia achocho le ámecheresaaló nónnómun manawach me affota mesach wóón ach fel ngeni Jiowa, i epwe awora meinisin minne sia osupwangan. A anúkúnúkúkich: “Ngang üsap fokun likituk, üsap pwal tümwününgau ngonuk.”​—Ipru 13:5.

Sia pwal achocho le álisi ekkewe ekkóch le apéchékkúlaló ar lúkú. Áwewe chék, sam me in mi mirit ra weweiti lamoten wiser ar repwe álisi néúr kewe le ámááraatá ar lúkú. Atun án ekkewe semirit ra mámmááritá, a lamot repwe silei pwe mi wor emén Kot me a fen awora ekkewe allúk usun minne mi pwúng me mwáál. Pwal och, a lamot repwe wesewesen lúkú pwe ach álleasochisi án Kot kewe allúk, ina ewe alen manaw mi éch seni meinisin. (Aisea 48:17, 18) Ekkewe sam me in ra ngeni néúr kewe eú liffang mi aúchea lupwen ra álisiir ar repwe lúkú pwe “mi wor Kot, nge epwe ngeni chokewe mi kütta i liwiniir.”​—Ipru 11:6.