O le “faatuatua,” e aofia ai talitonuga moni e faavae aʻe i ni faamaoniga maumaututū. O sē e faatuatua i le Atua, e na te mautinoa e faataunuu e le Atua ana folafolaga uma.

Na taulaʻi atu le olaga o Mose i folafolaga a le Atua. (Kenese 22:15-18) Sa ia maua le avanoa e ola ai i se olaga tamaoaiga i Aikupito, ae na ia tuua lenā avanoa, ma “filifili foʻi e faileagaina faatasi ma tagata o le Atua, nai lo o le fiafia puupuu i tuʻinanauga o le agasala.” (Eperu 11:25) Pe na vavevave o ia i lana faaiʻuga ma salamō mulimuli ane ai? E leai, auā o loo taʻua i le Tusi Paia “sa tūmausalī pea [Mose] e pei ua ia iloa atu Lē e lē o vaaia.” (Eperu 11:27) E leʻi salamō Mose ona o lona faatuatua i folafolaga a le Atua.

Na faamalosia e Mose le faatuatua o isi. Mātau le mea na tupu ina ua foliga mai ua lē sao ese tagata Isaraelu mai le va o le ʻautau a Farao ma le Sami Ulaula. O le fefefe o tagata na alalaga atu ai iā Ieova ma Mose. O le ā le tali a Mose?

Atonu e leʻi iloa e Mose o le a vaeluaina e le Atua le Sami Ulaula ma faasao ai tagata Isaraelu. Peitaʻi, na ia mautinoa o le a gaoioi le Atua e puipuia Ona tagata, ma sa manaʻo foʻi ia iai i tagata Isaraelu lenā lava mautinoa. Ua faapea mai le Tusi Paia: “Ona faapea atu lea o Mose i le nuu: ʻAua tou te fefefe. Ia outou laulaututū ma vāai i le faaolataga mai iā Ieova, o le a faia e ia mo outou i le aso nei.’” (Esoto 14:13) Pe na faamalosia e Mose le faatuatua o tagata Isaraelu? Ioe, auā o loo taʻua i le Tusi Paia: “O le faatuatua na latou savavali atu ai i le Sami Ulaula e pei ona savavali i le laueleele mātūtū.” (Eperu 11:29) O le faatuatua o Mose na ia maua ai aogā, faapea ma isi na faatuatua iā Ieova.

E mafai ona faaaʻoaʻo iā Mose e ala i le taulaʻi o o tatou olaga i folafolaga a le Atua. O se faaaʻoaʻoga, ua folafola mai e le Atua o le a ia tausia o tatou manaʻoga faaletino pe a tatou faamuamua le tapuaʻiga iā te ia. (Mataio 6:33) E moni e faigatā le lē faamuamua o ʻoa faaletino ona o le mea lenā o loo faia e le toʻatele. Peitaʻi, pe a taumafai malosi e faafaigofie o tatou olaga ma taulaʻi i le tapuaʻiga, e mautinoa o le a saunia e Ieova mea e tatou te manaʻomia. Ua ia faamautinoa mai: “Ou te lē tuua lava oe, ma ou te lē tuulafoaʻia lava oe.”​—Eperu 13:5.

E tatou te taumafai malosi foʻi e faamalosia le faatuatua o isi. O se faataʻitaʻiga, e iloa e mātua atamamai le tāua o le aʻoaʻo o fanau ina ia faatuatua i le Atua. A o latou tuputupu aʻe, e manaʻomia ona latou iloa o loo iai se Atua o loo aʻoaʻoina i tatou ina ia iloa le mea e saʻo ma le mea e sesē. E lē gata i lea, e tatau i mātua ona faamautinoa ua malamalama ma talitonu fanau, o le usitaʻia o taʻiala a le Atua o le auala sili lea mo le olaga. (Isaia 48:17, 18) O le meaalofa sili e avatu e mātua i fanau, o le fesoasoani lea iā i latou e faatuatua o loo “soifua [le Atua], ma e na te tauia ē e matuā saʻili iā te ia.”​—Eperu 11:6.