Yaḇeaḇen ro Santo Domingo, Republik Dominika, nggoḇe fyak ma aya iso ḇepur ya. Sinan ayesu suma snonggaku ḇena fawawi nabor suirya ma sumarisen insama nggokenem pyum syadi wer. Taun rifyak fyor yaḇeaḇen ḇaim, sinan ayesu susrow kuker misionaris Mormon. Sumanen kaku bar snonkbor ansya kukro sifrurpyum ma senapnap ḇa, inja sumarisen nggofanjur kuker Gereja Yesus Kristus ro Snonggaku Ḇesren ḇero Awar Papupes, ḇaido Gereja Mormon.

Rofyor yaba muryas, yamarisen yakso ro kegiatan sosial gereja ani sifrur ya ma yaḇesyowi kaku farkarkor Mormon ḇekofen kankenem ro kina ma kenem ḇepyum na nama roi ḇefandun kaku. Yamarisen kaku kukro yaksun ro Gereja Mormon ine ma yamarisen fa yakḇe misionaris.

Rofyor yaḇeumur 18, kina yesi nggora nggoḇarek ro Amerika Serikat insama yakfarkor ro universitas ḇepyum ya. Taun oser nande mura, imem ma mebin yedi surama sumamfar inggo ro Florida, suma Saksi Yahwe suiri. Suyor nggo ḇe munara kebaktian. Yamarisen kaku kukro yamam snonggaku ḇerama syakam sḇas Refo ya ma sfas mnuk na. Inja, yor bolpen ma kertas ramnai yakfas mnuk-mnuk na.

Munara ya raposa, Imem ma Mebin yesu suyoḇe snar yamarisen yakḇe misionaris, inja na sufnoḇek aya fa yafarkor Refo. Yamarisen kaku, kukro swaf anya yafawi syadi Kitab Mormon syadibur Refo ya.

Fafisu nggofarkor Refo roro telfon ya, Imem ma Mebin suwan ker aya fa yamam rosai yakyar na kuker roi Refo fyarkor na. Suyanun aya fa yamam kakaku ya ro manggundaya.

Farkarkor yasmai ro gereja Mormon na nabore, ḇape yafawi ḇa rosai Refo ikofen ḇekur roi anna. Mebin i fyarem ḇe aya syap ro Saksi-Saksi Yahwe, Sedarlah! 8 November 1995, ḇeser fawawi ḇeḇeso ḇekur roi Mormon sikyar ya. Yakandor kaku kukro farkarkor nabor ro Mormon naisya yafawi ḇaim na. Inja, yaḇas situs web ro Mormon fa yamam informasi bero syap Sedarlah! nkaku ke roḇa. Yakandor kaku kukro roi nakam nkaku rarirya. Ma yamam kaku roi anna nkaku rofyor yara ḇe museum-museum Mormon ḇero Utah.

Yakyar fyoro kwar, roi ḇero Kitab Mormon ma ro Refo ya dori namnisyae. Ḇape, fafisu yawasya mnis kaku Refo ya, insape yamam farkarkor Mormon iḇesebur Refo ya. Rupa ra, ro Yehezkiel 18:4, Refo doḇe jiwa ro snonggaku bisa imar. Imbape, ro Kitab Mormon ro Alma 42:9 ikofen, ”Jiwa ipok imar ḇa.”

Farkarkor ya naḇese monda ḇa, aya kako yamarisen ḇa faro farkarkor Mormon byuk na ḇekur nasionalistis. Imnis raris, snonggaku Mormon sikyar Yaf Eden isya ro Jackson County, Missouri, AS. Oso wer ido, manfarkin gereja sikofen, ”Karajan Allah nari ḇyepoik, ma barbar ro Amerika Serikat nari dek bo oso imnis i ḇa ro adir makakei ma hak asasi manusia.”

Yakmom rosai nari ḇekur sup ḇesena, ma kako sup marin yedi. Ro roḇ oso, snonkbor oso sfarkor i fa dakḇe misionaris Mormon ḇyetelfon aya, ma yawos roi ine kuker i. Yafuken i na imarisen myamunmun kuker min Mormon oso ke fyor er ḇyedi smamun kuker er sedi. Yakandor kaku fyor kyarem imbo! Yasewar fa yafawi kaku roi yakyar na ma yafuken faro manfarkin Gereja Mormon. Soḇe kankarem ḇyena nsamswene, ma fandun fa yawaf isof sananai ya isnai syadi wer.

Snar yafafko faro roi sikofen na, yakain yawasenkara roi ḇefnai kaku fa yamarisen yakḇe misionaris Mormon. Yafawi roi yamarisen kaku yaiso yafnoḇek snonggaku ḇesesya. Sesyowi nasan misionaris ine ma yamarisen kaku na. Ḇape, kaku ya yamamḇir pyum Allah ḇaim. Yawasya Refo ya ḇesya kwar raryano, yaḇesyowi kaku na ḇa. Yafawi mnis Allah marisen Ḇyena ḇa faro supswan ine ma snonggaku sya.

Farkarkor Refo kuker Saksi Yahwe nafrur fa yafawi Allah snonsnon Ḇyedi, moḇsa snonggaku ḇemar sya sḇerai, rariso Yesus na ifrur Allah marisen Ḇyena fa ndarirya, ma roi nabor wer. Kirine insape yafawi mnis syap ḇepyum kaku ine, ma yamarisen yafawar kakaku yasmai ine faro snonggaku ḇesesya. Fyor iwara, yafawi kwar Allah ima isya, ḇape kirine, bisa yaḇenadi imnis ra yawos ḇe bati yedi oso. Yaḇebaptis ḇe Saksi Yahwe ro tanggal 12 Juli 2004 ma paik riwonem mura yuffarmyan ro oras nakam.

Swaf taun ri rim ḇepur ine, yafararur ro kantor pusat Saksi-Saksi Yahwe ro Brooklyn, New York. Yamarisen kaku snar bisa yafnoḇek fa sifrur Refo ma syap ḇeknam ro Refo ḇeyun payamyum faro snonggaku riyuta. Kirine kako, yafnoḇek kaker snonggaku sya fa sakmamḇir Allah I.