? Malinga ndi mo Bayibolo likambiya, “chivwanu” ching’anamuwa kuja ndi chigomezgu chakukho pa vinthu vo ve ndi ukaboni. Munthu yo we ndi chigomezgu wasimikiza kuti Chiuta wafiskengi malayizgu Ngaki ngosi.

Mosese wagomezganga ukongwa malayizgu ngaku Chiuta. (Chiyambo 22:15-18) Wenga ndi mwaŵi wakuja umoyu wamampha ukongwa ku Egipiti, kweni wanguleka mwaŵi wenuwu, ndipu “wangusankha kuchitikiya uheni pamoza ndi khamu laku Chiuta kwakuruska kuŵa kwanyengu ndi malikondwa nga uheni.” (Ŵahebere 11:25) Kumbi wanguŵanaŵana ŵaka mwakuthaŵiriya ndipu pavuli paki wadandawulanga ndi vo wangusankha? Awa, Bayibolo likamba kuti Mosese ‘wangukunthiyapu, nge kuti wangumuwona Yo ngwambula mawoneka.’ (Ŵahebere 11:27) Mosese wangudandawula cha ndi vo wangusankha chifukwa wagomezganga malayizgu ngaku Chiuta.

Mosese wakhumbisiskanga kuwovya anyaki kuti aje ndi chigomezgu chakukho. Mwakuyeruzgiyapu, ŵanaŵaniyani vo vinguchitika panyengu yo Ayisraele angumaliya zeru ŵati afika pa Nyanja Yiyera, po asilikali aku Farao aŵalondonga. Ŵati achita mantha ndi suzgu yo atingi akumanengi nayu, Ayisraele anguliriya Yehova kweniso Mosese. Kumbi Mosese watingi wachitengi wuli?

Mosese watenere kuti waziŵanga cha kuti Chiuta wapatuwengi Nyanja Yiyera, kuti wajuli nthowa yakuti Ayisraele athaŵiyemu. Kweni Mosese wenga ndi chigomezgu chakuti Chiuta watingi wachitengi chinthu chinyaki kuti wataski ŵanthu Ŵaki. Ndipuso Mosese wakhumbanga kuti Ayisraele anyaki nawu aje ndi chigomezgu nge chaki. Bayibolo likamba kuti: “Mosese wanguti ku ŵanthu, ‘Lekani kopa, mani gwa, ndipu muwonengi utaski wa Ambuya weniwo akamuchitiyaningi msanawale.’” (Chituwa 14:13) Kumbi Mosese wanguwovya nadi Ayisraele anyaki kuti aje ndi chigomezgu chakukho? Hinya, chifukwa Bayibolo likamba zaku Mosese ndipuso Ayisraele anyaki kuti: “Ndi chivwanu angwambuka Nyanja Yiyera yo nge mphayumu.” (Ŵahebere 11:29) Chivwanu chaku Mosese chinguwovya iyu pe cha kweniso anyaki wosi wo angwamba kugomezga Chiuta.

Tingayezga Mosese mwakugomezga ukongwa malayizgu ngaku Chiuta asani tisankha vinthu. Mwakuyeruzgiyapu, Chiuta watitilayizga kuti watiwovyengi ndi vinthu vakuliŵavu asani tiŵika panthazi kusopa paumoyu widu. (Mateyu 6:33) Mbuneneska kuti vingaja vakusuzga ukongwa kukana kuŵika vinthu vakuliŵavu panthazi chifukwa vakuwanda ukongwa mazuŵa nganu. Kweni tingaja akusimikiza kuti asani tiyesesa kuja umoyu wambula kukhumba vinandi ndipuso kuŵika kusopa panthazi, Yehova watipaskengi vosi vo tisoŵa. Iyu watitilayiza kuti: “Kuti ndamleka iwi cha, chingana nkhuti ndamsiya iwi cha kosikosi.”—Ŵahebere 13:5.

Tiyesesa kuwovya so anyaki kuti aje ndi chigomezgu chakukho. Mwakuyeruzgiyapu, apapi azeru aziŵa mwaŵi ukulu wo ŵenawu wakuwovya ŵana ŵawu kuti agomezgengi Chiuta. Kwambiya pa unamana, ŵana atenere kuziŵa kuti kwe Chiuta ndipuso kuti watipaska marangu kuti ngatiwovyengi kuziŵa chamampha ndi chiheni. Kweniso, apapi atenere kuwonesesa kuti ŵana ŵawu agomezga kuti kuvwiya marangu ngaku Chiuta ndiku kungatiwovya kuti tije ndi umoyu wamampha. (Yesaya 48:17, 18) Apapi apaska ŵana ŵawu chawanangwa cha mtengu wapatali asani atiŵawovya kuja ndi chigomezgu chakuti Chiuta “waliku nadi, ndipu wapereka mphotu kwaku ŵeniwo atimupenja ndi mtima wosi.”—Ŵahebere 11:6, Holy Bible—Easy-to-Read Version.