Kiugo “wĩtĩkio” ta ũrĩa kĩhũthĩrĩtwo thĩinĩ wa Bibilia nĩ kuga mwĩhoko mũrũmu wĩhocetie harĩ ũira mũiganu. Mũndũ ũrĩ na wĩtĩkio harĩ Ngai ndakoragwo na nganja atĩ nĩ Akahingia ciĩranĩro Ciake ciothe.

Maũndũ marĩa Musa eekaga ũtũũro-inĩ wake wothe monanagia aarĩ na wĩtĩkio harĩ ciĩranĩro cia Ngai. (Kĩambĩrĩria 22:15-18) Aarĩ na mweke wa gũikara mũtũũrĩre wa mĩago thĩinĩ wa Misiri, ĩndĩ agĩtiganĩria mweke ũcio, “agĩthuura . . . kũnyariranĩrio na andũ a Ngai, gũkĩra gwĩkenia ihinda na mĩago ya wĩhia.” (Ahibirania 11:25) Hihi rĩu rĩarĩ itua rĩa kũhiũhũkĩra, rĩrĩa angĩacokire kwĩrira thutha-inĩ nĩ ũndũ warĩo? Aca, tondũ Bibilia yugaga atĩ Musa aathire na mbere ‘gũkirĩrĩria, ta moonanĩte na Ũrĩa ũtangĩoneka.’ (Ahibirania 11:27) Musa ndaigana kwĩrira nĩ ũndũ wa matua ma wĩtĩkio marĩa aatuire.

Musa nĩ aageragia gwĩkĩra wĩtĩkio wa andũ arĩa angĩ hinya. Kwa ngerekano ta wĩcirie ũrĩa kwahanĩkire rĩrĩa Aisiraeli meeciragia atĩ maarĩ handũ hairũ nĩ ũndũ wa gwĩkora gatagatĩ ga thigari cia Firauni na Iria Itune. Nĩ ũndũ wa kũhahũrũo nĩ gĩcanjama kĩrĩa meeciragia gĩkũmakora, Aisiraeli magĩkaĩra Jehova na Musa. Musa eekire atĩa?

No kũhoteke Musa ndaamenyaga atĩ Ngai aarĩ na mũbango wa gũthondeka njĩra Iria-inĩ Itune, nĩguo Aisiraeli mone gwa gwĩtharĩra. O na kũrĩ ũguo, Musa aarĩ na ũma atĩ no mũhaka Ngai angĩekire ũndũ nĩguo ahonokie andũ Ake. Musa eendaga Aisiraeli arĩa angĩ magĩe na wĩtĩkio o ta ũcio. Tũthomaga ũũ: “Musa akĩĩra andũ atĩrĩ, Menyai mwĩtigĩre, no rũgamai mwĩhandĩte o ro ũguo, muone ũrĩa Jehova ahonokanagia, na muone maũndũ marĩa egwĩka nĩ ũndũ wanyu ũmũthĩ.” (Thama 14:13) Hihi Musa nĩ aahotire gwĩkĩra wĩtĩkio wa Aisiraeli hinya? Hatirĩ nganja, tondũ Bibilia ĩkĩaria ũhoro wao othe yugaga ũũ: ‘Nĩ ũndũ wa gwĩtĩkia-rĩ, magĩtuĩkanĩria Iria rĩrĩa Itune ta arĩ thĩ nyũmũ maagereire.’ (Ahibirania 11:29) Wĩtĩkio wa Musa to we wiki wateithirie, ĩndĩ wateithirie arĩa othe meerutire kuumana naguo.

No twĩgerekanie na Musa ũtũũro-inĩ witũ na njĩra ya kuonania wĩtĩkio harĩ ciĩranĩro cia Ngai. Kwa ngerekano-rĩ, Ngai nĩ eranĩire atĩ nĩ arĩrũmbũyagia mabataro maitũ ma kĩĩmwĩrĩ angĩkorũo nĩ tũrĩigaga ũthathaiya wake mbere ũtũũro-inĩ witũ. (Mathayo 6:33) Twahota kuona ũrĩ ũndũ mũritũ kwaga gwĩkĩrĩra indo cia kĩĩmwĩrĩ, tondũ ũguo nĩguo andũ aingĩ mareka ũmũthĩ. Ĩndĩ no tũkorũo na ũma atĩ twerutanĩria biũ gũikara mũtũũrĩre mũhũthũ na twĩkĩrĩre mũno ũthathaiya witũ, Jehova nĩ arĩtũheaga mabataro maitũ mothe. Atĩtĩrithagia ũũ: “Ndirĩ hĩndĩ ngagũtigĩrĩra, kana ndigane nawe o na atĩa.”—Ahibirania 13:5.

Ningĩ nĩ twĩrutanagĩria gũteithia arĩa angĩ makũrie wĩtĩkio. Kwa ngerekano-rĩ, aciari marĩ na ũũgĩ nĩ mamenyaga atĩ marĩ na wĩra mũnene wa gũteithia ciana ciao ikũrie wĩtĩkio. O ũrĩa ciana irakũra, nĩ ibataraga gũteithio igĩe na ũmenyo wa bata wa atĩ nĩ kũrĩ Ngai na atĩ nĩ atũheete ithimi cia maũndũ marĩa magĩrĩire na marĩa matagĩrĩire. Ningĩ, nĩ ibataraga gũteithio itaũkĩrũo atĩ kũrũmĩrĩra ithimi ciake kũna nĩ kũrĩ ũguni ũtũũro-inĩ. (Isaia 48:17, 18) Aciari nĩ maheaga ciana ciao kĩheo kĩa goro mũno rĩrĩa maciteithia igĩe na wĩtĩkio “atĩ kwĩ Ngai, na Ngai ũcio nĩ aheaga andũ arĩa mamũcaragia iheeo.”—Ahibirania 11:6, The Holy Bible in Gĩkũyũ Language.