Na yâ ti Bible, “mabe” ayeke hingango biani na bê so ye so mo zo mo mä na bê na ni ayeke dä biani. Zo so amä na bê na Nzapa ahinga na bê ti lo kue so Nzapa ayeke sara ye alingbi na tënë ti yanga ti lo.

Aye so Moïse asara afa so lo mä na bê na azendo ti Nzapa (Genèse 22:15-18). Lo yeke lani na pasa ti duti nzoni na yâ ti mosoro ti Égypte, me lo ke ni, “lo soro ti tene a sara pasi na lo legeoko na azo ti Nzapa ahon ti tene lo wara ngia na yâ ti siokpari teti kete ngoi.” (aHébreu 11:25). Lo mû desizion ni gi tongaso ape nga lo regretté na pekoni ape. Bible atene so “lo ngbâ ti luti ngangu mo bâ mo tene lo yeke bâ Lo so lê abâ Lo pëpe.” (aHébreu 11:27). Lâ oko Moïse aregretté ape desizion so lo mû na lege ti mabe.

Moïse agi lani ti kpengba mabe ti amba ti lo. Na tapande, bâ ye so asi na azo ti Israël na ngoi so lani ala pensé atene ala tï na yâ ti gbara awe: aturugu ti Pharaon ayeke ga na peko ti ala, nga Kota Ngu-Bengba akanga lege na ala. Mbeto ahon ndo ti ala, na ala dekongo na Jéhovah nga na Moïse. Fade Moïse ayeke sara nyen?

Peut-être Moïse ahinga lani ape so Nzapa ayeke kangbi yâ ti Ngu-Bengba ni, si azo ti Israël alingbi ti hon na yâ ni. Me lo hinga so Nzapa ayeke sara mbeni ye ti bata na azo ti lo. Lo ye nga si amba ti lo aduti na oko mabe so. Bible atene: “Moïse atene na azo ni, Sara mbeto pëpe, i luti kpô ti bâ salut ti L’Éternel so fade Lo sara teti i laso.” (Exode 14:13). Atënë ti Moïse ni so akpengba mabe ti amba ti lo ni? En, teti so Bible atene na ndo ti Moïse nga na ndo ti azo ti Israël kue, a tene: “Na lege ti mabe, ala fâ kota Ngu-Bengba mo bâ mo tene ala tambela na ndo ti kuru sese.” (aHébreu 11:29). Mabe ti Moïse asara gi nzoni na lo oko ape, me nga na azo kue so amû tapande ni.

E lingbi ti sara ye tongana Moïse na lege so adesizion so e yeke mû afa so e mä na bê na azendo ti Nzapa. Na tapande, Nzapa atene so lo yeke mû na e aye so e bezoin ni tongana e zia vorongo lo na kozo ndo na yâ ti fini ti e (Matthieu 6:33). Tâ tënë, laso a yeke ngangu mingi ti ke ti zia aye ti mitele na kozo ndo, ndali ti so azo mingi ayeke bi tere ti ala kue ti gi gi aye ti mitele ni. Me zia e hinga so tongana e sara kue ti duti na gbâ ti aye ti mitele na yâ ti fini ti e ape na e zia li ti e gi na ndo ti vorongo Jéhovah, fade lo yeke mû na e aye kue so e yeke na bezoin ni. Lo wani lo tene: “Mbi yeke zia mo lâ oko pëpe nga mbi yeke girisa mo lâ oko pëpe.”​—aHébreu 13:5.

Zia e nga kue e gi ti kpengba mabe ti amba ti e. Na tapande, ababâ na amama so asara ye na ndara ahinga so alege mingi azi na ala ti mû maboko na amolenge ti ala ti mä na bê na Nzapa. Na ngoi so amolenge ni ayeke kono, a lingbi ala hinga so Nzapa ayeke dä biani na so lo fa na e ye so ayeke nzoni nga na ye so ayeke sioni. A lingbi nga ala hinga so andia ti lo ayeke tâ ndali ti nzoni ti ala (Ésaïe 48:17, 18). Tongana ababâ na amama amû maboko na amolenge ti ala ti hinga so Nzapa “ayeke dä na [so] lo ga zo ti futango azo so ayeke gi lo ngangu”, nzoni ye la ala yeke mû na amolenge ni so.​—aHébreu 11:6.