Biiblã wilgdame tɩ “tẽeb” yaa f sẽn tar kaset tɩ bũmb f sẽn pa ne sɩd beeme. Ned sã n tẽed Wẽnnaam, a kɩsa sɩd t’a na n pidsa a pʋlemsã fãa.

A Moiiz ra wilgda a vɩɩmã nens fãa pʋgẽ t’a tẽeda Wẽnnaam pʋlemsã. A ra paama weer n tõe n vɩɩmd naar pʋgẽ Ezipti, la a yãka yam n na n “lagem ne Wẽnnaam nebã n sak namsgo,” bala a ra kɩsa sɩd tɩ rẽ bark n “yɩɩd sũ-noog ning yel-wẽnã sẽn kõt wakat bilf pʋgẽ wã.” (Hebre dãmba 11:25) Rẽ yĩnga a yãka yam-kãngã n pa reng n tagse, n wa maand a bãngẽ bɩ? Ayo. Biiblã yeelame t’a Moiiz “talla tẽeb kãn-kãe wa a yãa nebã nin sẽn ka tõe n yã a soabã.” (Hebre dãmba 11:27) Rẽnd a pa tol n maan a bãngẽ ye.

A Moiiz ra wae n kengda a taabã tẽebo. Wala makre, tẽeg-y-yã a Faraõ sodaasã sẽn da wa n pʋgl Israyɛll nebã poor tɩ mog-miuugã be-b taoorã. Rabeem yõka nin-buiidã tɩ b yẽgem ne a Moiiz la a Zeova. A Moiiz manesem da na n yɩɩ wãna?

A Moiiz ra pa mi tɩ Wẽnnaam na n welga mog-miuugã n kõ Israyɛll nebã tɩ b pɩʋʋg n põs ye. La a ra kɩsa sɩd tɩ Wẽnnaam na n maana bũmb n kogl a nin-buiidã, n da rat tɩ b bas b yam ne rẽ. Kibarã yeta woto: “A Moiiz yeela nebã yaa: ‘Da zoe-y rabeem ye. Yaas-y n ges-y Zusoabã sẽn na n fãag yãmb dũndã.’” (Yikri 14:13) Rẽ yĩnga a Moiiz tõog n sõnga a taabã tɩ b kɩs sɩd tɩ Wẽnnaam bee ne-b bɩ? N-ye, bala, Biiblã goma a Moiiz ne nin-buiidã fãa yell n yeel tɩ ‘ne tẽebo, Israyɛll nebã pɩʋʋga Mog-Miuugã wa tẽng koɛɛnga.’ (Hebre dãmba 11:29) A Moiiz tẽebã naf-a lame, la nafd neb nins sẽn dɩkd yam a mak-sõngã pʋgẽ wã me.

D tõe n dɩka a Moiiz togs-n-taare, n kɩs sɩd tɩ Wẽnnaam na n pidsa a pʋlemsã. Makre, Wẽnnaam pʋlmame tɩ d sã n lʋɩɩs a raabã taoore, a na n gesame tɩ d paam bũmb nins sẽn yaa tɩlaeyã. (Matɩe 6:33) Yaa sɩd tɩ sẽn lebg laogã yell n pak neb wʋsgã, yɩl n tõog n da rɩk b naoor yaa toogo. La d tõe n kɩsa sɩd tɩ d sã n maand d sẽn tõe fãa n lʋɩɩsd a Zeova raabã taoore, a na n gesa d yelle. A pʋlm-d-la woto: “Mam kõn bas yãmb walla m mong yãmb abada ye.”—Hebre dãmba 13:5.

Sẽn paase, tõnd maoodame n dat n sõng d taabã tɩ b paam tẽeb sẽn tar pãnga. Makre, roagdbã miime tɩ b segd n sõnga b kambã tɩ b tall tẽebo. Roagdbã segd n sõnga b kambã hal b yãadmẽ tɩ b bãng tɩ Wẽnnaam sẽn kõ tõnd noyã yaa sẽn na yɩl tɩ d bãng sõma la wẽng n bake. Roagdbã segdame me n modg tɩ b kambã kɩs sɩd tɩ no-kãens tũub n nafd ned n yɩɩda. (Ezai 48:17, 18) Roagdbã sã n sõng b kambã tɩ b bas b yam tɩ Wẽnnaam “beeme” la t’a ‘ronda ned ning fãa sẽn baood-a,’ b kõt-b-la kũun sẽn tar yõod wʋsgo.—Hebre dãmba 11:6, Sebr Sõngo.