Geeshsha Maxaafay yootiyoogaadan, “ammanoy” naqaashay deˈiyoobaa mintti ammaniyoogaa giyoogaa. Xoossan ammaniya uri I gelido qaalaa ubbaa polanaagaa ammanettees.

Muusee Xoossay gelido qaalaa ammaniyoogaa bessiyaabaa oottiis. (Doomettaabaa 22:15-18) I Gibxxen ishalo deˈuwaa deˈana danddayees; shin hegaa aggidi nagaran “guutta wodiyaa ufaittanaagaappe, Xoossaa asaara waayettanaagaa dooriis.” (Ibraawe 11:25) Hegee, guyyeppe i zilˈˈettanaadan oottiya, dirbban kuuyido kuushshee? CHii gidenna; Muusee, “beettenna Xoossaa be7idabaadan, genccidi sinttau biis” yaagidi Geeshsha Maxaafay yootees. (Ibraawe 11:27) Muusee ammanuwan oottidoban mule zilˈˈettibeenna.

Muusee harati Xoossan minttidi ammananaadan maaddiis. Leemisuwau, Israaˈeelati Paaroona olanchatuppenne Zoˈo Abbaappe gidduwan piriyan gelidabadan qoppido wode hanidabaa qoppa. Israaˈeelati bantta bolli wolqqaama bashshay gakkana hanees gi yayyidi, Yihoowakkonne Muusekko waassidosona. He wode Muusee waatidee?

Xoossay Zoˈo Abbaa shaakkidi, Israaˈeelata hegaara pinttidi ashshanaagaa Muusee erennan aggana danddayees. Gidikkokka, Xoossay ba asaa ashshanau issibaa oottanaagaa Muusee ammanettiis. Muusee Israaˈeelatikka hegaadan ammanettanaadan koyiis. Geeshsha Maxaafay, “Muusee asaa, ‘Yayyoppite; minni eqqite; GODAI hachchi inttena ashshiyo ashettaa intte be7ana’” yaagidoogaa yootees. (Kessaabaa 14:13) Muusee Israaˈeelatussi mino ammanoy deˈanaadan maaddidee? Ee; Muuse xallaa gidennan, Israaˈeelata ubbaa xeelliyaagan Geeshsha Maxaafay, “[Eti] mela biittan hemettiyoogaadan, Zo7o Abbaa pinnidoogee ammanuwaana” yaagees. (Ibraawe 11:29) Muuse ammanoy a xallaa gidennan, Yihoowan ammanettiyoogee aadhida eratetta gidiyoogaa akeekida ubbaa maaddiis.

Xoossay gelido qaalan ammaniyoogaa bessiyaabaa oottiyoogan Muuse leemisuwaa kaallana danddayoos. Leemisuwau, nuuni Xoossaa goynuwaa kaseyiyaaba gidikko, i nuuyyo asatettan koshshiyaabaa kunttanau qaalaa geliis. (Maatiyoosa 6:33) Ha wodiyan daro asay aquwaabaa kaseyiyo gishshau, nuunikka aquwaabaa kaseyanau paacettana danddayoos. SHin, nuuni sima deˈuwaa deˈanaunne Xoossaa goynuwaa kaseyanau baaxetiyo wode, Yihooway nuuyyo koshshiya ubbabaa kunttanaagaa ammanettana danddayoos. I, “Taani nena mulekka yeggikke woikko aggikke” yaagidi qaalaa geliis.—Ibraawe 13:5.

Nuunikka harati Xoossan mintti ammananaadan maaddoos. Leemisuwau, erancha aawatinne aayeti bantta naatu ammanoy minnanaadan maaddiyo daro injjee deˈiyoogaa akeekoosona. Xoossay deˈiyoogaa, qassi suure woy bala gididabay aybakko i higgiyaa kessidoogaa, yelidaageeti bantta naata naatettaappe doommidi tamaarissana koshshees. Hegaa bollikka, Xoossaa higgiyaa naagiyoogee aybippenne aaruwan goˈˈiyaaba gidiyoogaa naati akeekanaadaaninne ammananaadan maaddana koshshees. (Isiyaasa 48:17, 18) Yelidaageeti bantta naati “Xoossai de7iyoogaanne bana koyiyaageetuyyo woituwaa immiyoogaa” ammananaadan maaddiyo wode, etayyo alˈˈo imotaa immoosona.—Ibraawe 11:6.